بالنسبه لامتحان الشفوى يا جماعه
امتحان الشفوى ده حظ .. لانه فعلا بيعتمد على نسبه كبيره جدا من الحظ .. ممكن واحد يخش وميكونش مذاكر اوى ويخش مع طلبه اقل منه فياخد درجه حلوه .. او يكون الدكتور نفسه درجاته عاليه فينقصك ويديك 25 ..
وممكن وبنفس المذاكره تخش مع طلبه مذاكرين كويس جدا .. والدكتور كمان درجاته مش عاليه تبص تلاقيك واخد 15 او 18 ..
طيب واحنا فى ايدينا ايه ؟؟
لا فى ايدينا كتير ..
اول حاجه زى ما اتقال الثقه بالنفس تكون واثق وانت بتقول اجابتك .. وتحاول تختار الفاظ سهله وتكون بتنطقها كويس ..
وفيه حاجه مهمه جدا لو اتسالت سؤال ما انتاش عارفه اوعى تحاول تألف اجابه .. ومتستناش من الدكتور انه يقول لك لا غلط .. بالعكس ده هيقعد يقول لك برافو شاطر وايه تانى .. وانت قاعد تعجن والدكتور بيحط لك ميه عشان العجينه تزيد ..
لا قول للدكتور الحته دى مركزتش فيها .. او نسيتها او اى حاجه .. وتخليه يسالك سؤال تانى ..
حاول على قد ما تقدر تقول كلام من الكلام اللى الدكتور بيقوله .. وتدى له احساس انك متابع محاضراته .. يعنى مثلا ممكن تقول له الحته دى فعلا حضرتك قلتها فى المحاضرة وقلت عليها مهمه .. ومتفتكرش انه هيبقى فاكر كله كلمه قالها .. بس متخصصش الكلام برضه اوى عشان متقعش ويبقى منظرك وحش .. خلى كلامك عام .. يعنى مثلا تقول له الحته دى فعلا حضرتك شرحتها كويس جدا فى المحاضره .. وانا فاكرها من يوميها ومخدتش منى وقت فى المذاكره كده ..
لو الدكتور بيدى ورق فيه اسئله وانت بتحلها تحريرى حاول متكترش فى الكلام .. عشان الدكتور ميضايقش .. جاوب على قد المطلوب بس .. وكتر من الرسومات والـ structures ..
لو الدكتور بيسال كذا طالب قدامه وبيسال بالدور .. اوعى تجاوب على سؤال مش موجه لك .. لان ده بيضايق الدكتور ويخليه يخبطك سؤال تبلم قدامه ..
ممنوع منعا باتا الاستظراف او قول الافيهات او التعليقات البايخه .. واسمعوا كلامى فيه ناس كتير خدوا اصفار بسبب الموضوع ده .. خصوصا لو كان اكسترنال .. اوعى ..
وبالتوفيق ان شاء الله ولو حد عنده اى سؤال او استفسار يقول .. ميشيلش فى نفسه ابدا ..