يوميات BoNbOoNa في الصيدلية !

[Ramy Saad]

ما شاء الله تبارك الله
أنا والله مستمتع بالقراءة
بارك الله فيكم يا دكتورة

الستة اللي فاتت حصلي نفس الموقف بتاع supp و tabs
بس أهم حاجة يكون فيه همة
وده اللي أنا حسيته من الكلام وبجد سعيد جدا بالهمة العالية ديه

[BoNbOoNa]

....Thanks alot Dr. Eman
i realy appreciate your kind comment .... Thanks again
-------------
ربنا يكرمك يا د\ رامي والله اخجلتمووووووووني

الستة اللي فاتت حصلي نفس الموقف بتاع supp و tabs

طب الحمد لله ان مش أنا لوحدي ...
جزاكم الله كل خير كلكم يا اخوتي و اخواتي

[MoCo 3001]

ما شاء الله مرة تانية

اليوم السادس خطير جداً والله

سادس يوم ليكي في الصيدلية وخلاص جالك ناس مدمنين

أنا نزلت الصيدلية كمان مرة

بس المرة دي قعدت بتاع ساعتين ونص كده

حاولت برضه أقرأ الروشتات

واللي غاظني فعلاً ان كل الروشتات قريت منها دوا واحد علي الأقل
ما عدا روشتات ماما وبابا ............ معرفتش أقرأ منها ولا كلمة
لما كنت هاتجنن

والصيدلي زي ما جلال عبد الغني قالنا بيحط خطوط علي العلبة

خط واحد >>> مرة واحدة في اليوم

خطين >>> مرتين وكده يعني

بس كان في روشتة كان فيها دوا واحد بس

قالي اصرفها انت

كان مكتوب فيها Frose F ( دا دوا حديد )

هو اللي جابهولي طبعاً لأن أنا لسه معرفس الحاجات فين

قمت كتبت عليه حبة كل 12 ساعة بالعربي

وحطيته في كيسة <<< بقيت استاذ في الموضوع ده

ومشي

مستني day 7

أنا موجود لحد ما تحطيه

سلام

[muna7assan]

والله جميل جدا يا بنبوبنه
انا برضه نزلت اتدرب من فتره صغيره وكنت ناويه احكى هنا بس المشكله ان مفيش وقت
بس انا بأه معايا صيادله فا بيفيدونى كتير
وكل يوم لازم اروح بورقه كاتبنلى فيها حاجات اقراها
يعنى نوع الدوا وازاى اقرأ الروشته صح بالتركيزات والانواع ومره الفروق بين المرهم والكريم والجل فى الخواص والتركيب ......يعنى شويه من هنا ومن هنا
دا غير انها فى مصيف وجمب مستشفى يعنى امراض وروشيتات ما تتعدش
نصيحه حاولى قدر الامكان انك تكونى جنب الدكتور الصيدلى نفسه فى وقت وجوده بحيث انك تخليه يديكى معلومات كل يوم ولو حتى واحده فى اليوم من نفسه ها تفيدك جدااااا
تقبلى تحياتى

[monosh]

مرسيه لكى بنبوبة المنتدى....

أنا كمان دورت تانى وسألت أكتر...

وتقريبا نفس المعلومات اللى وصلتى ليها...

بس منك أوضح كتير طبعا...يمكن لما ندرس الحاجات دى نفهمها أكتر....

ألف شكر ليكى بنبونة...

وربنا يوفقك...

استمــــــــــــــــــــــــــــرى......

[lovely princess]

مش لاقية كلام أقوله يعبر عن الموضوع التحفة ده ...

بجد بارك الله فيكي يا بونبونة ...

انا مستمعتة جداااااااااا بالموضوع


تابعي ...

احنا في الانتظار

[BoNbOoNa]

Friday...My Vacation Day

هتكلم عن مــ & مــ ؟؟؟؟

حد يعرف يعني ايه

المعني الذي قصدته هو مواقف انسانية مع المرضي

بعضها مضحك

بعضها مبكي
و بعضها يلهمك

Scene 1

بنوتة صغنونة معاها عروسة جاية.. مع مامتها ... الأم كانت عاوزة Cataflam tab
50mg
(بقيت باخد بالي من الdosage form و التركيز اهو )
بعد ما جبتلها الدواء..لاقيت البنت بتشد كم عباءة مامتها و بتقلها في ودنها ..صوتها كان عالي لكن مكنتش عارفة اني سامعاها
......
"ماما .. ماما ... انا عاوزة بامبرز للعروثة بتاعتي"
الام قالتلي معلش هو عندكم بامبرز مقاس صغير اصل بنتي اللعبة بتاعتها بتغرقلنا الدنيا في البيت...
انا مكنتش قادرة امسك نفسي من الضحك بس ضغط علي اعصابي و قلتلها حاضر ثواني
رحت جبت واحد و رجعت
حطيته في كيسة تانية و معاها لبانة
و اديته للبنوتة
و سألتها اسم عروستك ايه
قبلت العروسة في جبهتها و قالتلي : ياثمين
قلتلها تتربي في عزك و عقبال ما تشيلي ولادك بجد ان شاء الله
مامتها اعدت تضحك فلقيت ان الفرصة متاحة اني اضحك
فضحكت... و يا ريتني ما ضحكت
لاني
فضلت اضحك طول اليوم
يا الله
فين ايام الطفولة و راحة البال

-----------------

Scene 2

دخلت امرأة عجوز الصيدلية... اخبروني بعد ذلك انها زبونة قيمة جدا من اول ما الصيدلية اتعملت
كانت روشتتها عبارة عن مسكنات و علاجات لآلام الاسنان لا اذكر اسمها
بعد ان احضرت الادوية وكتبت التعليمات علي ظهر العلب
سألتني هل الدواء الفلاني يعالج حقا ام هو مسكن مؤقت
طبعا ...تنحت !!
نظرت الي مدربتي التي كانت تقف وراء المرأة العجوز فاشارت لي بنعم ..فقلت لها نعم يعالج
لكن طبعا المرأة حكيمة فشعرت بارتباكي من السؤال
فقال لي : انتي دكتورة بجد ولا ايه ؟؟؟
انا قلتلها انا في سنة اولي صيدلة و تحت التدريب
اكتشفت بعد كده ان سؤالها ده مكنش بسبب ارتباكي ولا حاجة
دي كانت بتحاول تجر معايا في الكلام
لانها وقفت نصف ساعة كاملة تتكلم و انا انصت لها باهتمام
حكت لي تقريبا قصة حياتها كلها و قصة ابنها و بنتها
لا داعي لذكر التفاصيل
ولكن عندما تلخص لك امرأة سبعين عاما عاشتهم و تقصها عليك في نصف ساعة ....تتشرب من الحكم ما لا يحصي

و ستتيقن ان الصدف لا وجود لها .. بل كل شئ مدبر من لدن حكيم خبير
سبحان الله
ربنا يكرمك يا أم محمد
--------------

Scene 3

كل حين و اخر يأتي أشخاص لقياس السكر او الضغط في الصيدلية

كل واحدة من مدرباتي لها طريقتها الخاصة في التعامل مع هؤلاء الأشخاص
احداهن لا تنظر الي المريض اطلاقا تضع الجهاز و تقيس و تقوم بعملها دون اي تعبير علي وجهها ...كأنها لا تفعل شيئا حقا
ثم تقول للرجل الرقم ... فيضع النقود علي الزجاج امام مدربتي و ينصرف
و اخري ... تقوم بقياس ثم تخبره بالرقم ... و تقول له بوضوح ان كان قد تحسن أم لا ...و غالبا ما تنصحه بمراجعة الطبيب
و اخري ...تسأله متي كانت اخر مرة تناول فيها الطعام .. هل هو صائم ام لا ... كيف هي احواله النفسية
ثم تقوم بالكشف و تقول له ما شاء الله جيد جدا ...حتي و ان كان سيئا و مرتفعا (مرة وصل لحد 200\120) لا تفزعه بل تخبره بانه بانه جيد ولكن مرتفع بعض الشئ و تطيب خاطره و تطلب منه مراجعة الطبيب و ان يمر بعد يومين لتعيد القياس مرة اخري
لن تستغربوا ان قلت ان كل من قاست لهم مدربتي (الاخيرة)
يأتون دائما للقياس عندنا ...و يخرجون مطمئنين دائما
يا له من هدف سامي..ان تنشر الطمأنينة بين الناس
و ما اروع من يسعون لذلك
التقدير كل التقدير لهم
------------

(طبعا انا مجربتش اقيس لا سكر ولا ضغط ... اكتفي بالمراقبة عن قرب فقط ..مؤقتا)
---------------

Scene 4

ما هذا؟؟؟
قلم الانسولين
لا يعرفه الكثيرون لانه لم ينتشر الا حديثا
--------
جاءت سيدة بعد صلاة الظهر بقليل لا اذكر كم كان الوقت بالتحديد
هي سمينة بعض الشئ ... تبدوا لي في اواخر الاربعينات من عمرها و يبدوا عليها التعب و الارهاق...الجو كان حارا فكانت تتعرق بغزارة لم اشاهدها الا في ماتشات الكورة ... ولا ابالغ في ذلك ..
اخرجت قلم انسولين يشبه الذي في الصورة ولكنه رمادي اللون و زجاجة انسولين و سألت مدربتي عن طريقة استخدامه
فاستأذنت منها معلمتي ان تصعد للصيدلي فوق في مكتبه لتعرف منه الطريقة بالظبط ثم ستعود لتخبرها
و اخذت منها القلم و صعدت
طلبت مني المرأة كرسيا ...
فاحضرت لها الكرسي
دعت لي دعوات لم اسمعها من قبل حتي ظننت ان رحمات الله تتنزل علينا من اجلها
ثم قالت: معلش يا دكتورة هتعبك معايا ممكن تجيبيلي مية اصل انا عطشانة اوي
ولكن
انا من كانت عطشانة اشد العطش لمثل هذه الدعوات فانطلقت لاعلي (عند التلاجة) و احضرت لها ابرد ماء وجدته
فشربت و استرسلت في الدعاء
فطمعت في المزيد من الدعوات فذهبت لاحضر لها مناديل لتجفف بها وجهها الذي يتصبب عرقا
فدعت لي مجددا ... فابتسمت و سألتها اذا كانت محتاجة حاجة تانية
قالت لأ
فانقطعت هذه الدعوات الجميلة ...
ظللت واقفة الي جانبها الي ان عادت معلمتي و وقفت اتعلم معها طريقة عمل القلم
" يتم تركيب الانسولين داخل القلم ثم تقوم بلف العداد في قاعدته الي ان يصل الي رقم الجرعة اليومية المعتادة ..التي يصفها الطبيب ثم توجهه عموديا الي فخذك او علي ذراعك مثلا و تضغط علي قاعدته لتخرج الجرعة المناسبة التي حددتها..تماما كما تضغط علي قاعدة قلم الاسنان ليخرج السن "
طلبت المرأة بصوت يبدو عليه الاحراج ان تعيد عليها معلمتي الطريقة مرة اخري
فقامت بذلك ثم اعطتها القلم لتدور اسفل القلم و تجرب ان تحدد الجرعة بنفسها
كانت متوترة فلم تستطع ان تلفه بشكل صحيح
فقالت لها معلمتي: معندكيش حد في البيت يعملهولك
فعم سكون للحظة مرة طويلة ثقيلة علي تلك السيدة علي ما اعتقد
ثم انفجرت في البكاء
فابكت معلمتي و ابكتني انا ايضا
دون ان تنطق بكلمة واحدة
وحتي الان لا ادري ما خطبها
ولكن كان بودي ان اضمها الي صدري و لكن خشيت ان يزيدها ذلك الما ... فآثرت البقاء بجوارها دون ان انطق بكلمة
انحنت معلمتي الي تلك المرأة (التي كانت تجلس علي الكرسي)
و شرحت لها الطريقة مرة اخري ببطء الي ان تمكنت بفضل الله من التعامل مع الجهاز
فدعت لنا مرة اخري و لكنني لم اكن اركز مع كلماتها في ذلك الوقت
شغلني امر آخر
شعرت بالخجل من نفسي.... فكم انا مقصرة في حق الله كثيرا
كم يوم مر علي وانا في مكرمة منعمة و لم اشكره
و كم يوم مر وقد اصابني بعض الوجع او الهم و انزعجت و لم اصبر صبرا جميلا
جعلتني هذه المرأة ادرك و لأول مرة معني جملة :
"ابتسم...فهناك دائما من هو أشقي منك "
--------------

دول اكتر مواقف اثرت فيا...فيه ملايين المواقف الاخري و لكن سأترككم تكتشفونها بأنفسكم لما تنزلوا ان شاء الله الصيدلية
قريـبا
.
.

ادعو الله ان بحفظكم و يهدينا جميعا لما فيه الخير لبلدنا و مهنتنا و انفسنا و اهلنا و دنيانا و اخرتنا
جزيل الشكر لكل من دعمني
و كل من تابع
اكمل غدا بعد العمل ان شاء الله
في حفظ الرحمن ...

~تم بحمد الله~

[lovely princess]

فوق الوصف

أكملي ...

أنا في قمة الاشتياق

[pharmacistina]

ما شاء الله صيدليتكم مثالية الى حد كبير , ربنا يبارك فيكم جميعا ..

عندي سؤال , بخصوص قلم الانسولين , لازم بيتعقم كل مرة يستخدم فيها أكيد .. صح ولا ايه ؟؟

هل أعطيتم للسيدة مطهر أو حاجة ؟؟

سؤالي عن تعقيم قلم الانسولين ..


شكرا , الى الأمام ..

[sunshine]

حقيقى انتى اكتر من رائعه يا بنبونا ربنا يكرمك يا رب

ومسنيين الباقى