.. الحلقة التاسعة ..
في الصباح الباكر........كان هناك طرقات متواصلة علي باب منزل علي..........
اشرف بصوت عالي وهو يتجه نحو الباب: ايوة يا سيدي يا اللي بتخبط......انا جاي اهو
وما ان فتح اشرف الباب حتي استند الي الدرفة المغلقة وهو يقول بابتسامة واسعة: اهلا اهلا .............ده ايه النور ده علي الصبح........؟؟.
سنية بحده: ايه يا اخويا..........ساعة علشان تفتح الباب؟؟
اشرف بهدوء: معلش يا جميل........اصلي كنت بفطر انا وعلوة ...........ماتتفضلي معانا........
سنية وقد تهللت اساريرها فجأة: والله؟؟هو سي علي لسه مانزلش؟؟........طب كويس .........ده انا كنت عايزاه في موضوع مهم
وبدون كلمة اضافية ازاحت اشرف ودخلت ...........
سنية بدلع: ازيك يا سي علي؟؟
علي بابتسامة هادئة وهو جالس علي مائده الطعام: ازيك انتي يا سنية..؟؟
سنية بابتسامة واسعة: تسلم ياغالي......انا بخير ............بس انا كنت عايزاك كده في موضوع مهم........
علي بجدية : موضوع ايه؟؟.......
سنية : بص يا سي علي.......انا هخش في الموضوع علطول.......انا بشتغل عند ناس امرا ..........ولاد اصول وطيبين......وكنت سمعت كده طراطيش كلام منهم ان العمال في مصنعهم عاملين مظاهرة باين ولا معرفش ايه........لا استني ..هي كلمة كده كنت سمعتها في التلافازيون قبل كده ........معناها انهم يعني مش عايزين يشتغلوا
علي : اضطراب عن العمل ؟؟
سنية : اييييييييييييوة.........عليك نور ياخويا......صدق اللي قال العلم نور ياولاد
اشرف: هو اللي قال العلم نور قال بعدها (يا ولاد؟؟)
التفتت سنية الي اشرف وقالت بعصبية: يا اخويا انا مش عارفة انت واقفلي علي الساقطة واللاقطة كده ليه ؟؟.........ماتهمد شوية
هم اشرف بقول شئ الا ان علي قاطعه وهو يقول بنفاد صبر: ياستي كملي كلامك .........بعد ماالعمال عملوا اضطراب ايه اللي حصل؟؟
سنية: اه .......العمال عملوا اسمه ايه ده .........اوم ايه بقي .......سيدي هيمشيهم ويجيب عمال غيرهم ........ها قلت ايه؟؟
علي بحده: قلت ايه في ايه؟؟...........ما يمشيهم .......دخلي انا ايه؟؟
سنية : يوه يقطعني.........انا نسيت اقولك ان مصنعهم بتاع عربيات........هو مش انت برضه بتاع عربيات يا سي علي؟؟
علي بغيظ: ايه بتاع عربيات دي؟؟.........ماتقولي اسطي احسن
سنية ببراءه: والله ما اعرف انك كنت اسطي يا سي علي........مش انت كنت بتشتغل في ورشة ؟؟
علي وهو يضع يده اسفل وجنته : ايوة يا ستي ...........كنت ....
سنية بنفس البراءة: طيب يا سي علي.......هما بقي شغلهم زي شغل الورشة كده........بس مصنع كبير.........
علي بملل: مممممممم........والمطلوب ايه؟؟
سنية: يوه.......مطلوب انك تقدم في شغل عندهم يا سي علي......مش انت لسه عاطل؟؟
علي بغيظ: عاطل؟؟.........ممممممممم
سنية: يوه .....يقطعني انت زعلت .......والنبي ماتزعل .........بص انا همشي بقي علشان اتأخرت عليهم وفكر في اللي قلته......انا سمعت انهم بياخدوا فلوس كتير اوي.......يالا فوتك بعافية
وهمت سنية بالمغادرة .......الا ان اشرف استوقفها وهو يقول: استني يا سنية.......هي الشركة اسمها ايه؟؟
سنية: معرفش
اشرف بغيظ: نعم ياختي........كل ده وماتعرفيش الشركة اسمها ايه؟؟
سنية: اه صحيح .......بس بص.......انا اعرف ان الراجل اللي بشتغل عنده اسمه صدقي علوان......ابقوا شوفوا بقي شركته اسمها ايه.......فوتكوا بعافية.......(خرجت سنية واغلقت الباب وراءها ..........)
التفت اشرف الي علي وهو يقول: ايه رأيك؟؟
علي بضيق: رأيي في ايه؟.......
اشرف ببديهية: في اللي قالته سنية
علي وهو يشيح بوجهه: ياعم دي ** هبلة ..........انا اصلا مش فاهم حاجة منها .......
اشرف وهو يقترب منه: بس انا بقي فاهم ........ويمكن يكون كلامها صح.......مش هتخسر حاجة ........انت لفيت علي نص شركات مصر........جت يعني علي دي وتكسل؟؟
علي بضيق: ياسيدي احنا مانعرفش اسم الشركة..........هنمشي ونقول شركة صدقي علوان فين ؟؟
اشرف: ياسيدي بسيطة...... طالما عرفنا اسم المالك ........يبقي سهل نعرف اسم الشركة......
علي : وهنعرف منين ؟؟
اشرف: يا سلام..........بسيطة ........انا هنزل دلوقتي عند السايبر اللي تحتنا ........وابحث عن اسم صدقي علوان علي النت .......ولو هو راجل مشهور وشركته مشهورة يبقي اكيد هيبقي فيه معلومات عنها علي النت
علي: ولو مفيش؟؟
اشرف: يبقي نسأل عنه الناس ...........مش هنغلب يعني يا علوة ........هي فيه حاجة بتستخبي في البلد دي؟؟
علي وهو يقوم من فوق مقعده: طب خليك انت ......وانا اللي هنزل اشوف بنفسي
اشرف وهو يجلس علي المقعد ويضع ساقا فوق الاخري: طيب انزل انت ........وشوفلي شغلانة معاك بالمرة
علي : يا راجل؟؟..........وايه الالاطة اللي انت فيها دي؟؟...........لو عايز شغلانة قوم يا حلو وهز طولك ........ولا انت عايز الشغلانة تيجيلك وانت قاعد مرتاح كده؟؟
اشرف: يوه ياعلي...........انت علطول كده جايبلي احباط..........انزل يا سيدي وبلاها شغلانة........ولما اخلص فلوس ورث بابا ابقي ادور علي شغلانة تليق بمقامي........تفيدني وتفيد المجتمع كله
علي : والله؟؟..........والمجتمع هيستفاد ايه؟؟
اشرف بغيظ : انزل يا علي.........انزل بدل ما اتهور عليك
اطلق علي ضحكة مرتفعة ثم قال: مفيش فايده فيك.........
وفتح علي باب المنزل .............وخرج للبحث في امر هذا العمل الجديد.........
في يوم العطلة الاسبوعية .........استيقظت شمس من نوم عميق............ونزلت الي بهو القصر
شمس : صباح الخير يا مامي........
سوسن وهي تنظر الي الجريده : صباح النور يا حبيبتي.......ايه .....صاحية بدري يعني؟؟
شمس وهي تهم بالجلوس علي المقعد الوثير: عادي يعني.......اصلي نمت بدري امبارح
سوسن: اه مانا خدت بالي
شمس بتردد: ماما.......
سوسن وهي مازالت تنظر الي الجريده: نعم يا حبيبتي؟؟
شمس بشئ من التوتر: هو انتي حبيتي بابا قبل الجواز؟؟
سوسن وعلي شفتيها شبح ابتسامة: اشمعني يعني؟؟
شمس: ابدا........اصلي ماسألتكيش قبل كده انتي عرفتي بابا ازاي
سوسن: ماده اللي انا مستغرباله.......اشمعني بتسألي السؤال ده دلوقتي؟؟
شمس: يعني.....جه علي دماغي فجأة
سوسن بخبث: يا شيخة؟؟.......ماشي يا ستي ....انا هقولك........باباكي كان ابن جيراننا .......وكان بيحبني وانا كنت بحبه..........بس محدش فينا كان يعرف حقيقة مشاعر التاني..........وفضلنا فترة طويلة علي كده.......لغاية لما في يوم لقيت علبة واقعة في البلاكونة بتاعتنا......فتحتها لقيت جواها ورقة متطبقه .......فتحتها و.لقيت جواها شعر مكتوب بالقلوب وبخط جميل اوي.........وفي الاخر 3 كلمات(بحبك وعايز اتجوزك )........ساعتها فرحت اوي ورحت قولت لماما ........ راحت ضربتني بالقلم ........وقالتلي مالكيش دعوة بالواد ده
شمس: يااه .....ايه القسوة دي؟؟
سوسن: كانت خايفة عليا يا شمس.......ليها حق.....ماهي ام برضه وانا حسيت دلوقتي باحساسها
شمس وقد بدت انها مستمتعة بالقصة: وبعدين ؟؟
سوسن: عرف باباكي برفض امي .......وقرر انه يسافر بره يدرس......ابوه باع اللي وراه واللي قدامه علشان ابنه يسافر ويدرس في احسن جامعة........وفعلا دخل هندسة ميكانيكا ......وبقي مهندس قد الدنيا.......ورجع لقاني لسه زي مانا.......كان فاكر اني اتجوزت ...بس انا فضلت مخلصاله طول العمر...... ولاد كتير اتقدمولي من الحتة......بس انا كنت علطول برفض........كانت امي اتوفت ....وطبعا ماكنش فيه اي سبب يمنع اني ارتبط بيه......وفعلا اتجوزنا ...........كان فاتح ورشة تصليح عربيات بسيطة.......وواحده واحده كبر في شغله.....والورشة بقت ورشتين وتلاتة.........لغاية لما قرر يفتح مصنع استيراد قطع غيار سيارات والاجزاء المستعملة وتجميعها وتركيبها وبيعها كعربيات مستعملة ...........وواحده واحده المصنع بقي اتنين ............لغاية لما قرر ياخد توكيل شركة (......).....وبقي يستورد اجزاء السيارات بس جديده ويجمعها ويبيعها لمعارض السيارات........وبعد ما كان صدقي الواد الفقير ......بقي صدقي باشا علوان
شمس بشرود : دي حكاية ولا في الافلام.........طب يا ماما هسألك سؤال تاني
سوسن: ايه حكاية الاسئلة معاكي النهارده ؟؟.........اتفضلي اسألي يا ستي
شمس بتوتر: هو ايه اللي حببك في بابا؟؟
سوسن: يووووه......حاجات كتير اوي......ابوكي كله علي بعضه كان يتحب
شمس: يعني قوليلي اكتر حاجة عجبتك فيه ايه؟؟
سوسن: اكتر حاجة عجبتني فيه عزة نفسه وكبريائه وكمان قوة شخصيته ........
شمس : ازاي يعني؟؟
تابعت سوسن: يعني....كانت شخصيته قوية جدا......كان متحمل للمسئولية ........كفاية انه عمل نفسه بنفسه......هو بصراحة كان عصبي اوي معايا ..........ياما كان بيزعقلي علي حاجات غلط عملتها وطبعا كنت بنام معيطة .....بس كان حنين اوي.....كان كل مايزعلني يرجع يصالحني..........كنت بخاف منه وفي نفس الوقت بحبه جدا
شمس: يعني ازاي يا ماما كنتي تسمحلي لحد يزعقلك؟؟
سوسن: يابت هو كان اي حد؟؟.......ده جوزي وحبيبي.....والست ان ماكنتش ضعيفة قدام الراجل اللي بتحبه بتبقي حاجة من الاتنين.....يا اما متهيألها انها بتحبه وهي مش بتحبه....يا اما بقي هي مش طبيعية......لان الست بالفطرة بتحب الراجل الاقوي منها وتكره الراجل الضعيف اللي علطول مطاطي ادامها .......
كانت شمس مستغرقة في تفكير عميق بعد سماعها لجملة والدتها الاخيرة(الست تحب الراجل القوي .....مش الضعيف)
سوسن بخبث وهي تنظر الي ابنتها الشارده: هو فيه ايه؟؟........حسام زعلك ولا حاجة؟؟
تنبهت شمس فجأة لاسم حسام .........فخرجت من وسط حالة شرودها وهي تقول بحده : حسام؟؟.........حسام مين؟؟
سوسن: يا سلام......؟؟.......فكرك يعني اني مش فاهمة؟؟.........مش انتي قولتيلي ان حسام اخو عبير عدا عليكي في الكلية ووصلك بعربيته؟؟
شمس: ايوة........وده ايه علاقته بسؤالك دلوقتي؟؟
سوسن ببراءه: ابدا.....لايكون زعقلك ولا حاجة .........ردا علي اي كلمة من كلامك اللي زي الرصاص تكوني قولتهاله ولا حاجة
شمس بضيق: ايه يا ماما ده؟؟.........انتي بترسمي افلام في دماغك ولا ايه؟؟............حسام وصلني توصيلة عادية......وبعدين هو يقدر يزعقلي.........ده الناقص كمان........
قامت شمس من فوق مقعدها وهمت بالصعود الي غرفتها.......لقد كانت تشعر بالحنق .........لم تكن تتوقع ان والدتها ستفسر كلامها علي هذا النحو.......لم تكن تعتقد ان والدتها يمكنها ان تحيك في عقلها علاقة حب وهمية بينها وبين حسام والذي لا تشعر تجاهه بأي شئ سوي انه (تقيل علي قلبها)......... وفجأة دق جرس الباب........ركضت سنية مسرعة لتفتح .........و
سوسن بصوت عالي: مين يا سنية؟؟
سنيه بصوت اعلي: بيقول ان اسمه حسام ياستي......
سوسن بسرعة : خليه يتفضل..........
ما ان سمعت شمس اسم حسام حتي همت بالصعود بسرعة الي غرفتها الا انها فوجئت بيد سوسن تمسك بها وهي تقول : ** يا شمس........بلاش قلة ذوق ....خليكي قاعده......
شمس بحده هامسة: يا ماما ..........ولكن لم يكن هناك وقتا لاكمال جملتها حيث ان حسام الان قد اقترب وعلي شفتيه ابتسامة واسعة.....
قامت سوسن من فوق مقعدها وهي تقول: اهلا اهلا..........ازيك يا حسام
حسام بابتسامة واسعة: ازيك انتي يا طنط .......ثم التفت الي شمس ومد يده اليها مصافحا وهو يقول بصوت اقرب الي الهمس: ازيك يا شمس.........
شمس بابتسامة صفراء: ازيك انت يا حسام......
سوسن: اتفضل يا حسام اقعد
جلس حسام واضطرت شمس للجلوس نزولا عند طلب والدتها ..........
حسام: انا اسف يا طنط لو كنت جيت من غير ميعاد.........بس انا الحقيقة معرفش تليفون بيتكو.......نسيت اخده من عبير
سوسن بابتسامة واسعة: ولا يهمك يا حسام.........احنا زي الاهل والبيت بيتك
حسام وهو ينظر الي الارض متصنعا الخجل: ميرسي يا طنط
سوسن وهي تنظر الي شمس: ده احنا حتي كنا في سيرتك من شوية انا وشمس
حسام وقد تهللت اساريره: والله ؟؟
رمقت شمس والدتها بنظرة ناريه ثم قالت وهي تجز بأسنانها: ابدا كانت ماما سألتني عن العربية قلتلها اني سبتها قدام الجامعة علشان انت وصلتني ....... بس يعني
ابتسم لها حسام ابتسامة تحمل معني (عليا برضه ؟؟).....ثم التفت الي سوسن وهو يقول: انا بصراحة كنت جاي وطمعان في موافقتك ان شمس تيجي معايا النهارده عند حفلة حد من اصحابنا......
سوسن وهي تنقل بصرها الي شمس بتوتر : بصراحة مش عارفة..............يمك(وهنا قاطعتها شمس وهي تقول بحده: واجي معاك بصفتي ايه؟؟........)
حسام:عادي يا شمس......دي حفلة عيد ميلاد واحد من اصحابي.......وفكرت اني اخدك هناك تغيري جو ...وخصوصا ان النهارده اجازة وزمانك زهقانة من القاعده في البيت
شمس بضيق: انا اسفة ......مش هقدر......وبعدين انا ورايا مذاكرة
سوسن بغيظ: متهيألي مافيهاش حاجة يا شمس انك تروحي معاه الحفلة.....حتي علشان تفرحي وتغيري جو......
شمس: بس يا ماما انا(قاطعتها والدتها وهي تنظر الي حسام قائلة: اهم حاجة تحافظ عليها يا حسام)
حسام بسهوجة: دي في عيني يا طنط .......انا همشي دلوقتي بقي
سوسن: ليه مالسه بدري.......
حسام وهو يهم بالوقوف: معلش اصلي ورايا مشوار مهم اوي........
سوسن: شرفت يا حسام......تبقي تسلملي علي عبير
حسام : يوصل يا طنط......مع السلامة (ومد يده مصافحا ....ثم نظر الي شمس وقال: هعدي عليكي الساعة 8 يا شمس....اوعي تتاخري)
لم تجب شمس وانما ظلت شارده الذهن غير مصدقه ما فعلته والدتها بها منذ قليل ......
ذهبت سوسن مع حسام لتوصله الي باب القصر وكانت شمس تراقبهما ......وما ان اغلقت والدتها الباب حتي صاحت شمس: ممكن اعرف ايه اللي عملتيه ده يا ماما؟؟
سوسن : عملت ايه ؟؟
شمس بحده: والله؟؟.......خدتي قرار بالنيابة عني وانتي عارفة اني رافضه الفكرة
سوسن: ورافضاها ليه ان شاء الله......ولا انتي فالحة في التنطيط في حفلات اصحابك اللي انا ماعرفهومش ......ونيجي عند الناس اللي عارفينهم من زمان وترفضي
شمس بتهكم: عارفينهم من زمان ؟؟.......دي معرفه عن طريق محل الكوافير
سوسن: مايهمنيش عرفت عبير ازاي .....كل اللي يهمني من امتي اعرفها.......
شمس: بس يا ماما ده مايدكيش الحق انك تقرري حاجة بالنيابة عني
سوسن بحده: ** يا شمس.......انا مش مستعده اخسر صاحبتي علشان خاطرك......معلش ياختي اعصري علي نفسك لمونة وروحي معاه الحفلة........ولو ماعجبتكيش ابقي سيبيها وارجعي
شمس بعصبية: يا ماما مش عايزة اروح
سوسن: لا هتروحي يا شمس.........وانا وعدته وانا عارفة انك مش هتقدري تطلعي شكلي وحش ادامه وترفضي
شمس وقد شعرت بأي مأزق وضعتها به والدتها فقالت بحده: هروح بس هتبقي اول واخر مرة اخرج مع اللي اسمه حسام ده .....ولو دبستيني في خروجة تانية انا هشتكي لبابا وهو يتصرف
صعدت شمس الي غرفتها حانقة ..........غاضبه ............مستاءه ............وعقلها يحمل فكرة وحيده............كيف تخلص نفسها من بين براثن حسام ؟؟...............كيف؟؟
******************************
صعد علي الي منزله وطرق الباب..........و
اشرف: ها يا علي......ايه الاخبار؟؟
علي بابتسامة واسعة: اول ماحطيت اسم صدقي علوان طلعلي كلام كتيييييييييييير........واضح انه شخصية مهمة واحنا علشان في قاع المجتمع ماكناش بنسمع عنها........
اشرف :والله؟؟...........طب تعالي تعالي اقعد ......واطربني........
جلس علي علي المقعد وهو يقول: طلع كلام سنية صح.......هي شركة استيراد اجزاء السيارات وتجميعها وبيع السيارات جديده علي الزيرو للمعارض
اشرف: يا راجل........يعني تصنيع سيارات
علي: اه ......بس مش تصنيع بالظبط......هما بيستوردوا الاجزاء من الدول المصنعة ليها وبيجمعوها هنا .......علشان طبعا مصر مافيهاش امكانيه صنع عربية من الالف للياء
اشرف : طب حلو اوي والله.......طب وموضوع الاضطراب؟؟
علي: لا ده بقي ماعرفهوش.........انا هزور الشركة بكرة ان شاء الله وهديهم السي في بتاعي........وادعيلي بقي الاقي شغلانة كويسة
اشرف: يارب يا علي.......علشان نفسي اتغدي كباب وكفتة بقي
علي: ياراجل؟؟........هو انت كده علطول همك علي بطنك؟؟
اشرف: معلش يا علوة بقي.........اصلك عشمتني بغدا بره.........ومن ساعتها وانا بخطط لأكله كباب وكفتة
علي: ادعيلي بس يا اشرف........وليك عليا اغرقك كباب وكفتة كل يوم
اشرف : بجد يا علي؟؟.............ربنا يخليك يارب..........
ابتسم علي في سعاده..........وعلي الرغم من انه لم يتقدم لطلب الوظيفة بعد...الا انه كان يشعر بالتفاؤل .........شئ ما بداخله يحدثه ان هذا العمل به مفاتيح سعادته ...........سواء السعاده الوقتيه..........او ..........الابدية ........
يتبع.........
