انا اعتبر الشفهى الحالى اختبار تحصيلى فقط ليس فيه مهارات ذهنية
ارى ان يكون الشفهى معيار هام لقياس المهارات الذهنية و النقلية للطالب
بديهى ان يكون فى الشفهى اسئلة غير نمطية و تميل للتطبيق لقياس مدى فهم الطالب للمادة
الواسطة غير موجودة البته فى إمتحان الشفهى
يجب ان يوزع القسم على الممتحن الخارجى قائمة محتوى المقرر قبل امتحان الشفهى
انا عندى احساس يالغبن عندما ارى زميل او زميلة تأخذ درجة افضل منى لمجرد التوصية
ارى ان زيادة اعداد الطلاب تؤثر بالسلب فى معرفة المستوى الحقيقى للطالب
افضل ان امتحن وحدى و ليس فى مجموعة حتى لا أحرج و حتى يتحدد مستواى الحقيقى
افضل ان امتحن فى مجموعة لا تزيد عن ثلاثة طلاب حتى يظهر الفرق للممتحن فتكون الدرجة معبرة
ارى ان يعطى الطالب سؤال مكتوب كمفتاح قبل البدء فى إمتحانه
ارى انى املك المعلومة و لكن السؤال الغير مباشر او الغير نمطى يوترنى فلا استطيع الإجابة
ابتسامة الممتحن لى و عدم تجهمه فى وجهى يشجعنى على الإجابة يإنطلاق و بثقة
ارى ان لا يسأل ممتحن الشفهى فى امتحان النظرى حتى لا يصير الجزاء ضعفين فى النظرى
ارى استبدال الشفهى بمشاريع بحثية يناقش الطالب فيها و يقيم على جودة البحث و مهارات العرض
يتحقق العدل فى امتحان الشفهى بإختفاء الواسطة
أرى ان يلغى الشفهى بوضعه الحالى او تقل درجته الى النصف لأنه غير معبر عن المستوى الحقيقى للطلاب
ارى ان يكون الشفهى فى اليوم التالى للنظرى لان الإجهاد و عدم الأكل يؤثر بالسلب على القدرة الذهنية
ارى ان يكون الشفهى بعد انتهاء الإمتحانات النظرية
ارى ان يشمل تقييم الشفهى مظهر الطالب و مهارات الشرح و الثقافة العامة
هل لك رأى إضافى (تفضل بالمشاركة فى الموضوع)
شىء طبيعى انى الاقى موضوع زى دة ف قسم حضرتك يا دكتور
لو مكانش حضرتك تتكلم وتتناقش معانا فى المواضيع دى مين هيناقشها معانا
باشكر حضرتك جدا جدا على طرح الموضوع دة لانه بجد عاملنا مشكلة كلنا بلا استثناء
ولى عودة ان شاء الله بعد الامتحانات عشان افرد فى الحديث
لان الشفوى دة تحديدا ليا فيه صولات وجولالالالالالالالالالالات
وحاجات لا يصدقها عقل
شوفى يا نونى الموضوع ده له أسباب كتيرة قوى
منها اننا بندرس حاجات مش هتنفعنا بعد كده
انا عن نفسى كنت هموت وأدخل صيدلة دى
على اساس ان حياتى هتبقى أدويه
هعيش كده وأتعمق فى الدوا
بجد انا ببقى مكسوفه قوى لو حد سألنى فى حاجة ومعرفش أجاوب
عندنا فى بيتنا بيسألو نى او بيختبرونى ومش بعرف اقول حاجة
بيبقى شكلى وحش قوى وبيقولولى انتى بقالك 3 سنسن بتخدى ايه
اقولهم ان شاء الله السنة الجاية هغرقكم معلومات فى علم الصيدلة
كمان المناهج مش ممتعه خالص مش هقعد افهم تحليلية ولا اتخيل شوية مركبات اورجانيك
طول السنه سكاشن ومحاضرات ( قال يعنى بحضر محاضرات)
ومش بنذاكر غير فى الآخر
طبعا مش هقعد أفهم
انا عاوزة المختصر المفيد
وهكذاااااااااا
السلام عليكم ورحمه الله وبركاته
جزاكم الله خيرا دكتورنا العزيز على طرح هذا الموضوع المهم
انا من راى ان الشفوى دا حظوظ وارزاق يتخش لدكتور كريم ياما تخش لدكتور ماسك قوى فى الدرجات
وبيبقى تقدير الدرجات تقدير شخصى يعنى فى دكاتره تبقى كريمه ويبقى الرانج بتعها من 28 لما فوق سواء الطالب جاوب او لاء
وفى دكاتره يعد يعصر الواحد اسئله ويساله فى كل جزئيات المنهج وفى الاخر ميزدش عن 25
والمشكله ان دكتور الاكسترنال مش بيكون عارف احنا اخدنا ايه بيسالنا فى حاجات بره المنهج
حصلتلى التيرم الاول فى الصيدلانيات سالنى سؤال قلته مخدناهوش قلى يلا قومى قلتله اسالنى سؤال تانى مرضاش بيبقى ده ذنب مين وانا اللى اضريت فى الاخر
المفروض ان الشفوى ده عباره عن نقاش بين الطالب والدكتور يتناقش معاه حول المهج ويشوفه هو فاهم ولا لاء مش يسيبه يعد يتكلم ويحل غلط ومفيش اى رد فعل من جهة الدكتور
وده حصلتلى فى العقاقير الدكتوره سالتنى سؤال وانا عماله اكلم والغبط الدنيا فى بعضها وفى الاخر تدنيى الدرجه وتقومنى واخرج فاكره اننا جاوبت صح والاقى اللى كانت داخله معايا تصدمنى وتقولى اننا لبخت الدنيا فى بعضها
امتحان الشفوى ده هديه من الكليه للطالب يعنى المفروض كل الدكاتره تتوحد فى رانج الدرجات علشان محدش يتظلم ومحدش ياخد اكتر من حقه-----
اسفه على الاطاله
نفس اللى كنت عايزه اقوله بالظبط
ان نظام الدراسه عندنا مش ممتع ومعظم المواد اللى بندرسها مش هتفدنا بعد كده فى مجال الادويه
يعنى على سبيل المثال معروف ان ماده الفارما دى اساس الصيدله فليه بقى مندرسهاش من اول ما ندخل الكليه علشان نفهم امور الادويه دى ماشيه مش ندرسها اخر سنتين ونفضل التلات سنين الاولى مش فاهمين اى حاجه
انا بقترح ان دكاتره المنهج تجتمع بدكاتره الاكسترنال وتعطيهم فكره حول المنهج علشان يكونوا بدرايه كامله حول المنهج قبل ما يسالونا
وبقترح برده ان الدكاتره تحط رينج للدرجات بحيث ان الكل يمشى عليه ومحدش يتظلم
درجة الشفهى معيار ام أمنية, حكم ام هدية؟</strong>
فى أوقات كتير درجات الشفوى بتبقى عقاب للطالب
مش علشان حاجه
علشان بس حظه وحش ( لإنه مثلاُ دخل للدكتور كذا اللى مهما جاوب معاه مش هيزيد عن 23
أو العكس
تبقى مكافآه له لإن حظه حلو مش أكتر (برده مثلاُ لإنه دخل لدكتور كريم شويه بيوزع ال 30 على كل الناس
يعنى من الآخر المسأله كلها حظوظ
ده غيرالجانب السلبى التانى
وهو الوسايط
والناس اللى بتأخد ال 30 وهى واقفه
لما بتكون معرفه مع الدكتور
وحصلت قدامى والله مع دكتور إكسترنال
بس الظلم والفساد بقا فى كل حاجه
ومافيش حل للمسأله دى لإنها مسألة ضمير
شكراً دكتور عطا الله لفتح الموضوع
جزاك الله كل خير
التعديل الأخير تم بواسطة **SAMAR_RESALA** ; 02-07-2010 الساعة 05:29 PM
كل سنة و انتم بخير بمناسبة نهاية السنة الأكاديمية
عسى ان تكونوا قد وفقتم فى الإمتحانات
إمتحان الشفهى الأصل فيه تقييم مهارات الطالب الذهنية و النقلية. المقصود بالمهارة النقلية هى القدرة على إيصال المعلومة المهنية لكل شرائح المجتمع بما فيهم الطبيب و الممتحن الذى يتناقش معك. منذ وقت مضى كانت درجة الشفوى 75 درجة من 300 (نظام الفصل الواحد) و كان يمتحن الطالب منفردا و يجلس مع الممتحن مدة لا تقل عن 10 دقائق يجوب به المقرر بجزء تحصيلى و جزء تجميعى و جزء ذهنى غير مباشر و كان الممتحن لا يجد غضاضة فى وضع الـدرجةامام عين الطالب فى حالتين: الطالب الذى لم يفتح عليه الله إطلاقا بشيىء أو الطالب الذى أجاب و أجاد فى الأسئلة كلها. أحيانا كنا كطلاب ندس بعض المصطلحات الجذابة تعمدا فى نقاشنا مع الممتحن حتى نفتح شهية الممتحن للسؤال المتوقع عن معناها بشرط معرفة الإجابة و إلا أوقعت نفسك فى فخ من صنع يديك. بالطبع فى هذا العصر و بإنشقاق السنة الأكاديمية الى فصلين و توالى الإمتحانات الكثيرة. زد على ذلك أعداد الطلاب اليأجوجية بالإضافة الى نظرة المجتمع و الطالب نفسه للإمتحان فى انه يِؤدى الى شهادة ورقية و ليس مهما تقييم مهنية الطالب و إحترافه فى تحصيل العلم. أضطربت الموازين و اختلت نظرة الطالب لنفسه بالتقييم الخارج عن إطار واقعه (either over- or under-estimate himself).
القضية يا أولاد ذات شجون و نحن نريد تحسين العملية التعليمية و التقييمية للطلاب و بالتالى نرصد ارائكم بإهتمام عسى ان تشاركوا معنا فى معركة التغيير و التحسين. و فى هذا لابد ان تسمع لكم المؤسسة التعليمية. و لهذا ارجو ان تشاركوا تعبئة الإستبيان المرفق عن رأيك فى إمتحان الشفهى من خلال البنود المرفقة . قل رأيك الإضافى بصراحة و بشفافية و لكن فى الإطار المقبول. لا داعى ان اذكركم بأن كثافة مشاركة الطلاب فى هذا الإستبيان يعطى لنتائج تحليلة مصداقية كبيرة تفيد أعضاء هيئة التدريس و المؤسسة التعليمية بما فيها انتم فى النهوض أكثر بالفعالية التعليمية و التقييمية.
اذا كانت لديك أى مداخلة إضافية أو رأى فى هذه القضية او قصة واقعية حدثت لك او رأيتها لغيرك بعينيك فبرجاء تدوينها فى المشاركات.
أترككم مع بعض بنود الإستبيان مرفق بها بعض الصور الرمزية للتمعن و التفكير فى الإجابة
انا اعتبر الشفهى الحالى اختبار تحصيلى فقط ليس فيه مهارات ذهنية
ارى ان يكون الشفهى معيار هام لقياس المهارات الذهنية و النقلية للطالب
بديهى ان يكون فى الشفهى اسئلة غير نمطية و تميل للتطبيق لقياس مدى فهم الطالب
للمادة
الواسطة غير موجودة البته فى إمتحان الشفهى ام انه يتحقق العدل فى امتحان الشفهى بإختفاء التوصية
يجب ان يوزع القسم على الممتحن الخارجى قائمة محتوى المقرر قبل امتحان الشفهى
انا عندى احساس يالغبن عندما ارى زميل او زميلة تأخذ درجة افضل منى لمجرد التوصية
ارى ان زيادة اعداد الطلاب تؤثر بالسلب فى معرفة المستوى الحقيقى للطالب
ارى ان يشمل تقييم الشفهى مظهر الطالب و مهارات الشرح و الثقافة العامة
ابتسامة الممتحن لى و عدم تجهمه فى وجهى يشجعنى على الإجابة يإنطلاق و بثقة
اقرا الأسئلة بتأنى و لا تنس البنود الأخرى فى الإستبيان و اختر ما تراه بدون تأثر برأى الغير ثم شارك فى الموضوع
"من لا يتقدم يتقادم .. فلا بصمة و لا أثر"
اولا اشكر حضرتك على طرح الموضوع للنقاش
بقالى سنه بافكر احطه فى قسم التطوير
لكن كده افضل كتير انه يكون تحت اشراف حضرتك
اعتذر مقدما عن الاطالة
لكن حضرتك نكأت فينا جراح بمناقشة هذا الموضوع
بصراحة الشفوى الحالى مالوش اى لازمة مجرد تعب وبهدله وظلم لطلبة كتير
ناس بتاخد تلاتين لا تستحقها
وناس بتاخد درجات اسوأ بكتير من مستواها
هو هديه للى عنده واسطة ومش معيار للتقييم مطلقا باختلاف الممتحنين واختلاف معايير التقييم عند كل ممتحن
معظمنا بيشتكى من الشفوى
وده لعدة اسباب
اكبر واهم سبب دكاترة الاكسترنال
مشاكل دكاترة الاكسترنال :
السؤال في اجزاء من خارج المقرر او فى تفاصيل لم تُدرّس حتى لو معاهم ورقه الامتحان او ورقة بعناوين المنهج
اسوأ شفوى دخلت له شفوى الميكرو
الترم الاول الدكتورة قعدت تسألنا فى تفاصيل كتير فى جزء معين من المنهج واحنا كنا يادوب واخدين فكرة عامة عن الموضوع والانواع لكن مش بالتفصيل ده
كل شوية واحدة تقولها ما اخدنهاش مش عارفة ما اتشرحتش
فى الاخر قالت لنا اصل انا الى بادرس الجزء ده عندنا وباشرح لهم الحاجات دى
وهل تقييمنا هيكون مقارنة باللى هى شرحته؟
الترم التانى الدكتور كان بيسأل فى ادق التفاصيل
دخل فى جزء انا كنت فاهمة محاضرته ومذاكراه كويس
سالنى على نوع معين
قلت له ما اخدناش النوع ده
قال مكتوب قدامى ان انتم اخدتم الmutation وانواعه
انا خلاص كان فاض بي بيسالنا من ساعتها فى تفاصيل ما اتشرحتش ومش مصدق اننا ما اخدنهاش
قلت له اه بس النوع ده ما درسناهوش انا معايا كشكول المحاضرات لو حضرتك حابب تعرف احنا اخدنا ايه فى المحاضرة
قالى ياريت
المحاضرة دى كانت من اكتر المحاضرات الى الدكتور شرحها كويس وكنت فاهمة وكاتبة وراه كويس جدا
العناوين الرئيسية بلون والفرعية بلون والمحاضرة منظمة جدا
يعنى واضح انى مش ناقص فيها عندى حاجة
قالى : خلاص حكمت المحكمة بالبراءة بعد ان اظهر المحامى الدفاع !!!
هل المفروض انى اخد معايا كشكول المحاضرات فى كل امتحان شفوى ادخله؟
الوضع ده ممكن يحصل مع اى دكتور من الكلية مش هو اللى بيدرس المقرر ده لكن بصورة اوضح مع دكاترة الاكسترنال
احيانا تكون بتجاوب كويس جدا وفى الاخر الدرجة ماتزيدش عن 25 فى حين ان معظم الانترنال درجاتهم اعلى من كده بكتير وده بيكون فيه ظلم بيّن بين الطلبة
المشكلة التانية فى الشفوى الانتقال بين اجزاء المنهج المختلفة بسرعة
غالبا الدكاترة بيسالوا المجموعة فى موضوع وبعدين يدخل فى موضوع تانى ويسال الطلبه فيه
بتلاقى نفسك بدات تسترجع المعلومات الخاصة بالجزء ده سريعا ومتجاوب كويس مع الدكتور
لكن احيانا الدكتور يسال اول واحد فى موضوع والى بعده فى موضوع وانا فى موضوع تالت
واحيانا يسال نفس الطالب فى اكتر من موضوع ورا بعض
باحس بتشويش وانى مش قادرة افتكر اى حاجة حتى لو عارفة المعلومة
فى تانية دخلت شفوى عقاقير لدكتورة اكسترنال
كانت تسال واحدة عن المواد الفعالة فى نبات معين
واللى بعدها طب ايه تانى فيه نفس المادة
طب ايه تانى باستخدمه لنفس الاستخدام ده
طب ايه اللى من الroot ينفع انى استخدمه لكذا
هى اسئله حلوة بس انا لو مش مجمعه المنهج بالطرق دى كلها مش هافتكر الاجابه فى لحظتها
ممكن يكون عندى اكتر من تلاتة وما افتكرش غير واحد لان المعلومات كلها اتشتت بسب التوتر من طريقة الاسئلة
مش عاوزة كل الاسئلة تكون تقليدية لكن فى نفس الوقت مش كلها بالاسلوب ده وباسلوب الانتقال السريع بين اجزاء المنهج اللي بيضيع كل المعلومات
ثالث مشكلة الواسطة
وانا ماكنتش باهتم بيها اوى لغاية السنة دى
لما ابقى عند دكتور اكسترنال ومايجيش وأقف على باب اى حد انترنال ووانا واقفة يدخل قدامى كتييير بواسطه
ندخل للدكتور نقوله دكتورنا ماجاش يقول لنا انا مش بامتحن غير لجنتى بس
لما ابقى واقفة وشايفة الدكتور وهو بيتكلم مع الى داخل بواسطة عن الامتحان وعن المنهج ومواضيع عامة ويقوم من غير ما يتسأل ولا سؤال
لما نفضل واقفين ساعة واتنين وتلاتة عشان نمتحن
واللى معاه واسطه يدخل للدكتور اللى هو عاوزة فى الاول ويرتاح
لما تشوف كشف الدرجات كلها قليلة ماعدا ناس معينه
ابسط احساس ان الدكتور بتقل مكانته عندى جدا جدا
كنت بامتحن عند دكتور حسن الصباغ ودخل له واحد بواسطة
واتسال نفس الاسئلة اللى احنا بنتسألها لكن ماجاوبش كويس على اكتر من سؤال
والدكتور يدى له فى الاخر 23 تقريبا
زى اى حد بنفس المستوى
بجد زاد احترامى للكتور حسن جدا جدا ربنا يبارك فيه
رابع مشكله استعجال الدكتور وعدم اعطاء فرصة للتفكير
مع التوتر والقلق عند الطالب ورهبة الامتحان
استرجاع المعلومة بيكون صعب جدا
خامس مشكلة التعب والارهاق بعد الامتحان
وده بيضيّع كتير على الطالب
يوم ما قعدت الف عشان امتحن عند حد لما الدكتور بتاعنا ماجاش
كنت خلاص فقدت كل ما تبقى من طاقة كنت حاسة ان الكلام مش بيطلع اصلا وانا باجاوب
السؤال سهل وانا عارفة بس مش قادرة ارتب اجابتى ومش قادرة اتكلم اصلا من كتر ماكنت تعبانة
سادس مشكله اختلاف مستوى الاسئله من لجنه لاخرى واختلاف اسلوب تقييم الممتحنين للطلبة ونظرتهم الدرجة التى يستحقها الطالب
و الحل؟
اعتقد ان الحل الامثل ان كل الاقسام تعمل زى التحليلية
من ناحتين اتمنى الجمع بينهما
اولا :
كل الدفعة بتمتحن شفوى قبل امتحانات النظرى بفترة صحيح بخمس درجات لكن كلنا بنذاكر وبنمتحن
وعند الدكاترة الى بيدرسوا لنا المنهج بس
هو عبء على الدكاترة اكيد لكن لو الدفعة اتقسمت بحيث ان خلال تلات اربع اسابيع الدفعة تمتحن المواد كلها عند دكتور المادة او على الاقل دكاترة انترنال هنتقسم
وهنكون ذاكرنا المنهج قبل النظرى كويس
وهيكون الضغط اقل على الدكاترة والتوتر اقل عند الطالب
كفاية انه هيمتحن بذهن صافى وحاضر وبدون المعاناه اللى بنعانيها عشان ندخل للشفوى
ثانيا وهو الاهم واللى نفسي بجد يتطبق فى كل الاقسام ان الاسئلة تكون مطبوعة فى ورقة
وده بيحقق عده مميزات
اولا اننا نفكر بتأنى فى المعلومة ونسترجع المعلومات المرتبطه بها ونرتب الافكار فى الورقة قبل ما نتناقش شفوى
وثانيا حصر الذهن فى موضوعات محددة مما يسهل استرجاع المعلومة عند النقاش مع الدكتور
ثالثا الاسئلة بتكون مقسمة على موضوعات المنهج بالتساوى
وبكده بتغطى اجزاء المنهج
رابعا تجنب طرح السئلة من خارج ما تم تدريسه لان الاسئلة موضوعة من قبل محاضر المادة حتى لو لم يقم هو بامتحان كل الطلبة
خامسا تحقيق العدالة فى مستوى الاسئلة باختلاف اللجان والممتحنين
مش شرط ان الماده تكون كيمياء ومعادلات عشان نمتحن كده
السنه الى فاتت اول سؤال كان عندى فى التحليلية عن الHPLC
للوهلة الاولى ما عرفتش السؤال
بس قعدت استرجع اجزاء المنهج واتخيل ممكن ايه تكون العناصر المطلوبه ومن كل محاضرة كنت باطلع عناصر
لما اديت الورقة للدكتورة قلت لها انا اول مرة اشوف السؤال وما اعتقدش ان الدكتور شرحه عندنا لكن انا كتبت من فهمى لفكرة الفصل
سالتنى فى اول كام عنصر بس وقالت لى خلاص قومى انتى فاهمة كويس وخدت الثلاثين بفضل الله
لو كنت اتسالت السؤال ده شفوى مباشرة اعتقد ما كنتش هاعرف اجاوب مطلقا ولا اجمع اى عنصر
عذرا مرة اخرى على الاطالة
وجزاكم الله خيرا على حرصكم على المصلحة العامة للطالب
التعديل الأخير تم بواسطة زهرة الياسمين ; 03-07-2010 الساعة 03:29 PM
بدايه اشكر حضرتك يا دكتور على طرح هذا الموضوع الشائك
الحقيقه انا شايفه ان الشفوى ده حظوظ ونصيب
وظلم بين وانا ديما بقول الكلمه دى
اولا هو مش بيعتمد على مهاراه ولا فهم ولا حاجه انا شايفه ان درجه الشفوى دى لازم تتخفض للنص يعنى كفايه قوى 15 درجه ويكون الحد الادنى ليه 10 عشان الفرق بين الطلبه ما يبقاش كبير لان 30 درجه دى مكن ترفعنا جدا او تنزلنا الارض
ثانيا موضوع الدكاتره الاكسترنال ده بجد مستفز جدا يعنى مثلا السنه دى فى الصيدلانيات دخلنا لدكتور ربنا يسامحه سالنا سؤال واحد فى جزء واحد من المنهج وجاوبت عليه بالنص زى ا الكتاب بيقول قالى لا وسال اللى جنبى قالت نفس الكلام قالنا غلط سال الثالثه نفس الاجابه قال لا غلط انتوا بتدرسوا هنا بطريقه واحنا فى جامعه القاهره بنعلم الناس حاجه تانيه قلنا والله ده اللى احنا اخدناه مش مصدق طلب الكتاب طبعا محش معاه كتاب وبعدين سال زميلتى سؤال فى نفس الموضوع وبرده اجابتها اللى هى بالنص زى ما الدكتور قالها لم تكن مرضيه بالنسبه له وواضح انه معترض على نظام الكليه قالنا قوموا وقيل ما نقوم درجاته كانت 18 و19 و20
بالذمه ده اسمه ايه؟
ده منتهى الظلم
اولا لاننا اجابنا على اللى هو سال فيه بالنص بس حضرته مش عاجبه الاجابه اللى كده بالظبط فى الكتاب
ثانيا لان مش سؤال واحد هو اللى يقيم بيه هنفرض انه الطالب ما كنش مذاكر الجزءيه دى كويس فى حين انه مذاكر بقيه المنهج كويس جدا خاصه ليه يحكم عليه من سؤال واحد
بجد انا عمرة ما دخلت شفوى بالسوووووووووووء ده بس هقول ايه حسبى الله ونعم الوكيل
فى حين انه فيه دكاتره اكسترنال كويسين جدا ودرجاتهم حلوه جدا فيه برده دكاتره انترنال مش بيزيدوا عن 25 وده بيبقى فيه ظلم بين الطلاب
لذلك اطالب بتخفيض درجه الشفوى الى 15 درجه كى لا يكون التفاوت بين الطلبه كبير
وكمان الغاء نظام الوساطه اللى للاسف الدكاتره بفسهم بيدخلوا مع الطلبه للدكتور الممتحن عشان يديهم ال 30
ده حرام ولا حلال
اعتذر عن الاطاله