امتحان الألكالويد أعطنا رأيك

[Dr. Atallah F. Ahmed]

الطلاب الأحباب بالفرقة الثالثة
موفقين ان شاء الله فى إمتحان الفايتو نظرى و شفوى.
من أجل التطوير و التحسين أود ان أحصد أراءكم فى جزء الألكالويد من حيث النقاط التى فى الإستبيان أعلاه. مرفق الإجابة النموذجية لجزء الألكالويد أيضا من أجل المساعدة فى التقييم. يهمنى ان تكون أراءكم بدون انفعالية او شخصانية لأنها كذلك تفيدينى فى تطوير و تحسين الأداء لكم و للجيل القادم من الطلاب هنا أو فى أى جامعة أخرى. جازاكم الله خيرا مقدما.

نماذج الإجابة (انقر الصفحات مرتين للتكبير فى صفحة منفصلة)

[عبدالله عبدالرحمن]

فى البداية جزيل الشكر والعرفان لحضرتك
على الامتحان
وانا هكتفى بالقول ان
الأمتحان لم يكن تسميع ووحفظ ولكن كان هناك تناغم
بين عملية ربط المعلومات واستخراج الأجابة الصحيحة
وفى نفس الوقت يقيس بعض المهارات الخاصة بالذاكرة
الأمتحان كان متوازن من حيث قياس المهارات المختلفة
ولكن تعجبت جدا من اختفاء الكالويد معينة مثل الكينا والنيكوتين
الوقت مناسب
صيغة الأسئلة كانت سهلة ومفهومة
هذا النوع من الأختبارات لا نراه كثيرا فى كليتنا
ولكن اتمنى ان نرى مثله فى باقى المواد
لا حرمنا الله
من جهودك وامتحاناتك يا دكتور
تقبل مرورى السريع
وان شاء الله سأسهب بالتفاصيل خلال الأجازة

[Mohamed Al Gohary]

في البداية طبعا شكرا جدا لحضرتك يا دكتور على كل شيء .. لانى لو عددت هذه الاشياء فلن أوفي حق حضرتك ..

جزاك الله كل خير عنا

بالنسبه للامتحان :

اول سؤال كان عباره عن solve problems وكان طالب اتنين يتحلوا مع ولازم اجابة رقم واحد .. وده بصراحه بيحط الواحد في حيرة انه يحل انهى واحد خصوصا لما لكون مجمع اجابة الاتنين ..
النقطه الاولى على الـ semisynthesis of cocaine ودى كانت اساسيه ..
والتانيه والتالته عباره عن فصل خليط ..

تاني سؤال كان الـ matching وده بصراحه اكتر سؤال خد منى وقت .. لانى قريته الاول تقريبا مرتين كامل وبعد كده بدات اوفق .. بس فكرة طريقة اجابته كانت جميله وسهلت لينا كمان الحل والمراجعه ..

السؤال التالت بقى بصراحه كان جميل جدا .. وانا شخضيا كنت مستمتع وانا بحله .. عبارة عن استراكشرات الكالويد .. وجايب عليها اسئله .. name , use , chem.test وهكذا .. وعملناه فى جدول يا دكتور زى ما حضرتك قلت

السؤال اللى بعد كده اعتبرته سؤال التفكير بتاع دكتور عطالله .. فاهتميت بيه .. الاول كان شكل فزورة وانت تحلها جايب معلومه اساسيه وهى anticancer بالاضافه لمعلومه كمان عن كل الكالويد والمطلوب انى اعرفه واقول الـ mechanism of action ..

الفقرة التانيه دى اللى قعدت افكر فيها كتبر . هو المطلوب اكشف عن وجود الـ ergot من غير اى chem.test والحمد لله هداني ربنا للاجابه فى الاخر

واخر سؤال جه بالنص فى امتحان السنه اللى فاتت وهو عبارة عن mixture بتاع الـ areca ..


وبس .. يمكن يبان حجم الامتحان طويل .. بس كان معقول جدا .. لو حد مذاكر ومجمع المعلومات فى دماغه ..


وبقولها تاني .. ان حضرتك فعلا اثبت ان قياس كفاءة الكورس مش من خلال مستوى امتحانه .. وده اهم حاجه خرجت بيها من الامتحان ..


جزاك الله كل خير عنا يا دكتور عطالله .. وزادك الله علما ينتفع به ان شاء الله ..
-----

الأمتحان لم يكن تسميع ووحفظ ولكن كان هناك تناغم

تمام جدا ...

[MAI HABIB]

شكرا يادكتر على الامتحان ... ووقت حضرتك وتعاونك معانا بجد

بالنسبة للامتحان بيتهيالي بشكل مجمل ان الكويزات اللي حضرتك نزلتهالنا كانت اسهل منه .. او يمكن عشان كنت بحل الكويزات وليا فرصة اني اراجع وافكر في الحل !؟

جزء A كان سهل الحمد لله ومباشر ...
انما B ف خد مني وقت كتير في الحل .. وحسيت اني تهت ولما راجعت نموذج الاجابة اكتشفت ان معنديش الا جملة وحدة اللي صح بس !؟
اكيد العيب مني ... بس زيي زي غيري كتير من الطلبة ( المستوي المتوسط او اقل ) السؤال خد وقت كبير في حله .. وضاعت درجاته ولخبطت اوي في التفكير في حله وحسيت ان الجمل شبه بعض
ف دا بجد فرّق بين اللي مزاكر بتركيز وبجد واللي مزاكر عشوائي او تركيزه ماساعدهوش في الحل

يادكتر ... هوا فعلا لو الاجابة فيها غلطة وحدة مش هتتحسب حاجة صح ؟ يعني لو مجاوبة A&B صح بس C غلط كدا بتكون الدرجة مش محسوبة ؟!


وبالنسبة للفرع C
دا السهل الممتنع فعلا ... محتاج تركييز في الحل وطالب مراكر ومراجع كويس

واخيرا D
سؤال 1 .. كان فيه كلام كتير وكتابة .. يعني يادكتر نرجع لنقطة الحفظ مش الفهم ..
و2 كان سؤال للطالب المتميز ... اللي مش كل الطلبة حلته صح فعلا دا بيقيس المهارات الذهنية
و3 مباشر

وبجد شكرااا يادكتر على تعب حضرتك طول التيرم معانا وتفاعلك معانا سواء في المحاضرات او المنتدى وحتى بعد الامتحان انك تتواضع وتتقبل منا أراءنا عن الامتحان شرف كبير لينا ان حضرتك دكتورنا ... الفاضل

[BonaBart]

جزاكم الله خيرا دكتور عطا الله

تقريبا دى من المرات القليلة اللى أحس فيها
انى بمتحن المادة اللى كنت بذاكرها

وكمان حسيت انى طالب محترم
عارف السؤال طالب يعرف منه ايه بالظبط ؟

انا اول مامسكت الورضة بدأت علطول ف الالكالويد
ماضاعش منى الا حاجات بسيطة الحمد لله
لانى ماكنتش ركزت عليها ف المذاكرة
ألا هو الـ acyl moity للكابسايسن دى هيا حلقة البنزين وماعليها ؟
غير الـ side shain صح ولا ؟

واتلخبطت ف الانتى كانسر

وكتبت اللاندا ماكس للارجوت 318 زى ماهيا موجودة ف الكتاب

بس نموذج الاجابة بيقول 366




وطبعا لانى ذاكرت الفولاتيل اويل خطف كدا
ومالحقتش اراجع عليها ... ماعرفتش احل حاجة خالص

دا انا حتى ماكتبتش الـ HPLC



الحمـــد للــــــه الذى بنعمته تتم الصالحات

[...مصر...]

السلام عليكم ورحمة الله وبركاته
بغض النظر عن حلي فالإمتحان كان فيه أسئلة ذكية فعلا يعني بتقيس فهمنا لحاجات معينة يعني أنا لما شفت سؤال التاميفلو قلت لازم اللي بعده يكون عن الميكانيزم وفعلا لقيت كده
بس أنا حابة أتكلم عن حاجة أحب تكون متوفرة في الإمتحانات وهي الحمد لله كانت موجودة في كذا سؤال وهي إن الدكتور اللي بيحط الإمتحان يسأل نفسه هو الإمتحان ده هيقيس إيه لأني بحس إن من الدكاترة اللي يجيب امتحان انتقاما للدفعة انها ما بتحضرش ودكاترة بتحط أسئلة حتى لو كانت أسئلة مش مفيده بس لأنها عرفت إنها مش موجوده في الورق ... لكن المهم الامتحان يكون مقياس لأن اللي هيحله أحسن هيكون صيدلي أنجح لأننا بنسمع عن ناس بعد ما تتخرج يقولوا دا كان بيجيب امتياز بس ما بيفهمش حاجة في شغله وده نتيجة للامتحانات اللي بتقيس الصم والحفظ واللي محصلتها لاشيء مثلا لو في طالبين واحد حفظ 30 استركشر وجاب امتياز والثاني ماحفظهمش وجاب جيد في فرق لكن لما يتخرجو بعد سنة أو اتنين هيكون اللي حفظ ال 30 استركشر نسيهم أكيد والمحصلة إن الاتنين متساوين في الكفاءة وقد يكون اللي جاب جيد كان بيهتم بالفهم أكتر . ممكن حد يقول بس اللي حفظ ال 30 استركشر أكيد حافظ بقية المنهج بس أنا عارفة إن مناهحنا كبيرة وما بنلحقش نحصل كل حاجة وبنهتم باللي بيهتم بيه الدكتور والللي عليه درجات يعني لو الدكتور بيهتم بحاجات مفيدة هنذاكر الحاجات المفيدة ولو بيهتم بأرقام واستركشرات هنحفظها ...
وكمان لما واحد يكون متخرج بامتياز ومش كفء فدا عيب على الكلية يقلل الثقة بيها... والمنهج والإمتحانات لو الغرض منها واضح ولو الاهتمام في الحاجات اللي احنا هنطبقها في التدريب في الصيدلية وبيزود معرفتنا بالدواء والغذاء فدا إن شاء الله هيثبت معانا جزء كبير منه أما لو الاهتمام بالمعلومات اللي بتتطاير فدا بيخلينا أقل كفاءة في المستقبل ..
في دكاترة بيكون عندها استعداد إنها تقولنا إن السؤال جاي لأننا كده هنذاكره ونكون حققنا الغرض من المادة .
وطبعا بشكر حضرتك لأنكم اهتميتم مثلا بإضافة التاميفلو لأنه مفيد لينا...
وجزاكم الله خيرا

[Mohamed Al Gohary]

وكتبت اللاندا ماكس للارجوت 318 زى ماهيا موجودة ف الكتاب

بس نموذج الاجابة بيقول 366

دكتور عطالله كان قال ان الـ fresh solution بيدي فلورسنس عند 366nm

[Dr. Atallah F. Ahmed]

دكتور عطالله كان قال ان الـ fresh solution بيدي فلورسنس عند 366nm

مفيش مشكلة حتى للى كتبها 318نم, المهم انه استخدم الفكرة الصح فى المكان المناسب.
-----

ألا هو الـ acyl moity للكابسايسن دى هيا حلقة البنزين وماعليها ؟
غير الـ side shain صح ولا ؟

و جازاكم الله خيرا مثله.
الـ acyl moity المقصودة هى الـ side shain فقط التى تنتهى بـCO

[Mohamed Al Gohary]

الـ acyl moity المقصودة هى الـ side shain فقط التى تنتهى بـCO

تمام انا عملتها كده .. اللى هو الـ homo capsacin اللى بيبقى عباره عن 10 ذرات كربون او الـ nor capsacin اللى بيبقى 8 ذرات كربون .. يعنى عدد ذرات الكربون بتاعة الـ side chain زادت او قلت وده بيأدي الى تقليل الـ pungency ..
وكمان الـ dihydro capsacin لما بنعمل sturation للـ double bond اللى بين C6 و C7 ..

مش بقولكم السؤال ده كان بجد روعة ..

[BonaBart]

مفيش مشكلة حتى للى كتبها 318نم, المهم انه استخدم الفكرة الصح فى المكان المناسب.
-----

شكرا دكتور عطا الله

وفعلا هو دا المطلوب انى أعرف الطريقة والمفتاح

انما التفاصيل مش مهم احفظها لانى لو اضطريت للموقف دا
هفتح اى فارماكوبيا والاقى فيه تفاصيل التستات ومعلومات عن المركبات

وياريت لو دا يبقى الغرض من تدريس المناهج ازاى استفيد منها

مش ازاى احفظها ف وقت معين وبكفاءة معينة وارجع انساها تانى

و جازاكم الله خيرا مثله.
الـ acyl moity المقصودة هى الـ side shain فقط التى تنتهى بـCO

ياااااااه هو الواحد ممكن ينسى حاجة بديهية زى دى

acyl .. acylation .. acetylation ... acetyl gp ... CH3C=O

تمام انا عملتها كده .. اللى هو الـ homo capsacin اللى بيبقى عباره عن 10 ذرات كربون او الـ nor capsacin اللى بيبقى 8 ذرات كربون .. يعنى عدد ذرات الكربون بتاعة الـ side chain زادت او قلت وده بيأدي الى تقليل الـ pungency ..
وكمان الـ dihydro capsacin لما بنعمل sturation للـ double bond اللى بين C6 و C7 ..

مش بقولكم السؤال ده كان بجد روعة ..

انا بقى كنت مذاكرها كويس جدااااااا
بس قلت الاسايل مويتى غير السايد شين
دا يمكن عشان اول مرة اروح الامتحان بعد 24 ساعة من غير مانام

مثلا لو في طالبين واحد حفظ 30 استركشر وجاب امتياز والثاني ماحفظهمش وجاب جيد
في فرق
لكن لما يتخرجو بعد سنة أو اتنين هيكون اللي حفظ ال 30 استركشر نسيهم أكيد
والمحصلة إن الاتنين متساوين في الكفاءة
وقد يكون اللي جاب جيد كان بيهتم بالفهم أكتر






بنهتم باللي بيهتم بيه الدكتور والللي عليه درجات
يعني لو الدكتور بيهتم بحاجات مفيدة هنذاكر الحاجات المفيدة
ولو بيهتم بأرقام واستركشرات هنحفظها ...

هيا دى المشكلة كل الاهتمام بينصب ع الامتحان والدرجات
واسيب جزء ايه وادخل بجزء ايه
انما لو التركيز ازاى استفيد من المادة العلمية واقدر استخدمها
أكيد هتتغير نظرة الطالب للمنهج والا متحان



وجزاكم الله خيرا يا دكتور عطا الله
ووفقك لما يحب ويرضى