السلام عليكم ورحمة الله وبركاته
كل سنة وانتو طيبين يا دكاترة وكل سكشن مديسنال وانتو بسلامة وصحة وعافية
النهاردة كان اول سكشن مديسنال في سنة تالتة كان سكشن مرعب ومخيف مع ان الشغل كان بسيط وحلو
مع بداية السكـشن طبعا لاوم نسمع تكسير الانابيب والنسلر تيوبز اللي تفتت تفتتا النهاردة .. وطبعا لابسين النظارات وعاملين زي اللي رايحين نغطس
كله ماشي تمام والمعمل جديد وعسول والعدد كويس والحمد لله
وبعد ساعة تقريبا من بدأ المعمل او ساعة ونص دكتور مريم بدأت تعملنا dry egnition
وطبعا لا يخفى عن الجميع انه لما يكون المعيد بيعمل حاجة نروح نلزق في البنش ( زي ما يكون بيوزعوا لحمة ) والقصير زي حالتي مش شايف حاجة
المهم بدأنا نعمل ethyle borat test اللي اتشائمت منه ،، واحنا متجمعين كلنا كدا والدكتورة بدور على الكحول .. فجأة ببص ورايا لقيت الفليم اللي جنبي انا وصاحبتي بيسرب ،، بس بيسرب نــــار بعدنا عنه وبدأت النار تزيد شوية بشوية
جت أخت شجاعة حاولت تقفل المحبس مش راضي يتقفل خالص ،،، والكل بيصرخ يا أماني يا اماني تقريبا كان اسمها اماني ( دي العاملة)
اللطيف في الموضوع ان الدكتورة مريم خرجت وتقولنا اخرجوا يلا واحنا واقفين نتفرج بس من بعيد ،
يا جماعة اخرجوا وبردو واقفين نتفرج .. ( حب العلم بقة انتو عارفين بقينا في تالتة ومديسنال بقة وكدا ) واحنا واقفين بردو ،،
فـــجأة
لقينا نااااااااااااااااااااااااار كأن خرطوم نار شغال وصوته فظييييع ومنظره لا يوصف طالع من عند الفليم كله صرخ وطلعنا نجري زي المجانين اللي ماسك ماصة واللي ماسك تيست تيوب
كنت حاسة اني مش لاقية الباب واني مش هلحق اخرج ، والعمال مقابلينا عالسلم اجروووو اجرووو اخلو المبنى الانبوبة هتفرقع ، حالة من الرعب والذعر بصراحة عمري ما حسيتها قبل كدا سبحان الله في لحظة كدا كان المعمل هيولع والحمد لله محدش حصلة حاجة الحمد لله
طبعا طلع الحرس ود .محمد مصطفى والمعيدين والعمال ومعاهم وأناببب إطفاء حريق
الحمد لله الموقف اتعالج عشر دقايق ودخلنا تاني المعمل بعد ما كنا قلنا بقة خلاص هنروح ومفيش كويز واتقفلت الفليمات ومتنسوش علبة كبريت معاكو المرة الجاية عشان اللي عايز فليم يولعه وبعد كدا يطفيه
عايزين تعويض بقة على راي البنات بدل خضة وفي اول سكشن كمان عالاقل ناخد الدرجتين بتوع الكويز ده احنا خفنا بردو ومعرفناش نشتغل بعدها ولا حتى نعدي بس من قدام اي فليم العامل بيجربه
الظريف بقة ان الدكتور لما جه يعيد التيست بتاع ethyl borat كل واحد وقف في مكانه يبص من بعيد لبعيد وفي ناس راحت وقفت جنب الباب ونقوله خلاص يا دكتور شفنا كفااااية حرمناااااااااااااا بقة
وفي الاخر خدنا الكويز بردو ،، ربنا يطلعنا من الكلية على خير ويسترها معانا مش عارفة السكاشن السنة دي جميلة كدا ليه سكشن نطلع رجلينا متكسـرة والتاني حريقة ونار