شفوي صيدله المنصوره..هتعمل ايه؟؟

[Messi]

أغبى حركات ممكن تعملها فى امتحان الشفوي بتاعك

ايه هى اغبى حركات ممكن تعملها فى امتحان شفوى صيدله المنصوره ؟؟


اول ما تدخل و تقعد قدام الدكتور , حاول تبين انك مرعوب و خايف


لو دكتور اكسترنال و سألك سؤال غتت قول له الجزء ده ما اتشرحش

لو دكتور من الكلية قول له الجزء ده ما اتشرحش برضه او قول له اصلى ما فهمتش
حاجة من شرح الدكتور
(هنا الزيرو مضمون 100 %)


يا سلام لو تدخل للدكتور نايم او حاول تتاوب من وقت للتانى


لو الاجابة فيها اسامى ادوية او نباتات او حاجة مكلكعة باللاتينى او بالانجليزى حاول تهرب من الكلمة او انطقها و انت قافل بقك عشان الدكتور يعرف انك حمار انجليزى




لو مش عارف الاجابة اقعد فكر براحتك ربع ساعة و لو الدكتور استعجلك قول له : ثوانى


لو مش عارف الاجابة خالص : قوله معلش يا دكتور انا عارفها بس مش فاكر دلوقتى اصلى واقف من بدرى مستنى دورى و تعبت اوى و فيه ناس كتير دخلت قبلى بواسطة

:d:d:d

لو معاك حد تانى فى اللجنة و هو بيتسأل اعمل نفسك مش واخد بالك .. بص ع اللمبات .. بص فى الساعة و انفخ


لو زميلك مش عارف الاجابة و الدكتور قالك : ها جاوب انت
قول له بابتسامة سخيفة : معلش السؤال تانى اصلى كنت سرحان شوية


لو ما فهمتش السؤال اسأل الدكتور هو قصده ايه بالظبط و خليه يعيد السؤال كذا مرة و يفهمهولك و بعدين فكر شوية و قوله لا مش مذاكر الجزء ده


لو الدكتور قالك عايز تتسأل فى انهى جزء و اخترت و بعدين سألك قوله معلش طب ممكن الجزء التانى لو سمحت


لو الدكتور قدامه ازازة ميه قول له لو سمحت ممكن اشرب اصلى عطشان اوى و الدنيا حر بره


لو الدكتور قدامه شاى او غدا اقعد بص فيه




لو الدكتور اتأخر على اللجنة اول ما تدخل اعمل نفسك تعبان و قرفان و قوله يا دكتور ده احنا قاعدين بره من بدرى اوى




طبعا للسلامة العامة محدش يكتر من الحركات دى يعنى هى واحدة او اتنين بالكتير هيقوموا بالواجب و الدكتور هيعرف انك حمار و مش عارف المنهج بيتكلم عن ايه اصلا
و هيظبطك طبعا

مع تمنياتنا بالتوفيق للجميع

[S!lent Tear]

مع تمنياتنا بالتوفيق للجميع

هههههههههههههه
توفيق ايه بقه ده انا كده مطرود مطرود

[same7]

لا بجد
ليك مستقبل
انت فى اعدادى
وعندك افكار تحفه
اومال لما تبقى فى اولى ولا حاجه
هتعمل ايه




على فكره
انت مش محتاج قرصات
فى الحاجات دى
لان اظاهر عندك موهبه فظيعه
محدش يحسده يا جماعه

استمر يا مان



نسيت اقولك التوبيك جامد
بس فى افكار تانيه كتير
واكيد موهبتك هتوصلك ليها

[إيمان حمدي]

وهو كدا ان شاء الله هيتخرج من الكلية بعد اد ايه؟؟؟؟؟
ربنا معاك ويوفقك
( توبيك حلو على فكرة)

[اميرة الاحلام]

توبيك حلو اوى يا د.عليوة
بس حراااااااااااااااااااااااام
بجد
دى افكار تودى من رابعة لاعدادى تانى

[M.32L]

جميل التوبك يامحمد لا فعلاَ صحبى بجد

[طيور الجنه]

انا اللى صعبان عليا الدكتور

بس هو دة اللى ينفع اليومين دول بالذات
توبيك جااااااااااااااامد

[بسطامى]

إيه يادكتور؟
بتحرضنا على الفشل ولا ايه النظام؟
عامة دى نصايح من دهب وأكيد هنطبقها

[Hope1]

مانصحكيش..

[Messi]

اوعدكم بافكار جديده..........ولكن بعد الفاصل

شكرا للمرور