صفحة 1 من 6 123 ... الأخيرةالأخيرة
النتائج 1 إلى 10 من 58

الموضوع: مع بعض نتعرف على سنه تالته

العرض المتطور

المشاركة السابقة المشاركة السابقة   المشاركة التالية المشاركة التالية
  1. #1
    Pb Elite
    تاريخ التسجيل
    Jul 2008
    الدولة
    in my wishes
    المشاركات
    1,840

    افتراضي مع بعض نتعرف على سنه تالته

    السلام عليكم ورحمه الله وبركاته

    ازيكم ياسنه تالته الجداد نورتوا القسم اللي كان بتاعنا لحد امبارح ويارب تبقى ايامكم فيه احلى من ايامنا

    طبعا الطالب بتاع صيدله دا مسكين ياعيني اول مايدخل الكليه يدخل على اعدادي يلاقي نفسه ضايع وحالته حالته ولاعارف يروح ولاييجي ويقول يارب بس انجح لو حتى بمقبول بس ما اشوفش المواد دي تاني وبعدين يطلع على اولى يحس بقى بالفرق وان الدنيا بقت بمبي شويه ويندمج مع الجو ويشتغل صيدلانيات ويحضر مركبات يحس انو بقى صيدلي خبير ويعمل تفاعلات في العضويه وتلاقي السعاده بتنط من عينيه وهو بيجري على المعيد وبيوريه الكريمسون ريد كولر اللي قتل نفسه لحد ماطلعه وتمضي الايام ويلاقي نفسه في سنه تانيه اللي هي شبه سنه اولى يعني المواد مش جديده عليه لكن طبعا الكونتنت اكبر بكتير والى حد ما اصعب شويه لكن برضه مقدور عليها وعدى الطالب الهمام وانتهى بيه المطاف الى انه دلوقتي في سنه تالته وقاعد يقرا الموضوع بتاعي دا وهو هيتشل خلاص لاني من اول الموضوع مقلتش حاجه عن سنه تالته

    طبعا عارفه ان كل واحد جاي في دماغه خلفيه اسطوريه سوداويه عن سنه تالته وانها اصعب سنه في الكليه والكلكعه والعقد والفيران والضفاديع والحاجات اليااااااااااي دي عارفه والله بس ياجماعه صدقوني الكلام دا مش سليم سنه تالته احلى سنه في الكليه كلها موادها حلوه وجميله ومرتبطه مع بعضها والاهم انها هتحسسك انك صيدلي بجد
    في سنه تالته عندنا 6 مواد اللي هما الفارما والمدسنال الفايتو (عقاقير الناس الكبار) والبيو المعايرات الحيويه اللي هي الاساي واخر حاجه الصيدلانيات

    لو خدناهم واحده واحده اولا الفارما دي اللي اسم كليتنا مشتق منها ماده جميله هتعرفك كل حاجه عن الدوا باستثناء الاستركشر بتاعه في الترم الاول هتتكلم عن autonomic nervous system هتدرسوا فيها السمباثاتك والباراسمباثاتك طبعا احنا عارفين ان الدوا علشان يعطي مفعوله لازم يربط مع المستقبلات receptors وساعتها ياما ان الدوا يربط مع المستقبل ويعطي تاثيره اما بتنشيط او تثبيط الوظيفه او انه يقفل المستقبل ويمنع ان اي حاجه تانيه تربط معاه وهو دا محور الدراسه هتاخد المستقبلات بانواعها الفا وبيتا (تخضع للسمباثاتك ) مسكارنك ونيكوتنك ( تخضع للبارا سمباثاتك ) وتعرف الادويه اللي بتمسك معها agonist والادويع اللي بتقفلها antagonist دي كمقدمه للفارما بعدها هتدرس حالات من GIT و RESPIRATORY SYSTEM وايه الادويه اللي بتعالجها يعني مثلا هتاخد الببتك السر الدياريا الفومتنج الكحه الازما بتاعه الربو وهكذا طبعا اسماء ادويه كتير جدا علشان كدا حاول قدر الامكان مذاكره اول باول كمان كان في جزء الكيموثيرابي ودا تقريبا مراجعه لما سبق دراسته في جزء الانتي بيوتك بتاع الميكرو مع بعض الاضافات الصغيره واخر جزء بقى جزء اسمه الAUTACOIDSالواد دي على راي دكتور حسن مواد بتفرز داخل جسم الانسان بالطلب كدا يعني مش في كل وقت هنلاقيها زي الهستامين والسيروتونين ماشي بكده نبقى غطينا جزء الفارما بالهنا والشفا
    الفارما دي طبعا هي الملكه لان منها هتتفرع ماده المعايرات الاحيائيه وماده الكيمياء الطبيه بالنسبه للطبيه هي تقريبا تكرار للفارما لكن الفرق ان هنا بقى بتبقى ملزم انك تعرف استركشر الدوا وتعرف الSAR بتاعه السار دي هي اختصار لكلمه STRUCTURE ACTIVITY RELATIONSHIP يعني مثلا الدوا دا بيشتغل على مستقبلات الالفا يبقى مثلا لازم الدوا دا يبقى فيه حلقه بنزين ماسك فيها 2 OH اورثو لبعض ويبقى فيه ترمنال نيتروجين وهكذا وكمان ازاي العب فيه علشان اتغلب على عيب فيه او اعلي الافينيتي بتاعته تجاه المستقبل ماشي كمان هتدروا مواضيع متفرقه زي مثلا مدرات البول وادويه لعلاج ضغط الدم المرتفع ولعلاج الHYPER LIPIDEMIA ودي الموضوعات اللي هترجع تاخدها تاني بالظبط في الترم التاني بس في كورس الفارما انتوا لسه شفتوا حاجه
    كده خلصنا على الطبيه
    اما بقى المعايرات فماهي الا دراسه لوسائل الحكم على الدوا يعني انت النهارده جالك واحد يقلك ان زجاجه الدوا دي فيها اي حاجه بتشتغل كبيتا ون اجونست مثلا يبقى انت هنا عليك حاجتين انك تعمل SCRENING للدوا بمعنى انك تشوف الفارماكولوجكال اكتيفيتي بتاع الدوا يعني معروف ان البيتا ون دي موجوده في القلب وبتعلي سرعه ضربات القلب وكمان قدره القلب على الانقباض يعني المفروض لما تحقن الدوا دا في حيوان التجارب تلاقي التاثير دا حصل لو محصلش يبقى الدوا دا بايظ ومينفعش
    تاني حاجه بقى بعد ماعرفنا ان فعلا الدوا دا بيشتغل على مستقبلات البيتا اننا نحدد بقى الجرعه الدوائيه والجرعه السامه من الدواء ودا مايعرف بعمليه ال BIOASSAY ماشي كدا نقول باي للاساي
    ندخل بقى على الفايتو الفايتو بتاعت سنه تالته هي عقاقير بالمقلوب يعني احنا دايما متعودين ناخد النبات ونشوف استخداماته اللي بتتحدد عن طريق الماده الفعاله اللي فيه هنا بقى لا احنا هندرس الماده الفعاله دي شخصيا يعني هناخد الالكالويدز طبعا اشهرهم على الاطلاق التروبين الكالويد الموجودين في عيله السولاناسي طيب مين الامثله عليهم الاتروبين والهيوسين والهيوسيامين هنعرف موجودين في نبات ايه بيلا دونا داتورا الاستركشر بتاعهم ايه ازاي نعملهم سيباريشن وبيوريفيكيشن واخيرا بنستخدمهم في ايه طبعا صعوبه الفايتو برضه هو في انك لازم تحفظ الاستركشرات برضه (هيا الاسركشرات دي اللي بتطلع روحنا في سنه تالته بس شويه بشويه ربنا هيسهل ودماغك هتتعود على حفظ المركبات يعني ان شاء الله هتوصل لمرحله انك تبص على المركب وفي فيمتو ثانيه صورته تتطبع في دماغك ).........بلاش احلام واصحوا معايا
    تاني جزء هو الزيوت الطياره ودا مقدمته لوحدها نص المنهج تقريبا يعني ازاي نفصل الزيوت دي من النبته والاجهزه اللي بنستخدمها في العمليه دي خواص الزيوت دي الفيزيائيه والكيميائيه وبعد كده بقى هتدرس امثله عليهم كل واحد بحضره ازاي وبجيبه منين شبيهه شويه بالعضويه تحسها في الاخر كلها خرايط هنبدي بالمركب دا نحط عليه H2SO4 يتكون انتر ميدييت اللي بعد كده يحصله ايزوميريزاشن علشان يعطينا دا .....اوكي وبرضه مش محتاجه اقول ان الكلام دا كله بالاستركشرات اخر جزء جزء مش عارفه ايه لازمته بصراحه بيتكلم عن الRESIN ,RESIN COMBINATION ,BITTER PRINCEPILS
    ربنا يعينكم بكده ندخل على اخر ماده مجهوله بالنسبه ليكم واللي هيا

    البيو الكيمياء الحيويه وفيها يتم التعرف على كل الحاجات اللي ربنا خلقها في كل فرع من فروعها الماده مقسمه لاربع فروع فرع كاربوهيدرات ودا يعتبر اسهلهم بحكم دراستنا السابقه جزء الفيتامينات والدهون الفيتامينات الذائبه في الدهون والذائبه في الماء والذائبه في ماء البحيره ههههه مش هيبقى نفسكم في حاجه الجزء التلات هو جزء البروتين والاحماض الامينيه برضه هتاخد العشرين حمض اميني باستركشارتهم وتتعرف على خصائصهم وتقسيماتهم اللي مبتخلصش وهكذا حاجات بسييييييييييطه واخر حاجه بقى جزء د/عبد الله الموافي دا كان فيه انزيمات بالاضافه الى الحاجات اللي بتشتغل ك ANTI OXIDANTS وكمان بقيه الفيتامين تقريبا شرحلنا الفيتامينات الذائبه في الدهون دا جزء حلو بجد بس لازمله حضور من غير حضور هتبقوا بتحفظوا بس من غير فهم
    نصيحه :ذاكروا كويس جدا في الترم الاولاني وحاولوا تجيبوا على قد ماتقدروا في الترم الاول في كل المواد بس البيو تحديدا لان الترم التاني بتاعها اصعب من الاول
    اخر حاجه بقى الصيدلانيات تعتبر اسهل مواد سنه تالته مقسمه الى جزئين جزء BIOAVALABILITY وفيها هتتعرفوا على العمليات اللي بتحصل للدوا من ساعه مايدخل الجسم هو جزء كله شبه بعضه هتقلب الورقه تحس انك بتقراها تاني ياسبحان الله هيبقى شعاركم فيهاال ABSORPTION ثم ABSORPTION ثم ABSORPTION اكتر كلمه هتشوفوها في حياتكم في الصيدلانيات وكمان بقى هتدرسوا الدستربيوشن والاليمينيشن بتاع الدوا برا الجسم
    تاني جزء هو جزء الSUPPOSITORY دا جزء سهل خالص شبه بتاع سنه اولى وكلامه شبه الصيدلانيات اللي احنا عارفينها يعني ماشي انا كده خلصت يارب اكون قدرت افيدكم واعطيكم فكره عن مواد سنه تالته ويارب تبقى سنه حلوه وسهله عليكم بالتوفيق

  2. #2
    Pharma Student
    تاريخ التسجيل
    Aug 2007
    المشاركات
    225

    افتراضي

    بجد معلومات قيمة جدا ومفيدة جدا

    تسلم يا دوك



  3. #3
    Pb Elite
    تاريخ التسجيل
    Jul 2007
    الدولة
    المنصورة
    المشاركات
    1,340

    افتراضي

    ربنا يخليكى لينا
    طريقتك جميله جدا.. وانا عن نفسى متفائله بتالته ومش خايفه منها خلاص لانى حبتها وحاسه انها هتبقى ممتعه حتى لو تقيله شويه..

  4. #4
    Co-Admin
    تاريخ التسجيل
    Aug 2007
    الدولة
    Away from the Away
    المشاركات
    5,843

    افتراضي

    موضوع فوق الممتاز

    جزاكِ الله خيراً ؛

    تم التثبيت

  5. #5
    Pharma Student
    تاريخ التسجيل
    Jan 2009
    الدولة
    دمياط
    المشاركات
    38

    افتراضي

    موضوع فوق الرائع جزاك الله كل خير احنا فعلا حاسين ان احنا داخلين مجزرة مش سنة جديدة

  6. #6
    Pharma Student
    تاريخ التسجيل
    Mar 2008
    المشاركات
    1,002

    افتراضي

    اقتباس المشاركة الأصلية كتبت بواسطة dr/mero مشاهدة المشاركة
    موضوع فوق الرائع جزاك الله كل خير احنا فعلا حاسين ان احنا داخلين مجزرة مش سنة جديدة
    ولا مجزرة ولا حاجة كله هيعدي ان شاء الله كلنا كنا كدة زيكوا في يوم من الايام بس الايام جريت بسرعه وادينا الحمد لله في بكالوريوس عقبالكوا ان شاء الله
    تالته مش صعبه بس تقيله عن تانيه بمراحل بس صدقوني ممتعه والله وبالذات الفارما ان شاء الله هتحبوها
    الميديسنال قريبه من الفارما بس عندكوا استركشرات
    البيو لذيذة التيرم الاول عن التاني
    الاساي بقي هتجننكوا شوية رغم انها صغيرة بس زي الفل ههه
    صيدلانيات اسهل مادة ان شاء الله
    فيتو جميله
    متخافوش سنة وهتعدي ان شاء الله

  7. #7
    Pharma Student
    تاريخ التسجيل
    Jul 2008
    الدولة
    جمهورية مصرالعربية
    المشاركات
    3,069

    افتراضي


    بجد اكتر حاجة عجبتنى فى الموضوع ده

    مش المعلومات لانى سمعتها قبل كده من ناس اكبر منى

    بس بجد اسلوب الكتابة الشيق

    اللى بيخلى الواحد مستمتع بقرأة معلومات مش بيحب يقرأ عنها اساسا

    الف شكر ليكى يادكتورة وعقبال التخرج بأذن الله


  8. #8
    Pharma Student
    تاريخ التسجيل
    Nov 2008
    الدولة
    في بيتنا
    المشاركات
    91

    افتراضي

    اقتباس المشاركة الأصلية كتبت بواسطة Dr/HULK مشاهدة المشاركة
    بجد اكتر حاجة عجبتنى فى الموضوع ده

    مش المعلومات لانى سمعتها قبل كده من ناس اكبر منى

    بس بجد اسلوب الكتابة الشيق

    اللى بيخلى الواحد مستمتع بقرأة معلومات مش بيحب يقرأ عنها اساسا

    الف شكر ليكى يادكتورة وعقبال التخرج بأذن الله


    فعلا والله ماشاء الله بنا يجزيك عنا خير يا دكتوره اسلوب رائع وشيق جدا انا فعلا قبل مافتح التوبيك قل لسه بدري علي الموضوع ده بس اسلوبك فعلا شدني ربنا يكرمك بالامتياز في البكالريوس

  9. #9
    Pharma Student
    تاريخ التسجيل
    Sep 2007
    المشاركات
    89

    افتراضي

    شكرا جدا يا دكتورة على المعلومات القيمة اللى هتحببنا فى سنة ثالثة دى وربنا يوفقك ويوفقنا

  10. #10
    Pb Elite
    تاريخ التسجيل
    Jul 2008
    الدولة
    Where The Heart Is
    المشاركات
    1,948

    افتراضي

    ميرسى يا سموره ربنا يخليكى لينا ...
    ان شاء الله تبقى سنه جميله علينا كلنا ..


صفحة 1 من 6 123 ... الأخيرةالأخيرة

المواضيع المتشابهه

  1. مع بعض نتعرف على سنه تالته
    بواسطة summer breeze في المنتدى الفرقة الثالثة 2011
    مشاركات: 32
    آخر مشاركة: 18-09-2010, 09:53 PM
  2. اضغط على النبات وتعرف على فوائده
    بواسطة أمــ هـنـد ــة الله في المنتدى منتدى الصحه
    مشاركات: 10
    آخر مشاركة: 01-05-2009, 04:32 PM
  3. عيش معانا ثالثه
    بواسطة :|©؛°¨¨°؛©الصيدلى الذهبى© في المنتدى الفرقة الثالثة 2009
    مشاركات: 50
    آخر مشاركة: 16-10-2008, 06:26 PM
  4. يلا بنا نتعرف على بعض
    بواسطة zidane555 في المنتدى الفرقة الاعدادية 2008
    مشاركات: 1
    آخر مشاركة: 26-10-2007, 12:59 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •