ماتغربيناش
ماتغربيناش وتقوللي قدر
ما توّهيناش ف مواني سفر
متضيّعيناش في دموع وفراق
ح تجيبي منين زيّنا عشاق
في قلوبنا حصاد .. ف عنينا مطر
متغربيناش
ماتغربيناش ف الأرض البور
واحنا الزراع
وايدينا سواقي فرح بتدور
رغم الأوجاع
احنا الشاريين فدادين النور
لو خاين باع
ماتغربيناش
ماتغربيناش في بلاد بتموت
واحنا الخالدين
يا أول زرعة وأول قوت
ويا أول دين
العمر بدونك ليل بيفوت
مهزوم وحزين
ماتغربيناش
ماتغربيناش في بلاد الريح
واحنا الأحباب
احنا اللي رفضنا تكوني ضريح
ف زمن كداب
ضلّلي بالحب على المجاريح
وكفاية غياب
ما تغربيناش
شعر جمال بخيت