يوميات إبليس بيه وأبو جهل

[*محبة رسول الله*]

بسم الله الرحمن الرحيم

((يوميات ابليس بيه وابو جهل))

متجدد باستمرار ان شاء الله

هذا ان لم يتم حذف الموضوع


حبيت اقدم لكم مسلسل ابدا لا ينتهي ولكن الحلقات المكتوبه ستنتهي لكن في الحقيقه هي لن تنتهي الا بقيام الساعه ، اتمني اقرأ ارائكم ..

الحلقه الأولي

ــ صباح الفل يا ابليس بيه

ــ صباح الخير يابني .. اطلع بينا علي سنه 622

ــ ياااااه سعادتك ايه اللي هيوديك هناك .. دا الدنيا كانت صعبه اوي ايامها

ــ وحشوني والله يا عكروت .. أعمل ايه بقي .. نفسي اشوف ابو جهل

ــ ماتشوفش وحش يا بيه .. وصلنا خلاص

ينزل ابليس من العربيه .. ويخبط الجرس علي بيت ابو جهل .. تفتح له الشغاله

ــ الاستاذ ابو جهل موجود

ــ ايوه موجود .. مين حضرتك

ــ قوليله ابليس

ــ دقيقه واحده

يخرج ابو جهل

ــ اهلاااااااان .. إزيك يابو مُـرّه .. واحشني يا راجل .. ايه الغيبه الطويله دي

اتفضل اتفضل

ــ والله هفيت علي بالي اليومين اللي فاتوا .. والعالم بتوع القرن الواحد وعشرين خنقوني .. قلت اجي اشرب معاك كاسين .. حجرين .. الموجود بقي .. أي حاجه

ــ علي حسابي ولا علي حسابك ؟

ــ أيووووه عليك .. انت لسه زي مانت .. يا راجل دانا بقالي متين سنه مشوفتكش .. ده اللي انا علمتهولك ؟

ــ اه .. ههههههه .. طب اقعد بس اقعد .. دا الحاله بقت كرب اوي .. ونفسي أفضفض لك شويه

ــ خير يا أبو جهل

ـ
ــ فاكر لما المسلمين هاجروا يثرب ومن بعدها مشوفناش يوم حلو .. والعمليه نشفت أوي وبدأوا يقفلوا علينا طرق التجاره .. العيشه بقت صعبه اوي يا ابليس ياخويا

ــ بس بس قطعت قلبي .. طب انا جايلك في مشوار حلو .. هيفتح نفسك

ــ مشوار ايه يا معلم .. قوللي

ــ شوف يا سيدي .. انا جايلك دلوقتي من القرن الواحد وعشرين .. في شغلانه جامده اوي في مصر ظبطتها تظبيطه ما حصلتش .. وانا حاسس بيك قلت اجي اخدك تتفرج .. أرفع من روحك المعدنيه شويه

ــ بس ميكونش التظبيط الخايب بتاعك زي شغلانه من كل رجل قبيله دي

ــ كدا برضه .. الله يسامحك .. بس اطمن المره دي هتيجي جون يعني هتيجي جون

_ والمشوار دا هنروحه ازاي ؟؟

ــ اركب بس اركب .. ما تخافش مش هأخرك

ركب أبو جهل العربيه مع ابليس ووصلوا القاهره .. أبو جهل تَـنّح

ــ ايه دا يا ابليس يا خويا .. احنا لسه في الدنيا ؟؟

ــ ههههههه .. جمد قلبك يا راجل .. احنا بعد 1400 سنه من أيامكم

ــ وايه الناس دي عاملين في نفسهم كدا ليه !!
ــ ايه مش عاجبينك ؟

ــ يعني .. الستات لابسين عريان اوي .. والرجاله شكلهم شبه الستات .. وبص الواد دا ماشي مع البنت ازاي .... اخص عالرجاله

ــ هههههههه .. يا راجل متقولش كدا .. دول علفكره مسلمين

ــ إيه ؟؟ .. هو دين محمد وصل لغايه هنا

ــ آه طبعاً من زمان اوي .. بص الجوامع أد ايه .. واللي انت سامعه دا اسمه الآذان .. بينادوا ع الناس وقت الصلاه عشان يصلوا
الله ؟؟ .. امال مالهم قاعدين كدا مبيتحركوش .. وعشره عشرين واحد بس اللي داخلين الجامع

ــ آه .. أصل النهارده فيه ماتش .. واللي قاعدين دول بيتفرجوا ع الماتش في القهوه

ــ ماتش ؟؟ .. ايه دا ؟؟

ــ دي فكره حلوه من أفكار أخوك .. الناس بتحب الرياضه .. فيها حاجه دي ؟
ــ لأ مافيهاش

ــ أنا قعدت بقي اكبرها وأنفخ فيها لحد ما الناس بقت تحبها اكتر من الصلاه

ــ يا ابن الاييييييييه .. دانت هتروح جهنم حدف

ــ فال الله ولا فالك .. فقري طول عمرك

ــ بس ايه اللي مكتوب عالحيطان دا ؟؟ .. الاسلام هو الحل ؟؟ حل ايه ؟؟

ــ ماهو دا اللي انا جايبك عشانه

ــ طب نورني .. ايه الموضوع

في الحلقه القادمه ان شاء الله هنشوف ايه الموضوع

فانتظرونا

دمتم في رعايه الله

على فكرة الموضوع ده

transfered

أرجو الموضوع ميتحذفش

ولو اتحذف مش مشكلة برده

[زهرة الإسلام]

حلوة اوى الفكرة دى
تسلمى علىالموضوع الشيق دا وياريت ماتشوقناش كتير

[Retag]

حلو اوى يا هاله ومتابعين ان شاء الله

[NeScaFE]

متابعين يا هالة

[*محبة رسول الله*]

الحلقة الثانية


شوف يا سيدي .. بعد الأيام بتاعتكم المسلمين وصلوا للدنيا كلها وحكموا البلاد دي بالقرآن اللي جابه محمد
- أيوووووووه .. حكموا البلاد دي
- آه امال ايه .. بس اخوك ما سكتش
- أيوه طمني كده .. عملت ايه بقى ؟؟
- فضلت ورا ناس منهم .. لغاية ما طلعت في دماغهم إن القرآن ده كان بتاع زمان بس .. وما ينفعش الزمان ده
- معقول ؟؟ وصدقوك ؟؟
- طبعا .. ومن يومها بطلوا يحكموا بالقرآن .. وفضلوا يحاربوا الناس اللي عايزة تحكم بالقرآن .. ويقولوا عليهم أسامي تضحك أنا اللي علمتها لهم .. رجعيين .. متخلفين .. متطرفين .. إرهابيين .. حوارات كده
- الله ينور عليك .. أهو كده الشغل الصح .. طب ليه بقى رجعوا يكتبوا الإسلام هو الحل عالحيطان
- أصل مع الوقت الناس اللي انا ربيتهم دول بقوا حرامية كبار أوي .. وسرقوا كل حاجة في البلد .. لحد ما ناس بقت مش لاقية تاكل ..
(وفجأه يسمعوا صوت واحد بيصرخ .. الحقونيييييي .. هيموتونيييييييي)
أبو جهل - ايه ده ؟؟ .. تعال نخلص الراجل ده بسرعة ده بيستنجد بينا .. أنا جاااااااااااي
إبليس - بس بس رايح فين .. انت اتجننت و لا إيه ؟
- اتجننت ؟؟ .. انت مش سامع الراجل بيستنجد بينا .. دول بيسرقوه وهيموتوه .. ده واحد رافع عليه سيف
- لا ما تقلقش .. ده عادي دلوقتي دول عايزين يسرقوا حاجه منه اسمها الموبايل وده حاجه حكايتها حكايه هبقى اقلك عليها بعدين .. ايزي يا جوجو
- إيه اللي عادي .. ما حدش ينجده ؟؟
- آه .. ما هو أنا خليت الناس دلوقتي تنسى حوارات النجدة والمروءة .. والوهم بتاعكوا بتاع زمان ده .. دلوقتي لو واحد قعد ينادي على الدنيا كلها الناس ولا هاتعبره
- اخص على الناس .. ده انت بوظت الناس خالص يا جدع.
- أمال كنت فاكرني بالعب الكام ألف سنة اللي فاتوا دول .. شغل يابا
- وبعدين
- رجع الناس يفكروا تاني يحكموا بالقرآن .. وناس كتير طلعت تقول ان الإسلام هو الحل .. بس أنا كنت مظبط بقى شوية ناس يطلعوا في الفضائيات والجرايد فترة طويلة .. الناس وثقت فيهم وبقوا يصدقوهم .. وخليتهم يقولوا إن الإسلام ما ينفعش حل .. وخلينا نجرب فكر جديد وكلام من ده .. وادونا فرصة تانية
- يعني معقول فيه ناس لسه بتفكر يحكموا تاني بالإسلام .. زعلتني يا شيخ
- ما تقلقش .. أخوك شغال .. هم في الآخر اتفقوا يخلوا الناس هي اللي تحكم بينهم .. اللي تختاره الناس يمشي .. عشان كده كل فريق منهم بيعمل إعلانات لفكرته .. ومنها اللي مكتوب عالحيطان ده .. وبيسموا الشغلانة دي انتخابات
- طيب وانت ايه اللي مخليك مطمن أوي ان أغلب الناس مش هتختار الإسلام هو الحل
- لا طبعا .. هو الموضوع مش كده .. تعالى بس اوريك .. انا معزوم النهارده مع اصحابي على قعدة كده عشان نظبط موضوع الانتخابات ده
- وإيه الزحمة دي .. الناس دي كلها بتعمل ايه ؟
- ده واحد نازل الانتخابات وجايب الناس في الشادر ده عشان يقول لهم هيعمل ايه
- ده من بتوع الإسلام هو الحل وللا من اصحابك ؟
- لا ده ولا ده .. أصل فيه ناس تانية كتير مش عاجبها اللي عملناه في البلد .. وبيقولوا لازم نصلح البلد ومش شرط نقول الإسلام هو الحل لإن كل الناس مسلمين .. بس بيني وبينك اصحابي خايفين منهم أوي عشان ناس نضيفة مش حرامية زيهم .. ياللا وصلنا اهوه
( يدخلوا فيللا فخمة .. يدخل ابليس ومعاه أبو جهل .. الناس بتبص لأبو جهل ومستغربين من شكله .. مزمزة هانم تستقبلهم )
- أهلا أهلا إبليس بيه .. إيه اللي معاك ده ؟؟ .. لقيته فين ده ؟
- أهلا مزموزتي .. لا ده صاحبي عمرو .. بس هو كان رايح حفلة تنكرية وجبته على هنا وما لحقش يغير
- آآآآآآآآآآه .. تصدق ده انت فعلا شبه عبد الكعبة اللي كان في فيلم امبارح ..
- آه .. ماهو يبقى ابن اختي
- ابن اختك ؟؟ ههههههههه .. دمك خفيف أوي يا سي عمرو
- لمـّي إيدك يا ولية انتي .. .. انتي من أصحاب الرايات الحُمر وللا إيه ؟
- رايات ايه يا دلعدي .. حُمر ؟
ابليس – لا لا ما تاخديش على كلامه .. ده أصله شيوعي .. – عسل يا إبليس بيه .. عسل .. طول عمرك دمك زي العسل
ابليس – طب خلينا في موضوعنا .. الشلة وصلت وللا لأ .. كانوا قايلين لي عايزينـّي النهارده
- كلهم جوه .. مستنيينك من بدري
( يدخل ابليس وأبو جهل .. الناس يشوفوا دقنه وشكله يتخضوا .. ويلموا الورق اللي في إيديهم )
إبليس – ما تخافوش .. إيه ؟؟ .. ده عمرو صاحبي .. أمان يعني .. هو أنا يعني غشيم أجيب لكم حد كده وللا كده
- لا مؤاخذة يا بيسو .. احنا شفنا دقنه قلنا إرهابي وواخدك رهينة وللا حاجة
- يا عبيط .. انتوا هتكدبوا الكدبة وتصدقوها .. مانتو عارفين ان ما حدش بيعمل كده .. المهم .. وروني عملتوا إيه .. إيه الجديد السنة دي
واحد - كتير .. البركة فيك يا ريس
التاني – شوف يا سيدي .. أنا اتفقت مع مقاولين أصوات ندفع للناس فلوس .. ويدونا صوتهم .. هنغريهم بمبالغ كبيرة أوي .. وموبيلات .. وأكل
إبليس – طب ولما ياخد الفلوس ويديهم صوته يا حدق .. هتعمل فيها ايه دي ؟
التالت – عييييييب .. معانا أهو ورق تصويت فاضي .. هادي له اللي متعلم عليها باسمي ويديني الفاضية اللي هياخدها من جوه
إبليس – معقول برضه .. مش بطال .. غيره
الرابع – شوف يا سيدي .. عملنا كشوفات بالناس اللي في شركاتنا وكل واحد طلع لهم ولعيلتهم آلاف البطايق في دايرته
إبليس – قديمة .. ما هو الناس اللي قصادنا كتير برضه وممكن عددهم يبقى أكتر مننا
الرابع – هههههههه .. ما هو احنا بوظنا الكشوفات اللي فيها الأسماء .. ما حدش هيعرف مكانه الجديد .. أي واحد يروح يدي صوته هيحتاس ونلففه على ميت لجنة لحد ما يزهق ويروح
إبليس – براوة عليك يا وله .. أهو كده الشغل وللا بلاش .. إيه رأيك يا عمرو
أبو جهل – لا والله ما هذا بالرأي .. الناس لو مخنوقة منكم فعلا هيفضلوا يدوروا لغاية ما يعرفوا لجانهم
التاني – أمال انت رأيك فيه يا فتك ؟
أبو جهل – ليس لهم إلا السيف .. ادبحوهم .. سنقتلهم جميعا .. اسألوني انا
إبليس – اتنيل اسكت انت .. الكلام ده ما عادش ينفع .. ما تشوفوا لنا حاجة تانية يا جماعة .. فين أيام زمان لما كنا بنغير الصناديق
الخامس – ما هو الجماعة اللي جوه اللجنة دلوقتي مش تبعنا .. وما نقدرش عليهم ياريس .. وممشيينها ميري أوي
إبليس – طيب .. على أي حال خلينا نشوف .. بيتهيألي احنا نجحنا فعلا نقنع الناس ان فيه تغيير وفكر جديد .. وطلعنا بطاقات كتير .. وشوية بالفلوس .. وما فيش حد أصلا هيروح يدي صوته .. نتوكل على الله .. وربنا يسهل

ومستنياكم في الحلقة القادمة ان شاء الله.. أما نشوف آخرتها

[*محبة رسول الله*]

لا مش معقول كده خالص يا جماعه

أنهى الموضوع ده ولا ايه؟

مفيش أى كومنتات؟

شكله موضوع رخم قوى

[S!lent Tear]

موضوع عسل زيك يا هاله ومتابعين معاكى

[مهداه]

لا مش معقول كده خالص يا جماعه

أنهى الموضوع ده ولا ايه؟

مفيش أى كومنتات؟

شكله موضوع رخم قوى

اه
رخم اوى
ويا ريت تخلصيه بسرعه
يا ريت بقى تحطى كل الحلقات
يلا منتظرين
بهذر يا جميل
وحلقات جميله
ممنتظرين الحلقه الجايه

[dr_koko]

[M.32L]

جميل جداا دكتوره هاله سلمت الايادى
فى انتظار الباقى