السـلام عليـكم ورحمـة الله وبـركاتـه
يا رب يكون فيه حد بيتخطى صفعات التشاؤم وركلات الفوضوية اللي احنا عايشين فيها ويفكر في قدام
دلوقتي كليتنا حالها لا يسر عدو ولا صديق .. أو للصدق يعني لو عدو شاف اللي احنا فيه دا هيفرح جدااااا.
تجربة واقعية لجامعة هي الأفضل عالميًا .. صحيح جامعة خاصة وصحيح مصاريف الطلبة كبيرة لكن تجربة مثالية وكتير من أستاذتها حاصلين على جايزة نوبل، وفيه حاجات كتير شفتها غير مكلفة بالمرة في طريقة التدريس.
معهد MIT مصنف على أنه أفضل أول جامعة بين أعلى مائتي جامعة في العالم وعلى أنه أيضًا الأول بالنسبة كجامعة تكنولوجية، أما على مستوى الولايات المتحدة الأمريكية فقد صنفه مجلس البحث القومي في 1995م على أنه الأول من ناحية السمعة وعلى أنه الرابع بالنسبة لكثافة الجوائز الممنوحة إليه.
مدرسة سلون للإدارة (التابعة للمعهد) صنفت على أنها الرابعة على مستوى الولايات المتحدة الأمريكية على حسب تصنيف US News في عام 2006م ؛ برامج الخريجين التي يقدمها المعهد في الكيمياء وعلوم الحاسبات والاقتصاد والهندسة والرياضيات والفيزياء احتلت المرتبة الأولى من قبل US News. وطبقًا لل US News والتقرير العالمي حول “أفضل الجامعات” فإن ال MIT يعتبر من أفضل عشر جامعات في العالم. لا يمنح المعهد أي درجات فخرية إلا في مناسبات نادرة، مثلما حينما منح وينستون تشرشل في عام 1949م
أنا عرفت المعهد دا عن طريق
MIT OpenCourseWare ودا موقع بيعرض محاضرات الجامعة في كل الأقسام -طبعًا المحاضرة بتكون بالانجليزي والأجمل ان الكلام اللي بيتقال بيكون مكتوب تحت ودا بيسهل جدا الفهم وفيه تمارين وشوية ملحقات كدا-.
اللي لاحظته ان المحاضرات فيها حاجات بسيطة جدا احنا مفتقيدينها في كلياتنا للأسف مع ان سهل جدًا تتطبق وهتغير كتيييييييييير أوي في فهمنا واستيعابنا.
طلبي منكم لو سمحتم .. إذا تعرفوا جامعة بعينها وشفتوا فيها نموذج سهل تطبيقه ومش مكلف تطرحوا أفكاركم هنا..
لو متعرفوش جامعة مميزة ممكن تشوفوا أي كورس لمعهد MIT من الموقع اللي حطيته دا -وبالمرة ممكن تختاروا حاجة تفيدكم في الدراسة لإن الكورسات مفيدة جدًا وأنا عن نفسي بشوف الموضوعات اللي مش بفهمها من أيام ثانوي لدلوقتي-
شوفوا أي محاضرة ولو عشوائية وقولوا أحسن حاجة عجبتكم ولفتت انتباهكم ايه.
يا رب حد يعبرني .. ويا رب محدش يقول اني سرحانة في الخيال .. ويا رب أشوف أفكار حلوة وجديدة منكم .. عشان احنا اللي هنغير مينفعش نستنى العقول الكبيرة القديمة -اللي مسيرها هتمشي -خصوصًا الإدارة- دا لو مش مشيت أصلًا- مينفعش نسيبهم يمشونا زي ما يحبوا ونبقى بنضيع 5 سنين من عمرنا ونخرج من الكلية وحالها وحالنا أسوء واحنا محاولناش نصلح فيها أي حاجة..
ومننساش إن السلبية حلها عمره ما هيكون المزيد من السلبية
طبعًا مش بتكلم دلوقتي عن سلوك الطلبة ولا عن الانضباط ولا عن المشاكل اللي بالهبل في كليتنا.. المفروض مننساش اننا بنروح الكلية كارهينها وان دا بيخلي طلبة كتير بيعملوا أي حاجة تانية غير الانتباه للمذاكرة ومفيش حاجة محسساهم ان فيه تعليم أصلًا يستاهل يتعلموه.
دي محاضرة كنت بسمعها امبارح ولفت نظري فيها حاجات كتيييييييير
على سبيل المثال ودي أبسط حاجة ومن الحاجات اللي بعتبرها مهمة
ان الدكتورة بتشتغل بقلم طباشير مش زي عندنا بنتبهدل بالبروجكتر اللي مش بنستفيد منه أي حاجة في كتير من الأحيان ومش بيساعد على الفهم بالمرة وكمان كتير دكاترة مش بيدوهولنا أصلًا.
محاضرة شفتها امبارح عن الثرموكيمستري ^_^
في انتظاركم