بسم الله الرحمن الرحيم
احب اهنيكم علي فكره الشات الجميله دي واللي ان شاء الله تفيدكم واتمني ان زمايلنا في الفرقه التالته اللي ان شاء الله هيبقوا في رابعه السنه دي يعملوها واهو نستفيد كلنا من خبره بعض باذن الله
انا اسمي سامح في سنه تالته ان شاء الله
بالنسبه لمواد تالته اللي هتقابلكم السنه اللي جايه فاحب اقولكم ان تالته مش هتبقي صعبه علي قد ما هتبقي مناهجها طويله
يعني باختصار هيا محتاجه نفس طويل ومتابعه من البدايه ان شاء الله
المشكله مش هتبقي في طول المناهج وبس المشكله في تالته هي بعض الدكاتره ومش كلهم لا بعضهم
الموضوع فعلا هيطول لان الموضوع محتاج اننا نمسكها ماده ماده لكن انا هحاول اختصر
1)لازم غصب عننا نهتم بالعملي شويه علشان هو اللي بيخلي الواحد يضمن النجاح
2)بالنسبه للفيتو جزء الدكتور جلال معتوق في التيرم الاول وجزء الدكتور فريد بدريه في التيرم التاني هيبقوا صعب جدا في الامتحان لانهم غالبا بيجو من بره المنهج من ابحاث وكلام كده غريب فلازم يبقي في متابعه في المحاضرات بتاعتهم وفي نفس الوقت متابعه ورق الدروس اللي مبينزلش الا في اخر يوم قبل الامتحان
3)بالنسبه للكيميا الحيويه والطبيه فهما ان شاء الله اسهل حاجه هتقابلكم لكن المنهج طويل بس
4)المعايرات ان شاء الله مفيش فيها مشكله هي منهجها دايما صغير بس هي ماده جديده قوي علشان كده هتحتاج شويه مجهود لكن هي ماده صغيره جدا وامتحاناتها سهله جدا فيما عدا امتحانات العملي بتاعتها في التيرمين بيبقوا صعب شويه لكن الورقه والشفوي ان شاء الله مفيش فيهم مشكله
5)الفارما بقي الذ ماده ان شاء الله واسهلهم كمان لكن اطولهم بس ان شاء الله مش هتلاقوا مشكله في مذاكرتها لانها ماده لذيذه قوي والتيرم التاني فيها اجمل
باختصار تالته محتاجه ان الواحد بس يركز ويعتبر نفسه صيدلي بجد ويهتم بعقله شويه وينسي بقي العضويه والتحليليه اللي كانوا بيخلوا الواحد يلغي عقله ويستعمل اليه الحفظ
خلوا بالكم انشاء الله هتقابلوا دكتور نادر اللي بيدي معظم دروس تالته واعتقد انه سبب كبير ان لم يكن وحيد في الدرجات اللي بتضيع من الواحد فياريت اللي مش بياخد دروس انه يتابع معاه من الكتاب اول باول او من محاضرات لانه بيعمل حركات خبيثه قوي وبيشيل كلام مهم من الورق ومش بينزله الا ايام الامتحانات بس
ربنا يوفقنا جميعا ان شاء الله
اه نسيت اهم حاجه علي قد ما الواحد بيكتب في الورقه علي قد ما بياخد درجات وعلي فكره تالته اكتر سنه فيها تقديرات عاليه في الكليه