الدروس الخصوصية

[sa3dany20002002]

اولا احب اشكر حضرتك يا دكتور على اتاحه الفرصه
للتعبير عن اّراءنا بحريه
ــــــــــــــــــــــــــــــــــــــــــــــــــ ــــ
بالنسبه لمشكله الدروس
أولا انا محول من جامعه اسيوط
واسمحلى اضرب مثال بالوضع هناك


البدايه
كنا هناك قبل الامتحان باسبوع نسمع ان فيه مكتبه معينه فيها
ورق شرح للمناهج بتاعتنا والى عاملها طبعا معيد من علوم
وفى بعض الاحيان بيكون تبييض زميل
والورق بينزل بعلامه مائيه (بدات الظاهره دى فى جامعه اسيوط)

طبعا الى كان بيجيب الورق ده الطالب الفاشل
الى مبيحضرش .. او بيحضر ومبيفهمش
لان المصدر الوحيد المحاضره ثم الكتاب ثم المكتبه

شويه بشويه بدانا كلنا نجيب الورق ده ونعتمد عليه
ونريح دماغنا ... والطريف فى الامر ان الى بيعمل الورق بيكتب باسلوبه
وبيعمل اختصارات معينه هو الى فاهمها ...كانت المذاكره من الورق ده
بمثابه فك شفره ...وكانت الحركه متعمده طبعا


ظهرت مجموعه تانيه من الطلاب مبتحضرش
ومش عارفه تذاكر من الورق.....يعملوا اييييه
طبعا قرروا ياخدوا دروس لمجرد انهم ينجحوا
وكانت البدايييييييييييييييييييييييييييييييييييه


نقطه مهمه
السبب فى انتشار الظاهره هو البعد عن الكليه و
عدم الاهتمام ٫٫٫٫٫
لانى بحس فعلا ان مفيش حد من الدكاتره او المعيدين
بيهتم بينا ولا بيحاولوا يقربوا مننا
فصار فيه شعور متبادل ٫٫وعاملناهم باسلوبهم
وبقى الطلبه فى وادى٫٫والدكاتره فى وادى تانى

السكشن مثلا
بدخل المعمل .. زحمه .. مفيش كراسى ..
مش لاقى مكان اشتغل فيه..
حاسس ان ده مش مكانى او مش معمول حسابى
والعمليه كلها سكشنين فى الشهر
٫٫٫٫٫كنا بنشتغل اتنين فى الاسبوع((ايام اسيوط))٫٫٫٫٫
معتقدش انهم ممكن يخرجوا طالب متمكن من العملى
يعنى اخرك هتشتغل التجربه مره والتانيه الامتحان
دا لو بتحضر وبتشتغل


طب اعمل ايه انا هنا بقى
بلاقى قدامى اعلان ..للاسف جوه الجامعه
و جوه الكليه وداخل المدرج كمان
((شرح العملى فى 4 حصص))
طب شكرا مش عاوز حاجه من الكليه
انا لقيت الى انا عاوزه بره


والامر مختلفش كتير بالنسبه للمحاضرات
لان من المستحيل انى هفتح كتاب للكليه واذاكر منه
لان منظره يجيب اكتئاب والخط صغير وطباعه رديئه
وفيه كل العبر
(مع ان فيه اقسام الكتب فيها روعه) لا احد ينكر ذلك
لكن الغالبيه!!!!!!!!!!!!!اكيد كلكم عارفين

يبقى امر بديهى انى هدور على ورق مكتوب كويس اذاكر منه
والاحسن بقى اروح اخد الدرس واوفر على نفسى البهدله



وبعدين الناس بتسجل المحاضرات وتسلمها للدروس بره
يعنى الى هيشرحلى سمع المحاضره وفصصها وهيقول الخلاصه
يبقى اخنق نفسى ليه بقعده المدرج


الخلاصه
ــــــــــــــــــــــــــــــــــــــــــــــــــ ـــ
عاوزين نرجع نحب الكليه تانى
وصدقنى والله لو ده حصل
بجد امور كتير هتتغير
ودى بقى بتاعتكم يا دكتور
ـــــــــــــــــــــــــــــــــــــــــــــــ
اّسف على الاطاله
وشكرا لسعه صدر حضرتك
والسلام عليكم ورحمه الله وبركاته

[ameer]

مينفعش اقول راي لاني مخدتش دروس في الكلية خالص (حتي الان) ومش شايف ليها اي داعي (حتي الان برضة )

[Dr. Atallah F. Ahmed]

مينفعش اقول راي لاني مخدتش دروس في الكلية خالص (حتي الان) ومش شايف ليها اي داعي (حتي الان برضة )

و ياريت ما تقربش منها يا أمير. ربنا يوفقك

[Hope1]

كليتنا اساسا مش محتاجة دروس اللهم الا اذا كانت للعملي خاصة العقاقير لان طبعا الامكانيات متسمحش ان كل واحد يشتغل لوحده اما غير كده اعتقد ان الدروس مالهاش فايدة لان كليتنا = توفيق من ربنا اولا + مذاكرة و حفظ ثانيا

[Dr. Atallah F. Ahmed]

كليتنا اساسا مش محتاجة دروس اللهم الا اذا كانت للعملي خاصة العقاقير لان طبعا الامكانيات متسمحش ان كل واحد يشتغل لوحده اما غير كده اعتقد ان الدروس مالهاش فايدة لان كليتنا = توفيق من ربنا اولا + مذاكرة و حفظ ثانيا

و لا حتى العملى يا هوب1 لو توافر الحرص فى التعلم حتى و لو فى ظروف العملى التى ذكرتها.

[pharmacistina]

أنا كمان عمري ما رحت حصة درس من يوم ما دخلت الكلية ولن أفعل و ذلك لعدة أسباب :

أولا : الحمد لله حضور المحاضرة أنا شايفة نتيجته تغنيني عن الدروس تماما , الا بعض المحاضرات ودة مش كتير ..

ثانيا : أحسها نوع من تقليل الشأن لي , لأن اللي هيشرح حصة الدرس مش أحسن مننا في حاجة , بعتبره زميل ليا أكبر مني جاب المحاضرة و ذاكرها و هييجي يشرحهالي .. سبحان الله .. مهو أنا أقدر أحضر المحاضرة و أجيبها و أذاكرها لنفسي و لو مفهمتش حاجة أدور عليها ع النت أو أسأل الدكتور المحاضر ..
ايه اللي يخليني آخد درس عن زميل ليا ؟؟
الواحد يحضر المحاضرة و يتعلم من أستاذ جامعي على قدر كبير من العلم ..

ثالثا : أنا كطالب جامعي مش صغير عشان أروح الدرس ,, التعليم الجامعي مش كدة .. يعني طالب الفرقة الرابعة هيكون صيدلي بعد شهور , من غير المستحب انه يكون dependant على شرح حد ..

في رأيي السبب الرئيسي للدروس الخصوصية : خوف الطالب و قلقه و احساسه بأنه هيضيع لوحده فبيروح الدرس عشان يحس ان في حد مسئول عنه .. و الكلام دة قالهولي بنات بتاخد دروس ..
ولا أنكر ان في بعض المحاضرات بتكون غير كافية أبدااا انها تفهم الطالب .. و دة قليل ..

و أنا ناوية باذن الله أن أقول لسيادة العميد على أسماء المحاضرات التي لا فائدة منها .. بس بعد لما أخلص امتحانات الترم التاني علشان أنا نفسي أتخرج على خير ..

مع الأسف الدروس الخصوصية بتزيد بشكل كبير .. نظرا لزيادة عدم تحمل المسئولية على مر الأجيال ..

بالنسبة لورق الدروس الخصوصية .. هو مصدر للمحاضرة يغني الطالب مننا عن الكتابة لأن كتير مننا ( و أنا كدة ) بيكره الكتابة أثناء المحاضرة .. كتابة للمحاضرة ليس أكثر ولا أقل ..

لو الدكتور أعطانا المحاضرة دة بيغني عن ورق الدروس ..

شكرا لكم أستاذنا الفاضل ..

[ameer]

أنا كمان عمري ما رحت حصة درس من يوم ما دخلت الكلية ولن أفعل

حضرتك في رابعة ومخدتيش دروس طب كويس قوي يبقي في امل اني انجح من غير دروس

[Dr. Atallah F. Ahmed]

أنا كمان عمري ما رحت حصة درس من يوم ما دخلت الكلية ولن أفعل و ذلك

حضرتك في رابعة ومخدتيش دروس طب كويس قوي يبقي في امل اني انجح من غير دروس

شكرا يا فارمسيستينا ..................... هادى قدوة يا أمير, طبعا هناك امل كبير فى التوكل على الله و الإعتماد على النفس

[ASOOOM]

انا عن نفسي مش شايفه اي داعي للدروس وخصوصا بعد ما شفت حال اللي بدأوا دروس لان ميعاد الدرس بيتداخل مع مواعيد المحاضرات وطبعا بيروحوا الدرس وبعدين يحاولوا يعوضوا اللي فاتهم انهم يحضروا مع مجموعة تانية و بكده يكونوا ضيعوا اليوم الاجازة في تعويض اللي فاتهم و بالتالي بيكونوا لا استفادوا ولا عندهم وقت يذاكروا اللي خدوه في الدرس او المحاضرة فالحمد لله ان انا شفتهم من بدري وكمان في كتير نصحوني ما اخدش دروس خصوصا ان انا مش متعودة عليهم غير في ثانوي بس على عكس ناس كتير


باعتذر اذاطولت