لماذا لم أشترك في أسرة طلابية ؟ نقد بناء

[pharmacistina]

السلام عليكم ورحمة الله وبركاته

موضوع شائك أنا عارفة ..



ربنا يستر عليا ..

أولا أحب أن أوضح اعجابي الكبير بأي نشاط علمي أو رياضي أو فني تقوم به أي أسرة من الأسر الطلابية عندنا في الكلية ..

ليا صديقة و زميلة فنانة فعلا ما شاء الله .. لوحاتها ورسمها يستحق أن ينشر و يعرض للجميع في معرض أسرة طلابية ..

مسابقات رائعة و مجلات حائط ..


الحقيقة حاجات جميلة بتنمي مواهبنا ..


كان نفسي أشارك في أسرة طلابية ..

لكن ..

محدش يزعل من كلامي فأنا و الله لا أخص أو أقصد أسرة معينة .. الكلام general

أنا عن نفسي ..

لا يرضي ضميري أن المحاضرة تكون شغالة و أنا عندي نشاط في الأسرة أو بعمل مجلة حائط أو بوزع أوراق الخ ..

و خصوصا انتو عارفين اننا في صيدلة يومنا في الكلية عبارة عن محاضرات و سكاشن متتالية ..


يعني صعب أو مستحيل ان صدقنا ان الواحد يحضر كل المحاضرات و السكاشن و يلاقي وقت يقف ينظم و يعمل أنشطة الأسرة ..

الحاجة التانية المهمة أوي ..

السنة اللي فاتت كان أحد الأساتذة الأفاضل خارج من المحاضرة و أنا كنت بلحقه أسأل عن حاجة , وقفت أسأل الدكتور بالضبط عند بوابة المبني بتاعنا ( مبنى الفرقة الثالثة و الرابعة ) ..
لفت نظري طالبة زميلة لنا في صيدلة قاعدة مستربعة على الرخامة دي اللي في مدخل المبنى بتاعنا .. و ماسكة الموبايل بتسمع أغاني ..
و الطلبة و الطالبات معديين عليها و الأساتذة معديين عليها و هي قاعدة فوق هذا المرتفع و مستربعة ..

و هذا المشهد يتكرر كثيرا للأسف , و طبعا الزملاء و الزميلات واقفين يتناقشوا في نشاط الأسرة طول اليوم الدراسي ..

عمري - ان شاء الله - ما هقبلها ان أقضي يومي مع الزملاء حتى لو عشان نشاط كويس ..

يا جماعة احنا في كلية من كليات القمة و مكان علم مقدس , مينفعش بعض الحاجات اللي بنشوفها أثناء النشاط الأسري بتخليني أخاف من الاشتراك في أي أسرة ..
هو عشان الأسرة تبقى ناجحة لازم نصاحب زملاءنا و نقضي اليوم معاهم ..
لو كان كدة يبقى لهذا السبب لم و لن أشارك في أسرة طلابية رغم ان كان نفسي .. لكن محبش حاجة تيجي على حساب حاجة ..

قد يكون منتدى الكلية عندي هو أسرتي اللي بعرض عليها أفكاري .. و أنا في بيتنا بالي مرتاح بدون اختلاط ..

و صديقة ليا مشتركة في أسرة طلابية شهيرة جداا اتكلمت معاها مرة في الموضوع دة قالت لي أحسن انك ما اشتركتيش في أسرة لأن فعلا القصص و الارتباطات و الكلام اللي انتو عارفينه دة بيزيد أوي في الأسر طبعا مهو دة نتيجة قضاء اليوم مع الزملاء ..

وكمان الأسرة الطلابية تتطلب ان زملائي في الأسرة يكونوا معاهم رقم موبايلي عشان لو في اجتماع للأسرة يتصلوا بيا و يخبروني بكل جديد .. لم و لن أتبادل أرقام الهواتف مع الزملاء ..

لهذا لم و لن أشترك في أسرة طلابية ..

لو سمحتم يا جماعة ..
الأسر الطلابية واجهة لكلية الصيدلة ..

ما ينفعش نبقى داخلين المبنى بتاعنا نلاقي الناس ( شباب و بنات ) اللي واقفة جوا المربع دة قاعدين يهزروا و يتجاذبوا أطراف الحديث و ( كفك ع النكتة دي ) ..

و نلاقي واحدة طالعة قاعدة فوق ..


لا يا جماعة واجهة كلية الصيدلة المفروض تكون أحسن من كدة ..

دي حاجة حبيت أنتقدها و أنا طالبة في الفرقة الرابعة يعني على وشك مغادرة كليتي الغالية اللي بتمنى تكون أحسن و أعلى و أكثر كليات العالم التزاما و تقدما , ياريت يكون نقد بناء و محدش يزعل مني ..

و طبعا في أسر كويسة جداااا و كلنا عارفين كدة ..

و في داخل الأسرة الواحدة ناس ملتزمة جدااا و ناس مقضياها لعب لذلك الكلام دة موجه لفئة معينة من الناس المشتركة في الأسر , و مش كلهم ..

و التعامل بيننا و بين الزملاء أنا مقلتش انه حاجة وحشة و مجرمة لكن له ضوابطه و عموما كل واحد حر ..

أنا مش بفرض ثقافتي ولا طريقتي على حد , بس في حاجات لا يختلف عليها اثنين انها ظواهر مش حلوة ..

دة نقد و نصيحة يا ريت اخواني و أخواتي يتقبلوا كلامي و ميزعلوش مني و أنا أقدركم كلكم (كلكم قد تكونوا أفضل مني ) و أعتبركم اخوان و أخوات ليا و ربنا يعلم ..

كلمتين كانوا في نفسي حبيت أقولهم قبل ما أمشي من الكلية ..

[Chimera]

مش عارف ..
بس اعتقد عادي يعني .. مهو ممكن يتكلموا و يهزروا مع بعض بعيد عن الاسرة ..!!
يعني الاسرة مالهاش دخل ف كده .. ده نابع من جوه الانسان ذات نفسه و قناعاته
إللي عاوزه يهزر و يتعرف و يعمل ارتباطات .. مش هيستنى الاسرة يعني عشان يعمل كده من خلالها ..!!

بعدين الصراحة انا مش شايف اي انشطة مثيرة للأهتمام بتقدمها الاسر .. تخلي الواحد يحب يشارك
يعني معلش كلها انشطة سطحية كنا بنعملها ف ابتدائي
رحلات و تنظيم دورات و ندوتين و على كده

ع العموم انتي ممكن تطلبي بعمل سيكشن خاص للبنات ف اي اسرة تحبي تشاركي فيها ..
و تعيشوا مع نفسكوا بقى مالكوش دعوة بحد .. إلا ف ال big events بتكون في واحده منكم تتكلم بأسمكم
احنا عملنا كده ف جروب الاولترا .. لما البنات مكنش عاجبهم منظر التنطيط و خلع الفانلات و التشجيع .. اتعمل لهم سيكشن لوحدهم .. و بقت إللي تحب تبقى معانا أهلاً و سهلاً .. عاوزه تنضم لسيكشن البنات مفيش مشكلة .. و كلهم ليهم مننا كل احترام

.,,

[احمد شبند]

مفيش وقت

مش عشان المحضرات والسكاشن

لا لان فعلا مفيش وقت والوقت الضايع فى الاسر ممكن استثحره فى حجات تانية كتير برضوا بادر بيها النفع على غيرى


وانا عن نفسى لو اى حد طلب منى اى مساعدة فى اى اسرة من الاسر بعملهالو ومع ذلك مشتركتش فى اى اسرة

[yojeena]

اولا لو تقصديني يبقي بشكرك بشده يا مني لكن لو مش انا يبقي برده بشكرك بس علي طرحك للموضوع
ثانيا انا فعلا من اول ما دخلت كليتنا العزيزه كنت بتمني اشارك في اسر عشان احس ان في حاجات ليها قيمه بعملها غير حضور المحاضرات و السكاشن
لان بجد ما عنديش حاجه احكيها عن فتره دراستي بالكليه الا حاجات بسيطه و اغلب الاربع سنين اللي فاتوا عدوا بنفس الروووووووتين ما فيش جديد .........اغلب الحاجات اللي بتحصلنا بتحصل مع غيرنا ومع اللي بعدنا يعني ما فيش شئ معين انتي مميزه فيه عن الباقيين
بس ف الاخر انا اللي رفضت اشترك في اي اسره لاني شفت حاجات غريبه في بعض الاسر مش كلها الصراحه(بس ممكن اللي انا شايفاه غير لائق غيري شايفه عادي )
فقلت انا هقعد اتعب دماغي ليه خليني في السليم احسن و قررت اني ما ادخلش ولا اسره وانا مقتنعه بكدا
و الوقتي ممكن اشارك في بعض انشطه الاسر اللي شايفاها مناسبه ليا

[pharmacistina]

اولا لو تقصديني يبقي بشكرك بشده يا مني لكن لو مش انا يبقي برده بشكرك بس علي طرحك للموضوع

و الله أنا ما بقصد حد أبدااا بكلامي ..

و بعدين .. أنا .. هو انتي مشتركة في أسرة أصلا ؟؟

أنا بطرح الموضوع عايزة الناس تقرأه , لأن دي حاجة أنا شايفاها مهمة , و لو العيوب دي راحت تتميز جدااا الأسر الطلابية ..

شكرا على مروركم ..

[عبدالله عبدالرحمن]

طبعا فى البداية شكرا على الموضوع
اول حاجة فعلا بأيد حضرتك فيها
هى ان فى كليتنا السكاشن والمحاضرات
شغالة طول اليوم يعنى لو حبيت اعمل اى نشاط طلابى
هيكون على حساب محاضرة او سكشن
وطبعا ممكن حد يقول غير السكشن
او حاجة من قبيل كده
بس بصراحة انا بحب التزم بالأولويات
انا دخلت الكلية عشان ايه
عشان احضر المحاضرات والشكاشن واتعلم
ولا عشان اعمل نشاط طلابى
كل واحد له اولوياته
وعلى اساس كده هيختار
وتجد مسئولي النشاط الطلابى يتعجبون
لماذا لا يشارك الطلاب فى النشاطات الخاصة
طبعا لأنهم بيكونوا معظمهم فى محاضرات وسكاشن
مش معقول يعنى اسيب علمى واروح اعمل نشاط طلابى
ثانيا
مسألة الأختلاط
اللى حضرتك ذكرتيها بس بصورة لطيفة
الأختلاط يغلق اى طريق نحو اشتراكى فى اى اسرة طلابية
(والكثير من الطلاب مثلى ويوافقوننى فى هذه النقطة)
ومهما كانت الأراء ان الأنسان هو اللى بيحدد انضباطه وهو اللى بيختار
والكلام ده
فانا غير مقتنع به على الأطلاق
الواحد محتمل الوضع فى السكاشن والمحاضرات بالقوة
افرض على نفسى ليه حاجة انا مش مقتنع بيها
ومش هرضى هشوف الكلام ده قدامى
بالنسبة للأخ حسن كايميرا
اللى بيقول ان الزملاء والزميلات بيهزروا مع بعض خارج الأسرة
فمفروض ما نقولش ان الأسرة السبب فى الكلام ده
فعلا الأسرة ملهاش دعوة
لكنها بتدى فرصة واطار يسمح بتصرفات خطأ
وتحت مظلة تعطى مايشبه الشرعية على الأمر
ان الزملاء والزميلات بيعملوا نشاط طلابى
ومش بيعملوا حاجة غلط
مجددا كما قالت الدكتورة كلامى موجه لفئة محددة
وليس كل من يشاركون فى الأسر الطلابية كذلك
ولكن للأسف هم من يظهروا فى الصورة بتصرفاتهم
التى لايمكن ان يقبلها اى أحد
__--___---__--__
السبب الثانى
ان طلاب كلية الصيدلة يجب ان يكون تفكيرهم وانشتطهم معبرة
عن انتمائهم لكليتهم
شخص فى صيدلة اهتماماته مختلفه عن اهتمامات الكليات الأخرى
والكلام ده انا قلته فى موضوع سابق
هنا

[yojeena]

و الله أنا ما بقصد حد أبدااا بكلامي ..

و بعدين .. أنا .. هو انتي مشتركة في أسرة أصلا ؟؟

ما تركزي شويه يا مني انا اصلا مش مشتركه في اسره ولسه قايله الوقتي
اقصد اول الموضوع ما انا لسه مورياكي حاجات ليا ما اظنش انك لحقتي تنسي

[pharmacistina]

ما تركزي شويه يا مني انا اصلا مش مشتركه في اسره ولسه قايله الوقتي
اقصد اول الموضوع ما انا لسه مورياكي حاجات ليا ما اظنش انك لحقتي تنسي

أيوة ..

رسمك ما شاء الله رائع جداااا ..

و كنت أقصد كمان واحدة تانية صاحبتي رسمها رائع ..

انتو الاتنين فنانين ..

ربنا يكرمكم ..

[SmSm]

لكن ..

محدش يزعل من كلامي فأنا و الله لا أخص أو أقصد أسرة معينة .. الكلام general

أنا عن نفسي ..

لا يرضي ضميري أن المحاضرة تكون شغالة و أنا عندي نشاط في الأسرة أو بعمل مجلة حائط أو بوزع أوراق الخ ..

و خصوصا انتو عارفين اننا في صيدلة يومنا في الكلية عبارة عن محاضرات و سكاشن متتالية ..


يعني صعب أو مستحيل ان صدقنا ان الواحد يحضر كل المحاضرات و السكاشن و يلاقي وقت يقف ينظم و يعمل أنشطة الأسرة ..

مممممم لأ صدقني .. أنا عن نفسي بحضر كل المحاضرات و السكاشن و لو في محاضرة فوتها يبقه عشان انا مش عايزة احضرها اصلا و عمر ما حاجة ف شغل الاسرة أثرت ع الموضوع ده لأننا بنظم كل واحد ومواعيده ومحدش مجبر انه يعمل حاجة ..

الحاجة التانية المهمة أوي ..

السنة اللي فاتت كان أحد الأساتذة الأفاضل خارج من المحاضرة و أنا كنت بلحقه أسأل عن حاجة , وقفت أسأل الدكتور بالضبط عند بوابة المبني بتاعنا ( مبنى الفرقة الثالثة و الرابعة ) ..
لفت نظري طالبة زميلة لنا في صيدلة قاعدة مستربعة على الرخامة دي اللي في مدخل المبنى بتاعنا .. و ماسكة الموبايل بتسمع أغاني ..
و الطلبة و الطالبات معديين عليها و الأساتذة معديين عليها و هي قاعدة فوق هذا المرتفع و مستربعة ..

و هذا المشهد يتكرر كثيرا للأسف , و طبعا الزملاء و الزميلات واقفين يتناقشوا في نشاط الأسرة طول اليوم الدراسي ..

عمر ما حد بيقدر يغير مبادئه طالما مقتنع بيها فعلا .... لو عايزة اتجنب التعاملات دي اكيد هقدر و ده بجد عن مثال انا شايفاه قدامي زميلة لينا ف الاسرة مش عايزة التعاملات دي مهما كانت ومهما كان الكلام قليل و حتى أهميته بس عايزة تعمل حاجة و تستغل طاقتها... بجددددددددد معانا ف كل الايفينتات تقريبا منغيييييييير ولا كلمة ..بدون مبالغه ..

عمري - ان شاء الله - ما هقبلها ان أقضي يومي مع الزملاء حتى لو عشان نشاط كويس ..


يا جماعة احنا في كلية من كليات القمة و مكان علم مقدس , مينفعش بعض الحاجات اللي بنشوفها أثناء النشاط الأسري بتخليني أخاف من الاشتراك في أي أسرة ..
زي ما الزملا قالو مش الاسرة هي السبب بس يمكن فعلا بتفتح باب لده للي عنده استعداد
هو عشان الأسرة تبقى ناجحة لازم نصاحب زملاءنا و نقضي اليوم معاهم ..
لأ طبعااااا
لو كان كدة يبقى لهذا السبب لم و لن أشارك في أسرة طلابية رغم ان كان نفسي .. لكن محبش حاجة تيجي على حساب حاجة ..

قد يكون منتدى الكلية عندي هو أسرتي اللي بعرض عليها أفكاري .. و أنا في بيتنا بالي مرتاح بدون اختلاط ..


وكمان الأسرة الطلابية تتطلب ان زملائي في الأسرة يكونوا معاهم رقم موبايلي عشان لو في اجتماع للأسرة يتصلوا بيا و يخبروني بكل جديد ..
اطلاقااااا ..ولو كنتي شوفتي ده قدامك فمش كل الناس كده ... ممكن التواصل يكون عن طريق المنتدى او الجروب ع الفيس منغير اي اتصال مباشر..للي عايز يعمل كده
لم و لن أتبادل أرقام الهواتف مع الزملاء ..

لهذا لم و لن أشترك في أسرة طلابية ..

لو سمحتم يا جماعة ..
الأسر الطلابية واجهة لكلية الصيدلة ..

ما ينفعش نبقى داخلين المبنى بتاعنا نلاقي الناس ( شباب و بنات ) اللي واقفة جوا المربع دة قاعدين يهزروا و يتجاذبوا أطراف الحديث و ( كفك ع النكتة دي ) ..

و نلاقي واحدة طالعة قاعدة فوق ..


لا يا جماعة واجهة كلية الصيدلة المفروض تكون أحسن من كدة ..

دي حاجة حبيت أنتقدها و أنا طالبة في الفرقة الرابعة يعني على وشك مغادرة كليتي الغالية اللي بتمنى تكون أحسن و أعلى و أكثر كليات العالم التزاما و تقدما , ياريت يكون نقد بناء و محدش يزعل مني ..

و طبعا في أسر كويسة جداااا و كلنا عارفين كدة ..

و في داخل الأسرة الواحدة ناس ملتزمة جدااا و ناس مقضياها لعب لذلك الكلام دة موجه لفئة معينة من الناس المشتركة في الأسر , و مش كلهم ..

و التعامل بيننا و بين الزملاء أنا مقلتش انه حاجة وحشة و مجرمة لكن له ضوابطه و عموما كل واحد حر ..

أنا مش بفرض ثقافتي ولا طريقتي على حد , بس في حاجات لا يختلف عليها اثنين انها ظواهر مش حلوة ..

دة نقد و نصيحة يا ريت اخواني و أخواتي يتقبلوا كلامي و ميزعلوش مني و أنا أقدركم كلكم (كلكم قد تكونوا أفضل مني ) و أعتبركم اخوان و أخوات ليا و ربنا يعلم ..

كلمتين كانوا في نفسي حبيت أقولهم قبل ما أمشي من الكلية ..

ده كان رأيي وعارفه انك متقصديش حد معين بالكلام ده ولا تقصدي التعميم زي ما أكدتي بس انا برده حبيت اوضح الجانب الكويس ..

وبجد من اجمل ايام حياتي الايام اللي بقضيها ف نشاطات الاسرة ...
شكر لطرحك الموضوع

[Mohamed Al Gohary]

بشكرك جدا يا دكتوره على هذا الموضوع ..

لكن اسمحي لى حضرتك ظلمتي النشاط الطلابي والاسر الطلابيه ..

وجنيتي عليها ..

لماذا حكمتي على كل المشاهد التى ذكرتيها واستنكرتيها بان النشاط الطلابي والاسر الطلابيه هى السبب .. وانها سبب هذا الاختلاط الغير مبرر .. وان كل قصص الارتباط ناتجه عن قضاء اليوم بالكامل بين الجنسين بحجة النشاط الطلابي !!

اعذريني حكمك ظالم بالمره .. وحكمتي على شيء لم تجربيه .. وهذه اسمحيلي نقطه عليكي ..
انتى بهذا تحكمي على كل من مارس النشاط الطلابي بعدم الالتزام .. وهذا ايضا انا ارفضه تماما ..


كما قلت فى حفلة الترحيب للفرقة الاعداديه التى اقامتها اسرة برايت ستارز .. هل يوجد تعارض بين النشاط الطلابي والمذاكره ؟؟ انا اتحدث فى هذه السطور عن الناحيه العلميه والدراسيه ..

لو كان الامر كذلك .. لما كان الدكتور حسن الكاشف كابتن فريق السله فى الكليه .. ولم يكن الدكتور احمد رمضان سكرتير عام الجمعيه العلميه لعدة سنوات .. وهو التاني على الدفعه .. ودكتور احمد جمال .. ودكتوره دعاء سلطان ودكتوره الاء علاء .. وترتيبهم ال40 وال33 على دفعتهم ..
ودكتوره رحاب مقررة اسرة صيدلي المستقبل .. اعتقد انها لم تتغيب عن اى محاضرات ولا سكاشن .. وتقديرها ما شاء الله امتياز .. والكل يعرف مدى نشاطها الطلابي فى الكليه ..
الدكتوره ولاء .. احد اهم اعضاء اسرة رساله .. والسادسه على دفعتها .. وهى الان معيده فى قسم الصيدلانيات ..

اذا وضح وبالدليل .. انه لا تعارض بين محاضرات وسكاشن وتفوق .. ونشاط طلابي ..
من يريد الالتزام فى محاضراته وسكاشنه ..لن يثنيه عن ذلك النشاط الطلابي ..
وهناك الكثيرون والكثيرون .. تسمع منهم كلمة " انا بنزل على السكاشن بس "
وللاسف تلاقيه فى الفرقة الرابعه وتيجي تقوله الجمعيه العلميه .. يقولك يعني ايه .. طيب المبنى الادراي .. قاعة فاركو .. يقولك فين دى في زراعه !!

اظن وضح الناحيه العلميه ..


اما الناحيه الاخلاقيه .. فمن الظلم الشديد .. ان يتم ربط النشاط الطلابي والاسر الطلابيه بالاختلاط وعدم الالتزام الاخلاقي ..
انا لن انكر انه لا يوجد اختلاط .. ولكن اختلاط عن اختلاط يفرق كثيرا ..
لو طلبت منك يا دكتوره انك تعدي حالات الاختلاط الزائد في الكليه .. وان تشوفي كم حاله منهم سببها نشاط طلابي .. وكام حاله منهم سببها سبب تاني .. والله لو لقيتيها 1:10 لصالح السبب التاني .. يبقى انتى محقه فى كلامك ..

ظاهرة الاختلاط موجوده في كل الكليات ولا لأ .. اكيد هنقول اه .. طيب هل كل الكليات فيها اسر طلابية ونشاط طلابي ..
من خلال اجتماعات اتحاد طلاب الجامعه احب اقولكم ان كليات قليله اوى اللى فيها نشاط طلابي واسر طلابيه ..

طيب سؤال تاني .. اكيد حضرتك عارفه او سمعتى عن شارع تل ابيب او اللى هو خلف كلية هندسه .. اللى بعد كلية طب بيطري ..
لو متعرفيهوش روحي هناك .. وشوفي المناظر .. هل هناك نشاط طلابي واسر طلابيه ؟؟؟؟

هل السنتر يقام فيه نشاط طلابي واسر طلابيه !!


ساتحدث عن نفسي فى السطور القادمه ..

انا شخصيا اشكر كل من شجعنى على الانضمام للاسر الطلابيه والنشاط الطلابي .. لاننى استفدت منه كثيرا وتعلمت منه اشياء واشياء لو عشت عمري كله مرتين فلن اتعلمها اواكتسبها ..
والحمد لله تقديري كويس كل سنه .. واخلاقي يستطيع كل من تعامل معي ان يحكم عليها ...


للاسف يا دكتوره .. حكمك ظالم على الاسر الطلابيه والنشاط الطلابي ..

وللكلام بقية ..