عمل المراه بين القبول والرفض

[The Princess]

دكتور sowtrig
عحبني رايك جدا و بالرغم من طوله الا انى قريته كامل و لكن احب اعلق على نقطة معينة :

أنا عن نفسى مش بحب العمل فى مكان فيه إختلاط بالرغم من إنى راجل وحياء البنت المفروض يكون أكتر بكتير من حياء الراجل ....

اذا كان الموضوع كده فياريت تشوف شغلانه تانيه غير الصيدلة لانك مش معقول هتمنع الستات من دخول الصيدلية لشراء الدوا و على فكرة اى صيدلية لازم يتوفر فيها العنصر النسائى و ده علشان الحقن و لف الجروح و كمان ساعات بيبقى فيه ادوية و حاجات تخجل الست من انها تطلبها من الصيدلي الراجل صعب يا دكتور صعب جدا فى مجالات كتير اوى فى الحياة انك تفصل الراجل عن الست كل واحد يتقى الله و خلاص ..
و فيه نقطة كمان و دى للموضوع ككل لانى نسيت اتكلم فيها :

بس حتى لو الشغل مهم فى حياة البنت, فانا رأيى إن كيان البنت الأنوثه, وزوجها هو اللى هيحسسها بكده, مش الشغل والبهدلة

معاك حق بس للاسف اللى الواحد بيشوفه دلوقتى و لان كتير من الرجاله معدوش رجاله بمعنى الكلمة بقى الشغل هو الحاجة الوحيدة اللى ممكن تحميها من جوزها مش من الفقر و لا الحاجة ...
يا جماعه البنات فعلا بقى عندها حالة من الخوف خايفه تتجوز و جوزها يبخل عليها خايفه يرميها فى اى وقت خايفه انه يتجوز عليها خايفه انها تيجى تطلب اى طلب يعايرها بصرفه عليها يبقى ايه الحل ؟؟؟
تطلق و تشرد اسرة كاملة و لا تستحمل و تنزل تشتغل و تحمى نفسها منه و امرها لله ؟؟؟
تحياتى للجميع ..

[summer breeze]

انا بشكر كم ياجماعه على تفاعلكم مع الموضوع وعلى طريقه العرض الحلوه اللي كل واحد قال بيها وجهه نظره
وطبعا بشكر د/ عامر على المشاركه القيمه بس عاوزه اساله المشاركه دي تعني ان حضرتك من الرافضين لعمل
المراه وان سبب الرفض ديني ؟وكمان بشكر جدا د/PRINCESS على ردها وبالذات النقطه الاخيره لما قالت ان المراه احيانا بتشتغل علشان تحمي نفسها من زوجها ودي يادكتور فعلا حالات واقعيه بنشوفها بعنينا وبنسمع عنها في الاعلام وفي الحالات اللي زي دي الزوجه بستحمل قهر الزوج وظلمه علشان تربي اولادها لان ملهاش مصدر دخل تاني غير جوزها حتى لو كان اهلها عايشين فاكيد هي هتحس انها هتبقى عبء عليهم خصوصا بقى اذا كان معاها اولاد وده طبعا بيبقى صعب جدا عليها برضه عاوزه اعرف راي حضرتك ياد/ عامر في النقطه دي وطبعا في انتظار ردود باقي الاعضاء ولسه برضه مشاركه الاولاد محدوده شكله الموضوع مش عاجبهم والبنات كمان عاوزين منهم ردود اكتر من كده وسلاااااااااااااااام

[Anas]

الموضوع جميل جدا

و أنا و الحمد لله عندي رأي ثابت في المسألة دي


مبدئيا الشغل مرفوض لأسباب عديدة
‏*مكونش راجع من الشغل تعبان و هي كده برضه
آجي أقولها عاوز أتغدى تقولي عندك في المطبخ !!!
‏"حد ييجي يقولي هو انت هتشغلها خدامة ؟!! ... في فرق كبير طبعا "

‏*خروجها للشغل في أي مكان هيعرضها طبعا للاختلاط و ده مرفوض بتاتا

دي كانت بعض الأسباب ... و في غيرها شخصي كتير

انما كل حالة و ليها ظروفها
لو أنا ربنا قدرني اني أكفل ليها حياة كريمة فيها المتطلبات الأساسية .... يبقى متشتغلش

انما لو ربنا مقدرنيش يبقى ممكن تشتغل في اطار الضوابط المعروفة
و الشغل ده هيبقى حاجة عارضة مش أساسي لحد ما تزول الظروف اللي شجعت عليه

و الواحد و هو بيفكر كده لقيت ان أفضل زوجة "بعد التأكد من الأخلاق و التربية و الدين طبعا "
أفضل لو كانت صيدلانية ..... !!!!
يوم ما تتكلم ... و تقول عاوزة أشتغل ...
الصيدلية في البيت تحت ... و مترخصة من السنة اللي فاتت ... و التجهيز على حسابي كمان

و دي الحالة الوحيدة تقريبا اللي ممكن أوافق عليها بدون ما يكون في سبب قوي للشغل


و طبعا مسألة الشغل دي من المسائل الرئيسية و الهااااامة جدا
اللي هيتم الاتفاق عليها قبل الزواج علشان نكون على نور من أولها

ربنا يكون في عونها

و شكرا مرة تانية على الموضوع

[summer breeze]

شكرا يادكتور انس على ردك على الموضوع وحضرتك كده اول واحد قال بشكل صريح العمل مرفوض بشكل قاطع
وحضرتك قلت في اسباب الرفض انك رافض لانك مش عاوز زوجتك تهمل في حقك لما تعوز تتغدى ومتلاقيش غدى
وده راي متفق مع الدكاتره اللي ردوا قبل كده لكن السؤال بقى في السبب التاني وهو ان العمل هيعرضها للاختلاط وده مرفوض تماما نقطه الاختلاط دي ياجماعه خارجه عن ايد المراه لان في مجتمعنا مفيش مهن مقتصره على احد الجنسين دون الاخر الانادرا فاحنا لو اعتمدنا مبدا عدم الاختلاط ده مفيش ولا ست هتشتغل مش كده ولا ايه رايكم يا دكاتره مستنيه اراؤكم وردودكم ولسه النقاش متحسمش

[The Princess]

انا قريت الردود تانى و لقيت ان كل الولاد فعلا رافضين و ان اختلف شكل الرفض من شخص للتانى ...
عندى سؤال لكل واحد فيهم بقى و ياريت يجاوبوا من غير كذب او تجمل :
هل عندك استعداد تاخد زوجتك اللى قعدتها فى البيت كل اسبوع و تخرجها و تفسحها و المقصود هنا مش انكم تروحوا تزوروا حد ...لا تاخدها و تخرجوا لوحدكم و تفسحها حسب امكانياتك المادية ؟؟؟
هل عندك استعداد انك و انت راجع من الشغل تفتكر انها كانت بتحب الايس كريم - ده مثلا - و تجيبلها معاك و انت راجع ؟؟؟
هل عندك استعداد تقعد معاها 4 ساعات كل يوم تتكلموا و تعرفها الدنيا بره فيها ايه من دون ما تدخل وجهة نظرك فى الحكايات ؟؟؟
هل عندك استعداد يوم الجمعه و انت اجازة تقولها ارتاحى انتى - ما هى شغاله طول الاسبوع فى البيت و طالع عينها - و تقوم انت تحضر مثلا الغدا ؟؟؟
لو كانت اجابتك على كل الاسئلة اللى فاتت دى ب ( لا ) يبقى ياريت يا ابن الناس تدور لمراتك على شغل من دلوقتى بدل ما تموت من الوحدة و الفراغ و الملل و فراغة المخ .......

[Anas]

قلت في اسباب الرفض انك رافض لانك مش عاوز زوجتك تهمل في حقك لما تعوز تتغدى ومتلاقيش غدى

تقريبا حضرتك مش أخدتي بالك من المقصود من المثال ده
يمكن أنا موضحتش الفكرة كويس

يا دكتورة ... نقطة الغدا دي مجرد مثال على واجبات الزوجة في بيتها
و دي أبسط حاجة و أول حاجة تقريبا بتحصل لما الراجل يرجع من شغله

نقطه الاختلاط دي ياجماعه خارجه عن ايد المرأه لان في مجتمعنا مفيش مهن مقتصره على احد الجنسين دون الاخر الا نادرا

لو مفيش الا كده ... يبقى بلاش منه
لحد ما يبقى في ظروف محترمة فيها انفصال و عدم اختلاط

فاحنا لو اعتمدنا مبدا عدم الاختلاط ده مفيش ولا ست هتشتغل

يبقى أحسن و أكرم ليها

مستنيه اراؤكم وردودكم ولسه النقاش متحسمش[/COLOR]

مفيش حاجة اسمها موضوع زي ده يتحسم
الحاجات اللي زي دي وجهات نظر نادرا لما تغير الا تحت أقسى الظروف

و شكرا مرة تانية لطرح الموضوع

[Mohamed Al Gohary]

انا عن نفسى موافق ومؤيد لعمل المرأة .. احنا بنعيش فى ظروف صعبه يا جماعه فى مصر ..

أما نقطة الاختلاط .. فالاختلاط موجود فى كل مكان .. يعنى انا لما آجى أجوز واحده .. وخريجة صيدله يا دوكتور أنس .. فهى هتكون عاشت وسط اختلاط فى الثانويه العامه .. والاكبر الاختلاط فى الكليه .. فى المحاضرات فى السكاشن فى الدروس فى كل حاجه .. وانا اخترتها يبقى هى اكيد على قدر كافى من الاخلاق .. اذا اللى خلاها تحافظ على نفسها فى الاختلاط ده كله .. هيخليها تحافظ على نفسها فى الشغل لو كان فيه اختلاط ..

والا بقى يا دوكتور انس تشوف واحده مش متعلمه مخرجتش من بيت ابوها الا لما تعبت وراحت المستشفى ..

وشكرا ..

[RASPUTIN]

والله اذا كان شغل مراتي-لو جت- معناه انها تهمل في حق بيتها يبقي لا والف لا.....

لو معناه انهي تهين كرامتها يبقي برضه لا والف لا.....

وبعدين ردا علي دكتوره The Princess....
ايه المشكله اني اخدها كل يوم افسحها....
ايه المشكله اني وانا راجع م الشغل اجيبلها الحاجه اللي هيا بتحبها...
ايه المشكله اني اعد الك معاها لمده 24 ساعه حتي....هوا احنا متجوزين عشان نعد ساكتين ومكلمهاش بس الا اما اعوز منها حاجه.....؟؟
ايه المشكله اني اساعدها كل يوم في شغل البيت مش يوم الجمعه بس....
اذا كان رسول الله صلي الله عليه وسلم كان يساعد زوجاته
وقد قال صلي الله عليه وسلم ....:"خيركم خيركم لاهله وانا خيركم لاهلي....."
هوا انا مثلا هاكون احسن منه.....؟؟!!!!!!!!!!!!!!!!!!!!!!!!!!!
عموما شكرا علي اثاره الموضوع....

[summer breeze]

تقريبا حضرتك مش أخدتي بالك من المقصود من المثال ده
يمكن أنا موضحتش الفكرة كويس

يا دكتورة ... نقطة الغدا دي مجرد مثال على واجبات الزوجة في بيتها
و دي أبسط حاجة و أول حاجة تقريبا بتحصل لما الراجل يرجع من شغله

لا يا دكتور انس انا فهمت قصدك بدليل اني قلت ان ردك متفق مع راي الدكاتره اللي قبل حضرتك واللي اجمعوا على رفض الشغل اذا كان هيتعارض مع واجبات الزوجه المنزليه بس انا حبيت اقتبس ردك بالنص مش اكتر

نقطه الاختلاط دي ياجماعه خارجه عن ايد المرأه لان في مجتمعنا مفيش مهن مقتصره على احد الجنسين دون الاخر الا نادرا

لو مفيش الا كده ... يبقى بلاش منه
لحد ما يبقى في ظروف محترمة فيها انفصال و عدم اختلاط فاحنا لو اعتمدنا مبدا عدم الاختلاط ده مفيش ولا ست هتشتغل يبقى أحسن و أكرم ليها

يادكتور الاختلاط ده مساله مرفوضه والبنات بتنادي بمنع الاختلاط اكتر من الاولاد لان ده هيوفرلهم راحه وحريه اكتر ده شيء كلنا متفقين عليه لكن يادكتور لازم نكون واقعيين يعني لو حضرتك خطبت بنت كويسه جدا واخلاقها عاجباك بس اشترطت عليك انها تشتغل هتقولها لا علشان فيه اختلاط ابسط رد هترده عليك قلي مكان مفيهوش اختلاط وانا اشتغل فيه تاني حاجه يادكتور في بنات كتيره هترجع موضوع الاختلاط ده لثقتك فيها وفي اخلاقها يعني ما حضرتك كمان اكيد هتشتغل وهتختلط بالبنات سواء في العمل او كمريضه فممكن خطيبتك كمان تقولك انا واثقه فيك اشمعنى انت متثقش فيا

مفيش حاجة اسمها موضوع زي ده يتحسم
الحاجات اللي زي دي وجهات نظر نادرا لما تغير الا تحت أقسى الظروف

انا معاك يادكتور وهو جه اختيار غير موفق مني للكلمه اعذرني ومنك نستفيد

و شكرا مرة تانية لطرح الموضوع

]العفو يادكتور بالعكس كل الشكر ليك على ردك على الموضوع وعلى استجابتك للنقاش وتوضيحك للنقط اللي انا رديت عليها وياريت تنور الموضوع مره تانيه وتقول رايك في الكلام اللي انا قلته ومستنيه اراء اكتر منكم يادكاتره وسلااااام

[عامر إبراهيم]

جزاكم الله خيرآ يا جماعة على تعقيبكم على ردى,

دكتورة the princess, أنا أقصد المكان اللى بشتغل فيها من حيث زملائى فى العمل, وعلى العموم أنا إن شاء الله توجهى مش صيدلة أو صيدلية وربنا يسهل رغم إنى ناوى أفتح صيدلية بس فقط كمصدر داخل اولى وثابت لكن مش بفكر أقف فيها حتى أول ما تشتغل إن شاء الله, ومش ناوى فعلآ أشتغل فى الصيدلة بس مش للسبب إن هيكون فى تعامل بينى وبينى مريضات نساء أكيد يعنى, لكن فى مجالات كتير أنا حبتها وعرفتها و بدأت أركز عليها من دلوقتى وربنا معانا إن شاء الله ....

لكن أنا كنت أتمنى إن مثلآ الصيدلية تكون كبيرة ومحترمة كده وقسم نسائى وقسم رجالى, و ربنا يقدرنى إن شاء الله وأفضى باعدين لمجال الصيدلة وأعمل الفكرة دى إن شاء الله ....

معاك حق بس للاسف اللى الواحد بيشوفه دلوقتى و لان كتير من الرجاله معدوش رجاله بمعنى الكلمة بقى الشغل هو الحاجة الوحيدة اللى ممكن تحميها من جوزها مش من الفقر و لا الحاجة ...
يا جماعه البنات فعلا بقى عندها حالة من الخوف خايفه تتجوز و جوزها يبخل عليها خايفه يرميها فى اى وقت خايفه انه يتجوز عليها خايفه انها تيجى تطلب اى طلب يعايرها بصرفه عليها يبقى ايه الحل ؟؟؟
تطلق و تشرد اسرة كاملة و لا تستحمل و تنزل تشتغل و تحمى نفسها منه و امرها لله ؟؟؟

بصراحة يا دكتورة ردك صعب جدآ, أنا مش متصور إن فى حد ممكن يفكر فينا كده, ومش متصور أكتر إن فى رجالة كتير كده وإن كان فى قلة قليلة جدآ, وياريت يا جماعة نسيبنا من التلفزيون والإعلام الفاسد الى بيروج أفكار غلط جدآ عن المجتمع وظروفه, وأقرب مثال إن معظمنا كان داخل الجامعة وفاكرها حياة تانية غير اللى قابلها لما عاشها بنفسه ....

وياريت يا دكتور تخلى عندك أمل بربنا, وتحاولى من الأول تختارى رجل متدين يقدرك ويراعى ربنا فى حضرتك, وكل البنات إن شاء الله, لو هتختاروا من الأول راجل غنى وكده ومش متدين يبقى عندكم حق تخافوا فعلآ, والمفروض تريحوا نفسكم وتختاروا ذى الدين واللى تكونوا مرتاحين ليه كمان ....

طبعا بشكر د/ عامر على المشاركه القيمه بس عاوزه اساله المشاركه دي تعني ان حضرتك من الرافضين لعمل
المراه وان سبب الرفض ديني ؟

الشكر لحضرتك على الموضوع يا دكتور علشان كلنا نعيد تفكير فى النقطة دى ونبص للموضوع من جميع الأبعاد ونتعلم ونعرف رأى أقرب للصح,
طبعآ لو الظروف والشروط اللى الدين طالبها مش متوفرة مش هوافق لأنى عارف إنى زوجتى نفسها مش هتوافق على كده,
لكن لو الوقت مناسب والمكان مناسب والشروط متوفرة يبقى ماقدرش أرفض لواحدى, ولازم يكون فى إتفاق بينى وبين زوجتى على أساس ظروفنا وقتها و ظروف البيت والاولاد, لأن أنا برده متاكد إن زوجتى مش هتسمح لشغل أو خلافه يؤثر على البيت بس أنا مبدئيآ مش موافق فعلآ وده مش رأيى واحدى لأن حاجة زى دى مش ينفع فيها آراء فردية .......

هل عندك استعداد تاخد زوجتك اللى قعدتها فى البيت كل اسبوع و تخرجها و تفسحها و المقصود هنا مش انكم تروحوا تزوروا حد ...لا تاخدها و تخرجوا لوحدكم و تفسحها حسب امكانياتك المادية ؟؟؟
هل عندك استعداد انك و انت راجع من الشغل تفتكر انها كانت بتحب الايس كريم - ده مثلا - و تجيبلها معاك و انت راجع ؟؟؟
هل عندك استعداد تقعد معاها 4 ساعات كل يوم تتكلموا و تعرفها الدنيا بره فيها ايه من دون ما تدخل وجهة نظرك فى الحكايات ؟؟؟
هل عندك استعداد يوم الجمعه و انت اجازة تقولها ارتاحى انتى - ما هى شغاله طول الاسبوع فى البيت و طالع عينها - و تقوم انت تحضر مثلا الغدا ؟؟؟

أسئلة حضرتك غريبة يا دكتور, لأنها المفروض إنها حاجة طبيعية فى البيوت, بغض النظر عن إن فى بعض الناس ربنا يهديهم يارب مشددة على بيوتهم ومن غير داعى بس هما قلة يعنى.
وإن شاء الله دى زوجتى وأنا أكيد عارف إن قعدة البيت تخنق, ووحشة علشان كده أنا مش ناوى أخرج مرة واحدة بس أو أجيب آيس كريم بس, وربنا يقدرنى يارب وأجيب كل حاجة تكون مفيدة أو كويسة لزوجتى ....

بالنسبة ليوم الجمعة, هو طبعآ ماعنديش مانع إنى أساعد فى البيت الإسبوع كله كل ماتسنح الفرصة, لكن حضرتك بتقولى إنها شغالة فى البيت طول الإسبوع, طب ما أنا شغال برده المفروض طول الإسبوع وتعبان أنا كمان, وباعدين مش علشان أنسيها تعب شغل البيت يبقى أتعبها فى شغل برده ولا إيه؟؟؟؟