يادكتور متفائل
للأسف ومش للأسف أوي
إن النشاط الطلابى بيمنع الأنشطة ذات الطابع الدينى و السياسى
نيجى لنقطة أسرة الحياة " سابقآ " أسرة الشروق "قبل أن يتم حلها قبل عامين"
كلنا عارفين إن الأسرة إمتداد للعمل السياسى لجماعة الأخوان المسلمين
الذكاء هو الحصول على أقصى ماتستطيع الحصول عليه فى أي مكان
يبقى هو يا إما نعمل اللى عايزينه وبمزاجنا يا إما مش عاملين حاجة
الحمد لله فى أسر كويسة فى صيدلة المنصورة وبتعمل شغل ممتاز جدآ وعلى جميع الإتجهات سواء الخيرية و التطوعية أو الإجتماعية أو العلمية, وفى أسر خير ممثل بأفعالهم وليس كلامهم عن الإسلام, ولا يوجد منا من هو ملاك معصوم من الخطأ, ربما يكون هناك تجاوزات نتفق سويآ على وجودها, ولكن إنسحابنا و إصرارنا على تنفيذ رغباتنا بالطريقة التى نريدها أو فلا نشاط, فده مش ذكاء.
وبخصوص حل أسرة الشروق, فعلى حد علمى هو إقامة معرض بدون موافقة إدارة الجامعة, وعلى فكرة يادكتور, ياما إتلغالنا شغل بسبب إدارة الجامعة, بالرغم إن نفس الشغل إتوافق عليه لناس تانين, بالرغم من إن طبيعة الشغل علمية بحتة... ولكن مالا يدرك كله لا يترك كله, وربنا يقدر الجميع على اللى يقدروا عليه.
وبخصوص موضوع النشاط السياسى جوه الجامعة, فده مش خاص بأنشطة جماعة الأخوان بس, لأن أي نشاط أو أسر على علاقة بالأحزاب الأخرى سواء الغد أو الوطنى أو غيرهم مش بيحصل فى الجامعات المصرية ولو حصل بيتلغى وبيتعاقب المشتركين فيه وبالفصل من الكلية وليس فقط الحرمان من مادة أو مادتين.
وعلى حد علمى برده إن الحرمان من مادة معينة بيكون راجع للقسم بعينه مش لمجلس الكلية.