التدريب فى الصيدليات

[BoNbOoNa]

انتا عايز تكتسب خبرة فى المجال بتاعاك
وبعدين لازم تبتدى من الاول كدة علشان تبقى خبير فى مجالك

وبأزن الله انا هجرب من السنة دى ومتاكد أنها هتفرق معايا

تمام اوي . . اكتر رد عجبني في الموضوع
استمر علي نفس التفكير و ربنا يوفقك ان شاء الله

في حاجات كتيـر جدا ممكن تتعلموها في الصيدلية بغض النظر عن الدراسة
زي نظام الادارة في الصيدلية و المخزن ... يعني ايه طلبية و يعني ايه مرتجعات ..
التعامل مع الناس سواء مرضي - مندوبين - زمايلك في الصيدلية
تتعودوا علي خط الدكاترة الرائع و تبدأ تفك الخط و تصرف روشتات
تاخدوا فكرة عن قياس الضغط و السكر
تعرفوا أماكن الأدوية في الصيدلية لأن كل صيدلية ليها استراتيجية خاصة في ترتيب الأدوية
النقطة الأخيرة دي مهمة ،
لو هتنزلوا في نفس الصيدلية اللي هتتدربوا فيها كمان سنتين ان شاء الله ركزوا علي اماكن الدواء عشان لما يبدأ التدريب في تانية و تالتة ان شاء الله تكونوا ملمين بأغلب اماكن الأدوية و بكده تكونوا قطعتوا شوط كبير و تدخلوا علي الجد علي طول .. مش لسه هتدوروا المضاد الحيوي فين و الأقراص فين طب و حقن التلاجة فين ... الخ
و علي فكرة التدريب بيسهل الدراسة شوية بعد كده لأن اسامي ادوية كتير بتبقي already مرت عليك قبل كده في الصيدلية فسهل تعرفها
كنت بفرح أوي لما دكتور يقول اسم دواء في المحاضرة و انا افتكر اسمه و افتكر لون العلبة و ممكن كمان افتكر موقف مضحك حصل مع الدواء ده

بجد هتفرق معاكم كتير ، و ده عن تجربة
ممكن تقرأوا ملخصها من هنا : http://www.pharma-board.com/board/showthread.php?t=10631

و في الموضوع ده حلو أوي ، ممكن تاخدوا منه فكرة عن قراءة الروشتات : http://www.pharma-board.com/board/showthread.php?t=10197
معرفتش اشارك فيه الا بعد ما وقفت فترة في الصيدلية

و علي فكرة انا اللي بيقف معايا في الصيدلية 3 بنات .. محدش فيهم من صيدلة
مستخفوش بدبلوم الصنايع بالذات لو عنده خبرة ... هتلاقوهم اساتذة ما شاء الله بالذات في قراءة الروشتات ..
استفيدوا من أي حد حتي العامل اللي بينضف و حاولوا تجمعوا خبرة علي أد ما تقدروا

ربنا يوفقكم ان شاء الله يا اعدادي سابقا - أولي حاليا

[Messi]

احنا مش ممكن ننسي كل الكلام ده بعد ما نتخرج؟؟؟؟؟

اصل لسه بدري قوي.......ده لسه 4 سنين

لوعشنا وكان لينا عمر بامر الله ..
-----

http://www.pharma-board.com/board/showthread.php?t=10631

موضوع رائع بصراحه...
وممكن يشجعنا اننا ننزل نتدرب في صيدله ..

[Anas]

نصيحة يا اعدادي ... انزلو التدريب من النهاردة لو تعرفو

شوف اي صيدلية قريبة من البيت او معرفة والدك او حد من قرايبك

و مش لازم تروح كل يوم عشان مش تزهق ... روح يوم و يوم

متزودش عن 4 ساعات بالكتير ... يعني من 6 كده لحد صلاة العشا و تروح

تاخد على الجو عامل ازاي و تعرف اشكال الأدوية " الانواع يعني ... كبسول قرص حقن "

هتفرق معاك جامد جدا ... انا حتى الآن بندم اني مش نزلت بعد اعدادي و ضيعت الاجازة

[harypotter]

على العموم كل دى وجهات نظر وأنا مقتنع بوجهة نظرى الصراحة وباذن الله متأكد أنها مفيدة لية (وبعدين دى أكتر حاجة مفيدة فى الأجازة)
وبعدين الى فى دبلوم أى حاجة وواقف فى الصيدلية من زمان دا شخص عندة خبرة كبيرة أوى كمان متستقلوش بية كدة

[m_pharmacist89]

ياجماعة اعدادى التدريب من البداية مفيد جدا

ومش شرط انك تعرف كل حاجة فى البداية

انت ممكن تبدأ ازاى؟

انك تشترى ماستر للادوية او اندكس زى ما تحب والفرق ان الماستر بيكون فيه الادوية وعليه اشكال العلب وصورها وبيديك فكرة عن اسعار الادوية واستخداماتها والبدائل التجارية المتاحة

اشترى الماستر وابدا مع مجموعات الادوية البسيطة زى المسكنات مثلا وحاول تشوف الاشكال المختلفة للدواء الواحد

يعنى مثلا الباراسيتامول ده مسكن وخافض للحرارة فى منه اقراص ولبوس
وتعرف طبعا الاسماء التجارية المتوفرة على قد ما تقدر

ومش شرط تعرف ازاى الدوا ده بيشتغل والاعراض الجانبية

مع ان المفروض ان طالب الصيدلة لا يعتمد على العلوم اللى بيدرسها فى الكلية لان العلوم الطبية اللى بندرسها مستواها ضعيف ولا تؤهل للوقوف فى الصيدلية فلازم تقرأ باستمرار عن كل جديد

ولكن واحدة واحدة انت دلوقتى مطلوب منك تعرف مجموعات الادوية البسيطة ده مسكن ولا مضاد للحموضه حاجة مضادة للقئ وهكذا
تعرف الاسماء التجارية الاشكال الدوائية المختلفة للدواء الواحد وتعرف الاستخدام العام للدواء يعنى مثلا الاسبرين تعرف انه مسكن وخافض للحرارة (مع ان له استخدامات كتير جدا وبتتوقف على الجرعة ومقدار التركيز )

ومع الوقت خبرتك هتزيد من ناحية الاسماء التجارية ولما هتتدرج فى الدراسة هتبدأ تعرف اكتر عن الادوية والاعراض الجانبية وهكذا

[eneen]

صح فعلا يا جماعة انا متفق معاكم جدا مش لازم كل حاجة مرة واحدة احنا لورحنا يوم كدة وعرفنا دواء معين واحد بس وكل حاجة عنه طول اليوم يبقى كويس جدا
-----
وبعدين زي ما قال الدكتور انس لازم نقرا ع طول كل جديد في عالم الدواء وممكن نجيب كتاب اطلس نشوف فيه شكل الدواء بعد ما ننزل الصيدليات ان شاء الله

[مهداه]

ازيكوااا
شوفوا بقى حكايه التدريب دى
هى شغلك
عاوز تبتديه من دلوقتى يبقى هتكسب خبره كبيرا جدا على لما تتخرج
وبغض النظر عن توافق التدريب مع الدراسه
اللى اعتقد ان مفيش صله بينهم خالص
حتى الان
المهم انت دلوقتى بينادولك يا دكتور
حاول تكون ادها بجد
اتعلم من دلوقتى
لان معظم الناس هتقع ف مواقف بايخه اوى
وهتلاقى حد من اهلك او جيرانك يسالك على دوا معين او انك تعطيه حقنه او ما شابه ذلك
فلو قدرت تفيدهم هتحس بجد انك تستحق لقب دكتور
اما لو قلت بعدين _ ودا حقك طبعا_
ويجى حد يسالك ويقولك يا دكتور كذا
هتقوله مش عارف
هتبقى وحشه اوى وهتحس انك بجد متستحقش كلمه دكتور دى
ربنا ما يعرضكوا لموقف ذى ده ابدا
.......................................

[NeScaFE]

ايون ياريت تنزلو التدريب السنة دى والله هتفيدكم جامد .

انا بندم انى منزلتش من اعدادى ..انا لة مش بعرف ادى حقن ودى فى حقى شكلها وحش اوى

لان فى ناس كتير بتيجى عندنا والله عاوزنى اديلهم حقنة نقول لسة متدربتش

اكيد هما فى سرهم بيقولو دكتورة ايه بقى ؟؟

مش بس الحقن اللى هتتعلموها انتو على اما تخلصوا كده

ان شاءالله ومعاكم خبرة تدريب 5 سنين ده غير الشغل اللى بعد كده

ده هياهلك انك تشتغل فى حتة وانت حاطط رجل ع رجل .

وان شاءالله انا لازم هنزل السنة دى ..

[الفراشة الرقيقة]

طيب يا دكاترة إحنا المفروض لازم نخلص Icdl بس أنا فى نفس الوقت عايزة أتدرب فى صيدلية فى الأجازة ,يا ترى إزاى أعمل الحاجتين دول فى الأجازة ؟؟

[مهداه]

طيب يا دكاترة إحنا المفروض لازم نخلص Icdl بس أنا فى نفس الوقت عايزة أتدرب فى صيدلية فى الأجازة ,يا ترى إزاى أعمل الحاجتين دول فى الأجازة ؟؟

لا يا جميل
ابدئى الاول بالاهم
التدريب قدامه بالنسبه ليكى كتير
لكن الدوره المفروض تخلصى منها الاول
بالنجاح ان شاء الله