تأثير الجامعة على كل واحد فينا

[*محبة رسول الله*]

السلام عليكم ورحمة الله وبركاته
أكيد الجواب باين من عنوانه
سؤال بسأله ليكم ولنفسى قبلكم
ايه تأثير الجامعه علينا؟

بمعنى هل غيرتك للأحسن ولا للأسوأ؟
امبارح كنت قاعده مع واحده صاحبتى(الأنتيم بتاع ثانوى)
لقيتها بتقولى:
فاكرة أيام ما كنا بنصوم اتنين وخميس؟
فاكرة لما كنا بنفكر بعض بالأيام القمريه ؟
فاكرة لما كان لو حد فينا صام من غير التانى تبقى خناقه؟
فاكرة لما كنا بنتصدق بكل الفلوس اللى معانا حتى لو محتاجينها؟
فاكرة لما كنت اقولك ابعتيلى الفلوس اللى معاكى فى ظرف النهارده ضرورى عشان هنعمل عمل خير؟
فاكرة لما كنا منخلعش الجوانتى حتى فى امتحانات ثانوى؟
فاكرة لما كنا نقول الأذكار واحنا ريحين المدرسة الصبح ومنتكلمش غير لما نخلصها؟
ونقولها واحنا راجعين المغرب من الدروس؟
فاكرة لما كنت اقولك انتى بتقولى ايه فى الأذكار ونقول لبعض ونرتب أذكارنا بحيث نقولها بطريقه معينه مع بعض؟

فاكرة ال 11 ركعة بتوع قبل النوم؟
فاكرة السنن اللى لو كنا بنموت منسيبهاش؟

يااااااااااااااااااااااه!!!
فين الأيام دى؟
كان فيها بركه فى كل حاجة فى حياتنا

مدعيتش دعوة غير وربنا استجابها منى
تخيلوا انى دعيت ربنا أجيب 50 فى الأحياء
أقسملكم بالله انى الوحيده فى المدرسه اللى جبت 50 .

كنت بشوف أحلام ربنا اللى يعلم بيها وحده
ومكنتش بقولها لحد.
كنت بحس ان ربنا معايا فى كل مكان
وانه حاسس بيه فى كل حاجه
وانى ازعل قوى لو حد غضب ربنا

كانت حياتى كلها مع ربنا
أتكلم معاه وأشكيله كل حاجه
عمرى ما اتكلمت مع أمى فى مشاكلى.

تخيلوا مرة كان عند ناس جيرانا فرح
وأغانى بقى ونظام

بكيت بكاء مرير عارفين ليه؟
حسيت ان ربنا زعلان.
كنت عايشه احسن عيشه
وكان قلبى مرتاح حتى لو تعبانه لأنى حسه انى مع ربنا وانه مش هيخيب رجائى فيه أبدا

ايه اللى حصل؟
عاوزة بجد أعرف ده بسسب ايه؟

العيب فينا ولا فى الجامعه نفسها؟

بجد مستنية ردودكم ان شاء الله
عاوزاكم تجاوبونى
اتغيرتوا للأحسن ولا للأسوأ؟

وايه السبب؟
وازاى نرجع زى ما كنا ان شاء الله؟

[Dr.A7med]

الجامعة في حياتي .. اكتئاب .. ثقة أقل .. ابتسامات أقل .. هم .. خنقة .. بعد عن ربنا .. مشاكل .. أنا بصراحة مفيش أي ميزة خدتها من الجامعة
وسبحان الله يا محبة رسول الله .. أسبابي هي نفس أسبابك بالضبط .. والحاجات اللي قلتيها دي هي بالمللي اللي افتقدتها في مرحلة الكلية
يا رب أفوق
أسوأ حاجة حصلتلي في الجامعة هي مستوايا الدراسي .. كنت بذاكر أيام الامتحانات .. فاكر اني كنت بذاكر في باب التكاثر في الأحياء لأول مرة الساعة عشرة ليلة الامتحان .. ومع ذلك جبت أكتر من 98 % .. المدرسين لحد دلوقتي لما يشوفوني يقولولي ما قابلناش زيك كتير .. وأنا أقول في نفسي .. يا خسارة
أما دلوقتي معادش في استعداد اني أبص في كتاب ..
فاكر الذكر .. الصيام .. القيام .. الهدوء .. الصمت .. السداد .. صلاة الفجر في عز الشتا .. صلة الأرحام .. ورد القرآن .. الصدقات .. الدروس .. فاكر نفسي أيام ما كنت عايش بتنفس .. ودلوقتي يا ألف خسارة

[drpinkysnow]

بجد الجامعة خلتنا ننسى حاجات كتير اوى كنا بنعملها زمان يعنى انا كنت ايام ثانوة وكدة اول ما اصحى من النوم لازم اقرا صفحتين فى القران وكمان مكنتش ببقى حزينة ومتضايقة كدة طول الوقت وعاد شغلى الشاغل هو المزاكرة يعنى انام واققوم عالمزاكرة وكانها جرعة دواءبس بجد بحس ان العيب فينا لان احما لو اخدنا الامور ببساطة ونعقدناش كل حاجة هنشوف الدنيا حلوة وهنرضى ربنا

[white light]

لا انا الحمد لله تعتبر الجامعه نقطه تحول فى حياتى من الاسوا للاحسن والسبب الصحبه الصالحه
انا كان مستوايا الدينى فى الثانوى كانكويش الحمد لله كنت بعمل كل حاجه لوحدى اصوم لوحدى وقيام اليل كنت بعمله من نفسى بس كنت مش منتظمه يعنى بعمل الحاجات دى بظروفها

بس الحمد لله لما دخلت الجامعه وقعت فى اصحاب خدوا بايدى الى الخير يعنى نتفق نصلى قيام مع بعض نقرا سورة الملك ونرن على البعضلما نخلصها نعمل ورد كل اسبوع نمشى عليه يعنى ببساطه بنشجع بعض اننا نرتقى بايمانا ايام الدراسه
وانا الحمد لله بحمد ربنا انهو وقعنى فيهم يعنى من راى دليل حب ربنا للواحد انه يرزقه الصحبه الصالحه

اما بالنسبه للدراسه وايام المذاكره بجد والمسؤليه اللى كنت شايلها وشيلان الهم وتحديد المصير مدى ايام عدت وراحت مش عارفه ليه لكن دلوقتى مستواياه فى المذاكره بقى فى الحضيض من بعد 98% بقيت بجيب 77 و76 بالعافيه وببقى مبسوطه جدا بالتقدير يلا الحمد لله
ونذاكر قبل الامتحان بشهر والباقى نسيبه ليله الامتحان بجد مش عارفه الظروف هى السبب ولا التقصير منا

[زهرة الياسمين]

امبارح كنت قاعده مع واحده صاحبتى(الأنتيم بتاع ثانوى)
لقيتها بتقولى:
فاكرة أيام ما كنا بنصوم اتنين وخميس؟
فاكرة لما كنا بنفكر بعض بالأيام القمريه ؟
فاكرة لما كان لو حد فينا صام من غير التانى تبقى خناقه؟
فاكرة لما كنا بنتصدق بكل الفلوس اللى معانا حتى لو محتاجينها؟
فاكرة لما كنت اقولك ابعتيلى الفلوس اللى معاكى فى ظرف النهارده ضرورى عشان هنعمل عمل خير؟
فاكرة لما كنا منخلعش الجوانتى حتى فى امتحانات ثانوى؟
فاكرة لما كنا نقول الأذكار واحنا ريحين المدرسة الصبح ومنتكلمش غير لما نخلصها؟
ونقولها واحنا راجعين المغرب من الدروس؟
فاكرة لما كنت اقولك انتى بتقولى ايه فى الأذكار ونقول لبعض ونرتب أذكارنا بحيث نقولها بطريقه معينه مع بعض؟

فاكرة ال 11 ركعة بتوع قبل النوم؟
فاكرة السنن اللى لو كنا بنموت منسيبهاش؟

الجامعة او المدرسة على حسب الصحبة الى معاك
بالعكس فى الجامعة تلاقى فئات كتير ومختلفة
ممكن تلاقى معاك فى نفس السكشن صديقة تعينك وتشجعك
وفى نفس السكشن ممكن تلاقى الى تثبط همتك وتقنعك بالاقل وانك كده كويسه
بس حسن الاختيار
افتكر مرة نويت اعمل كذا حاجة وقلت لصاحبتى عليهم من باب اننا نشجع بعض
لكن للاسف لقيت منها فتور وتكاسل
صحيح مش تكاسلها الى اقعدنى
لكن على الاقل قلل من عزيمتى ولو واحد فى الميه

الصحبه ليها دور مهم جدا جدا
لكن اولا واخيرا والاساس: توفيق الله عز وجل ورضاه عنك
ممكن تبقى مع نفس الصحبه ويشجعوك على الخير لكن الفتور ودنو الهمة منك انتى
وممكن العكس

المقصد ان الجامعة لها مساوئ لكن فرص الاصلاح والتغيير فيها قدامك كتير سواء لنفسك او للى حواليك
طول ما ربنا بيعينك وهمتك عالية ونيتك خالصة لله وحده

[Retag]

انا عن نفسى الجامعه غيرتنى كتير بس طبعا لاحسن والحمد لله على ده
شكرا يا هاله عن الموضوع الجميل ده
جزاكى الله كل خير وجعله فى ميزان حسناتك

[N00R EL _SHAMS]

انا عن نفسى الجامعه غيرتنى كتير بس طبعا لاحسن والحمد لله على ده

تمام كده يا اوختى انا كنت داخله اقول كده
الجامعه فعلا غيرتنا كتير لكن للافضل والحمد لله هو مش افضل اوى بس على الاقل غيرتنا شويه
انا والله كنت داخله الجامعه دى وكنت متخوفه جدا لانها عالم تانى خالص ولازم الانسان يسيطر فيها على نفسه بقدر المستطاع ودايما كان اساتذتى ف الثانوى يحذرونامنها ........
لكن الحمد لله متغيرتش كتير عن الثانوى يمكن الى اتغير فينا الطباع ...معاملاتنا مع الناس اصبحت اكتر تفتح..ادراكنا بالحياه زاد شويه .... والحمد لله اصحابى كويسين اوى وده الاهم فعلا ف الجامعه ...بس انا نفسى اكون قريبه من ربنا اوى اوى نفسى اعمل كل حاجه ترضيه ....ونفسى يكون راضى عنى دايما .......
اللهم ارزقنا الهدى والتقى والعفاف والرضا
وبكده نقدر نقول
انعيب الجامعة والعيب فينا ******وما للجامعة عيب سوانا
لكن طبعا كل الى انا قلته ده حاجه والمذاكره حاجه تانيه خااااااااالص انا مذاكرتى ف الجامعه لا تعادل تمن مذاكرتى ف الثانوى انا حاسه فعلا بضياع ف الجامعه بالنسبه للمذاكره والتحصيل ....ربنا يوفقنا يارب

شكرا يا هاله ع الموضوع المميز ده ....فعلا يستحق النقاش ويارب ترجعى زى الاول واكتر كمان

[محمد سمير]

كل فتره فى حياتنا ليها مميزات وعيوب

بس بنقدر نتغلب على العيوب دى بالاصرار والعزيمه وان احنا نحاول على اد ما

نقدر نفضل فى الطريق المستقيم اللى الشيطان بيحاول بكل ما يملك انه يبعدنا عن

الطريق ده بس بجد اللى بيفضل فى طريق ربنا بيكون مستريح جدا وربنا بيسهله كل شىء

اللهم يامثبت القلوب ثبت قلوبنا على دينك

وربنا يهدينا جميعا لما يحبه ويرضاه

شكرا على الموضوع وربنا يصلح الاحوال

[مشمشة]

ازيك يا *محبة رسول الله *؟عاملة ايه؟ مش عارفة تخلى المواضيع الحلوة دى للاجازة (ده على اساس ان المذاكرة مقطعة بعضها يعنى)ماعلينا

طبعا الكل بيقول انه كان ايام الثانوى بيذاكر احسن وكدة والكلام ده كله ..........انا بقى الموضوع بالنسبة لى مختلف
انا فاكرة انى ايام الثانوى كان كل المدرسين بيشتكوا لوالدى عشان مش كنت بحضر غير كل مدة كدة كنت بكسل وكانوا بيقولولى انى لو ذاكرت شوية هبقى حاجة تانية خالص ومكنتش ببدا مذاكرة كويس غير فى الاخر خالص ده حتى ماماتى هى اللى كانت بتشرحلى فرنساوى اخر مازهقت منى قالتلى روحى خدى درس النظام ده مش هينفع.
اما فى الجامعة الحمد لله بحط فى دماغى تقدير معين وبحاول اجيبه وخلاص والحمد لله ربنا بيسهل .

الفرق بس ان ايام الثانوى الواحد كان بينمى مواهبه اما لما دخلت الجامعة كل المواهب دى اتدفنت وانا كنت عارفة كدة

تمام كده يا اوختى انا كنت داخله اقول كده
الجامعه فعلا غيرتنا كتير لكن للافضل والحمد لله هو مش افضل اوى بس على الاقل غيرتنا شويه

الحمد لله ده الللى انا بحس بيه برضه ..........انا منكرش انى فى الاول كدةكنت حاسة انى اتغير فى حاجات معينة كدة بس بجد مكنتش راضية عن نفسى تماما وبجد جالى فترة كنت اتخنقت بس والله هقول على حاجة بجد والله اللى يدعى ربنا بصدق ويخلص فى الدعاء والله العظيم ربنا بيعينه بجد

بس والله ياجماعة بجد مجاهدة النفس فى الجامعة بجد حاجة صعبة جداااااااااااا ده اللى بحسه انك تحاول ان مفيش اى حاجة تفتنك وتبقى فى حالك مع ان اللى حواليك مش بيساعدوا على كدة صعب بجد
بس بجد لازم نحط فى دماغنا ان من ترك شيئا لله ابدله الله خيرا منه
يارب نفسى ده اللى يحصل

وبرضه والله الصحبة ليها دور كبير جدا لو على الاقل مش هتتغير للاحسن بس مش هتقع

يمكن الحكاية دى بجد انا حاساها مع اقرب الناس ليا بجد حاسة فيه بالتغير ده بجد ونفسى يرجع زى ماكان يارب بندعيله وربنا يارب يثبت الجميع ويهدينا جميع ويوفقنا الى مايحب وبرضى
آسفة ع الاطالة

جزاكى الله خيرا

مع السلامة

[LOVELY BIRD]

انا شخصيا بقى عندي لامبالاه شديده جدا
وماعدتش بذاكر زي ايام ثانوي وبقى اللي شاغلني مجرد النجاح فقط