أجهزة التشويش على الموبايل في الكلية !!! .... ليه كده ؟؟؟

[M.3esawy]

انا من فترة حاولى اسبوعين نزلت الكليه وكان موبايلي بيفصل شبكه ويرجع تاني كل دقيقتين تلاته ..
بس الكلام ده كان في النص بين الاداري والمبنى الجديد ..
معناها نسيب الموبايلات في البيت بقى :d

[pharmacistina]

مهو احنا اللي دفعناهم لكدة ..
المفروض هي كلمة واحدة اقفلوا الموبايلات يبقى تتقفل .. بس في ناس مش عارفة أقول ايه بس عليهم ..
بالنسبة للي دكتور ياسر بيتكلم عنه .. الموقف دة حصل مرة و الدكتور مشى و قال المحاضرة مشروحة نتيجة رنة الموبايل .. و في المحاضرة التالية لنفس الدكتور حصل برده الموقف دة فاتعصب و بهدلنا في الامتحان ..
يعني اللي موبايله رن دة يتقال عليه ايه بس ؟؟ ليه محدش بيتعلم من مرة واحدة ..
المفروض لا يلدغ المؤمن من جحر مرتين ..

[Anas]

بس برضه نرجع ونقول اننا مش متاكدين من الموضوع ده .. ولا انت متاكد ؟؟

أنا متأكد و متأكد و متأكد

لو دخلت المدرج ابقى بص لفوق

هتلاقي حاجة كده متعلقة‎‏ في نص السقف

ده الدكتور محمد الشابوري بنفسه شاور عليه و كان مبسوط منه

[summer breeze]

مش عارفه والله ياد/ انس الحركه دي فعلا مش هتوقف الدوشه اللي ممكن تحصل جوا المحاضره لكن اهو يعني بيحاولوا على اد ما يقدروا يريحوا الدكاتره لان الاغاني والالعاب مش هيعرفوا يعملوا فيها حاجه بس برضه اكيد ده هياثر علينا جامد جدا يعني مثلا وقت النتيجه محدش هيعرف يديلك مسد ولا يكلمك ان النتيجه بانت كمان بالنسبه للناس اللي بيسافروا وربنا بيرزقهم بمحاضرات متاخر وياسلام لما المحاضره يبقى المفروض انها تخلص الساعه 5 والمعيد ياخد راحته ويقعد ل5 ونص سته الاربع وانت مش عارف تتكلم ولا تقول حاجه غير بعد ما تطلع من الكليه يعني اكيد في صعوبه علينا كدا بس بدل الكليه ركبت الاجهزه دي يبقى يستحيل انها هتتشال يلا ربنا يعينا بس نرجع ونقول ان اكيد في مجموعه مننا هيا السبب في اللي بيحصلنا ده فبجد بجد ربنا يسامحهم على كده

[WhiteBird]

ايه ده قرار غرييييييييب !!!

[do3a2_alganna]

هو فى ايه ؟ تشويش؟ليه حاجة غريبة والله

[أمــ هـنـد ــة الله]

سبحان الله انا لسه راجعه وكنت ناوية اكتب عن الموضوع ده
وفرت عليا يا دكتور انس والله
بالنسبة بقى لموضضوع التشويش ده انا فعلا بمجرد ما دخلت المدرج لقيت ان مفيش شبكة قلت جايز من عندى شوفت مع صحابى برده مفيش عرفت بقى ان فيه حاجه مانعه الشبكة
ومش عارفه ليه يعنى حكاية التشويش ولازمتها ايه
بجد احنا اللى هنضر ف الموضوع ده لان فعلا افرضو حد عايزنا ضرورى
وغير كده طب مافيه ناس بتشغل اغانى ومش بتبقى رنات يعنى
انا شايفه انه قرار مالوش لازمة ........ومفروض يلغوه والبتاعه دى تتشال من المدرج
مش عشان خاطرنا لأ عشان خاطر اللى هيقلقو علينا ف البيت

[Mohamed Al Gohary]

انا قالبت الدكتور محمود بكره النهارده وسالته .. وقال لى اه فعلا .. وده عشان الطلبه نفسهم ..

وكمان قال لى احنا عاملين 10 دقايق ريست بين المحاضرات .. ولا الطلبه بيزنس مان بقى !!

وقال كمان ان الدكاتره بتضايق .. وبيطلعوا ضيقهم على الطلبه فى الامتحانات وكده ..

[..::ciZar_Resala::..]

سبحان الله انا لسه راجعه وكنت ناوية اكتب عن الموضوع ده
وفرت عليا يا دكتور انس والله
بالنسبة بقى لموضضوع التشويش ده انا فعلا بمجرد ما دخلت المدرج لقيت ان مفيش شبكة قلت جايز من عندى شوفت مع صحابى برده مفيش عرفت بقى ان فيه حاجه مانعه الشبكة
ومش عارفه ليه يعنى حكاية التشويش ولازمتها ايه
بجد احنا اللى هنضر ف الموضوع ده لان فعلا افرضو حد عايزنا ضرورى
وغير كده طب مافيه ناس بتشغل اغانى ومش بتبقى رنات يعنى
انا شايفه انه قرار مالوش لازمة ........ومفروض يلغوه والبتاعه دى تتشال من المدرج
مش عشان خاطرنا لأ عشان خاطر اللى هيقلقو علينا ف البيت

و الله يا دكتورة أنا شايف إن القرار صح جدا .. لأن اللى بيشغل موبايله فى المحاضرة يبقى مش بيحترم الدكتور اللى تاعب نفسه و جاى يشرحله و الله أعلم باللى فيه .. و اللى مش بيجترم الأكبر منه .. أكيد كلنا عارفين يبقى إيه

أما الناس اللى بتشغل أغانى فى المحاضرة دى فدى قلة احترام متناهية .. مش بس للدكتور .. لأ ده لزمايله اللى قاعدين جنبه و ناويين يستفادوا حاجة من المحاضرة .. يعنى مش مكفيه إن هو مش بيفهم .. و لا بيستفيد .. ده كمان بيشوش على زمايله و مبيخليش حد من اللى قاعد جنبه يستفيد

المفروض المدرج ده محراب علم .. يعنى مكان مقدس .. دخلته .. يبقى تحترمه و تحترم الناس اللى فيه .. و إلا مكنتش تدخل من الأول .. الدكتور مطلعش يجرى وراك فى الطرقة زى ما كانوا بيعملوا فى ثانوى و إعدادى و قالك إنت واقف بره ليه خش المدرج .. لأن إنت متهموش أساسا .. اللى يهمه القلة القليلة اللى بتحضر عشان تفهم .. و تركز و تستفيد

كمان اللى بيشغل أغانى ده يا دكتورة لو جنبك تقدرى تسكتيه .. لأنه مش بيعليها .. و بتأثر بس على اللى قاعدين جنبه أو قدامه و وراه ..

و بعدين إحنا مش رجال أعمال يعنى عشان عايزين الموبايل ميفصلش شبكة ثانية واحدة .. و لا حد فينا شغال فى البورصة .. حجة تأخير المحاضرات دى ممكن بعد ما المحاضرة تخلص فى ثوانى الكل بيكون بره .. و ممكن تتصلوا أو ترنوا و تطمنوا الأهل زى ما إنتوا عايزين

و بأكد تانى تأييدى للقرار .. عشان الناس اللى بتتكلم فى الموبايلات فى المحاضرة . و اللى كل دقيقتين الموبايل بيرن ... و فى الأغلب مسدات تافهة و ملهاش لازمة .. كحال 3/4 الشعب المصرى اللى عايش ع الرنات .. تبطل الحركات دى و تحترم نفسها

حطوا نفسكوا مكان الدكتور .. الراجل جاى مركز و منظم المعلومات فى دماغه .. و بيسردها بسستم معين عشان مينساش حاجة .. و يديلك كل المعلومات .. و ف عز ما الدكتور بيشرح و المحاضرة متركزة جدا .. تلاقى رنة و لا صوت نغمة طالعة .. و الله أنا لو منهم .. أحط أمن ع المدرج و يلموا الموبايلات قبل ما تدخلوا .. مش بس أجهزة تشويش

[dr_chamommile]

قرار غريب مش عارفين ايه اخر التطورات بس اكيد برده الدكاترة بيجيلهم مكالمات في المحاضرات ولو كانت مهمة

المهم هنشوف ايه اللي هيحصل