منتدى فارما بورد كيف بدأ وما هى سلبياته ؟؟

[M.tal3t]

السلام عليكم ورحمة الله وبركاته ،

بسم الله والصلاة والسلام على أشرف الخلق ، ..

أسعد الله أوقاتكم بكل خير يا شباب ،،

AbU ElKhAiR-Let`s Go شكرا جزيلا على طرحك ..

لكن هل المنتدى ده فى سلبيات أكيد

أكيد فيه سلبيات .. وفيه إيجابيات ,, مفيش حاجه في الدنيا Ideal

وبما أننا هدفنا كلنا واحد يبقى لازم نتناقش ونشوف اى هيا عيوب المنتدى ونحاول نحلها مع بعض بالهدوء وبالعقل

تمام , لكن اسمحلي أوضحلك .. المنتدى مش عباره عن ملفات

المنتدى مش عباره عن موقع .. بنكتبه وبنخش نشوف منتدى ..

المنتدى مش عباره عن ابتسامات .. او قسم موجود او مش موجود

المنتدى عباره عن فكر ناتج من كل واحد حط مشاركة فيه .. اذا كنت ناوي تتكلم بخصوص امور تقنية .. فيه موضوع اسمه سجل ملاحظاتك عن المنتدى .. مثبت في القسم ده .. اذا كنت ناوي تناقش امور تقنية..

بشكر حضرتك على إهتمامك .. وكنت أتمنى انك تحط نقاط نتكلم عنها .. مش تسيب الموضوع عايم .

زي ما قلت المنتدى عباره عن أعضاء , انا عملت موضوع وانت عملت موضوع وعضو تالت ورابع عمل موضوع وعضو حط تعليق .. وبكده تم تكوين منتدى ..

العيوب مش في ادارة لوحدها او في اعضاء لوحدهم , كلنا منظومه بتكمل بعضها هنا ..

ماينفعشي احصر واقول منتظر رد محمد طلعت عشان هو المدير , زي ما حضرتك عامل حملة ابدأ بنفسك , كل عضو يبدأ يحاسب نفسه

ربنا قال , {إذ يتلقى المتلقيان عن اليمين وعن الشمال قعيد ما يلفظ من قول إلا لديه رقيب عتيد}

وطبعا لازم نعرف تاريخ المنتدى ازاى بدأ وازاى بأه فى فارما بورد ولى واشمعنه ولى هوا رسمى وياترى هوا رسمى فعلا

إنت جاوبت نفسك الأول .. في اول سطر انت قلت :

أيوه انا شايفه كده منتدانا والرسمى كمان

سؤالي لكل عضو هنا ، لو قلنا انه رسمي .. هتدخل ؟ ،، ولو قلنا انه مش رسمي مش هتدخل ؟

إسأل نفسك انت داخل هنا ليه ..

هل انا بستفيد ؟

طيب لو فيه موقع تاني بيقدم نفس الخدمات و أكتر وكله طلبه من صيدلة المنصوره , هل هفضل ادخل هنا ؟

بس طبعا عشان نعرف كل ده فلازم ناس أكبر منى وعندهم معلومات أكتر منى بكتير يتكلموا عن فارما بورد

تمام , أي نقاش في الدنيا مبني على افتراضات بيكون نقاش مالوش فايده ..

اذا كان عندي فرضيات وقدرت احولها لحقائق اتكلم بيها .. يبقى انا كده ماشي صح .. لكن اذا ماكانشي عندي حقائق .. يبقى يفضل كله افتراضات وفي الحالة دي زي ما قلت .. لازم ناس عندهم معلومات اكتر مني يتكلموا بخصوص المنتدى .. او نسألهم زي ما حضرتك تفضلت

فيه لينك فوق .. اسمه هذا المنتدى .. فيه نبذه عن المنتدى وازاي تم إنشائه ..

انا قريت مشاركات موضوع ثورة طلاب صيدلة اللي موجود في قسم الاتحاد .. واستغربت من كلام بعض الناس اللي مش عندها حقائق تثبت اللي بيقولوه وقاعدين يفترضوا .. والمشكله الاكبر الناس اللي ماشية على هواهم ومش قادره تفكر او تحلل الامور بمنطقية أكبر ..

استغربت لما الاقي عضو يقول اشبه بالتلفزيون المصري .. وان فيه طلاب موقوفين واي حاجه مش متوفقه مع هوى المشرفين بنحذفها ..

طيب كنت فين قبل 25 يناير يا دكتور ياللي بتقول كده

ليه طالع تتكلم دلوقتي .. نقول حماس الثوره مثلا ؟ ..

اوك ..

شخصيا كنت متضرر
في حاجه من المنتدي
وهي اختيار المشرفين وبيتم علي اي اساس ؟؟؟؟؟؟

إختيار المشرفين بيتم كالتالي ..

بيتعمل اعلان ان مطلوب مشرفين على الاقسام الفلانية .. بيتقدم الناس .. ويبقوا فولنتيرز .. لسه مش مشرفين ..

اذا اثبتوا نفسهم بيترفعوا مشرفين وفيه اللي بيرجع عضو تاني ..

أساس اختيار ادارة المنتدى للمشرفين ليه عوامل كتير ، مش شرط يكون شارك كتير ولا رقم 1 في المنتدى ومعدل مشاركته بالنسبه للفترة الزمنية كبير ..

زي اجابتك في ورقة الامتحان , طالب جاوب السؤال عاوز ايه واخد الدرجة كامله ,, وطالب كتب 4 ورقات وماخدتش الدرجة كامله

اقرأ قوانين المنتدى .. هتلاقي فيها اهم اساس من اختيار المشرفين .. يكون تعاملك العام طيب وذو منفعه للطلبه

وممكن تسأل كل مشرف , قوله انت وصلت لهنا ازاي ؟ انت طلبت , قدمت واتقبلت , عرضوا عليك لوحدهم ولا يعرفوك عشان كده اخدوك ضمن الفريق الاشرافي للمنتدى ؟


،،،

دكتور عامر .. شكرا على آرائك .

ومن إيجابيات المنتدى : ون تاتش ريزلت, وكمان المحاضرات اللى زملائنا المشرفين بينزلوها بإستمرار
وكمان ساحات الحوار و التواصل الفعال سواء بين الطلاب وبعضهم أو مع اعضاء هيئة التدريس

المحاضرات اللي المشرفين والاعضاء كمان بينزلوها ,, المعلومات اللي بتوصل

وساحات الحوار اللي حضرتك شايفها ايجابية , وغيرك شايفها سلبيه كمصدر للإشاعات او كمصدر للتوتر والخوف ..

كل واحد شايف حاجه من وجهة نظره ..

لكنى هتكلم عن مرحلة إزدهار المنتدى و بإختصار اللى صنع الإزدهار ده هو الأسر الطلابية و الأنشطة الطلابية فى الكلية, لأن خلال سنة واحدة طبعنا أكتر من 200.000 ورقة عليها إسم وعنوان المنتدى وكنا بنوزعها على الطلبة ده غير البانرات و البوسترات والإعلانات اللى بتشتغل فى المدرجات, وفى المقابل على رأي زميلنا محمد الجوهرى: إننا كنا بناخد إعلان مجانى على المنتدى, ومش ذنب إدارة المنتدى إنها ماعدتش عايزة تنزل إعلانات على الإعلانات بتاعة الأنشطة

شفت ، انت كعضو وجوهري كمشرف كل واحد حكم على حسب معرفته ..

مثلا ياعامر ليك اهتمام بالنشاط الطلابي داخل الكليه , وعارف نظامه .. الخ فإتكلمت من وجهة نظرك

وجوهري كمان مشرف .. واتكلم من وجهة نظره

إسمحولي اوضحلكم ..

الاعلانات والنشاط الطلابي آحد عوامل ازدهار المنتدى ، ليه انت اختزلت عوامل كتير في عامل واحد ..

وليه جوهري موضحش عوامل تانيه وقالك : مش ذنب الاداره انها مش عاوزه تنزل اعلانات تاني مجانا

المنتدى بدأ على سيرفر مجاني .. معندناش مانع نحط بانرات للناس :::

طيب انا على سيرفر مجاني .. وفيه اقسام للأسر .. اعمل اللي انت عاوزه في القسم يتاعك .. حتى لو عملت 30 موضوع عن نشاط واحد انت حر ..

عاوز امتيازات اكتر واعلانات في الصفحة الرئيسيه ..

اوك مفيش مشاكل ..

خلي بالك احنا حاليا على سيرفر مجاني ..

هنعملك اعلانات في الرئيسية وكل حاجه .. لكن انت هتقدر تقدملنا ايه ..

قلنا لمقرري الاسر في الوقت ده احنا هنحطلكم الاعلانات مقابل لينك للمنتدى في النشاط اللي حضرتك بتوزع ورقه او بتعلق بوستراته .. انت تستفيد مشتركين اكتر .. واحنا نستفيد اعضاء او نوصل المنتدى لناس اكتر وكلنا نبقى مستفيدين

طيب ليه احنا بنعمل كده ؟ ليه متكونشي الادارة طيبة القلب ولما مقرر اسرة يطلب اعلانات , الاداره تنفذ من غير شروط ؟

لان اي موضوع غير مقنن هيبقى هيصه وزيطه

كل نشاط او كل ندوه او كل رحلة .. من فضلك اعملي بانر وحطه فوق وشيل ده ..

كده مش هنخلص .. ابدا .. لان كل شويه اسره حطلي وشلي طيب بدلي .. طيب البانر ده احلى شوية حطهولي ..

طيب انا عندي ندوتين .. حطلي ده لمدة 4 ايام وشلي ده بعد 5 ايام ..

يبقى لازم الموضوع مقنن ،

رحنا على سيرفر غير مجاني .. خلينا نقنن الموضوع برضو بالطريقه الصح اداريا على حسب الظروف..

ممكن عالسيرفر الغير مجاني اعمل نفس الموضوع , حطلي لينك للمنتدى وانا احطلك بانر .. لكن لكل موقف ظروفه

المنتدى الخدمى : هو الذى يحرص على المصلجة العامة فوق كل شيئ و تقديم مختلف الخدمات للمجتمع الذى يخدمه أمثلة على ذلك:
إعلانات لأنشطة الأسر : مجانآ
عدم تشويه صورة الموقع بالإعلانات المدفوعة الأخرى
السماح بإستخدام الرسائل الخاصة أو رسائل البريد الإلكترونى مجانآ

طيب طيب .. هل التعريف ده نابع من طالب عادي ولا نابع من طالب مسئول عن انشطة طلابية وأسر ؟

خليني اعرفلك المنتدى الخدمي من وجهة نظري ..

المنتدى الخدمي : هو المنتدى الذي يحرص على المصلحة العامة فوق كل شيء وتقديم مختلف الخدمات للمجتمع الذي يخدمه .. أمثله على ذلك :

**** الطالب في كلية الصيدلة - جامعة المنصورة ****

محاضرات ، نقاش مع اعضاء هيئة التدريس , محتاج استفسار ( طالب او زميل او عضو هيئة تدريس يساعده )

توظيف التكنولوجيا في اشياء تساعد العملية التعليمية , الداتا شو .. الامثله والسي ديهات زي العقاقير باثولوجي .. الخ

خدمات تانية مش متوفره زي ون تاتش ريزلت ..اللي بيجيب النتيجه عادي جدا . لكنه بيبعتها على الايميل ..

محتاج يعرف ادوات في وقت مش عارف يسأل فيه حد .. فأكتر من واحد يجاوب عليه ..

Sharing is caring

كمان يكون على علم بأحدث اخبار الكليه .. والانشطة الطلابيه من الاسر او الاتحاد

ويكون الطالب مشارك بشكل فعال في العملية التعليمية ..

طيب , المنتدى هنا بيخدم مين .. طلاب واسر واعضاء هيئة تدريس ..

ازاي ؟ اتكلمنا عن الطالب فوق

الاسر والنشاط الطلابي .. ليهم اقسام بيكتبوا فيه اخر مستجداتهم والطالب يتعرف عليها ويعرف الاخبار والشهادات امتى ويحط تقييم لنشاط كل اسرة ..

اعضاء هيئة التدريس .. المنتدى بيخدمهم انه بيوصل رأي مجموعه كبيره من الطلبه في وقت قصير بكل سهوله

مثال .. لو دكتور حط امتحان صعب او سهل او شرح كويس او فيه قصور في شرحه او منهجه او او او

بنوصل فكرنا بطريقه حضارية ونقد محترم او مدح للدكتور ونقوله كذا

انت تعريفك حطيت فيه كام مره كلمة مجانا ومدفوع ؟

كل تعريفك بيخدم النشاط الطلابي كل سطر انت كتبته لخدمه للنشاط الطلابي فقط

شكرا جزيلا على التعريف

أتقدم بالنيابة عن الأسر الطلابية لتقديم طلب إستضافة المنتدى مجانآ على إستضافة خاصة تتكفل الأسر الطلابية وومثلى النشاط بقيمتها بالمواصفات التى تحددها إدارة المنتدى

أو الإدارة تحدد قيمة سنوية أو شهرية لإستضافة المنتدى بإستضافة خاصة بهم ونتكفل نحن بها

وأيهم أيسر فى التنفيذمع إحتفاظ الإدارة لحقها فى الإدارة ولكن بتنفيذ طلبات الأعضاء.

يبقى بالتالى بعد الكلام الكتير ده كله هنختصر مطالبنا الموجهة لإدارة الكلية و إدارة المنتدى و اللى خرجنا بيها من إجتماعنا كالتالى:

موقع ومنتدى الكلية

· تحويل منتدى الكلية إلى منتدى رسمى مدعوم من الكلية.
· تكوين هيئة ادارية من ممثلى الانشطة الطلابية واعضاء هيئة التدريس.
· اختيار مشرفى الاقسام عن طريق التصويت.
· فتح اقسام الاسر لجميع الزوار.
· الغاء اسعار الدعاية للانشطة الطلابية.
· السماح بالتواقيع والروابط الخارجية.
· اهتمام اكبر من اعضاء هيئة التدريس.
· تعديل قوانين المنتدى, وتصويت الأعضاء عليها.

· تفعيل دور موقع الكلية وتنويع محتوياته و تحديثه بصفة مستمرة بالجداول الدراسية و جداول الإمتحانات و تحديث مكتبة الإمتحانات السابقة.

والسلام عليكم ورحمة الله وبركاته

تمام , هتقدموا المطالب دي لإدارة الكليه .. وادارة الكليه تتكلم معايا
مفيش مشكلة

شخصيآ يا سموح, و رامى, كنت أحب إن سؤال قيمة إشتراكات الأسرة لبعض الأنشطة, يكون من د. محمد طلعت لو كان السؤال يهمه

قيمة اشتراكات واعلانات الاسر موضحه لمقرري الاسر في القسم الخاص بيهم .. مش سر ولا حاجه

اما السؤال عن الدخل منهم كام ؟ ، انا مش مهتم اجاوب عالسؤال الا لشخص ليه صلاحية انه يسألني ..

وأقبل ما أجاوب ياريت ماحدش يتكلم عن لسان د. محمد طلعت لأن ممكن يكون بيحاول يكحلها فا يعميها, زي أحد التعليقات إن المنتدى بقوانين د. محمد طلعت, اللى عاجبه يشترك فيه يشترك و اللى مش عاجبه يعمله منتدى يلعب فيه, و أنا متأكد إن رد زي ده عمره ماكان هيخرج من د. محمد طلعت.

تمام , اي حد يقول قوانين محمد طلعت : هقوله

مينفعش اقول قوانين محمد طلعت .. مش عشان انا كاتب الموضوع يكون محتواه تأليفي مثلا

لما اي حد يكتب مقوله , هل تنسب اليه ؟

لما نكتب في القوانين ناقش بأدب , تقبل الرأي الاخر مثلا .. هل دي قوانين

لما نقول ممنوع ارقام الموبايلات ؟ دي قوانين .. اكيد فيه سبب مش هألف من نفسي يعني انه ممنوع ارقام موبايلات او ممنوع لينكات فيس بوك ..

اللي معترض المفروض يتعلم يسأل عن السبب ,, ليه انت حاطط القانون ده ؟

مش طالما القوانين معجبتنيش و جه يوم 25 يناير ,, اه ده مش عاجبني .. اجمع مجموعه مش موافقه ونغير وخلاص

وياريت نخلى كل مختص بنقطة يتكلم عنها, واللى ميعرفش فى حاجة بدل مايضحك الناس عليه يقول ماعرفش, وليقل أحدكم خيرآ أو ليصمت

أحسنت قولا ..

ويارامى ياحبيبى, أهل مكة أدرى بشعابها, او كما يقال
هل إنت يارامى شفت فاتورة مخصصة لخدمات المنتدى بـ 400 جنيه شهريآ؟ ده بغض النظر عن إن الموقع على سيرفر مواقع د. محمد طلعت, و إن إيجار أفضل سيرفر نسبيآ ومساحة تقرب من ربع تيرا بايت لا تزيد عن 400 جنيه شهريآ
وفى مشاركتى الأولى فى الموضوع, قلت إنى مستعد بالنيابة عن أسر صيدلة المنصورة بتوفير المساحة و الإستضافة اللازمة للمنتدى

كلامك مظبوط ..

رامي مشافش الفاتوره , ولا يعرف مين ممول المنتدى مثلا , ولا يعرف مقدار الربح وانت قلت اهل مكة ادرى بشاعبها , كل عضو يطبقها على نفسه

ياترى لو فى موقع خدمى ومش عايز يتحمل خسائر مادية وعمل إعلانات, وفى هامش ربح معاه, هيعمل إيه بالربح ده!
وباعدين سياسة التسعير يجب أن تكون عادلة للطرفين ومعلنة لأننا مش هنرضى بالخسائر سواء لمدير موقع أو لللى بيدعموه
يعنى في صندوق يتحمل الخسائر و يحتفظ بالمكاسب, واللى بيقوم بيه هنا د. محمد و اللى واضح لنا إنه بيتحمل خسائر لا طاقة له بها, وليست واجبة عليه إلا لأنه يهدف لخدمة طلاب كليته التى تخرج منها
علشان كده إحنا بنطالب الكلية بتحمل تكاليف ودعم المنتدى, والأسر نفسها مستعدة لتحمل تكاليف المنتدى بإعتباره نششاط طلابى
لأن إحنا مانرضاش إن حد يتكلف 400 * 12 * 4 = 19200 جنيه عن أربع سنين للمنتدى
أنا لو مكان د. محمد طلعت كنت هخلى مسؤوليتى من زمان أو كنت إشتريت عربية 128 وظبطتها آخر حاجة

مطالبنا منذ البداية موجهة لإدارة الكلية لدعم المنتدى, ويمكنك الرجوع إلى مشاركتى الأولى وقرائتها وتبيان تفاصيلها, لكي تتأكد إننا لا نطالب د. محمد بالمزيد من الخسائر المادية, وبرغم إنك إقتبست كلامى كامل, لكنى هقتبس سطر واحد بس فيه توضيح أولوية مطالبنا:

متشكر جدا ..

اذا ليكم مطالب تقدمتوا بيها لإدارة الكليه , الواجب حاليا ادارة الكليه تدرس الموقف وتتواصل معايا و نوصل لاتفاق ..

تمام

النيه الطيبه هي الاصل في تعاملاتنا .. كل المشاركات للتوضيح او شرح المطالب ووجهة نظر كاتبها .. و انا وضحت وجهة تظري وصححت بعض المفاهيم ورديت على نقاط تخصني ..

طيب اي اقتراحات تانيه خاصه بالمنتدى بعد كده هتتناقش في سجل ملاحظاتك عن المنتدى او مشروع تطوير منتدى الكلية في القسم العام , تقنيا

اي مشاكل ادارية .. مشرف عمل او مشرف سوى او مشرف متضايق منه , او اقتراح اداري .. في قسم الشكاوى والمقترحات

و تذكروا إن رضا الناس جميعا غاية لا تدرك .. احنا مش مجموعه من 100 واحد او 200 احنا على الاقل 3000 متابعين المنتدى , كل واحد بيبص على عضويته كفرد , بيبص على قسم اسرته كمجموعه , بيفتكر تغيير اسمه في ثانيتين لانه يهمه اسمه بس .. لكن كمشرفين بنبص للموضوع كـ bulk ,و إنما الأعمال بالنيات وإنما لكل لإمريء ما نوى ..

لكم أطيب تحية ..

أخوكم ،
mt-

[AbU ElKhAiR-Let`s Go]

السلام عليكم ورحمة الله وبركاته ،

بسم الله والصلاة والسلام على أشرف الخلق ، ..

أسعد الله أوقاتكم بكل خير يا شباب ،،

AbU ElKhAiR-Let`s Go شكرا جزيلا على طرحك ..

شكرا لحضرتك على الرد

المنتدى عباره عن فكر ناتج من كل واحد حط مشاركة فيه .. اذا كنت ناوي تتكلم بخصوص امور تقنية .. فيه موضوع اسمه سجل ملاحظاتك عن المنتدى .. مثبت في القسم ده .. اذا كنت ناوي تناقش امور تقنية..

أوك يا دكتور أنا عارف ان فى موضوع اسمه سجل ملاحضاتك ......... لكن فى حاجه حاليا وهيا ان فى ناس أنا من ضمنهم شفنا حاجات غلط بغض النظر ان كان بسبب 25 يناير أو بسبب الحماس أيا كان السبب لكن فى طلبات محتاجه مناقشه بصوره أكبر وأوضح لكل الناس عشان كده عملت الموضوع ده لكل الناس عشان نتكلم كلنا وكل واحد يقول رأيه

بشكر حضرتك على إهتمامك .. وكنت أتمنى انك تحط نقاط نتكلم عنها .. مش تسيب الموضوع عايم .

سيبته عايم لأنى فى حاجات مش عارفها بالتفصيل وكان لازم أسمعها الأول وأسمع الرد عليها وبعدين أقول أنا شخصيا عايز اى أو اقترح ممكن نعمل اى ونتناقش لكن مش ينفع أجى أقولك كده يا دكتور معلش غير وبدل وشيل وحط وأنا كل اللى أعرفه هى توبيكات بحطها أو بشارك فيها أراء بقولها فى الحاجه اللى ممكن يكون عندى رأى فيها لأن عارف حاجه عنها أو ملم بأغلب جوانبها لكن هنا لازم أسمع الأول وبعدين

العيوب مش في ادارة لوحدها او في اعضاء لوحدهم , كلنا منظومه بتكمل بعضها هنا ..

أكيد وكلنا لازم نصلح بعض ولو حد شاف حد عمل حاجه غلط ممكن ينبهه فى رد بتلميح أو فى رساله أو بأى طريقه

ماينفعشي احصر واقول منتظر رد محمد طلعت عشان هو المدير , زي ما حضرتك عامل حملة ابدأ بنفسك , كل عضو يبدأ يحاسب نفسه

أولا أنا مش حصرت أنا قلت أسماء أظن انها هتكون عندها معلومات أكتر وبعدين قلت وناس تانيه كتير
وبعدين حددت اسم حضرتك لان حضرتك المسئول الأول عن المنتدى من الناحيه الاداريه وطبعا هيا مش كل حاجه صحيح لكن هيا جزء كبير من المنتدى وقد تكون أصل المنتدى تقريبا

إنت جاوبت نفسك الأول .. في اول سطر انت قلت :
لأ أنا ما جاوبتش على نفسى ولا حاجه أنا قلت أنا شايفه رسمى وبعدين سألت هل هوا فعلا رسمى
لأنى مش كنت عارف ازاى بتم الاداره والتمويل والدعم ووضع القوانين
رسمى فعلا يعنى كل ده الكليه اللى تعمله وتدعمه وتدعم المدير اللى هينفذ ده كأنه موظف فى الكليه
غير رسمى انه يكون شخص هوا المسئول عنه ويعمل كل ده وأنا مش أقدر أحكم على ده أو ده
أما الأعضاء أنا شايفه رسمى بيعبر عن الكليه
بيتهيألى كده رأى أوضح

سؤالي لكل عضو هنا ، لو قلنا انه رسمي .. هتدخل ؟ ،، ولو قلنا انه مش رسمي مش هتدخل ؟

رسمى يبقى دى حاجه كويسه فى الكليه
غير رسمى هطالب بحاجه من اتنين انه يكون رسمى فعلا
أو الكليه تعمل منتدى رسمى

إسأل نفسك انت داخل هنا ليه ..
هل انا بستفيد ؟

أوك بستفيد ولازم أفيد ولو شفت غلط يبقى يتصلح

تمام , أي نقاش في الدنيا مبني على افتراضات بيكون نقاش مالوش فايده ..
اذا كان عندي فرضيات وقدرت احولها لحقائق اتكلم بيها .. يبقى انا كده ماشي صح .. لكن اذا ماكانشي عندي حقائق .. يبقى يفضل كله افتراضات وفي الحالة دي زي ما قلت .. لازم ناس عندهم معلومات اكتر مني يتكلموا بخصوص المنتدى .. او نسألهم زي ما حضرتك تفضلت

فيه لينك فوق .. اسمه هذا المنتدى .. فيه نبذه عن المنتدى وازاي تم إنشائه ..

دكتور زى ما هو واضح من الكلام انه المفروض انه منتدى رسمى
الحقائق والأدله اللى اتقالت وأنا مش قلتها وحضرتك مش نفتها بتقول انه غير رسمى

أساس اختيار ادارة المنتدى للمشرفين ليه عوامل كتير ، مش شرط يكون شارك كتير ولا رقم 1 في المنتدى ومعدل مشاركته بالنسبه للفترة الزمنية كبير ..
زي اجابتك في ورقة الامتحان , طالب جاوب السؤال عاوز ايه واخد الدرجة كامله ,, وطالب كتب 4 ورقات وماخدتش الدرجة كامله
اقرأ قوانين المنتدى .. هتلاقي فيها اهم اساس من اختيار المشرفين .. يكون تعاملك العام طيب وذو منفعه للطلبه

طيب لو سمحت مين اللى حدد الشروط دى
ولى مش يكون بالانتخاب مثلا بما ان المنتدى رسمى بيعبر عن الطلبه يبقى اللى يحط الشروط هما الطلبه أو ممثل الطلبه الشرعى
أما لو غير رسمى فيبقى ده مش حقى عشان أطلب بيه

وساحات الحوار اللي حضرتك شايفها ايجابية , وغيرك شايفها سلبيه كمصدر للإشاعات او كمصدر للتوتر والخوف ..
كل واحد شايف حاجه من وجهة نظره ..

دا طبيعى جدا والطبيعى اللى بيجى بعده انه رأى الأغلبيه هوا اللى يمشى

طيب ليه احنا بنعمل كده ؟ ليه متكونشي الادارة طيبة القلب ولما مقرر اسرة يطلب اعلانات , الاداره تنفذ من غير شروط ؟

دكتور لو سمحت أنا متفق مع حضرتك تماما
لكن هل ان الأسره تحط اعلان المنتدى يبقى ده شرط هيخلى العمليه مقننه
بيتهيألى مش صح

لان اي موضوع غير مقنن هيبقى هيصه وزيطه
كل نشاط او كل ندوه او كل رحلة .. من فضلك اعملي بانر وحطه فوق وشيل ده ..
كده مش هنخلص .. ابدا .. لان كل شويه اسره حطلي وشلي طيب بدلي .. طيب البانر ده احلى شوية حطهولي ..
طيب انا عندي ندوتين .. حطلي ده لمدة 4 ايام وشلي ده بعد 5 ايام ..
يبقى لازم الموضوع مقنن ،

أوك كده جميل يبقى مقنن ممكن تقول ان كل اسره ليها حد أقصى من البانرات وليها مده معينه وليها وليها وشوط المفروض اللى يقترحها ممثل شرعى للطلبه لأنه منتداهم دا الطبيعى والطبيعى جدا لكن مش تقول احنا هنخلى البانرات بمقابل مادى عشان نقنن العمليه

رحنا على سيرفر غير مجاني .. خلينا نقنن الموضوع برضو بالطريقه الصح اداريا على حسب الظروف..
ممكن عالسيرفر الغير مجاني اعمل نفس الموضوع , حطلي لينك للمنتدى وانا احطلك بانر .. لكن لكل موقف ظروفه

طيب واى الفرق يعنى بين السيرفر والغير مجانى هنا وهنا ممكن تحط قوانين من غير ما تخلى الأسر تدفع قيم ماديه

اما السؤال عن الدخل منهم كام ؟ ، انا مش مهتم اجاوب عالسؤال الا لشخص ليه صلاحية انه يسألني ..

على فكره يا دكتور حاليا اللى له الحق يسأل السؤال ده هوا اللى سأله فعلا لأن ده منتدى زى ما هوا مكتوب واللى يسأل هوا ممثل شرعى للطلبه حاليا مفيش اتحاد طلبه لكن فى لجنه متقدمه بطلبات بالنيابه عن الطلبه يبقى هيا اللى من حقها تسأل والمفروض يتجاوب عليها

تمام , اي حد يقول قوانين محمد طلعت : هقوله
مينفعش اقول قوانين محمد طلعت .. مش عشان انا كاتب الموضوع يكون محتواه تأليفي مثلا
لما اي حد يكتب مقوله , هل تنسب اليه ؟
لما نكتب في القوانين ناقش بأدب , تقبل الرأي الاخر مثلا .. هل دي قوانين
لما نقول ممنوع ارقام الموبايلات ؟ دي قوانين .. اكيد فيه سبب مش هألف من نفسي يعني انه ممنوع ارقام موبايلات او ممنوع لينكات فيس بوك ..

طيب حضرتك مش كاتبها طيب مين اللى كتبها ؟؟؟

اللي معترض المفروض يتعلم يسأل عن السبب ,, ليه انت حاطط القانون ده ؟

طيب منا لازم الأول أعرف مين اللى كتبها وهل هوا ده اللى المفروض يكتبها ولا لأ عشان أسأله

مش طالما القوانين معجبتنيش و جه يوم 25 يناير ,, اه ده مش عاجبني .. اجمع مجموعه مش موافقه ونغير وخلاص

المجموعه دى لو أغلبيه وكلامهم مقنع فيبقى لازم يتغير بغض النظر اى اللى خلاهم يطلبوا فى الوقت ده بالتحديد

شكرا لحضرتك على الرد جدا لكن أنا فى تعليقى التانى كان ليا اقتراحين وكمان دكتور عبدالله عبد الرحمن كان له اقتراح أتمنى حضرتك تقول رأيك فيهم وهل حضرتك مستعد فعلا ان صفة الرسمه اللى اتوصف بيها المنتدى تتحول لواقع ولا لأ ويكون المنتدى الرسمى اسما وتصورا من الاعضاء فقط

شكرا

[Messi]

إختيار المشرفين بيتم كالتالي ..

بيتعمل اعلان ان مطلوب مشرفين على الاقسام الفلانية .. بيتقدم الناس .. ويبقوا فولنتيرز .. لسه مش مشرفين ..

اذا اثبتوا نفسهم بيترفعوا مشرفين وفيه اللي بيرجع عضو تاني ..

أساس اختيار ادارة المنتدى للمشرفين ليه عوامل كتير ، مش شرط يكون شارك كتير ولا رقم 1 في المنتدى ومعدل مشاركته بالنسبه للفترة الزمنية كبير ..

زي اجابتك في ورقة الامتحان , طالب جاوب السؤال عاوز ايه واخد الدرجة كامله ,, وطالب كتب 4 ورقات وماخدتش الدرجة كامله

اقرأ قوانين المنتدى .. هتلاقي فيها اهم اساس من اختيار المشرفين .. يكون تعاملك العام طيب وذو منفعه للطلبه

وممكن تسأل كل مشرف , قوله انت وصلت لهنا ازاي ؟ انت طلبت , قدمت واتقبلت , عرضوا عليك لوحدهم ولا يعرفوك عشان كده اخدوك ضمن الفريق الاشرافي للمنتدى ؟
mt-

انا اسف علي المداخله مره تانيه ......

بس بغض النظر عن القوانين التي لا تعرف الرحمه

وبغض النظر كيف تم وضع هذه القوانين او دستور المنتدي .... والذي يحتاج لتعديل .. .


اليس من الافتراء و الظلم و التشدد

ان تلغي مجهود 1000 مشاركه بانذار وحيد ؟؟؟؟؟؟؟؟


تخيل حضرتك كده الف مشاركه

فيهم كام موضوع وكل موضوع اخد كام دقيقه عشان يتظبط وينزل ونتابع الردود عليه

ولو كان محاضره او سكشن

اخدت اد ايه تسجيل و رفع او تصوير ورفع

حضرتك عاوز تختزل كل المجهود الجبار ده بانذار ناتج عن لحظه غضب او سوء تفاهم او عناد من مشرف لعضو ؟؟؟

HOW ؟؟؟؟؟؟؟

طب ما لو كده

وفيه ناس شغاليين كويس

ممكن بتنبيه صغير جدا من حضرتك ليهم قولهم

والله انتوا عندكم سلبيات كذا كذا كذا

حاولوا تصلحوها


انما مش نوصل لالاف ومئات المشاركات

اخدت مجهود و ووقت جبار وبعدين بكام انذار معدود تحذف كل ده .... ويبقي كان لم يكن



انا اسف مره تانيه اني طولت في النقطه بتاعت الاشراف دي

بس لازم صوتي كان يوصل للاداره .... ويشوفوا كلامي ويفكروا فيه

عشان مستقبل افضل للمنتدي

[Mohamed Al Gohary]

حضرتك عاوز تختزل كل المجهود الجبار ده بانذار ناتج عن لحظه غضب او سوء تفاهم او عناد من مشرف لعضو ؟؟؟

مفيش فايدة برضه

[M.tal3t]

السلام عليكم ورحمة الله ،

أوك يا دكتور أنا عارف ان فى موضوع اسمه سجل ملاحضاتك ......... لكن فى حاجه حاليا وهيا ان فى ناس أنا من ضمنهم شفنا حاجات غلط بغض النظر ان كان بسبب 25 يناير أو بسبب الحماس أيا كان السبب لكن فى طلبات محتاجه مناقشه بصوره أكبر وأوضح لكل الناس عشان كده عملت الموضوع ده لكل الناس عشان نتكلم كلنا وكل واحد يقول رأيه

طيب ليه حكمت عليها انها غلط ؟

لأ أنا ما جاوبتش على نفسى ولا حاجه أنا قلت أنا شايفه رسمى وبعدين سألت هل هوا فعلا رسمى
لأنى مش كنت عارف ازاى بتم الاداره والتمويل والدعم ووضع القوانين
رسمى فعلا يعنى كل ده الكليه اللى تعمله وتدعمه وتدعم المدير اللى هينفذ ده كأنه موظف فى الكليه
غير رسمى انه يكون شخص هوا المسئول عنه ويعمل كل ده وأنا مش أقدر أحكم على ده أو ده
أما الأعضاء أنا شايفه رسمى بيعبر عن الكليه
بيتهيألى كده رأى أوضح

طيب , خلينا نتفق على حاجه الاول ايه تعريف الرسميه ؟

لو تعريفها ان الكليه بتدعم المنتدى .. يبقى المنتدى غير رسمي وانا المتحكم الاول والاخير في كل حاجه هنا

تمام ..

غير رسمى هطالب بحاجه من اتنين انه يكون رسمى فعلا
أو الكليه تعمل منتدى رسمى

تمام , ةده في المطالب وقلنا لما الكليه تقرر خليها تتواصل معايا ،

لكن هل ان الأسره تحط اعلان المنتدى يبقى ده شرط هيخلى العمليه مقننه
بيتهيألى مش صح

الفتره دي كانت من 3 سنين ووقتها بيتهيألي انه صح..

أوك كده جميل يبقى مقنن ممكن تقول ان كل اسره ليها حد أقصى من البانرات وليها مده معينه وليها وليها وشوط المفروض اللى يقترحها ممثل شرعى للطلبه لأنه منتداهم دا الطبيعى والطبيعى جدا لكن مش تقول احنا هنخلى البانرات بمقابل مادى عشان نقنن العمليه

يادكتور حضرتك بتتكلم بس على اساس ايه ؟؟ هل قرأت مشاركتي كويس !

الاول كان سيستم وحاليا سيستم تاني ..

سيبك من المقابل المادي .. كل الشروط اللي حضرتك بتقولها هيطلع واحد يعترض عليها برده ويقولك ممثل شرعي للطلبه .. هو مين حاليا الممثل الشرعي للطلبه ؟ ومين سابقا الممثل الشرعي للطلبه ؟

وازاي كل اسرة ليها حد من البانرات ؟ يعني اقوله ليك 5 مرات اعلانات في الترم بنرات بحجم معين لمدة معينه ؟

طيب هو عمل اكتر وعاوز اكتر ..

نفس الشروط اللي انت حطيتها , ناس مكانشي هيعجبها

العملبه مش مقابل مادي فقط

طيب واى الفرق يعنى بين السيرفر والغير مجانى هنا وهنا ممكن تحط قوانين من غير ما تخلى الأسر تدفع قيم ماديه

انت مزعلك ان الاسر بتدفع قيم مادية مقابل الاعلانات اللي بتتعمل فوق .. مظبوط

طيب كل الاسر عندها اقسامها .. تحط فيه اعلاناتها براحتها ماعندهاش مشكله

السيرفر ده غير مجاني ,, بيندفعله تكاليف لو الاسر هتعمل اعلانات في الرئيسيه , بيندفعلها تكاليف

ممكن احط قوانين تبقى مجانبه , وممكن احط قوانين تبقى غير مجانيه .. بس الاداره قررت هنا تكون غير مجانيه !

هل ده بيأثر على الهدف الاساسي للمنتدى ؟

على فكره يا دكتور حاليا اللى له الحق يسأل السؤال ده هوا اللى سأله فعلا لأن ده منتدى زى ما هوا مكتوب واللى يسأل هوا ممثل شرعى للطلبه حاليا مفيش اتحاد طلبه لكن فى لجنه متقدمه بطلبات بالنيابه عن الطلبه يبقى هيا اللى من حقها تسأل والمفروض يتجاوب عليها

اللجنه متقدمه بالطلبات لادارة الكليه , مش لادارة المنتدى يافندم

المفروض يتجاوب عليها من ادارة الكليه ..

طيب حضرتك مش كاتبها طيب مين اللى كتبها ؟؟؟

وحدة التعليم الالكتروني + ادارة المنتدى

لو فيه قانون مش عاجبك .. اتكلم عنه في سجل ملاحظاتك عن المنتدى .. أو في الشكاوى والمقترحات .

المجموعه دى لو أغلبيه وكلامهم مقنع فيبقى لازم يتغير بغض النظر اى اللى خلاهم يطلبوا فى الوقت ده بالتحديد

لو أغلبيه

mt-

[عامر إبراهيم]

إختصارآ للوقت ياجماعة

أنا عايز أأكد على نقطة

إن مطالبنا موجهة لإدارة الكلية

رامى:

سواء المنتدى ربحى, فده مرفوض

ولو المنتدى جاي بخسارة على د. محمد بخسارة , فده مرفوض

وزي ماقلت مافيش مشكلة عند معظم الأسر بتكفل مصاريف المنتدى

لكن الأول زي ماد. محمد طلعت قال إن المنتدى بقوانين د. محمد طلعت فاهو يبقى منتدى د. محمد

يبقى إحنا نكلم الكلية فى دعم المنتدى قبل مانكلم إدارة المنتدى

بالرغم من, أي إدارة موقع أو منتدى فى العالم, وهنا أخص المواقع الجماهيرية و اللى زوارها و أعضائها بعشرات ومئات الملايين بل حتى مئات الملايين زي الفيس بوك
بيعملوا إستفتائات عن آراء الزوار و بيعملوا الأفضل ليهم و حسب آرائهم ووجهات نظر الأعضاء

تواصلنا بالفعل مع إدارة الكلية و اليوم تم إنضمامى للجنة الإلكترونية و الكلية طلبت المزيد من الأعضاء للإنضمام للجنة الإلكترونية, وإدارة الكلية متمثلة فى د. ماجدة طلبت إننا نتواصل مع د. محمد ونعرف طلباته إيه

لكن . محمد أصر على إنه هيكلم إدارة الكلية بنفسه بدون وسيط

مافيش مشاكل

لكن ليا تعليق على كلام الجوهرى الموجه ليا:

إن المنتدى فعلآ بتاع د. محمد طلعت, وبقوانينه و اللى مش عاجبه يشوفله منتدى تانى يشترك فيه

والرد هيكون من كلام د. محمد طلعت نفسه

من هنا تكفل بعض الطلبة بكلية الصيدلة بالإشراف على هذا الحلم الذي تم بناؤه

تحت إسم [منتدى كلية الصيدلة الرسمي]

فى وسط كلامك قلت, إن

د. محمد ليه رؤوية وإسلوب لإدارة المنتدى وعلشان كده هيفضل مكمل كمدير للمنتدى ولن يتنازل عن حقه فى إدارة مشروعه وحلمه الذى بدئه

وكلامك وكلام د. محمد و إسلوب الإدارة بهذا الشكل يتنافى مع تعريف المنتدى كمنتدى طلابى يقوم على إدارته طلاب الكلية.

بخصوص المطالب اللى إتناقشت فى الإجتماع واللى د. محمد طلعت بيقول إن المطالب تم توجيهها لخدمة الأسر الطلابية فقط

فأنا هقتبس الكلام اللى د. محمد إقتبسه من كلامى و أترك الحكم للأعضاء بعد الإطلاع عليها وعلى تعليقى عليها:

موقع ومنتدى الكلية

· تحويل منتدى الكلية إلى منتدى رسمى مدعوم من الكلية.
· تكوين هيئة ادارية من ممثلى الانشطة الطلابية واعضاء هيئة التدريس.
· اختيار مشرفى الاقسام عن طريق التصويت.
· فتح اقسام الاسر لجميع الزوار.
· الغاء اسعار الدعاية للانشطة الطلابية.
· السماح بالتواقيع والروابط الخارجية.
· اهتمام اكبر من اعضاء هيئة التدريس.
· تعديل قوانين المنتدى, وتصويت الأعضاء عليها.
· تفعيل دور موقع الكلية وتنويع محتوياته و تحديثه بصفة مستمرة بالجداول الدراسية و جداول الإمتحانات و تحديث مكتبة الإمتحانات السابقة.

اللى يقرأ الكلام بإهتمام ويركز فيه هيجد التالى:
1- المطالب تشمل موقع الكلية أيضآ
2- مطالب موقع الكلية إنصبت حول خدمة الطلاب بمختلف الأفكار ولم يتم طلب تقديم فكرة واحدة حتى لخدمة النشاط الطلابى بقدر خدمة عموم الطلاب
3- أغلب النقاط تعرضت لإسلوب إدارة المنتدى و قوانين المنتدى والتى لاقت عدم إستحسان عموم الطلاب, والتى أكد د. محمد طلعت فيها إنها قوانينه و إن المنتدى منتداه
4- فكرة إلغاء أسعار الدعايا بالنسبة كمطلب للأسر ليس لإحتياج الأسر إليها, فالحمد لله معظم الأسر تجد بيئة جيدة من التفاعل و التواصل الفعال مع طلاب كلية من خلال مواقع كبيرة كالفيس بوك الذى أصبح وسيلة التفاعل و التواصل الأولى فى العالم, ولكننا نعترف أن هناك بعض الأعضاء والزملاء الغير مشتركين فى هذا الموقع, ولكن حقهم علينا أن نسعى للوصول إليهم و إطلاعهم على جديد الأنشطة سواء دورات أو رحلات أو مؤتمرات, لكي نحقق بيئة من التواصل الفعال أيضآ خلال منتدى من المفترض أنه منتدى رسمى لكلية الصيدلة وليس مننتدى شخص بعينه, وبرده أحب تأكيد أن الأسر الطلابية لن تبخل عن أي مصاريف دعائية للوصول إلى أكبر قدر ممكن من الزملاء و الزميلات, ولكن سياسة التسعير و التى أوافق أن تكون خاصة بإدارة المنتدى ولكن نتيجتها فى تحديد الأسعار مرتفعة بالمقارنة مع المنتديات الكبرى والتى تهتم بشئون الصيادلة عمومآ, ومنهم منتدى الصيادلة اليوم والذى يزيد عدد أعضاء بعشرات الأضعاف عن هذا المنتدى, ومع ذلك قيمة إعلان شهرى هناك لا تكفى إعلان إسبوع واحد فقط على هذا المنتدى
كذلك للتواصل مع الأعضاء من خلال الرسائل فهذا له ثمن و فلوس تدفع
لإرسال رسائل إلى البريد الإلكترونى للأعضاء لها قيمة تدفع, وهذا يعتبر تعد على حقوق الأعضاء وخصوصيتهم, لأنك تستخدم وسائل الإتصال بهم فى الدعايا و الإعلانات المادية, لأنك لو إعترفت إن تلك أنشطة الكلية ولا حرج فى إرسالها للأعضاء, فابالتالى لم يجب أن تكون هناك قيمة مادية
وطالما أن هناك قيمة مادية للإعلانات و إستغلال الوصول للبريد الإلكرتونى, فليس هناك حرج أن نجد رسائل دعائية لا تمت للنشاط الطلابى و بكلية الصيدلة أو أخبارها فى بريدنا الإلكترونى

روميو حبيبى
بتقول إن لو أنا عايز أغلى أقولك
العبرة يارامى مش بأغلى ولا أرخص
الأهم من السعر هو توفير الإحتياجات و المواصفات المطلوبة بالسعر الأفضل
ليه تدفع أكتر لما ممكن تدفع أقل؟
مش لو الكلية بتدفع للمنتدى وفى وسيلة لإستضافة المنتدى بسعر أرخص, يبقى الفرق اللى الكلية بتدفعه إهدار للمال العام؟
وكنا هنطالب بالتحقيق فى مين المستفيد من الموضوع ده وليه الكلية بتهدر فلوسنا؟

وباعدين يارامى أنا لما إتكلمت عن 400 جنيه لسيرفر, فلا يمكنك أن تقارن سيرفر بموقع, و إن إحتياج الموقع لن يتجاوز بقاعدة البيانات الحالية و الملفات مايزيد عن 10 جيجا فى أفضل الأحوال, فلا سبيل لمقارنة سيرفر 250 جيجا بموقع 10 جيجا " لو كان كذلك "

ولكي لا يفهم كلامى على سبيل التخوين أو التكذيب, ليس هذا قصدى, ولا أحب أن ينظر أحد للموضوع من هذه النقطة, إذا توافرت الإمكانيات بسعر يقرب سنويآ مايتم دفعه حاليآ فى شهر واحد أو شهرين, ماالمشكلة من التعاون وتقديم الأفضل للجميع؟

أرجع و أأكد إن كل كلامنا موجه لإدارة الكلية ماعدا إننا نتقدم كأسر طلابية بطلب دعم المنتدى وتكفل مصاريفه لو إدارة الكلية ماوفقتش على دعم المنتدى.

[AbU ElKhAiR-Let`s Go]

ياريت يا عامر تقول آخر ما توصلت له بخصوص منتدى فارما بورد

هل سيصبح هوا المنتدى الرسمى شكلا ومضمونا

أم هناك توجه لانشاء منتدى جديد

ام ما الذى سيحدث

وياريت تقول آخر الاخبار اول باول

[Messi]

ياريت بجد اسمع اخبار اكيده و خطه زمنيه للتنفيذ

عشان نفسي ارجع اشارك تاني زي زمان بس مش قادر

[AbU ElKhAiR-Let`s Go]

ياريت بجد اسمع اخبار اكيده و خطه زمنيه للتنفيذ

عشان نفسي ارجع اشارك تاني زي زمان بس مش قادر

وإلى الآن
وبعد أكثر من 6 أشهر تقريبا
لا جديييييييييييييييييييد للأسف

[Messi]

وإلى الآن
وبعد أكثر من 6 أشهر تقريبا
لا جديييييييييييييييييييد للأسف

اداره الكليه ..... اولا