ساحة حوار صيادلة الفرقة الثالثة و الرابعة

[pharmacistina]

Sorry 4 the unintended delay

ورقة الـ Autonomic receptors حطيتها حالا في مكتبة دريم ..

بعتذر أنا كنت فعلا رحت المكتبة امبارح بالليل , بس المكتبة كانت قافلة , مشيت و رجعت تاني برده كانت قافلة ..

فوديت الورقتين دلوقت ( السبت )

Now they r available

[era]

السلام عليكم ورحمة الله وبركاته
ممكن حد يشرحلى ببساطة ال matching technique&4- point assay&3-point assay لأنى مش قادرة افهمهم خاااااااااااالص

[era]

السلام عليكم ورحمة الله وبركاته
ممكن حد يشرحلى ببساطة ال matching technique&4- point assay&3-point assay لأنى مش قادرة افهمهم خاااااااااااالص

هل من مجيب؟؟؟؟

[pharmacistina]

هل من مجيب؟؟؟؟

ان شاء الله هحاول أقرأها الأول و أبسطهالك قدر الامكان ..
أنا فاكرة الجزئية دي كانت تاعباني برده السنة اللي فاتت , و كنت رحت لدكتور شحتة شرحهالي ..

انتظري رد قريب ..

كل سنة و انتم طيبين ..

لو حد عايز أي تفسير حاجة في ورقة الـ receptors يتقضل يقول ..

و خدوا بالكم في حاجات ممكن تحفظوها دلوقت و هتاخدوها في الترم التاني هتلاقوا نفسكم فاهمين بعد كدة ..

Best wishes

[pharmacistina]

Designs of Bioassay Methods

أنا هقول بالعربي و هحكي حواديت , لأن الكلام اللي المفروض هتعرفيه و تحفظيه عشان الامتحان موجود في الكتاب معايا صفحة 6 و 7 و 8 ..

لكن هنحاول نبسطه مع بعض

و رجاء اقرأي الكلام بتركيز شديد و هتلاقيه كلام سهل خالص ..

بسم الله الرحمن الرحيم

أصلا .. يعني ايه Bioassay ؟؟
و ليه نشأ هذا المجال ؟؟
ايه قائدته في البحث العلمي ؟؟
و ليه بندرسه أصلاا ؟؟
ما الفرق بين الـ Bioassay و ال pharmacology ؟؟


أسئلة تتبادر الى ذهننا و احنا لسة جايين ندرس البيوأساي = المعايرات الاحيائية ..

أنا لو جبتلك دواء زي الـ Ibuprofen مجهول التركيز و قلتلك لو سمحت قم بتعيين تركيز هذا الدواء ..

هتقومي انتي تبصي للـ chemical structure بتاع الدواء ,

مثلا تلاقي مجموعة COOH ليها خواص حامضية قوية تقومي تقترحي اننا نعمل Acid - base titration و تحطي الدواء اللي مجهول التركيز unknown في الفلاسكة و تحطي و ليكن NaOH في السحاحة و تعملي titration لحد الـ End point و بعد كدة هتحسبي تركيز الدواء ..

دة من وجهة نظر الكيمياء التحليلية و بعض علماء الكيمياء الطبية ..
يقومون بتعيين تركيزات الأدوية بناء على الـ chemical structure of drugs ..


أما من وجهة النظر الفارماكولوجية ..
يتم تعيين تركيز الدواء بناء على مفعوله الدوائي ( المفعول الفارماكولوجي ) .. ازاي ؟؟

يعني لو جبتي نفس الدواء السابق الـ ibuprophen مجهول التركيز لعالم من علماء الفارماكولوجي ( أساتذتنا ) ..
لن ينظر الى الـ chemical structure
ولن يقوم بعمل المعايرة الكيميائية titration assay باستخدام سحاحة و فلاسكة ,
و لكن سينظر الى الـ pharmacological effect و يقوم بعمل معايرة احيائية Bio assay ..


حلو الكلام لحد دلوقت ..

يعني مثلا الدواء مجهول التركيز ibuprofen عبارة عن دواء مسكن للآلام ( شايفة بنتكلم في التأثير الدوائي دلوقت ) ,
و بيعمل تسكين للألم بدرجة معينة تتساوى مع درجة التسكين الناتجة من محلول ibuprofen معلوم التركيز ( من عندنا احنا اللي محضرين تركيزه ) ..

نستنتج أن الدوائين لهما نفس التركيز ..
أيوة ماداموا بيعطوا نفس درجة التسكين , و كلاهما ibuprofen , أكيد تركيزهم متساوي أو متقارب ..


خدي بالك بقول درجة التسكين ..
هل من الممكن تعيين درجة التركيز رقميا ؟؟
يعني أقول عينة الدواء دة مفعولها نصف مفعول عينة دواء أخرى ؟؟
أيوة ممكن , و ممكن أوي كمان .. هتشوفي طول منهج الـ bioassay ازاي بيتم تعيين المفعولات العلاجية بقيم عددية معينة ..




دي فكرة الـ Bioassay ..
اننا نعرف تركيز الدواء أو مقدار مفعوله الدوائي .. هو دة اللي يهمنا ..

مجال الـ Bioassay من أهم ما يمكن في الأبحاث عندنا في كلية الصيدلة , جميع الأقسام بتعمل تجارب Bioassay , قسم الفارما و العقاقير و كل مجال فيه أدوية جديدة لازم يتعمل لها Bioassay من أجل تعيين مقدار فاعليتها اللي بنقول عليه الـ potency of drug ..

طيب ايه الفرق بين الـ Bioassay و الـ pharmacology ؟؟


تلاقي جايبلك في الكتاب كلمة screening أحيانا و كلمة bioassay .. يعني ايه ؟؟

يعني أنا لو أعطيتك دواء و لم أخبرك ما هو هذا الدواء , هتيجي انتي تجربيه على الحيوان و تشوفي يا ترى ايه اللي هيحصل ؟؟

هل الدواء هيسكن الآلام analgesic و لا هيقلل الضغط hypotensive و لا هيعمل ايه بالضبط .. هذا هو الـ screening و هو ما يختص به علم الفارماكولوجي تحديدا .. معرفة التأثيرات العلاجية للأدوية ..

أما الخطوة التالية بما انك عرفتي ان هذا الدواء مسكن مثلا , هتكوني عايزة تعيني تركيزه بناء على مفعوله العلاجي و هذا هو الـ bioassay ..


الكلام السابق دة مجرد تمهيد و أدينا بندردش مع بعض , بكرة العيد بقى ..
-----

هل من الممكن تعيين درجة التركيز رقميا ؟؟

مثلا أنا لو جبت جزء من الـ rabbit intestine و علقتها في organ bath فيه مجلول رينجر ..

طبعا الـ rabbit intestine دي smooth muscle فيها muscarinic receptors من النوع M3 ..

لو أنا عندي Acetylcholine أنا محضراه بايدي و تركيزه 10 mg في كل واحد ml

جيت أخدت منه واحد ml و حطيته على الـ rabbit intestine اللي أنا معلقاها في الـ organ bath ,

لقيت العضلة عندي انقبضت ورسمت خط طوله ثلاثة سنتيمتر على الـ Kympgraph ..


الـ drum هي الاسطوانة الأسودة الجميلة اللي ممكن بدون قصد يتمسح السواد اللي فيها في كم البالطو



لو بعد كدة عملت washing للعضلة و شلت الجرعة السابقة من الأسيتيل كولين اللي انا عرفت انه هيعمل انقباض ثلاثة سم ..

و بعدين جبت Acetylcholine غير معلوم التركيز ( أنا نفسي أعرف تركيزه ) ..
حطيت منه واحد ml ع الـ rabbit intestine ..

لقيت عندي العضلة انقبضت ورسمت خط طوله 1,5 سنتيمتر ..

كدة أقدر أقول ان تركيز الـ unknown بتاعي هو نصف التركيز السابق يعني هيكون 5 mg في كل واحد ml

[pharmacistina]

Bioassay methods

أول طريقة Matching technique :

معنى matching يعني توفيق أو توصيل ..

باختصار بتقعدي تجربي جرعات مختلفة من الـ test drug لحد لما تلاقي عندك response مساوية للي كانت ناتجة مع الـ standard drug ..

ساعتها تقدري تعوضي في القانون Ct Vt = Cs Vs

أصلا من المعروف عندنا انه أي حاجة Standard يعني تركيزها معلوم و الكلام ة في الفارما و التحليلية و الطبية و كل حاجة ..

و أي حاجة test يعني تركيزها غير معلوم ..

هقول طريقة الـ matching على نفس المثال السابق بتاع الـ rabbit intestine ..

انتي الأول هتختاري جرعة معينة من الـ standard تثبتيها و تشوفي تأثيرها و بعد كدة تجربي الـ test ..

طبعا الـ dose أو جرعة الدواء تعتمد على حاجتين .. تركيز المحلول الدوائي و حجم المحلول الدوائي ..

طبعا انتي محضرة الدواء الـ standard بتركيز معين مش هينفع تغيري فيه , لكن ممكن تقومي بتغيير حجم الدواء و بيه تتحكمي في الـ dose of standard ..

يعني تحطي واحد ملليلتر standard drug solution أعطاكي انقباض في العضلة نصف سم
تحطي اتنين ملليلتر من الـ standard drug solution تلاقي عندك انقباض واحد سم تقريبا
تحطي 3 ملليلتر .. تلاقي انقباض واحد و نصف سم
تحطي 4 ملليلتر تلاقي انقباض اتنين سم
تحطي 5 ملليلتر تلاقي انقباض اتنين سم
تحطي 6 ملليلتر تلاقي انقباض اتنين سم


لاحظي الجرعة 4 ملليلتر بعدها مهما زودتي عدد الملليلترات من الدواء مفيش زيادة هتحصل في انقباض العضلة ..
يبقى هي دي الـ maximal dose

بترسمي حاجة اسمها dose response curve للـ standard drug solution ..

و ن هذا الـ curve بتختاري الـ submaximal dose ..

و تقولي خلاص أنا عرفت الـ submaximal dose تساوي كذا ملليلتر من تركيز كذا اللي أنا محضراه ..

تبدأي تجربي في الـ test drug لحد لما توصلي لانقباض في العضلة مساوي أو مقارب لبتاع
الـ submaximal standard ..

دي الفكرة ببساطة ..

Dose = concentration x number of mls of drug solution

قالك انتي قاعدة تجربي على العضلة و تعملي washing كل شوية و تحطي أدوية , أكيد العضلة هتتعب ..

يعني طبيعي في الأول هتعطي انقباض عالي و مع الوقت هيقل الانقباض .. طيب يا ترى هيقل نتيجة ان تركيز الدواء اللي بجربه أقل و لا عشان العضلة تعبت ؟؟

قالوا يبقى نحط الـ standard بعدين الـ test ..
و نعمل washing
و بعدين نحط الـ test الأول ثم الـ standard عشان مش كل مرة هنظلم الـ test كفاية حطيناه المرة اللي فاتت بعد الـ standard

كدة عشان كل دواء ياخد فرصتع مع العضلة و هي نشيطة ,


طبعا النتايج مش هتطلع معاكي matching دقيق بالمسطرة يعني ..

قولي مثلا هيكون عندك انقباض العضلة في حالة test يساوي4,8 سم
وانقباض العضلة الـ standard اللي بتعملي من خلالها الـ matching يساوي 5 سم

انتي هتقولي خلاص كفاية كدة نعتبر الاتنين متساويين و خلاص أحسن الفرق بسيط مش مستاهل ..

قالوالك لأ ..


بتطبقي في معادلة معينة عشان تعرفي اذا كان الفرق الـ 0.2 سم دول حاجة بسيطة ممكن التغاضي عنها , ولا حاجة كبيرة هتفرق معاكي في حساب التركيز ..


المعادلة دي اسمها Unpaired Student,s (t) test

و الله لو كان الفرق بسيط , تقدري تقولي على الجرعات matched و تتوكلي على الله و تعوضي في القانون ..

Cs Vs = Ct Vt

Cs و Vs و Vt معلومين ..

و الـ Ct مطلوب منك حسابه ..

تعرفي تجيبيه ؟؟؟


بتهيألي كدة فكرة الـ bioassay بقت واضحة بصفى عامة ..

أعتذر على الاطالة ..

[عبدالله عبدالرحمن]

مجهود مشكور يادكتورة
جزاكى الله خيرا
وبالمناسبة
شكرا على ورقة الريسبتور

[era]

شكرااااا جزيلااااا يادكتورة والله انا مش لاقية كلام اقوله علشان اشكرك غير جازاك الله خير الجزاء

[pharmacistina]

أنا مبسوطة و الله اني عرفت أوصل جزء من الفكرة ..

جزاكم الله خير وربنا يكرمكم في سنة ثالثة و تكونوا أحسن صيادلة بس مش تيجوا تنافسونا

كل عام و أنتم بخير ..

[زهرة الياسمين]

جزاك ِ الله خيرا كثيرا على الشرح المتميز الموضوع كده اسهل كتير
وعلى ورقة الريسيبتورز
لسه جايباها من شوية بس بجد هتساعدنا كتير
كل يوم هاقرأها ان شاء الله
ربنا يكرمك وييسر لك
ويجعلك من الفائزين في الدنيا والاخــرة
****
تقبل الله طاعاتكم