والله يا جماعه انا مش عارفه ارد عليكوا اقول ايه بس ؟؟
والله حزينه اذا كان فيه ناس تفكيرها وصلها كده .. الدكتوره اللي كاتبه الموضوع بقي يا تري حضرتك ساكنه فين ؟؟؟
اكيد مش في القاهره خالص ولا تعرفي حاجه من القتل اللي بيحصل هناك ولا الرعب اللي احنا بنعيشه
انا واحده من الناس بيني وبين ميدان التحرير تلت ساعه مشي قريب مني جدا لاني من القاهره
اولا ياريت محدش يقعد قدام قناه الجزيره وغيرها من القنوات اللي عماله تحمس الشباب علي الفاضي وبتنقل كلام كله غلط في غلط
ثانيا احنا بحركه 25 خلاص اخدنا وحققنا كتير من اللي عاوزينه ومش عاوزين خراب في البلد اكتر من كده
واللي بشوفه في ميدان التحرير انه بقي ميدان قتال مش ميدان عادي الناس بتروح تقضي فيه مصالح
وبعدين ده الرسول عليه الصلاه والسلام قال انك تسيب ساحه الجدال مش القتال كمان يعني لو اتنين بيتجادلوا الرسول قال انك تسيب الجدال احسنلك
مش بقي اتنين بيموتوا في بعض .. وبعدين معلش وماتزعلوش مني شباب 25 دول كلهم دلوقتي قاعدين في البيت لانهم خلاص حققوا كتير من المطالب لكن حاليا اللي في التحرير دلوقتي دول احزاب تانيه بتسعي وراء مصالحها الشخصيه
وكلامي ده مش من عندي ده علي السنه ناس كتيره من شباب 25 يناير
وبعدين لو فكرنا بالعقل لو مبارك اتنحي وساب البلد تفتكروا مين هيمسكها من بكره هتلاقي قوات حفظ السلام هنا عندنا بتقولك انا بحافظ علي السلام لغايه انتخاب رئيس جديد وانسوا بقي لو طلعوا اصلا
هنعيش في فقر وامراض وكمان من غير كرامه لانه هيبقي احتلال بالظبط زي ماهو حصل في العراق
هي دي بقي الديمقراطيه اللي بتتكلموا عنها بقي ... ده احنا هنندم اشد الندم
انتوا عارفين الايام اللي كانت من غير امن ده والرعب اللي عشناه والبلطجيه اللي كانوا بيكسروا البيوت والمحلات علي الناس يومها قد ايه عرفت ان الامان لايقدر بمال
انا عندي اعيش في فقر بس اعيش في امان وسلام من غير حروب ولا غيره وكفايه اوووووووووووووووي الشباب اللي ماتوا دول حرام بجد
حرام نبقي عرايس الماريونيت اللي ناس تانيه بتحركها عشان توصل لمصالحها الخاصه اصحوا بقي وبلاش عواطف ماشيين وراها هتودينا في داهيه وكارثه محققه ...
وكفايه بقي يبقي ميدان التحرير ساحه للقتال وحرام ان الناس تنزل بكره عشان تتقتل ده اللي انتوا عاوزينه عاوزنها تولع اكتر مهو مولعه ولا ايه ؟؟؟
ربنا يهدينا جميعا لما يحبه ويرضاه ويحفظ بلدنا وشعبها لان عمر ماكان المظاهرات والقتال لغه للحوار
رد مع اقتباس
المشاركة الأصلية كتبت بواسطة dr queen
