السلام عليكم ورحمة الله و بركاته
بعد التحية للاخوة و الأخوات الزملاء و الزميلات .. و بدون مقدمات أنا طالبة في الفرقة الثانية بدأت تدريبي الصيفي في احدى الصيدليات .. و بتمنى ربنا يساعدني و أحقق نتائج كويسة من التدريب ..
واجهتني مشكلة بتشغلني حاليا .. حبيت أناقشها و نفكر كلنا كصيادلة المستقبل تفكير عادل و صادق بعيد عن التحيز لينا لأننا صيادلة ..
من أكتر من أسبوعين جت في الصيدلية اللي أنا بتدرب فيها ست عشان تاخد أدوية لبنتها ( بعد كشف من الطبيب ) و سألتني و قالتلي انها قلقانة و قالت نصا ( بنتي طلعتلها غدد في الفخد , ممكن يا دكتورة تكون حاجة وحشة ) ... فهمت من الكلام ان الأم خايفة من وجود ورم سرطاني .. سألتها هل البنت اتجرحت قريبا جرح كبير أو شيء باعتبار ان احتمال الشيء الصلب اللي أنا حسيته في الفخذ تحت ايدي يكون Lymph node قالت لأ ...
المهم قلتلها ان شاء الله خير , خلي بنتك تنتظم على الدواء اللي الدكتور قالها عليه و ان شاء الله ( الكلكيعة أو الغدد ) على حد تعبير الست هتروح .. مع العلم ان الدكتور كان كاتب مسكنات و مضاد حيوي ..
امبارح الست جت تاني تتابع عند نفس الدكتور و أمر بتكرار نفس العلاج .. و لما جت تاخد العلاج من الصيدلية سألتني تاني ( و الله هي اللي سألت ) و قالت ان الغدد حجمها قل شوية مع الدوا و بعدين بيزيد و بتألم البنت رغم العلاج .. قالت و هي مبدية قلق أكتر من المرة الأولانية و دة طبيعي .. أم خايفة على بنتها ..
مع العلم ان الدكتور قال ان مفيش حاجة ( علما بأن الدكتور مش متخصص في الأورام ) ..
قلتلها يا حاجة أنا هجيبلك اسم معمل ( أحد معامل الباثولوجي ) تروحي عندهم البنت تحلل و ساعتها تتأكدي و تتطمني على بنتك ..
بمجرد ما الست خرجت .. في بنت ( دبلوم ) كانت حاضرة الكلام قالت لي ( كدة غلط يا دكتورة , احنا نصرف العلاج و بس و ما نتدخلش في شغل الدكتور ولا نتكلم في حاجة لأن دة مش شغلنا ( خدوا بالكم من نون الجماعة ) , لأنه كدة ممكن يقول للدكتور فلان ( صاحب الصيدلية ) قلت في بالي دة انتي اللي تصرفي علاج بس ..
, و أبدت ليا خوفها ان الطبيب دة معظم روشتات الصيدلية من عنده و انه قريب الدكتور و يمكن الموضوع دة يخلي غضبه يحل علينا و يمنع عننا خير روشتاته بطريقة أو بأخرى و ساعتها صاحب الصيدلية هيلومني أنا .
مع العلم ان موقفي كان من باب الاخلاص ي اعطاء النصيحة للمريض لأن صحة المريض و شفاءه أهم من أي اعتبارات فارغة .. و من باب الأخوة في الدين و الاحساس بالناس لأني تخيلت لو كان دة ورم سرطاني و انسكت عليه ممكن البنت دي حياتها تضيع و الموضوع يوصل لبتر ,, و ساعتها أنا عمري ما أسامح نفسي لأني كتمت نصيحة .. و لأن حياة انسان أهم من تجارة الأدوية وربحها .. بدون قصد لاني أخلي الست تشك أكتر ما هي شااااااكة في تشخيص الطبيب المعالج , و بدون قصد اني أعمل نفسي شاطرة أوي .. وربنا يعلم
لو كنت/ ي مكاني يكون ايه موقفك ؟؟
ايه هي حدود شغل الصيدلي ؟؟ النصح للمريض مش من تخصصنا ؟؟
ايه الحل مع دكتور انت متأكد ان روشتته ما هي الا كلام فارغ و مسكنات ؟؟ مع العلم انك لو كلمت الطبيب ممكن تسمع كلام مش كويس .. هل مهنتي هي اني أعرف مكان الدواء و سعره علشان نبيع ؟؟؟!!!!!!!!!!!
أرجو من الجميع المشاركة لأن الموضوع مهم لينا كطلبة لسة بنأسس روح المهنة ..