يوميات شبه شعريه

[Aya Farouk]

هو انا كتبت الكلام دا يومها ازاى هههههههه
الواحد مكنش فى وعيه
والله يا بيبو موش زى ما كان فى دماغى بس كل الناس بتشكر فيها فاعتقد اقدر اقول كانت كويسه
الحمد لله
وعقبال اللى جااى ان شاء الله

[chocolata]

تم بحمد الله وفضله و بواسطه كبيرة عل المنتدى
اضافه كل المشاركات اللى مش بتاعتى عشان الناس تدخل وتعلق عليها
ويارب تعجبكم كما اعجبتنى
وتتابعوا الموضوع باستمرار

-----

ههه ليا الشرف انى اوحيت ليكى بالفكره
امم حلوة فكرة الراب بكتبه لناس على فكره ههههه جيتى فى ملعبى بس ناو مش فاضيه بس اوك نحاول نفتكس اى منكش ههه محدش يركز مع اللغه
احم حد يدينى بييت بقا

انا قاعده دلوقتى عالمكتب بتاعى
بحاول اخلص شغلى
بس لاقتنى بتسنكح بدون اى داعى
عاماله ادرب عالقصيده اللى هقولها بكره
وماما بتشتكى من صوتى اصله بجد اذاعى !
طب انا اعمل ايه وانا ورايا ميت الف حاجه
تقدر فعلا تقول لعشر ساعات محتاجه
حاليا بكتب مقدمه للحفله بتاعة اسرتى
ولازم اكتب حاجه حلوه عشان ارضى ذمتى
انا عامله زى الملح ولازم ارضى بقسمتى
ودلوقتى شدنى موضوع وحاليا بكتب قصتى
الست شيكولاته فى المنتدى بطبق فكرتى
بعدين لازم اخلص والحق اعمل البامفليت
ومحدش يسألنى دا ايه دا ملخص فقرات الحفله
بجد انا ملبوخه وحياتى بجد فى ازمه
مش فاكره اخر مره كلت فيها كانت امته
اهم حاجه شغلى واى حاجه تانيه عالجزمه
من غير اسم ليا انا بجد مليش لازمه
ادعولى بقا
ونايس توبيك

جميله يا يووووووووويووووووووو ياجااااااااااااااامد
انا بقيت ست مرة واحده دانتى لو شفتينى تدينى بالكتير خمناشر ستاشر سنه
عاوزاكى معايا دايما على نفس الموجه

[Aya Farouk]

موجة واحده تجمعنا
Fm
ههههههههههه
حبيبتى يا شيكو من عونتينى ان شاء الله ههههه

[chocolata]

شيكو حبيبة قلبى بعتذر عن التأخير
غصب عنى والله
التوبيك جمييييل جدااااااااا وعايزينك
تستمر فى اليوميات الجميييلة دى
عشان نعرف انتى بتقضى يومك الدراسى ازاى
انا ماليش فى الراب خالص
بس فى حاجة خفيفة كدا كتبتها السنة اللى فاتت فى محاضرة عضوية ماكنتش فاهماها
بعد اذنك طبعا يا قلبى اشارك بها معاكم


والله قاعدين ومش فاهمين
دكتور بنضارة بيتكلم عن الدايين
ياعم براحة علينا دا الكل مش حاضرين
حس بينا شوية دا احنا مش قادرين
من عقاقير لعضوية وميثيلين وايثيلين
عقاقير ماشى الدكتور صالح رجل صالح
واحنا معاه مرتاحين
والعضوية شوية حلوة وشوية ربنا يستر
فيها مش ناجحين
يبقى حرام كدا لو العيب مننا
ماعدناش هنا جاييين
بس العيب ان الدكتور بيقرأ لناس ميتين
الفاتحة على روحهم وروح عضوية المحترمين

محاضرة العضوية كانت بعد محاضرة عقاقير
ربنا يكرمك يا شيكو ودايما تمتعينا بكل جديد ومميز وجزاكى ربى كل الخير

والله جمييييييييله يابيرو ياقمر
تسلمى كفايه انها تبعبر عن احساسك
وانتى هتقوليلى عل العقاااقير والعضويه وخاصه لما نبقى مهيسييييييين و مفالسيييييييين على الاخر
احنا بنفصل بعد اول ربع ساعه نص ساعه كل واحد وقدراته بقى

ايوة كده هو دا الكلااااااااااااااااااام خليكى معايا على الخط

[chocolata]

يوم الاحد 16/10
نازله من بيتى بالظبط 8الا عشرة
مع رفيقتى الكفاح سيكوسيكو ونيروز
واقفين مستنيين سواق تاكسى محترم
نقوله بوابه الجلاء يوصلنا من غير بوز
الحمد لله فى اقرب تاكسى نطينا
وكل ثانيه نبص عالساعه اللى فى ايدينا
الا 5
الا دقيقتين
مظبوطه
و5
و10
وصلنا والحمد لله للبوابه
ومشينا بسرعه يمكن نبقى محظوظين
وندخل سكشن الابلايد 8وعشرة ودقيقتيييييين
وببركه دعا الوالدين معيدينا كانوا كويسييين
ودخلنا واحنا مستريحيييييييين
وبدانا شغل الاسبوع اللى فات
وكله يدقق عينيه ويمقق
واللى يلاقى الكريستاله يزعق
وجدتها وجدتها
كلهم كانوا كويسين
الا بنت الذيكا الatropine

اركز وابص البصه اللى هيا
مشوفش غير ارض زراعيه

ونقط سودا فى الشريحه زى الرز
وانا اقول هو دا الشغل ايوه دا العز
وانده على المعيدة واقول بصى وافرحى
الاقيها ساكته ساكته ومش بترد
وبعدها تقولى اهى هى دى الاتروبين
نقطه برتقالى على اليمين
وانا فاتحه بقى بزاويه شويه قبل السبعين
ونادت على كل الموجودين
تعالوا شوفوا الاتروبين اللى هيا
الشريحه الجامده ديا
وانا اقول يلا قرب قرب
شوف واتدرب
والبصه بربع جنييييييييه
يلا هانم يلا يا بيييييييييه

عدا السكشن على خييييييييير
ولغايه دلوقتى انا لسه بخييييير

استراحه لمده ساعه

بعد كده نيجى لعذاب صوابعى الذهبيه
معنا ومعكم سكشن المستحضرات الصيدليه

قلت المرة دى اجهز نفسى من بدرى
لبست البالطو وطلعت عل المعمل اجرى

قعدت الف عل الموازين
يمكن الاقى ميزان امور وابن ناس طيبين

لقيته وعلى طول عقدت اليمين
ان شاء الله عليك شغالين

وطلعت الكارنيه الاصفر
ورحت عشان ااجر
اجدع dish واطول pestle وانضف مورتر

واتقسمنافى المعمل
كل اتنين partner

وبدانا المعركه البودريه
واحده توزن وواحده تطحن
و اللى تراقب شوربه البيلا دونا شويه

ودق ودق ودق ودق
وصداع فى دماغى شغال بيلق

وعجن وخلط وحمام بخار
وانا ياعينى اتلسعت من النار

وانتهت المذبحه
وطلعت النتيجه النهائيه
الله اكبر حبيبات بيج طويله وفواريه
وهاين عليا افقع الزغرودة اللى هيا
لكن نعمل ايه المعيدة واقفه جنبيا

وخرجنا وخرجنا خرجنااااااااااااا
اخيرا خرجنااااااااااااا

مش طايقه ايدى ونفسى افرك فى عينيا
جريت على صاحبتى وخدت احد المناديل العطريه
اهى لطفت العمليه عندى شويه

نيجى بقى لفترة ما بعد الظهريه
فى يوم فى حياة شيكو الشقيه

حضرت ندوة فلاش وسماش
وحصلى فيها شويه انتعاش

لما لقيت بنات عادى بتتكلم فى المايك
قلت والله شجعان وانا لازم اعمل like

مش ممكن فعلا انا ماسكه المايك

من ربكتى خرج منى صوت معرفوش
لا هو رجالى ولا حريمى بس خرفوش

قولت وماله كملت وانا والله صوتى مرعوش
ولما خلصت اول سؤال ارتحت اكتر
وجه التانى والتالت وراه مستنوش


قولت فعلا الرجوله مش ادب ولا هز كتاف
دى الرجوله لما تتكلم فى المايك ولاول مرة
وتبطل تانى تخاااااف
حتى لو كان صوتك شبه الجرار
المهم انك انتهزت الفرصه واخدت القرار


ونيجى للقسم الاخير
بعد ماخلصت الندوة
جريت عشان الحق الغدوة
كانت فى Katchup على فكرة
مع سيكو ونيروز وفتوش

اربعه كومبو تشيكن فرايداى
وانجز بسرعه داحنا هلكانين طول الday


ضربنا الصواريخ وعملنا احلى دمااااااااااغ للمريخ
وطلعنا واحنا مش شايفين
تقلانين ومصدعين
وسالتهم وسط الهلوسه حد نازل يوم الاتنين

المهم ودعنا فتوش
وبدانا رحله العودة المؤذيه
والساعه دلوقتى بعد المغربيه

رحنا على الجانب الاخر وبدانا المسابقه اليوميه
مين التاكسى الاصيل اللى هيودينا المحطه الفلانيه

1 2 3 5 10
عدوا
ولا علي سؤالنا حتى ردوا
وانا كل شويه بطنى تقلب عليا
ومش قادرة تشيلنى رجليا

وبقيت اقول
والنبى يااسطى و
وافق بقى
يابيه
هو بس الاعتراض دا ليييييييييييييييه؟

اخر مازهقنا قررنا نستفيد من الجهتين
ونلحق التكاسى على الشمال وعل اليمين

وقفنا على الرصيف اللى فى النص
سيكو ونيروز ماسكين الناحيه ادام كاتشب
وانا ماسكه الناحيه التانيه بس واقفه على الرصيف

وكلنا على نغمه وااااااااااحده
............يااسطى

وسامعه كلمه لاااااااااااااا من كل ناحيه
وقلبى معاها بيتقطع بسكينه حاميه

حسيت كانى بشحت او حتى ببيع منااااااااديل
والناس بداوا يبصوا على تلاته مهيسين
واقفين بيضحكوا وكانهم شاربين
ولسه بيدوروا ويدوروا ويدوروا

لكن مفيش فاايدة
سيكو قالت خلاااص كفايه اوى كده
يلا بينا يا عيال
المنطقه دى مقشفرة ومش اللى هيه
يلا نلقط رزقنا فى حته تانيه تكون مستويه

سبحان الله اول مانقلنا
ربنا كرمنا وركبنا وروحناااااااااااااا

وبس خلااااااااااااص
اقتباس


معلشى طولت اوى عليكم المرة دى بس اليوم كان طويييييييييل فعلا
يارب تعجبكم

[white light]

حلوه يا شيكووووووووووو

استمرى استمرى

ابلايد مع صيدلانيات بيعملو شغل جامد

[M.Hegazy]

تم تجديد الفهرس ..

و متابع معاكي يا د. شيكو ..

صيدلة عاملة عاميلها ما شاء الله ..

[sekoseko]

ايه الفضايح دى يا شيكو .. وكمان فضايح انترناشونال عالمنتدى والفيس
بس جامدة والله تحححححفة

سيكو قالت خلاااص كفايه اوى كده
يلا بينا يا عيال
المنطقه دى مقشفرة ومش اللى هيه
يلا نلقط رزقنا فى حته تانيه تكون مستويه

أيوة أيوة أنا قلت كده فعلا

[eeeman]

حلوووووووة اوووووووووى يا شيكو اليوميات دى ...اللى بنشوفه فى كليتنا يتعمله مدوناات
استمرررررررى

[DR.BIBO]

معلش يا شيكو على التاخير بس بجد اليومية ديه تخلى العقل تطير
جامدة جدا ومعديه وهستنى منك اجمل يوميه