سجل دخولك المنتدي الادبي بأبيات شعر

[Aya Farouk]

...علي عكس اللي تتمناه.....
مفيش (علي طول) فرص تانية
مفيش حد بيقع من فوق
يقوم تاني ..بدون ولا خدش!
مفيش ولا ضربة مابتوجعش.
او اختراعات تحل مشاكل العالم
بكبسه زر
وحتي فطيرة التوت اللي قالو عليها...
طعمها مر.!
وحبك ليا مش عشوة..وتذكرتين
وبوكيه ورد يصالحني
لما نتخاصم
ولا خناقه مع الواد اللي عينه عليا ومدايقك.
عشان بتغير
ومش صح ان لو واحد
اكل حبة سوداني يطير..
ولا ضفدع بقدرة قادر اتحول ف يوم لأمير
وبياض التلج.. ماتت ..قبل
مايجيلها البطل بــ كتير
ولا الاشرار بيبقي شكلهم معروف..
...ولا بيتفقسوا م الاول!!
ولا بيتمسكوا ف الآخر
ف مالاخر
وم الانصاف ..
محدش كامل الاوصاف
يجوز فعلا
في كـــلٍ منا
شئ مجنون
وانا حابة الجنان ..لكن
ياريت تفهمني وتصدق....
علي عكس اللي تتمناه
حياتنا بجد.....
مش كارتون



مى رضوان

[الملاك الضاحك]

أوقـات

أوقـات أفـوق ويحــل عنـي غبـايا

وأشـعر كأني فـهمت كـل الخبـايـا

وافتـح شـفايفي عشــان أقـول الدرر

مـا أقـولش غير حبة غزل في الصبايا

عـجبي !!

[Aya Farouk]

ولأني عارفه ان الزمن
مش بالضرورة ف صفِّنا
فلما كنت باقول... بحبك
كانت تلجِّمني الحروف
فبقول بدال منها...الوداع
ولإني عارفة ان السكات
احسن لنا
وان الكلام مِــ المستحيل
يلضم حكاية حلّيناها من العهود
وبقت ف خانة (الاصدقاء)
مع ضحكة باهتة
لحفظ ماء الوجه
مش اكتر
ولإني عارفة ان انقطاع حبل العشم
هايشدني اكتر
وان ارتباطك عندي
بالنور والحياة
شئ مش ف صالح رغبة النسيان
وانا اللي عشت
بخاف من الضلمة و وساوس وحدتي
هاهرب لهم-رغماً- عشان
صورك مغطية المكان
ولإني عارفة ان انت
مش راجع خلاص
وإني ف طريق
لا عَودة... منُّه.. ولا إليك
وإن حكاياتي عليك
بتبدو ممكنه
مع ان فعلا سردها بيوجع
وان استعارات الكتابة
دايما ماهياش منصفة
وان البحور
والتفعيلات والنحت
مش هتضيف جديد
ولا حتي من باب اقتباسك ع الورق
فِ يوتوبيا
معزولة و..بعيدة
(البُعد علي فكرة ..دا آخر مشكلة ف النص.. )
ولأني مش من طبعي اكون رهن الالم
مضطرة اعاند ف القلم...
لو حس مرة ببدء اعراض انسحاب
أما بخصوص كونك مشيت..وهاتبقي جزء من الغياب..
...
فأنا اســــــــــفة....
مش هكتب قصــــــيدة..!

....____.....
مي رضوان

[eeeman]

طُظ فيكوا
ياللي سيبتوا الحُزن .. فيكوا
و الوّجع يفضل ماليكوا
و الجروح تبقى الكيان
طُظ فيكوا \ ياللي ضيعتوا الأوان
ياللي خليتوا المكان
يقفِل الأيام عليكوا
ياللي سَكيتوا البيبان
ياللي سَلسِلتوا إيديكوا
طُظ فيكوا
ياللي بيكُوا
إختفى النور من عينيكوا
و السواد حاصِر باقيكوا
و الزمان ..
هوَ الزمان
مش هَيتغير عشان
يِبتسِم لَجل يواسيكوا
ياللي بيعتوا فّرح بُكرة
بُكرة أصلاً كان ناسيكوا
طُظ فيكوا
طُظ فيكوا

عزيزة على

[M.Hegazy]

>>> <<<<