اهمية الكتب الدراسية(مذكرات الاقسام)ليها لازمة ولا...؟؟

[Amira]

الماده الوحيده اللى كتابها يتفهم هى الصيدلانيات وخصوصا كتاب د/عبد المنعم كنت بذاكر منه على طوووول وكان بيبقى نفس الكلام اللى فى المحاضره بالظبط ولو فى حاجه ناقصه كان الدكتور بيقول لنا زودوها

اما بقى كتاب التحليليه والعضويه No Comment والله مكنتش بعرف اطلع اى حاجه منه ولا حتى العنوان اللى الدكتور بيشرح فيه

لسه بقى كتاب العقاقير برضو كان الى حد ما كويس من حيث ان المعلومات اللى فى الكتاب نفس اللى الدكتور بيقولها بس محتاج شويه تنظيم

ياريت الكتب كلها تبقى زى كتاب د/عبد المنعم

ويـــــــــارب الكتب تنزل بدرى بدل ما نضطر للورق من الاول من غير حتى مانشوف الكتاب اذا كان حلو ولا وحش

[rose_pharm]

فعلا كتب الصيدلانيات بس اللي كان ينفع يتزاكر منها

حاولنا كتير نزاكر من الكتب بس بحس انها مش مرتبه خااالص

بالذات كتاب المايكرو اسوا كتاب شفته في حياتي

انما العضوية قريت كتير من الكتاب بس كنت بزاكر من الورق بصحح المعادلات من الكتاب وازاكر من الورق المصدر الرئيسي عشان فيه تدريبات وكمان عشان الامتحانات وطريقة السرد

والتحليليه من الورق

والعقاقير كان الكتاب الي حد ما كويس بس الترتيب بردو محتاج اكتر

يريت كتب العملي تنفصل عن النظري لان فيه كتب كتير نظري احنا مش بنستفيد منها ولو شيفين اننا هنستفيد مكناش فتحنا الموضوع

الموضوع ببساطة ان لو الكتاب متظبط وده مش هيتكلف كتير ممكن يبقي طلبه اللي يصممو الكتاب ويبقي تابع لاشراف الدكتور
مثلا يكون الدكتور صاحب اسرة ياخد فريق من الطلبة المحبين للماده يعدلو الكتاب للطريقة الافضل مش هنغير صيغة الكلام بس هيتعدل شكله وترتيبه وحجم خطه بحيث يبقي سهل انه ميتعبناش ولا محتاج نضارة تكبير زي الميكرو كده ومش عيب اننا نشوف الاحسن ونحاكيه ونطوره لمصلحتنا ومفيهاش حاجة لما يبقي شبه ورق الدروس علي الاقل هيبقي مريح للطالب وهيبقي تعديله مرة واحدة والطلبه كلها هتحب تشتريه بما انه مصمون ومن الدكتور نفسه

ومش عايزين نحس اننا بيتفرض علينا ندفع فلوس من غير لازمة اجبااااار احنا اكبر من كده ودكاترتنا اكبر من كده

واعتقد ان الكليه في الفتره الاخيره بدات تتطور جامد فشكلها وحش
اكيد العملي هو اللي هنبقي بردو مرغمين عليه وده كفايا اوي
خصوصا ان ناس كتير جدا مش قادره

[Mohamed Al Gohary]

موضوع المذكرات ده نفسى كنت اتكلم عنه

من ساعة ماشفت كتاب الميكرو

منت عاوز اعمل عنه موضوع فى القسم الترفيهى

بس اصحابى خوفونى من انى اتكلم عن المذكرة لانهم لما راحوا للدكتور

قالهم المذكرة خط احمر وانها اخرحاجة

نتكلم فيها مع الدكتور

فقلت اقصر الشر احسن

لكن بجد كان نفسى اعمل الموضوع ده تانى بعد ماخلصنا امتحانات

بس الناس مشاركتها فى مواضيعى بتكون ضعيفة وبالتاى نش هيكون للموضوع قيمة

عشان كده انا عاوز واحد الناس بتقرأ مواضيعه هو اللى يعمله

وانا اقول رأيى فى الموضوع

واضح انك ناوي من زمان .. عموما الموضوع ده بتاع الاقسام مش بتاع الكليه ..

[shimoaa]

اولا شكرا لحضرتك يا دكتور علي الموضوع ده جه في وقته الصراحه
بم اني الحمد لله مش متعوده خالص اني اذاكر من الورق واني بذاكر من الكتاب فياريت الكتب تنزل بدري وتكون وكمان بعض الكتب تتظبط زي ما زاميلنا قالوا بجد يا جماعه معظم كتب الكليه جميله جدا علي الاقل بتكون مصدر موثوق فيه
-هو اه كتاب التحليليه محتاج تظبيط بس انا كنت بكتب المحاضرة واتاكد من المعلومات اللي انا كتبتها من الكتاب وبذاكر في الاخر من المحاضرة
- الصيدلانيات طبعا كتبه جميله ولا تعليق
-العضويه جميل جدا بس لو ينزل بدري شويه لان كل سنه العضويه دي بتاخر في مذاكرتها جدا
-العقاقير هو الكتاب حلو بس السنه دي كان جزي د/ عطا الله اعتمدت اكتر علي باور بوينت بتاع الحاضرات لان الكتاب مكانش وافي اوي فكنت بكمله من الباور بوينت
- بس بجد اكتر كتاب عجبني السنادي للاسف مش من كليتنا كان كتاب الهستولوجي بتاع طب يااااااااااااااااااه تنظيم وصور بالالوان وجلده الكتاب نفسها شكلها شيك تخليك تستخسر تفتحه لتبوظه والشرح علي شكل نقاط كان حاجه روعه الصراحه
انا اسفه علي الاطاله بس يا ريت يا جماعه الموضوع ده يوصل لحد مسئول قبل ما الدراسه تبدأ
عشان حتي ينزله الكتب بدري علي الاقل لان اعتقد ان التظبيط ده ممكن ياخد وقت
بس يا ريت مش نقعد بتكلم كده علي الفاضي

[قناع الذهب]

والله انا شخصيا بشوف ان فية كتب كويسه وممكن يتذاكر منها ودا هتشوفوة فى كتاب الalkaloid للدكتور عطا الله فى سنه تالتة ان شاء الله وكتب المديسنال كمان كانت كويسه جدا وكتب الفارما كمان وفية كتب طبعا ماتتفتحش اصلا عشان بحس ان هيا مفبش بين الكلام اى فروق وانا لازم يكون الحاجة اللى بذاكر منها متظبطة ومتعنونة مش كله سايح على بعضة حتى ان كنت مش هفهم منها اوى او ان كنت هبذل مجهود شويه فى الفهم
وبعدين بصراحة ان حاسه ان دا بقى مبدا عندنا كللللنا ان اول ما الورق ينزل نجرى عالمكتبه وايام المراجعة ميبقاش فية مكان فى المكتبه عشان الورق المنقذ نزل وانا مش هقول ان انا مبعملش كدا
لا بعمل كدا والمشكله ان احنا بنلاقى نتيجة مع الورق دا
فياريت يتنظر شويه لشكل المذكرات اللى ماينفعش حد يذاكر منها ولو ذاكر للاسف ممكن ميعرفش يجمع وبالتالى هيرجع تانى لورق الدروس المنظم...
وربنا يسهل ويعدى السنة دى على خير

[Dr/HULK]

واضح انك ناوي من زمان .. ..

كان نفسى اعمله فى اخر شهر مارس اللى فات

لما شفت كتاب الميكرو

وكمان لما كتاب العضوية اتأخر كتييييييييير

عموما الموضوع ده بتاع الاقسام مش بتاع الكليه

دى مش فاهمها

ولو اللى فهمته صح تبقى كوميديا

عذرا فى التعبير بس دا اللى عندى

[Mohamed Al Gohary]

يعني المسئول عن المذكرات وعن وقت اصدارها وعن اسعارها .. وعن كل شئ يخصها هو القسم يعني مثلا مذكرات الميكرو المسئول عنها مسئوليه كامله هو قسم الميكرو ..

اظن واضح

[Dr/HULK]

يعني المسئول عن المذكرات وعن وقت اصدارها وعن اسعارها .. وعن كل شئ يخصها هو القسم يعني مثلا مذكرات الميكرو المسئول عنها مسئوليه كامله هو قسم الميكرو ..

اظن واضح

طب وادارة الكلية فين من الحكاية دى!!!!!!!!!!!!!!!!

يعنى دلوقتى لو انا عندى صيدلية

وفيها دكتور للتركيبات

يبقى هو المسئول عنها ومليش دخل انى احاسبوا

حتى لو الناس اشتكوا من المنتج اللى بيخرجه؟؟

بيتهيألى لازم ادارة الكلية يكون ليها دور فى الحكاية دى

لانها مش مسئولة عن الطلبة بس انما مسئولة كمان على اقسام الكلية

يعنى لو القسم اتأخر فى تنزيل المذكرات او مثلا زى الميكرو المذكرة سيئة يبقى مش هيبقى لينا غير الادارة

[white light]

والله يا دكتور انا بحب اذاكر من الكتب بحس ان فى كليه محترمه وبدرس حاجات مهمه

مش شويه ورق هفق احفظلى كلمتين واخش اقولهم فى الامتحان


انا كنت براحع من الكتاب ورا الدكاتره فى العقاقير والصيدلنيات بس علشان احلل

فلوسهم وذاكرت من كتاب د عبد المنعم طول السنه والحمد لله مجبتش ورق خالص

الا المراجعه وجزء دثناء ود الصباغ التيرم الاول ذاكرت من الكتاب كان حلو وكنت بتابع

منه وفهمت منه لكن التيرم التانى مكنتش بعرف اتابع وراهم اصلا

والتحليليه كتاب طلاسم والعضويه يعنى كان جزء د حسن بس مكنتش بعرف اذاكر

منه حاجه

يعنى بتهيالى لحل المشكله دى ان كل دكتور يخش ومعاه الكتاب ويقول هو فى

صفحه ايه ويشرح زى ما الكتاب بيقول و لو فى حاجه زياده يقولنا نكتبها حتى علشان

الكتاب يبقى ليه اهميه

[DR.BIBO]

انا مع كل الدكاترة فى اللى قالوه ان الكتاب لو كان منظم وواضح وفى فهرس والكتاب ماشى مع كلام الدكتور فى المحاضرة كنا هنرتاح كتير وده كان السبب فى انى عملت الموضوع ده: http://www.pharma-board.com/board/sh...ad.php?t=11264