عوده الى كرسى الاعتراف مع a_fouda2

[a_fouda2]

ندخل بقه على الجد


وقد تقرر منعه من الاكل والشرب على مدار الاسبوع ويجب عليه الاجابه على كل الاسئله دون هروب من اى سؤال
يا عم من غير حاجة أنا صايم أصلا
ونبدا بسم الله الرحمن الرحيم

الاسم تساعى :
انت بتزود كل شوية مش كان ثماني مع انس
عبدالرحمن أشرف كامل فوده
كفايه عليك كده
السن: 19 سنة و 5 شهور و 6 ايام
الحاله الاجتماعيه(متزوج او اعذب): أعزب بالزين على فكره شايفني كباية ميا تقلي اعذب ولا مالح ده اسمه كلام برده
عدد الاخوه والاخوات: 2" أخ وأخت "
وظيفة الوالد والوالده : الاتنين أطباء
بتحب كليه الصيدله ولا دخلتها بالتنسيق: تنسيق والله بس حبيتها بعد كده
لو مدخلتش كليه الصيدلة كنت تحب تدخل كليه ايه: هندسة
مين كاتم اسرارك: نفسي و أختي وأصحابي أحيانًا
ايه هى احلامك: لما انام هصحى و أقول على طول بس لو افتكرت الحلم
اكتر المواضيع اللى بتعجبك على المنتدى واكتر اعضاء بتعجبك مواضيعهم
معظم مواضيع المنتدى الصحي اللي بتبقى عبارة عن حلقات يعني مش موضوع نزل من مشاركة واحده وخلاص
وكام موضوع في العام والاسلامي برده مش هعد أقولهم كلهم بقى عشان منساش حد
اعضاء بقى كتير
ابو شبند وعبدالله وانت و دكتورة بنبونة و دكتورة يوجينا وخلاف و دكتورة مطحونة و دكتورة أميرة "موضوع الصحابة الجديد ده حلو" و ناس كتير بقى تانيين هفتكر مين ولا مين

لا انت قاعد سبوع بحاله

ويلا ابتدى جاوب بقى عشان كده مش كويس

حليت الشوية بتوع ابو رولا اهو تصبيرة بس عشان خاطرك والله

-----

ههههههههههههه

ما كنتش اعرف ان سامح وابو على بيحبوك اوى كده

بالراحه على الواد ابنى ياشباب

هو فى حمايتى

ده مش حملكم

الموضوع شكله بدأ يولع

مين ده اللي مش حملهم
انت بستفزني يعني يا ابو سمير
ماشي

[Moonlight]

استمروا استمروا........................................... ....
مابعرفش أسأل...........بس فيه اللي قايمين بالواجب تمام.......................

ربنا معاك...........
-----

الحاله الاجتماعيه(متزوج او اعذب): أعزب بالزين ( اسمها الزاي و ليس الزين ......) على فكره شايفني كباية ميا تقلي اعذب ولا مالح ده اسمه كلام برده

[محمد سمير]

انت بتزود كل شوية مش كان ثماني مع انس-----

اصل انا بحب الزياده

الحاله الاجتماعيه(متزوج او اعذب): أعزب بالزين على فكره شايفني كباية ميا تقلي اعذب ولا مالح ده اسمه كلام برده

الحق عليك

ما انت لو كنت متجوز ما كنتش سألتك السؤال ده

19 سنة و 5 شهور و 6 ايام

ياااااااه بس

حليت الشوية بتوع ابو رولا اهو تصبيرة بس عشان خاطرك والله

عشان تعرف انى حنين

جبتلك تصبيره وما عملتش ذى ابو على وسامح

مين ده اللي مش حملهم
انت بستفزني يعني يا ابو سمير
ماشي

ايون

استقبل بقه

.( اسمها الزاي و ليس الزين ......)

اسمها الزاى يافوده

انت عاوز تروح كى جى تانى ولا ايه

[محمد_على_سلام]

ابو على بيحبك اوى

بس احب افكر ابو على بيومه اللى قرب عشان يستعد من الوقتى

لالالالالالالالا انسى خالص

طبعا بنحب فوده ولازمن نكرمه
-----

يا عم من غير حاجة أنا صايم أصلا

على فكرة يا شباب انا مش ضامنه

[DR.BIBO]

موضوع جامد وواضح ان الدكاترة متوصين بحضرتك ربنا يعين حضرتك
هسال اما الجهاز يتصلح ان شاء الله

[a_fouda2]

فودة حبيبى
انت معدتش حبيبي على فكره
لازم ادلعك
خد دول جاوبهم على الماشى
ايه هى اكتر الصفات اللي بتكرهها فيك ونفسك تغيرها

وليه؟
يا عم أنا كلي على بعضي حلو
بس هي ممكن بدلع شوية اتنين تلاتة ومبذاكرش كويس بس
وايه اكتر صفه او حاجة بتحبها فيك ونفسك تنميها
اكتر حاجة بحبها في نفسي اني على طول متفائل الحمد لله ومبتأخرش عن حد محتاج حاجة

مين اكتر شخص بتحب تقرب منه؟ العقلاني ولا اللي بيهزر

ولا السياسي؟ ولا المثقف ؟
العقلاني

ايه اكتر صفه بتنرفزك في البنت؟
التناكة والدلع الزياده
وايه اكتر صفه بتنرفزك ف الولد؟
الندالة
يعني ايه غباء بالنسبه لك؟
يعني واحد تفكيره محدود
ايه اكتر مقلب عملته في حد من اصحابك وندمت عليه؟
لا يا عم بيصعبوا عليا بعمل المقلب وقبل ما الواد يشربه بقله عليه
بس اكيد انا عملت مقلب في الواد عبدالمعبود قبل كده اصل انا بحب اعمل فيه مقالب على طول
واكيد في ثانوي برده
وايه اكتر مقلب اتعمل فيك وغاظك؟
يتعمل فيا مقلب انت بتهزر يا ابني
اللي بنعمله في الناس هيطلع علينا ولا ايه
لو جت لك امنية انك تكون شخص تانى غيرك هتكون مين؟
لا مش هتيجي الامنية دي
أنا كده كويس
ولو جت لك امنية تانيه بعودة الزمن شوية هتبقى قد ايه وليه؟
هرجع بنفس سني ولا ارجع لسن اصغر من دلوقتي
ارجع فترة ابتدائي
كانت فترة حلوة كده والواحد كان صغير وطيب كده
فترة الطفولة البريئة
مين اكتر انسان بيفهمك ومين اكتر انسان كان نفسك يفهمك
اكتر واحد بيفهمني أختي وأصدقائي القريبين
اكتر انسان كان نفسي يفهمني كان والدي في موقف كده
ياترى ندمت على مشاعرك ناحية حد معين؟
لا انا مبحبش اندم على حاجة
لأن كل حاجة ربنا مقدرها وفيها الخير والمصلحة ليا مهما كانت في نظري وحشة او مش كويسه

1. وايه هى المواصفات اللى يتمناها الطالب فى الداكترة؟

الدكتور يكون ممتاز في الشرح عشان الناس تكون حريصة انها تسمعله وتستفيد منه ويكون على علم بكل ما هو جديد
ويكون قريب من الطلبة بس في نفس الوقت في خط أحمر بينهم وبينه
يجبر الطلبة انهم يحترموه و يحبوه في نفس الوقت
كمان حاجة ودي أهمها الصدق لأن انا محترمش الدكتور اللي يقول حاجة ويعمل حاجة تانية

1. انت شايف مين الافضل الرجل أم المرأة فى منصب دكتور الكلية,,,,,,, ومنصب عميد الكلية ؟؟؟؟وليه؟؟

دكتور الكلية مش فارقة كتير
المهم يكون فيهم نفس الصفات اللي فوق دي
لكن العميد أفضل انه يكون رجل عشان مبحبش اي مرأة هي اللي تقود او هي اللي تكون رئيسة المكان اللي فيه او بقلق من الحكاية دي شوية

1. ايه الحاجات اللى بتخاف منها؟؟؟ وقول اسم عيل كنت بتخاف منه فى الشارع؟؟ واتخانقت معاه قبل كده؟؟

مش خوف من حاجة معينه
هو بس ساعات بتردد كتير وانا بعمل حاجات تفكير زياده بس
لا مكنتش بخاف من حد كنت انا واخويا عاملين تحالف وعيال الشارع كلهم عاملين تحالف ضدنا
وكان في واد يوميا يشتم فينا ويسب بالدين و يوميا نضربه وبرده مبيحرمش لغاية في يوم لحسته تراب الشارع
بس معدناش بنعمله حاجة لما عرفنا انه عنده أنيميا الفول Favism وسبناه يشتم ومنردش عليه

1. أكبر خناقة اتخانقتها فى حياتك؟

وانا في ابتدائي باين ولا اعدادي
كنت بصلي في الجامع وواد رخم جه أعد يغلس عيلا ومعرفتش اصلي منه قمت بعد الصلاة قالع الحزام وضربته بيه
جه أخوه الكبير ومسك فيا انا واخويا بس بسم الله ما شاء الله الواد مسكني من القميص بس لقيت زراير القميص كلها وقعت
والناس حجزت بينا وخلاص

1. اترفع عليك سلاح قبل كده؟؟؟ لو أه عملت ايه ساعتها؟

لا مترفعش احنا ناس طيبين

1. خناقة اتضربت فيها وايه سببها؟؟

وانا في ابتدائي برده كنت اتشاكلت مع واد بس كان بيلعب كاراتيه فمكنتش عارف اضربه و هو قاعد يضربني
بس مش فاكر ليه أكيد كانت حاجة تافهة

1. أكتر مدرس كان بيضربك فى المدرسة؟

كان مدرس الرياضيات في ابتدائي

1. أكتر مدرس كنت بتشتغله فى المدرسة؟؟؟ وكان فى اى مرحلة وياترى حاسس بالذنب دلوقتى ولا متفرقش معاك؟؟؟

مكنتش بشتغل حد كتير بس اكيد في ثانوي كنت بشتغل كل المدرسين عادي يعني لا ولا ذنب ولا حاجة
عادي بمشي دلوقتي وبسلم عليهم ويقولولي ازي يا دكتور كمان

مين اللى عرفك على المنتدى؟
حد من الصبيان كان قالي عليه في آخر سنة أولى باين الشربيني وبعد كده سجلت وفضلت 4 شهور العضوية مش متفعلة لغاية لما قلت لبنبونة وهي كلمت دكتور طلعت باين
قولى رأيك فى عمداء الكلية اللى حضرتهم؟
مبقلش رأيي في حد مش موجود
احنا يا ابني لينا عالم لوحدنا هتقلي عمداء كلية
مين هي الشخصيه اللي تثير فضولك واللي تحب انك تقرب منها وتتعرف عليها اكتر؟
الشخصية الساخرة عشان زيي

ايه رأيك ف الانطباع الاول؟ وهلى بتعتقد فيه اوى ولا؟
مبركزش في الكلام ده يا ابوعلي
انا انسان سيمبل وبسيط مبخدش بالي من الحاجات دي
بالنسبه لكلامك مع حد بتفكر في اللي ممكن يقوله ولا مبتحاولش تخمن؟
يا ابني أنا مصري يعني لازم اخمن وافتي في اللي مليش فيه
بتعمل ايه لما بتغضب؟
بسيب المكان اللي انا فيه
زعلك وحش؟ وامتى بتوصل لمرحلة الزعل؟
لا انا لما بزعل من حد بسيب المكان اللي فيه
بس انا مبزعلش من حد اصلا
بزعل من نفسي بس زي الكام يوم اللي كنت جيت فيهم مقفول دول
هبقى اجيب ترمومتر اقيس بيه مرحلة الزعل دي
ايه الحاجة اللي كنت تتمنى تبقى فيك وبتحاول تزرعها جواك؟
اذاكر شوية
كل انسان فينا معرض لأنه يتاخد عنه فكره غلط

ياترى بتحاول تصلح الفكرة دي مع كل الناس لمجرد انك مش بتحب حد يزعل منك
يا سيدي هو اللي غلط واخد فكره غلط والله بقى فهم بعد كده انه كان فاهم غلط خلاص دي بتاعته بقى
لكن انا مالي
الا لو حد صاحبي او قريب مني اوي بعد افهم فيه وغالبا بيكون أذكيا وبيفهموا على طول
ولا ليك ناس معينين بتخاف على زعلهم؟
أكيد ابويا وامي طبعا محبش ازعلهم ابدا
وبعد كده اخواتي واصحابي نشد شوية بس شوية و الاجواء بتصفى على طول
بتنام اد ايه ؟
من 4 ل 8 ساعات
بتنام في الدراسة اكتر ولا الصيف
الدراسة طبعا

اكتر حاجة بتعملها في اليوم ؟ ادام الكمبيوتر ولا فرجه على التلفزيون ..... الخ
الكمبيوتر ما انا قاعد عليه ليل نهار اهو
مين الناس اللي مكنتش تعرفهم وعرفتهم من المنتدى ؟ كان في حد منهم مستغلسه في الاول ولا لأ ؟
انس ورامي وخلاف و عبدالله وسامح كنت شفته مره في الكلية بس هو ميعرفنيش
دول اللي قابلتهم
في طبعا مقبلتهمش بس ليا كلام معاهم شوية
ابوسمير و ابو شبند
بيتهيألي دول بس
بتحب تتعرف على الناس من على النت ولا لأ ؟
لا
شخصيتك اتغيرت عما كنت في ثانوي ولا زي ما انت ؟
اكيد اتغيرت
لو اتغيرت انت شايف للأحسن ولا للأسوأ ؟
حاليا للاحسن بس اول سنة ونص في الكلية كانت زي ما هي
شايف نفسك مقصر في المذاكرة في الكلية ؟
ههههههههههههه
انت أدرى بالسؤال ده عني
هو انا بذاكر اصلا
ولا مكنش بالامكان احسن مما كان ؟
ولا انت مكنش في دماغك انك تذاكر اصلا ؟
والله لولا انت والواد احمد وابوسلامة وامجد ما كنت ذاكرت الشوية اللي انا بذاكر هم دول
الموقف اللي ندمت عليه في حياتك ولو رجعت تاني للموقف ده مش هتعمل اللي انت عملته تاني ؟
كنت في اعدادي وبروح العب بلاي استيشين من ورا ابويا وامي و مرة أخدت فلوس من شنطة ماما من غير ما اقلها ورحت لعبت بيها
بس لما رجعت بالليل قلتلها زعقولي شوية و خلص الموضوع على كده
بتحب تعمل اللي في دماغك واللي مش عاجبه مش مهم بالنسبة لك(يخبط دماغه في الحيط يعني ) ؟
ولا بتفكر الناس هتقول ايه الاول قبل ما تعمل اي حاجة ؟
لا برده الواحد بيشوف مدى النفع والضرر من التصرف دي بالنسبة ليه وبالنسبة للي حواليا وبعدين بشوف هعمل ايه
بتحب تتفرج على ايه في التلفيزيون ( افلام - ماتشات كورة - تنس - رياضة تانية - اخبار - افلام وثائقية - برامج دينيه .... )
لو اكتر من حاجة رتبها بالاولوية
اصل غالبا انا بتفرج على التلفيزيون مع حد مش انا اللي ببقى قاعد بتفرج يعني
مبشوفس الا لو حاجة محدده عارف معادها افتح واتفرج عليها وخلاص
بس بتفرج على كل دول على جسب مزاجي بقى واللي الاقيه ادامي
اسم الدلع بتاعك وانت صغير ؟
وانا كبير برده
بودي
اكتر مدرس حبيته وانت طالب ؟
أستاذ الرياضايات في اعدادي
اكتر دكتور حبيته من الدكاترة اللي درسولك؟
دكتور هاني بركه
حاجة كان نفسك فيها و معملتهاش ؟
بنسى انا الحاجات دي بسرعه عشان انا عارف ان اللي بيحصل هو الخير ليا فمبعدش افتكر
اتنصب عليك قبل كده ؟
لو اه احكي الموقف بالتفصيل .
أكيد بس أكيد برده معرفش
محدش هييجي يقلي انا نصبت عليك
او انا مكتشفتش ان حد نصب عليا

بتحب تسهر ولا تنام بدري؟
الدراسة انام بدري
الاجازة بسهر غصب عني
ايه الاكلة المفضلة ليك ؟
سمك مقلي
بتحب تاكل بره ولا اكل البيت احسن ؟
اكل البيت بس لما أمي تبقى فاضية بس وتفنن شوية
بتحب الفسيخ ؟
لااااااااااااع
دموعك قريبة ولا صعب انك تبكي ؟
قريبة بس مش ادام اي حد
ايه الموقف اللي يخليك تبكي ؟
اصل انا مبعيطش يعني
ممكن عيني تدمع بس عادي
لكن ابكي دي مبتحصلش الا لما اكون بقرأ قرآن بالليل بالذات

بتتقبل النقد ولا بتعد تجادل شوية الاول وانت عارف انك غلط ؟
كنت بجادل شوية ولازال في حتة كده
بس بقيت احسن دلوقتي وبتقبل النقد عادي
ايه المكان اللي نفسك تروحه ؟
الكعبة
اكتر مكان بتحس في راحه فيه ؟
المسجد
قدرتك على احتمال الالم أد ايه ؟
يعني تستحمل الالم لغاية ايه (مثال لو تقدر ) دبوس ولا ضربه مثلا وجع اسنان - التهاب ... اي حاجة يعني) ؟
لا يا اخويا بنستحمل لسه مجربتش حاجة ممكن مستحملش وجعها
ايه أرخم سؤال ممكن حد يسألهولك ؟
اصل انا اللي برخم على الناس فصعب حد يرخم عليا بسؤال
و ايه أصعب سؤال ؟ متجاوبوش
معندناش اسئلة صعبة كله سهل "متفائل بقى "
بتحب الصيف اكتر ولا الشتا ؟ و ليه ؟
الشتا طبعا عشان الحر في الصيف ملوش حل
لكن الشتا ممكن البس هدوم كتير ونبقى فله اوي
انت صبور ولا لأ ؟
حاليا صبور
بتتعصب بسرعه ولا لأ ؟
لا مبتعصبش بسرعه
امتى ممكن تكذب ؟ حصل معاك قبل كده ؟
لو بصلح بين اتنين
حصل معايا بس الحمد لله الاتنين متصالحوش
لو حد شتمك (لو كان واحد زميلك بس مش صاحبك ولو كان واحد صاحبك ولو كان واحد متعرفوش) ايه رد فعلك في ساعتها ؟ هتشتمه ولا هتضربه ولا هتقوله الله يسامحك ؟
صاحبي يبقى اكيد بيهزر مش بيقلك صاحبك لما هيحي ينصحك هيقلك في الاخر فهمت يا حمار
زميلي همسكه لغاية لما يرجع تاني عن اللي قاله
واحد معرفوش عادي ولا هرد عليه "الكلاب تعوي والقافلة تسير "
لو حد ظلمك و جه يوم وقدرت تظلمه زي ما ظلمك هتظلمه ولا هتعفو عنه ؟
لا غالبا هعفو عنه اصل انا طيب شويتين
اكتر موقف حصلك او حصل ادامك غير من تفكيرك او شخصيتك ؟
اي موقف بيححصل ادامي بحاول استفيد منه لكن مفيش حاجة محدده غيرت من شخصيتي اوي
ليك في القراءة ؟
يعني شوية على حسب المزاج برده
لو ليك بتحب تقرأ ايه ؟
على حسب المزاج بقى ممكن تاريخي ديني علمي مغامرات وخيال علمي يعني كله
بتحب تقرأ كتب على الكمبيوتر ولا لازم كتاب في ايدك ؟
لو في ايدي يكون احسن
بتحب تقرأ جرايد ؟
لا مش اوي
لو قرأت بتفضل اي جرنان ؟ من الجرايد القومية ومن الجرايد الخاصة برده ؟
اللي بلاقيه ادامي وخلاص
بتتابع اخبار السياسة منين ؟
نت وتلفيزيون
موقع معين يعني ولا تلفيزيون ولا من الفيس ولا لما بتتلكم مع اصحابك .
اخبار الرياضة برده ايه المصدر اللي بتتابع منه ؟
موقع كوووره
ايه أكتر حاجة بتعجبك في اصحابك ؟
جدعان
اكتر موقف زعلت والدك او والدتك منك قبل كده . لو ينفع قول السبب
ما هو بتاع البلاي استيشن اللي فوق ده
ايه اللي يخليك تقول ده صاحبي و ده مش صاحبي " أكتر صفة لو لقيتها في الشخص ده " ؟
الكذب
لما بتخرج مع اصحابك غالبا كلامكم عن ايه ؟ ولا مفيش حاجة معينه وهزار وخلاص ؟
أي حاجة بس بيبقي هزار في كله حتى في الجد بنهزر
لو قالولك انت بقيت وزير الصحة في مصر :
ايه اللي ممكن تعمله بالنسبة
للخدمة الطبية في مصر ؟
هدمرها
لو بايدي ازود المرتبات هزودها
عشان محدش يبقى يشتغل بره اكتر من المستشفيات
على راي المثل
أطعم الفم تستحي العين
غير كده دورات تدريبية اقدمها للطلبة يعرفوا الحياة العملية ميبقاش كل حاجة نظري
لوضع الصيدلي في المجتمع ؟
لما هو يحسن نفسه و اشوف صيادلة بجد هما نفسهم هيحسنوا من وضعهم
لو في أفكار في دماغك قولها لو مفيش متقولش
هل انت انسان بعيد النظر ؟
نوعًا ما بخطط للحاجات القريبة بس
بتخطط لحياتك ولا سايبها زي ما تيجي تيجي ؟
الحاجات القريبة بس وبعد كده لكل مقام مقال
عندك اولويات في حياتك ؟ يعني مرتب في دماغك هخلص دراسة بعدين اخش جيش بعدين اسافر بعدين ...
لو عندك قولها
لا مش مرتب الحاجات دي دلوقتي
هل شخصيتك ضعيفة أي حد ممكن يوجهك بكلامه ولا انت بتفرض شخصيتك على اللي بيكلمك ؟
انا بسمع من كل واحد و من كل الناس و اشوف انا حابب من ده ايه و من ده ايه واخد اللي يمشي معايا وبس
انت متعاون في شغل البيت ولا لأ ؟ بتعمل ايه لو متعاون ؟
متعاون بس
بعمل كل حاجة تقريبا
الصغير بقى
بتعرف تسوق عجل - موتوسكيل - عربية ؟
عجل وعربية بس
سؤال نفسك تسألهولي ؟
لا مفيش حاجة ما انت قاعد معايا في الكلية على طول
بتذاكر ازاي ؟
بكل الطرق عشان مزهقش
بورقة وقلم وبصوت عالي أحيانا وفي سري برده وساعات وانا نايم على السرير وساعات على المكتب او السفرة وساعات وانا بمشي وفي العربية برده وانا رايح الكلية وانا في المسجد مسبتش يعني
شايف ان في طريقة أحسن من كده و ايه هي ؟
ما انا بذاكر بكله عشان ميبقاش في نفسي حاجة
بتهتم بمظهرك ؟ لبسك - تسريحة شعرك مثلا
هو بيسرح من نفسه
ولا اللي ادامك بتلبسه وخلاص و تمشي ايدك في شعرك وانتهينا
ما هو بحاول اجيب حاجات لايقة على بعض والبسهم وخلاص
بس صلاة الجمعه و الاعياد بيبقى ليها وضع خاص شوية
ولا بتحلق زلبطة عشان متوجعش دماغك
لا بقصره بس
بتمارس رياضة يومية ؟
كنت في الدراسة الترم اللي فات بجري كل يوم تلت ساعة بس كان لمده شهر تقريبا
لكن العادي بتاعي المشي كل يوم
ولو اعتبرت طلوع ونزول السلم رياضة معنديش مشاكل
شايف ايه اكتر حاجة مميزة في شخصيتك ؟
مش عارف انا كلي على بعضي مميز
اكتر نادي بتشجعه دوري انجليزي-اسباني-ايطالي-الماني؟
مانشستر- فالنسيا - يوفينتوس- بايرن
اكتر موقف محرج اتعرضت ليه ؟
هو مش محرج هو تقدر تقول عليه عبيط بس
وانا في اوائل الطلبة في تالتة اعدادي كان الموجه بيملينا الاسئلة اللي هنحلها فانا اللي كنت بكتب الاسئلة فقال سؤال قمت انا قايله مخدنهوش
المشكلة كلها ان دي المرة الوحيده اللي والدي كان جاي يحضر فيها المسابقة فاتحرجت منه بس
اكتر فاكهة بتحبها؟
البرتقال
مشروبك المفضل؟
شاي بالنعنعاع
البرنامج التلفزيوني المفضل ؟
مفيش
كسرت حاجة في البيت قبل كده ؟ احكي الموقف
كتييييييييييييييير كبايات واطباق
كنت شايل الكوباية وهوب وقعت مني واتكسرت
مجموعك في ثانوية عامة؟
96%
علاقتك باخواتك عاملة ازاي ؟ اتحسنت دلوقتي عن قبل كده ولا لأ ؟ وهل انت شايف انها ممكن تكون افضل؟
الاتنين كويسة
اختي برخم عليها زي كل الاخوات اللي بيرخموا على بعض
واخويا بنتكلم ونهزر برده بس في حدود شوية بعمله حساب عشان لو مسك لي على كلمة هيفضل يذلني بها بس بهزار طبعا

بتحب ايه اكتر الحاجات المسكرة الحلويات يعني ولا الحاجات الحادقة
الحوادق
انت بتقول انك بتحب السفر سافرت فين قبل كده ؟ وايه المكان اللي نفسك تروحه تاني
أنا مقلتش ابقى انقل الاسئلة بذكاء
يومك في الكلية بيبقى عامل ازاي؟
ملكش دعوة
بروح الكلية احضر محاضراتي وسكاشني واصلي الضهر والعصر والمغرب لو فضلت قاعد لغاية المغرب D: واجيب الورق من الدكاترة وانزله المكتبه او اجيب الورق من الكلية واروح بعد ما خلص
ايه اختلاف يومك في الاجازة عن يومك في الدراسة؟
في الدراسة بخرج بالنهار وبروح بالليل
في الاجازة بخرج بالليل وبروح بالنهار
بتحضر محاضرات ولا لأ ؟(انا اعرف اجاوب السؤال ده اكتر منك )
هههههههههههههه
فاكر الباثولوجي انا الوحيد اللي حضرت 9 محاضرات
بص يا فوده من الآخر بسألك غلاسة لانى عارف اجابات معظم الاسئلة وعلى فكرة الاسئلة مغشوشة علشان محدش يقول انى غشيت ايوون بعترف
جاوب بقه

جاوبت اهو يا اخويا

.( اسمها الزاي و ليس الزين ......)

كده ده احنا دمايطة زي بعض
تشمتي فينا الاعداء

ما انت لو كنت متجوز ما كنتش سألتك السؤال ده

ياااااااه بس
لو عندك عروسه هاتها يا عم وانا مش هقول لأ

اسمها الزاى يافوده

انت عاوز تروح كى جى تانى ولا ايه

ماشي يا ابو سمير

موضوع جامد وواضح ان الدكاترة متوصين بحضرتك ربنا يعين حضرتك
هسال اما الجهاز يتصلح ان شاء الله

وليه تسألي والله ما تتعبي نفسك خالص كده كويس والله

سموحه كنت هجاوب على بتوعك بس انا مسافر دلوقتي
لما ارجع بقى ان شاء الله

[محمد_على_سلام]

انت بتقول انك بتحب السفر سافرت فين قبل كده ؟ وايه المكان اللي نفسك تروحه تاني
أنا مقلتش ابقى انقل الاسئلة بذكاء

آمال بس لما اسالك رايح فين يا عبده تقولى راس البر جاى منين يا عبده تقولى راس البر
سفر ده ولا مش سفر

[a_fouda2]

آمال بس لما اسالك رايح فين يا عبده تقولى راس البر جاى منين يا عبده تقولى راس البر
سفر ده ولا مش سفر

ده هما مرتين
مرة بعد امتحان المديسنال ومرة يوم الخميس اللي فات
و بعدين ايوة مش سفر

[محمد_على_سلام]

خد جاوب دول على الماشى لحد ما ارجعلك تانى ان شاء الله

اوصف نفسك وقول انت مين ؟
عايزه ايه من الدنيا ومن حياتك ومن اصحابك؟
ناوى تعمل ايه بعد التخرج؟
بتعرف تطبخ ولا لا؟
متعاون ف البيت ولا لا ؟
بتهرب م المشاوير وتدبس حد من اخواتك ولا لا؟
اسعد يوم ف حياتك؟

الموقف اللى لو حد عمله فيك عمرك ما هتسامحه عليه؟
امته ممكن تسيب حد من اصحابك ؟
انت ندل ولا جدع؟
اكتر موقف اتاندلت فيه مع حد ؟احكى بالتفصيل؟
اخر قلم اخدته ف البيت او بره البيت امته ؟ وليه ؟
فاكر اول علقه اخدتها ؟وكانت عشان ايه ؟
الاسره بالنسبالك تبقى ايه ؟
الكليه بالنسبه ليك ايه ؟
الحياه بالنسبه ليك ايه ؟
اوصف كل واحد سألك وانت قاعد ع الكرسى تقولى ف كل واحد ايه ؟
مين اللى تحب يشرف ع الكرسى بعدك غيرى؟
اول ما بتمسك ورقه وقلم بتكتب ايه؟
اكتب رساله لكل واحد سألك وانت مشرف ع الكرسى؟
ايه الخمس اسئله اللى كنت خايف تتسألهم ؟
قولهم كلهم واختار منهم سؤالين جاوبهم

الحسد بالنسبه ليك ايه ؟
انت شخص شكاك ؟
ايه اللى بيرعبك؟
اكتر حاجه بتحبها ف نفسك ؟
واكتر عشر حاجات عايز تولع فى نفسك بسببهم ؟
الاطفال بالنسبه ليك ؟
لو انت مخلف وجه لبنتك عريس زيك
هتقبله ولا؟ وليه ؟
ومتقوليش كل اب بيحتاج لبنته واحد احلى منه واحلى حاجه
عايز رد موضوعى
هتقبله ليه ؟
وهترفضه ليه؟

الظروف اكسبتك صفات ايه ؟
وهل شايفها خليتك احلى ولا اوحش؟
وايه الحلو وايه الوحش؟

خمس مواقف مثلت فيهم احساس غير اللى انت حاسه
كانوا ايه ؟وعملت فيهم وايه ؟وكان نفسك تعمل ايه؟


نفسك تشتغل ف صيدليه ولا يكون عندك صيدليه ولا تشتغل ف الدعايه ؟
وتقول المكان والشركه اللى هتشتغل فيهم برده



هل انت شخص عنيد ؟

لو لقيت مليون دولار هتسلمها ولا هتاخدها؟

انت بتسامح بسرعه ولا ؟

بتحب جيرانك ؟


اللى مبتحبهومش من جيرانك مبتحبهومش ليه؟

بتعتذر لو غلطت بسهوله؟

لو اخترت شخصيه خياليه
تحب تكون مين ؟
وهتعمل ايه ؟


لو معاك طاقيه لخفه
قولى خمس حاجات او اكتر هتعملهم بيها ؟


حيوان يملك م الصفات ما يشبهك وايه هيه ؟

شخصيه معروفه تشعر انها تشبهك وف ايه ؟


تعتبر نفسك شخص ذكى ولا؟
اصعب امتحان مر عليك ف الكليه؟

اما بتزهق بتجرى على مين تحكيله ؟

اما بتفرح بتجرى على مين تفرحه معاك ؟


اشخاص غلطت فيهم
ونفسك تقولهم سامحونى؟


اشخاص عملت فيك مواقف زعلتك
ايه هيه ؟


صفات تعجبك ف الرجال؟

صفات لا تعجبك ف الرجال؟

صفات تعجبك ف المرأه؟
صفات لا تعجبك ف المرأه؟
بتستشير مين ف مشاكلك؟
اضعف لحظه ف حياتك؟
امته اتهزت ثقتك ف نفسك؟
اقوى لحظه ف حياتك؟
امته حسيت بشئ م الغرور وليه؟
امته حسيت بالكسوف وليه؟
فاكر اول ما جالك الرساله انك قبلت ف صيدله المنصوره
عملت ايه؟
كنت ناوى تعمل ايه ساعتها ؟
وايه حصل من اللى نويته؟
وايه محصلش؟

الدين مصدر ثقه وهدوء؟
بنسبه اد ايه؟

اما بتكون مضايق بتعمل ايه؟

شايف نفسك حققت ايه م اللى توقعته لحد ناو؟

[Amira]

يعني انتم كنتم سايبين دكتورة أميرة و بيبو في حالهم وجايين تفوقوا عليا

الحمدلله انا عـديييييت
ربنا يكون فى عونك

دكتورة أميرة "موضوع الصحابة الجديد ده حلو"

شكـرا ... ربنا يسهل ويكمل على خير ان شاء الله