مسلسل رمضان ( مجنون سارة ) .. تم التحديث : 03 - 08 - 2012

[DR.BIBO]

هههههههههه حلو اوى المسلسل ده وجو ناقر ونقير اللى بينهم
متابعة ان شاء الله
فى انتظار باقى الحلقات

[E.Raafat]

الحلقة الثالثة ( مشروع زواج )

عادة ما نجتمع حول مائدة الإفطار ونتجاذب أطراف الحديث وإليكم هذه المفاجئة :-

( أمي )____ ما تتلكم يا حاج ,, خلينا نفرح ..

( أبي ) ____ طيب يا حاجة هتكلم أهوه ,, بس مش عارف أدخله إزاي ...

( أنا ) ___ فيه أيه يا حاج ,, انت كده قلقتني ؟؟

( أبي ) ____ أنا عاوز أخطب لك سارة بنت خالك ...

( أنا ) ____ و دا اللي مخليكم مش عارفين تتكلموا ما انتم كل يوم بتقولوا لي نفس الكلمتين دول بس الاسماء بتختلف ,, مره مريم ومره مش عرف مين والنهارده سارة ,,, و انا كالعادة برد بنفس الجواب أنا بدور على حاجة معينة و وقت ما ألاقيها هاجي جري وهقول لكم أنا عاوز أخطب ..

( أبي ) ______ لأ ماهو المره دي إحنا واخدين قرار نهائي ..

( أنا ) ___ قرار نهائي على أي أساس ؟؟

( أبي ) ___ احنا شايفنكم واخدين على بعض ,, و فيه شوية استلطاف متبادل و تشابه كبير بينكم ,, ممكن انتم متكنوش حاسينه بس أي حد بيشوفكم بيقول انكم فوله و انقسمت نصين ..

( أمي ) ___ وبعدين أنا بحب سارة ,, مؤدبة و حافظة القرآن ,, وبنت خالك يعني مننا وعلينا ..

( أنا ) ___ بس دي لسه صغيرة ,, ومتعرفش تاخد قرار مهم زي دا ,, و بعدين ممكن تكون مش شايفاني زوج ممكن تتزوجه في يوم من الأيام ,, و إن أنا مجرد فرد من عائلتها هيه بتحبه زي أخوها ...

( أمي ) ___ أولا سارة مش صغيرة ,, دي اتقدم لها عريسين و رفضتهم ,, و بعدين هيه طول الوقت بتتكلم عنك و كل ما حد يسألها في موضوع الجواز تقول أنا هجوز دكتور ...

( أنا ) ___ يا سلام ,, دا على أساس البلد مفهاش دكتور غيري !! يا جماعة الخير دي لو كلمتها في في أي مكون من مكونات الجواز مش هتفهمني دي بتفكر زي الأطفال .....

( أبي ) ___ طب ,, أيه رأيك تقعدوا مع بعض و تتكلموا وتشوفوا ممكن توصلوا لأيه ,, مش ممكن تكونوا بتحبوا بعض و انتم مش حاسين ؟؟

( أنا ) ___ لو انت شايف كده يا حاج خلاص نقعد ونشوف ..

بمجرد أن تلفظت أخر كلمة ,, هرعت والدتي نحو الهاتف تتصل بخالي تحدد معه موعد ,, لكنها قبل أن ترفع السماعة وجدت جرس التليفون يرن فرفعت السماعة تجيب ,, بضع لحظات وبدأ وجه والدتي يتحول للون الأحمر و حروفها تتثاقل ,, حاولت أنا و والدي معرفة ما يحدث لكنها أكملت المكالمة و التفتت إلينا ودار بيننا هذا الحديث :-

( أبي ) ____ مالك يا أم إبراهيم ,, فيه أيه ؟؟

( أمي ) ___ محمد ابن اختي اتقدم و طلب إيد سارة ..

( أنا ) ___ طب يالا بسرعة نلحق الباقي قبل ما يطلبه كمان ..

( أبي ) ___ اطلع بره يا تافه ,, عمالين نقنع فيك بقالنا ساعتين لحد ما البنت اتخطبت ..

( أنا ) ___ أنا أصلاَ كنت ماشي رايح عند أحمد عبد الدايم ,, سلام عليكم ..

لا يغرنكم هذا الثبات الذي قد يصل لدرجة البرود ,, فأنا عادة أخفي ما بصدري عن أقرب الناس لي ,, خرجت من عندهم لأنني لم أستطع البوح بما في صدري ,,لم أستطع الصراخ بأعلى صوت ( أنا بحب سارة ) ,, نعم إنها الحقيقة التي حاولت أن أخفيها حتى عن نفسي ,, إن سارة لم أتخيلها يوما في أي مكانة سوي زوجتي التي أضع العالم كله تحت قدميها ,, ارتمي في أحضانها فتأويني بعد غربة و تشاطرني ليلي بعد وحدة وتسقط عن كاهلى غبار الشيب فأحيا معها كالطفل الذي لا يكبر...

دخلت على أحمد وقد شعر بشيء غريب يعلو ملامحي ,, فبادر يسأل ,,,, فدار بيننا هذا الحوار :-

( أحمد ) ____ أيه يا عم مالك ؟؟

( أنا ) ___ سارة اتخطبت يا احمد ..

( أحمد ) ___ هيه مش بنت خالك !! اتخطبت وانت متعرفش غير بعد ما اتخطبت !!

( أنا ) ___ ابن خالتي اتقدم لها و تقريبا هيوافقوا عليه ,, أنا مش قلت لك قبل كده ان العيلة أول ما سارة اتولدت قالوا دي عروسة محمد..

( أحمد ) ___ يابني دا بيبقى كلام كده وخلاص و بعدين طالما لسه ما اتخطبتش يبقى لسه فيه أمل ..

( أنا )____ حتى لو الموضوع ماتمش مينعش خلاص اتقدم لها دا ابن خالتي يعني في مقام أخويه الكبير ..

( أحمد ) ___ طب قوم اتوضا و صلي لك ركعتين وان شاء الله خير ....................

إبراهيم رأفت

الحلقة القادمة ( أيه رأيك في الجوازة دي )

[قطر الندى]

الحلقات أصبحت مشوقة أكتر وأكتر
فى انتظار الحلقة القادمة ،وهيكون ايه رد سارة ؟!!!
متابعين معاك يا دكتور

[E.Raafat]

[الملاك الباكى]

جميلة جدا بس يا ريت حضرتك مش تتاخر علينا بباقى الحلقات

[white light]

متابعة

جميلة يا دكتور ماشاء الله

فى انتظار الباقى

[Dr_Cinderellaaaaa]

جميلة جدااااااااااااااااااااا يا دكتور ابراهيم
متابعة مع حضرتك ان شاء الله

[E.Raafat]

الحلقة الرابعة

أمضيت ليلتي في منزل صديقي أحمد عبد الدائم أحاول استيعاب الأمر ,, فأنا لم أفهم متغيرات المعادلة التي أطاحت بي بعدما كدت أمس النجوم وأعادتني ليس كما كنت بل ألقتني في قفص الإتهام في محكمة أقامها قلبي ونطقت فيها جوارحي واتحدت جميع جوارحي لتنطق بالحكم حضوريا على عقلي الذي بالغ في التصرف كعاقل و تناسى أمر محبوبته حتى استفاق فوجدها رحلت ...
ليس هذا أصعب ما قد أعانيه ,,,, لم ألحظ أنني قد تهت في بحور النو إلا عندما أيقظني الهاتف في تمام التاسعة صباحا ,, كانت هي التي تتصل ولا أدري إن كنت مازلت نائما وأن الذي يحدث ليس سوى حلم أم ما أعيشه هو الواقع وأنها تتصل فعلا ,, إليكم الحديث :-
( سارة ) ___ السلام عليكم ,, حضرتك فين ؟؟ تعالى بسرعة أنا عندكم في البيت عاوزاك في موضوع مهم ..
( أنا ) ___ وعليكم السلام ,, أيه خير ؟؟ فيه أيه ؟؟
( سارة ) ___ مش هينفع الكلام في التليفون تعالى حالا و انت تعرف كل حاجة ..
( أنا ) ___ بس أنا مش فاضي والد أحمد تعبان وأنا بركب له محاليل ومش هقدر أسيبه ..
(سارة ) ___ هتيجي ولا اجيلك أنا ,, الموضوع مهم جدا و لازم أشوفك ..
( أنا ) ____ طب خلاص نص ساعة و اكون عندك ان شاء الله ...
اتجهت نحو المنزل و أنا لا أدري كيف أنظر إليها ,, هل ستمتد يدي لتصافحها كالعادة ,, أم هي الآن باتت ملكا لرجل آخر يختص بها دون الجميع ,,, ماذا ستخبرني ,, كيف سأجاوب ,, كيف أحاورها ,, و أشياء لا تحصى تبادرت لذهني وظلت تطارد مخيلتي حتى وجدتني داخل المنزل واقفا بين يديها ...
( أنا ) _____ السلام عليكم ,,, عاوزاني في أيه يا ستي ؟؟؟.
( سارة ) __ انت منمتش كويس و لا بتتكلم كده ليه ؟؟
( أنا )______ سيبك مني أنا دلوقت ,, انت عاوزاني في أيه ؟؟؟
( سارة ) ____ بعدما جلسنا وحدنا في الصالون ,,, محد متقدم لي وأنا مش عارفه آخد قرار ,, أنا معرفش عنه حاجة وجيت أسألك عن رأيك ,, انت شايف أيه ؟؟
( أنا ) _____ أنا زيك بالظبط ,, محمد ابن خالتي بس أنا و هوه مش صحاب بالدرجة اللي تخليني أحكم عليه فمعرفش بصراحة أفيدك في الموضوع...
( سارة ) ____ انت مش كنت بتقول انك تقدر تحكم ع الانسان بمرد انك تشوفه حتى من غير ما تكلمه ؟؟ يعني أكيد عندك فكرة عنه ؟؟
( أنا ) ___ " وأنا أحاول الهروب و أتجنب إبداء و لو رأي بالسلب أو بالايجاب تجنبا للخلافات العائلية " مظبوط بس دا بالنسبة للحاجات العادية ,, بس مش لدرجة إني احكم على انسان في موضوع مهم زي كده ...
( سارة ) ____ شكلك خايف من عواقب قرارك يادكتور ,,, واضح ان الاعتبارات العائلية أهم عندك مني أنا ..
( أنا ) ___ " بعد نفس عميق " بصي يا سارة الموضوع دا أعتقد رأيك فيه مش هيكون محوري و اعتقد رغبة والدك هتتحكم في مسار الموضوع ,, وهنا أي حد هيتدخل هيقع في النص بين خالي و خالتي و أي كلمة تتقال ممكن تتسبب في خلافات عائلية أنا خصوصا مش حملها ..
( سارة )____ الكلام اللي انت بتقوله دا ملهوش أي لزمة بالنسبة لي ,, أنا جيت أسألك انت بس عشان تقول لي الجوازة دي تنفع ولا لأ بس واضح انك غير جدير بثقتي فيك ,, و انك أقل شجاعة بكثي مما كنت أتصور ,,
( أنا ) " بعدما شعرت أنها ستنصرف " سارة ,, محمد انسان مش وحش ,, هوه في فترة من فترات حياته كان وحش فعلا و يمكن محدش في العيلة يعرف الكلام دا غيري ,,, بس دلوقتي الراجل بيدرس وبيشتغل وإلى حد ما ناجح في حياته ,, وكمان عمتك هتكون حمى مثالية و اعتقد الأمور نظريا مبشرة بس القرار صدقيني مش هيكون بإيدك ابمواضيع دي بيدخل فيها حيثيات كتير عائلية حتى لو رفضتي ممكن خالي يوافق وساعتها مش هيكون أمامك أي خيار ...
( سارة ) __ انت تعرف انه عاوزني مكملش جامعة و ادخل معهد قراءات جنب البيت بحجة انه مبيحبش مراته تروح الجامعة وتختلط بمجتمع مفتوح من البنات و الشباب ,, مش شايف ان دي أنانية منه ؟؟؟
( أنا ) ___ دي وجهة نظره و دا العرض اللي هوه مقدمة و انتم ياترفضوا ياتقبلوا وانتم أحرار ...
( سارة ) ___ واضح ان انا كنت غلطانة لما فكرت آخد رايك ,, كلامك كله عايم كأنك عاوز تقول حاجة و خايف ,, انت مش ابراهيم اللي أنا أعرفه أو اللي كان مسمي نفسه " الملك " ,, انت شخص خايف تقول شيئ لإنك عارف إنه هيغير الأمور و ممكن يزعل العيلة منك ,,, عالعموم ياريت تسترجع شجاعتك المعهودة وتتكلم قبل نا يكون الأوان فات ......
أسرعت نحو الباب ,, بضع ثواني و اختفت عن عيني ,, فسارعت نحو غرفتي و أغلقت الباب و ...............

إبراهيم رأفت
( قرار )

[dr corundom]

الله..

جميل جدا ..

متابعة

[امانى*]

جميييييييييييييييل اوووووووووى ومتابعه مع حضرتك يادوك