يوميات صيدلي مفروس ....في الأرياف ؟؟؟؟

[yojeena]

جزمة ثقة ..reloaded

زى ما كتابة اليوميات ليها مميزات كتير .. ما تتعدش بصراحة , إلا إن ليها عيب خطير جدا بيضفى شىء من الرذالة على اليوميات بعد فترة من كتابتها و عرضها على القراء ..

العيب الخطير هو إنك بعد ما تكون اتعرضت لموقف تتوقع إنه يكون الأول من نوعه و المتفرد بحجم "الفرس" اللى ممكن يسببه .. و على ذلك , تكتبه سريعا فى يومياتك و تنشره على قرائك فى انتظار مشاركاتهم و تعليقاتهم المتعاطفة و المشجعة ..,
بعد كل ده بيومين تلاتة .. تكتشف إن الأيام كانت "مخبّية" لك موقف "أنقح" من اللى قبله بمراحل .. بل و تحس إن الموقف الأولانى كان مجرد زغزغة أو طبطبة خفيفة لا أكثر ..
و هو ده اللى عانيت منه النهاردة ..

فاكر الفرسة اللى كنّا سميناها "جزمة ثقة" ؟! .. أهو أنا اكتشفت النهاردة إنها مش جزمة .. تقدر تقول عليها "بُلغة ثقة" .. صَرمة ثقة" .. المهم أى حاجة بتتلبس فى الرجل و خلاص !!

بص يا عم .. و ركّز معايا ..

من أسبوعين تلاتة كده .. لقيت سيدة محترمة جدّدّدّدّدّا , داخلة الصيدلية و على كتفها ابنها اللى عنده سنتين و نص ..
-لمّا حللت للواد "لجيت" عنده ديدان فى مصارينه .. ماعندكش ليها علاج كويس ؟!
-تحت أمرك يا حاجة .. معاكى التحليل ؟!
-لأ .. ليه ؟!
-أمّال حاطلع له علاج على أساس إيه ؟! .. مش الديدان دى أنواع , و كل نوع له علاج ؟!
-يعنى مافيش حاجة "تجضى" على أى نوع و خلاص ؟! .. أصل البيت بعيد و لو رحت عشان أجيب لك التحليل مش ضامنة أعرف آجى تانى .. عشان الواد التانى لسه جاى من المدرسة و لسه ما حضرتلوش الغدا .. و ابو العيال راخر كان فى الشغل و نازل م البيت "مقَرْيِف" ... و أنا خايفة من .....
- خلاص يا ستى .. حاضر .. حاضر ... الدوا ده (Flub معلق) الواد حياخد منه معلقة صغيرة 3 مرات يوميا .. و يبقى يتكرر كمان أسبوع .. اتفقنا ؟! .. مع السلامة ..

و غابت كتير كتير .. و ما رجعتش إلا من نص ساعة بس .. ( و معاها تحليل )
-هوّ الدكتور الكبير ما بيجيش الصيدلية هنا ولّا إيه ؟!
-خير يا ستى .. أنا مكانه هنا .. أوامرك !!
-أصل الواد ابنى انت عطيته دوا من "جِيمِةْ" أسبوعين كدِه , على أساس إن عنده ديدان .. روحت حللت له دلوكت لقيت الدكتور اللى هناك "بيجول" لى عنده ديدان برضه .. فكنّا عايزين الدكتور الكبير يشوف لنا دوا أقوى من اللى "انت" طلّعته المرة اللى فاتت ..
-( بكل ذوق و إنسانية و غيظ مكتوم ) عينيّه يا حاجة .. أول ما ييجى الدكتور أسامة حابقى أقول له بس ممكن أسألك سؤال من غير زعل ؟!
-اتفضل .. ليه ؟! حازعل من إيه ؟!
-هو الأكل عندكوا أخباره إيه ؟!
-هيهيهي .. عندنا "فضلة خيرك" فتة و لحمة و دكر بط .. اتفضل معانا .. مش عزومة مراكبية و اللهِ
-لا يا ستى مش قصدى .. أنا عايز أقول يعنى .. النضافة أخبارها إيه ؟! ..
-دايما بنغسل بـ"برسيل" .. و ساعات بـ"تايد" أيام المقاطعة ..
-( مرارتى !!) يا ستى قصدى نضافة الأكل ؟1!
-آااااااه .. لا .. الأكل عندنا نضيف و زى الفل ..
-(مستغربا)يعنى الواد ده بياكل أكل نضيف ؟!
-آه .. (ثم تتردد قليلا ) .. لا خلاص ..
-كنتى عايزة تقولى إيه ؟!
-لا مفيش .. أصل الواد طول النهار ع الأرض بيجرى و يزحف .. و افتكرت إنه دايما كان بياخد أى حاجة من الأرض و يحدفها ف بقّه ..
-(!!!!!!!!!!!!!!) .. (أنظر لها و لشيماء فى سخرية تقطر مرارة و غيظاً) و مش عايزة يجيله ديدان ..؟! .. ده المفروض يجيله "تعابين" و "سحالى" .. مش تقولى لى "ديدان" و كلام فاضى من ده ..
بصّى يا ستى .. الكلام اللى حاقوله لك ده يتحط "حلقة ف ودنك" .. حاولى تبعدى الواد ده قدر الإمكان عن الأرض و التراب .. و خدى الدوا اللى حاجيبهولك ده .. ( و خلاص رايح أجيب الدوا فعلا )
-(فى تشكك واضح ) .. لا برضه .. خلّينا لغاية لما الدكتور الكبير ييجى ..
-( و الغيظ بدأ يبان ) حاضر .. مش حنزعلك ..
-مش حتعوزوا تخلّوا التحليل عندكوا عشان الدكتور الكبير يشوفه ؟!
-( و الغيظ بان خلاص ) يا ستى .. على فكرة أنا واخد الابتدائية بتفوق و اقدر أستعمل الموبايل و أقول فيه لأبويا إن ابنك عامل تحليل و عنده اسمها Giardia lamblia و إن انا كنت ناوى أطلّع له "فلاجيل شرب" أو "فلاجيلات فورت" .. و لو كان ابنك كبير شوية كنت حاطلّع له بروتوزول اقراص .. و كانت الجرعة حتبقى معلقة صغيرة 3 مرات فى اليوم لمدة 5 أيام .. أو الـ 4 أقراص مرة واحدة فى حالة البروتوزول .. متهيأ لى سهلة مش كده .. ؟! .. بس برضه مش حادّيكى الدوا دلوقتى و حاستنى لغاية لمّا الدكتور الكبير ييجى و يطلّع لك نفس الدوا بنفسه .. كل ده عشان تبقى مستريحة و ابنك يخف بسرعة .. أهم شىء ما تبقيش تنسى "تسفّفى" الواد شوية تراب م الأرض ف بقّه كل يوم قبل ما ينام عشان الدوا يعمل مفعوله كويس .. ماشى ؟! ..

تمشى السيدة الفاضلة سريعا و هى "تبرطم" و تهمهم ببضع كلمات غير مفهومة ..
قال مش عايزة الواد يجيله ديدان قال .. عجايب !!
شفتوا الواحد بيتعرض لمواقف تفرس و تغيظ قدّ إيه فى الأرياف ؟! .. أنا متهيأ لى أنا ممكن "أصلعّ" بدرى بسبب اللى بيحصل لى ده ؟! .. ياللا .. ربنا يجيب اللى فيه الخير ..
أخوكوا .. المفروس

[summer breeze]

بصراحه من اجمل المواضيع اللي قراتها توبيك تحفه بجد يا يوجينا تسلم ايدك

[شمس مشرقة]

موضوع جامد (جدى) على راى احمد مكى بيضحكنى موووت واللى بشوفه فى الصيدليه بيضحكنى اكتر اخر حاجه النهرده
واحده دخلتلى الصيدليه تسالنى على ورنيش جزم سايل طيب ارد عليها اقولها ايه دى؟؟
والله الصيادله دول ليهم الجنه م اللى بيشوفوه
وفى الاخر برضه نكتم غيظنا جوانا ونستحمل بس حد يقولى لحد امتى؟؟؟

[yasmeena]

ههههههههههههههه
جنااااااان بجد
توبيك دمه خفييييييييف اوى

[yojeena]

بصراحه من اجمل المواضيع اللي قراتها توبيك تحفه بجد يا يوجينا تسلم ايدك

من بعض ماعندكم
تسلمي يا قمر

موضوع جامد (جدى) على راى احمد مكى بيضحكنى موووت واللى بشوفه فى الصيدليه بيضحكنى اكتر اخر حاجه النهرده
واحده دخلتلى الصيدليه تسالنى على ورنيش جزم سايل طيب ارد عليها اقولها ايه دى؟؟
والله الصيادله دول ليهم الجنه م اللى بيشوفوه
وفى الاخر برضه نكتم غيظنا جوانا ونستحمل بس حد يقولى لحد امتى؟؟؟

ربنا يكتب لنا الجنة جميعا يا رب

بس موصلتش لدرجة ورنيش جزم يلا كله بثوابه
نورتــــــــــي يا مشرقه

ههههههههههههههه
جنااااااان بجد
توبيك دمه خفييييييييف اوى

الله يكرمك شكرا لمشاركاتك

[Larine_Resala]

مرة كنت واقفة ف الصيدلية فلقيت بنت صغيرة داخلة عليا بجنيه وبتقوللي (ماما بتقولك عايزة كيس كريم شانتيه)
بجد بجد

[yojeena]

.. اليونان هى خالتى ..


قبل ما اشتغل فى صيدليتنا المصون , كانت كل معلوماتى عن دولة اليونان تتلخص فى أن كل أهلها كانوا يعملون فى البارات المصرية الرخيصة قبل ثورة يوليو – أيام الملك فاروق كده – و دائما ما كان اسم الخواجة اليونانى – كما يظهر فى أفلام الستينيات – هو "يانّى" أو "خريستو" .. لدرجة أن خُيّل لى "إن مفيش أسماء رجالة فى اليونان غير الاسمين دول" !!

إلى أن اشتغلت فى صيدليتنا اللى فى الأرياف .. عندها تغيرت نظرتى لليونان و تحولت بما يساوى 180 درجة ع المنقلة ..

كنت أتوقع أن اليونان ظلت على حالها كما هى – كما ظللنا نحن على حالنا فى مصر – من أيام الفاروق و حتى الآن .. كنت فاكر إنهم فى اليونان لسه بيقولوا لبعض بصوت أخنف "يا خبيبى" .. إلا أنى اكتشفت أن اليونان أصبحت غير ذلك تماما ..!!


زمانك دلوقتى بتقول :"طب و إيه اللى جاب الصيدلية لليونان ؟! .. و إيه علاقة الأرياف بـ"يا خبيبى" .. ما تقلقش .. اصبر على رزقك بس و كمّل قراية ..


أحب أعرف سعادتك – بكل فخر – إن الفلاح المصرى من أهل الأرياف – اليومين دول – ما بقاش فلاح !! .. بقى عايز يشتغل أى حاجة غير إنه يبقى فلاح .. و ان جيت للحق : الراجل معذور .. ما هو لو فضل فلاح , حيفضل يزرع و يقلع طول 8 – 9 شهور عشان تيجى الحكومة فى الآخر "تستكرده" و تشترى منه القطن بملاليم لا تسمن و لا تغنى من جوع !!

و من ناحية تانية – و زى ما قلنا قبل كده – الدش المركزى اليومين دول أصبح فى كل بيت ريفى ... و تلاقى الفلاح من دول بيتحط فى محل اختيار بين الصحيان من بدرى عشان يلحق يروى الأرض و بين السهر قدّام أفلام الشوتايم و حلقات عمرو أديب الملهلبة .. !! و نتيجة الاختيار معروفة بالطبع .. (إم بى سى أكشن جايبة فيلم يجنن الليلة دى "جبل" الفجر علطول) ...

و ف نفس ذات الوقت تلاقى الجيل الجديد – المتعلم – من أهل الأرياف ينظر لك بكل استخفاف قائلا: بقى انا ضيّعت 17 سنة من عمرى فى المدارس و الكلّيات عشان أطلع فى الآخر زى أبويا .. بين الغيط و السماد و المبيدات و الكلام الفاضى ده كله ؟! .. لا انا أروح أشتغل موظف أحسن (!!!!!) .. إن شا الله أشتغل زبّال عند الحكومة .. بس بشهادتى (!!!!!!!!!!!) ..


طب و غير المتعلمين .. يعملوا إيه ؟! .. يزرعوا يعنى ؟! .. مش عيب برضه ؟!!!!!


اسمح لى أقول لك إن معظم غير المتعلمين فى عزبة الشراقوة اختاروا أن "يهجّوا" كلهم على بلاد بره .. و سبحان الله !! .. تلاقيهم كلهم بـ"يهجوا" على بلد واحدة ..!!

يعنى مثلا 95% من اللى "طفشوا" عندنا من الشراقوة , راحوا ع اليونان .. و ذلك لأسباب أهمها أنهم يعلمون جيدا أن "المصرى بيروح هناك يتشال على كفوف الراحة" .. فاليونانيون "بيموتوا" فى المصريين و "واقعين فى دباديبهم" ..

على فكرة .. ده مش كلامى .. ده كلام "عماد" .. آه .. Sorry .. تلاقيك ما تعرفش مين عماد ده أصلا !!.. خلاص .. خلاص .. تعالى أمّا أعرفكوا على بعض ..
بقى يا سيدى "عماد" ده عنده دلوقتى زى 38 أو 40 سنة كده .. تقدر تعتبره صاحب أطيب قلب و أخف دم على قلبى فيكى يا شراقوة .. المرة دى بجد مش تريقة !!

عماد من 10 سنين كده , "طقت" فى دماغه إنه يسافر و "يهجّ" ع اليونان .. و من يومها و هو ما بيخطّيش الشراقوة غير فى الأجازات .. يعنى كل 7 – 8 شهور هناك , ييجى يقعد له شهر أو شهر و نص هنا .. !!


الراجل جالى أول امبارح ع الساعة واحدة الظهر كده .. كان مش عارف يعمل إيه .. فى أجازة بقى !!
-عامل إيه يا "عمدة" ؟!
-الحمد الله .. أدينى قاعد فاضى .. قلت آجى أسلّم عليك و اقعد معاك شوية (فاكر كلامنا ع التكيّة ؟!)
-بس كده يا "عمدة" ؟! .. ده انت واحشنى يا راجل و اللهِ .. كوبايتين شاى يا شيماء الله يكرمك .. .. .. و اليونان أخبارها إيه على حسّك ؟!
-عال العال .. ده انا ما كنتش عايز أنزل مصر الإجازة دى ؟!
-ليه يا عم كده ؟! .. عيلتك ما وحشتكش ولّا إيه ؟!
-لا .. وحشتنى و كل حاجة .. بس هناك كنت مستريح .. هنا الدوشة و التراب و العفرة فى كل حتة .. لكن هناك كل حاجة بـ"تبرُق" .. أوروبا بقى !! ..


هناك (و الكلام لا يزال على لسان عماد):"تشتغل كويس:تقبض كويسين (يعنى 2 كويس) و تتعامل أحسن معاملة .." .. أنا باشتغل هناك فى حاجة زى "وكالة خضار" كده (بس متقدمة طبعا) .. أشتغل 8 ساعات , و أنام 8 ساعات .. و أعيش "ملِك" فى الـ8 ساعات اللى فاضلين ..
عندى التليفزيون بتاعى و الفيديو بتاعى .. و الدش بتاعى .. و الكمبيوتر بتاعى ( ملحوظة: عماد لا يجيد القراءة و الكتابة بس يفهمها و هى طايرة ) .. و لسه جايب الـ Dvd من 3 شهور .. الواحد يحتاج إيه أكتر من كده ؟! ..

عندهم هناك فى اليونان (و الكلام مازال على لسان عماد): "تشتغل كويس : تاخد حقوقك كلها و فوقيها بوسة " .. يا دكتور احمد ده أنا معمول لى هناك تأمين صحى .. لو دخلت فى عينى هاموشة , أروح المستشفى يطلّعوها لى و يحطّوا لى "جطرة" كمان من غير ما ياخدوا منى ولا مليم .. (لكن فى التأمين بتاع هنا ممكن يطلّعوها بس بعد ما يكونوا خزقوا عينيّه الاتنين!!!) ..

لأ و إيه ؟! .. البنية التحتية هناك عشرة على عشرة .. شوف انا بقى لى هناك قد إيه ؟! .. عمرهم ما قطعوا عليّه النور و لا المية من غير ما ينبّهوا ع الناس قبلها فى التليفزيون .. و دول كمان مرتين تلاتة يعنى مش كتير ..

ده انا مرة من سنتين كده (و الكلام لا يزال على لسان عماد) كنت واقف فى البلكونة الساعة 3 الفجر .. ما كانش جاي لى نوم .. لقيت لك 4 رجالة .. "بهوات بصراحة" .. راحوا جايين فى الشارع جنب الرصيف كده و قعدوا يحفروا بسرعة .. الحفرة بصراحة كانت واسعة شوية .. و لقيتهم بعد كده بيدخلوا فى الحفرة واحد ورا التانى .. ع الساعة 4 و نص الصبح كده لقيتهم خلّصوا و "سفلتوا" الشارع تانى و رجّعوه زى ما كان و أحسن كمان ..

تانى يوم باسألهم فى الشغل عندى ع الموضوع ده , قالوا لى : أصل هنا فى اليونان , بتوع الغاز و الكهربا و الميّه و التليفونات بيروحوا أى مكان عايزين يشتغلوا فيه "مرة واحدة" .. عشان يوفروا وقت و مجهود و فتح و قفل و سفلتة للشارع ع الفاضى !!
(هنا بقى تلاقى الشارع يفحروه 280 مرة فى السنة , و يا ريت بيسفلتوه علطول .. لا .. دول يقفلوه "سلق بيض" و منين ما يفتكروا بيبقوا يسفلتوه .. ده إذا ما سابوهوش مفتوح علطول ( و ده فى أغلب الأحيان!! ) .. و تلاقيهم أصلا كانوا فاتحينه و همّا مش عارفين كانوا عايزين يعملوا إيه ..!!


و ينتهى كلام "عماد" .. و يكمل شرب كوب الشاى .. و يغادر الصيدلية .. كل ذلك و انا أجلس "مذبهلًّا" فى مكانى أحملق شاردا فى الحفرة اللى مش عارفين يردموها قدّام الصيدلية لغاية دلوقت !! ..


طبعا بعد الكلام ده , ما يصحّش إننا نتخلى عن وطنيتنا و مصريتنا و قوميتنا .. "حماها الله .. حماها الله" .. بس متهيأ لى ينفع و يصح أن نقول فى فخر و إباء ( و شمم كمان !!)
"إذا كانت مصر هى أمى .. فياريت اليونان تبقى خالتى" !!!!!


-إلّا قول لى يا عماد:
هوّ الشغل فى صيدليات اليونان أخباره إيه ؟!!!!

[yasmeena]

متابعة معاكى
يلاااااااااااااا

[yojeena]

مرة كنت واقفة ف الصيدلية فلقيت بنت صغيرة داخلة عليا بجنيه وبتقوللي (ماما بتقولك عايزة كيس كريم شانتيه)
بجد بجد

طب دا طلب لذيذ جدا .....تقولي ايه في الورنيش و لا جلدة الحنفية!!!!!

منورة يا نانيس

متابعة معاكى
يلاااااااااااااا

بجد هبدأ افتقدك لو ملقتكيش تسلمي يا قمر

//////////

+ YouTube Video

الفيديو النهارده بيتكلم عن الصداع النصفي
حبيت اتكلم معاكو شوية في الموضوع دا لانه بيقابلنا كتير اووووووي
لازم نعرف الاتي
الصداع النصفي ساعات مش بيبقي نصفي !!!!!!
لانه بعد فترة ممكن ينتشر في الراس كلها

بيزيد لما الواحد يمشي او يبذل اي مجهود
بيعاني المريض من حساسية للضوء او اي صوت ينرفزه بسرعه
عشان كدا لازم ننصح المريض بانه يدخل غرفة مظلمة بعيدة عن الدوشه و ممكن يحط تلج علي مقدمة الراس و يحاااااول يناااااااام
كمان في N,V


طيب عرفنا ان اللي قدامك مريض صداع نصفي و عاوز علاج اديله ايه؟؟

يفضل اولا اننا نلجأ لحبيبنا و اللي بيريحنا ومعانا في كل حته ......دواء القرن


الاسبرين

طيب جرعته ايه ؟؟
1000 مجم او 3 اقراص ريفو و طبعا لااااااازم ياخده قبل النوبة .....بعدها مش هيبقي ليه لازمه
لو مش ادي نتيجة ممكن جرعة تانية بعدها ب 3 ساعات

طيب و الاطفال نعمل معاهم ايه؟؟
باراسيتامول 1000 مجم او ابيوبروفين

طيب النوبة حصلت واللي كان كان
يبقي نلجأ للتريبتان زي ما الدكتور قال

خلي بالك

no-migraine z
بيحتوي علي zolmitreptane
انما لو شلنا الزد

no-migraine
بيحتوي علي ergot,parac.,caff.,dompridone

لو في N,V اديله اي حاجة supp.

[Nayroz]

يوميات تحفة بجد بجد ..
بتخلينى أضحك من قلبى جدا جدا جدا ..
و غير انى بحب اسمع اللغة الفلاحى ( بحبها موت ... )
الا انى هنا من اليوميات حبتها اكتر و اكتر و شكلها كدة قريب هتدخل
فى كلامى من غير قصد ...

تسلمى يا يوجينا .. و مستنيين فرس أكتر من كدة ...