حواء .. مصلحة الكون

[pharmacistina]

لا و ألف لا للدلع

اياكم يا جماعة حد يدلع زيادة عن اللزوم ..

تدليع الطفل و الله العظيم بينتج عنه جوانب سلبية كتيرة من عدم تحمل المسئولية ..

لازم لما يحصل تجاوز تعاقب المخطئ .. لازم علشان يطلع انسان سوي يحترم القوانين ..

[Mohamed Al Gohary]

اكيد ارتجال

فعلا ممكن نوجه الطاقه اللى عندهم دى فى حاجات تخدمهم وتخدمنا ..

[muna7assan]

المعلومات العامه
فيه حاجات صغيره جدا مش هانلاقيها مكتوبه فى كتب المعلومات العامه ولا فى التليفزيون
الحاجات دى اطفالنا ها يعرفوها مننا من كلامنا ليهم كل يوم
يعنى مثلا
لو انا واقفه فى المطبخ بأجهز اكل ايه المانع انى جيب بنتى او حتى ابنى يقف جمبى يتكلم معايا وبعدين ابدأ افرجه على الاكل واقوله ان فيه حاجه اسمها خضار وفاكهه وفايده كل حاجه ايه؟
كل حاجه اعرفها اقولها له لأن الاطفال فى السن دا بيتعلموا بسرعه جدا ولما اربط المعلومه عنده بحاجه شافها بعينه اكيد عمره ما ها ينساها

[pharmacistina]

كوني قدوة

لازم تكوني قدوة يا أم المستقبل ..

مينفعش تكذبي قدام الأطفال و تنتظري منهم يصدقوا ,

مينفعش تغتابي و تتكلمي ع الناس و تنتظري منهم يطلعوا كويسين ..

المفروض يتعلموا منك الأخلاق الحلوة ..

ولازم اللي تقوليه تنفذيه ,

لأن لو انتي هتقولي لأولادك ( ما تكذبوش ) و تيجي انتي تكذبي خلاص بقى معدتيش هتقدري تقنعيهم بحاجة ..

علشان كدة بنقول يا جماعة حواء هي في ايدها تقدم الأمة دي .. لا مؤاخذة يا آدم

[Mohamed Al Gohary]

التعلم فى الصغر .. كالنقش على الحجز .. ثابت لا يزول ..
التعلم فى الكبر .. الكنقش على الماء .. لا يلبث أن يزول ..

[summer breeze]

موضوع جميل كنت لسه بفكر فيه من يومين شوفي ياستي انا لو ربنا سبحانه وتعالى من عليا بالزوج الصالح ومن عليا اكتر واكتر ورزقني باولاد بجد نفسي اربيهم زي مااهلي ربوني عمري ما هلعب دور الشخص المتحكم او الامر الناهي لازم يكون بيني وبينهم مساحه للحوار يتكلموا ويعرضوا وجهه نظرهم من غير خوف هكون صاحبتهم مش بس مامتهم اهم حاجه على فكره انك تكوني صاحبه اولادك لان معروف ان الصاحب هو اول حد بنلجاله لما بنحتاج مشوره في خطوه مهمه في حياتنا فلما يلجاولي احسن مايلجؤوا لحد تاني كمان لازم اعرف صحابهم مين واتصاحب عليهم كمان فيما يتعلق بالعقوبات وحل المشكلات عمري ماهزعق لحد او اعاقبه قدام التاني كل واحد اخده في القوضه لوحده اتكلم معاه واحسسه بغلطه ويطلع يعتذر للتاني مش هطلع حد ابدا غلطان قدام اخوه او ازعق لحد قدام التاني لان دي حاجه بتجرح جامد وبتاثر على علاقه الاولاد ببعض كمان لازم ارسي هرم المسؤوليات يعني بابا هو المسؤول الاول لما يقول كلمه لازم تتسمع مينفعش ماما تقول كلمه عكس كلمه بابا بس في ماما تقنع بابا تزن عليه لحد مايرضى كدا يعني لو بابا مش موجود يبقى كلام ماما يتسمع لو ماما مش موجوده يبقى كلمه اخوك او اختك الكبيره هيا اللي تتسمع وهكذا مينفعش مثلا الاخ الكبير يمشي كلامه على اخته او اخوه الاصغر منه في وجود باباه ومامته
كمان نفسي انجح في اني اخلي اولادي يسمعوا كلامي مش خوفا مني ولكن حبا فيا دي كبيره قوي عندي وليها اثر كبير قوي في نفسي فيارب اقدر احققها
دي شويه حاجات كدا كانت على بالي واول مايستجد جديد هقول على طول

[...مصر...]

السلام عليكم
أنا شايفة إن دور المرأة مش بس لما يكون عندها طفل لأ كمان إنها تختار الأب الكويس يعني اللي يسمع الأذان ويروح يصلي في المسجد يعني لو فضلت أدي الطفل دروس في فضل الصلاة وأهميتها غير لما يشوف باباه مهتم بكده ويقوم يصلي فورا . لكن أنا شايفة إن أغلب أولاد دفعتنا مابيحطوش موضوع الصلاة جماعة في دماغهم للأسف وبسألهم ليه ؟؟ وامتى هيهتموا بصلاة الجماعة ؟
دا غير طبعا الأغاني والفيديو كليب . متوقعين إيه من الطفل اللي قاعد مع باباه ومامته وبيتفرج على الأغاني دي ؟

[pharmacistina]

فيما يتعلق بالعقوبات وحل المشكلات عمري ماهزعق لحد او اعاقبه قدام التاني كل واحد اخده في القوضه لوحده اتكلم معاه واحسسه بغلطه ويطلع يعتذر للتاني مش هطلع حد ابدا غلطان قدام اخوه او ازعق لحد قدام التاني لان دي حاجه بتجرح جامد وبتاثر على علاقه الاولاد ببعض

صحيح يا سمورة ..

مشاركتك مميزة يا سمر Summer breeze ياريت كلنا نقرأها لأنها مهمة ..

نورتي صفحتي و الله

[أمــ هـنـد ــة الله]

حقيقى مش عارفة أقولك إيه دايما مواضيعك بتناقش كل اللى شاغلنى وبفكر فيه

الموضوع ده مسؤلية مش هينـة أبداً على المــرأة

لأنها بتقوم تقريبا بكل المسؤلية دى ... وسبحان الله مهما كانت صعبة ومتعبة بتتحمل وبتعمل كل جدها

عشان تربى ولادها أحسن تربية وتخليهم احسن نــاس وتتمنى أنهم يبقو أحسن منها ... سبحان من زرع

الحنان والحب ده كله فى قلبها ...

إن شــــاء الله حـــــابة أشــارك معاكم ..... وجزاكم الله خيرا على طرح الموضوع المهم ده

-----

الـذهـاب إلى المسجد مع الأب أو الجد

مكنتش متخيلة أن الأطفال ممكن يحبـو المسجد أوى كده وقلبهم ممكن يتعلق بيه
غيــر لمـا شفت أولاد خالــى عمرهم حوالى سنتين ... بيحبو المسجد بطريقة صعبة
لازم مع كل صلاة يتوضو من نفسهم ويرحو يصلو مع جدو وبقو يـأذنو وهما لسه مش بيعروفو يتكلمو كويس ويعيطو لو مش راحو ... قلبهم أتعلق بالمسجد وهما لسه مايعرفوش يعنى إيه صلاة ولا يعنى ايه وضوء ... بس لقو اللى ياخدهم ويعودهم ... فما بالكم بقى لما يكبرو كده ويعرفو يعنى إيه صلاة وعبادة أكيد
هيزيد حبهم للمسجد وبكده يبقى غرسنا فيهم حاجه جميــلة جدااا وعمرهم ما يفرطو
فيها ولا يهملوها لانها فيهم من طفولتهم كانت عـادة غير مفهمومه ليهم وبقت عبـادة مفروضه عليهم

[NonY]

الموضوع دا حلو أوى و مهم أوى ..

و يا ريت حتى لو حد معندوش أفكار معينة
أكيد بينتقد حاجات معينة فى أسلوب تربية أهله أو أهالى تانية ,, و بينوى انو يغيرها تماما فى تربية ولاده

لو كل واحد عرض الحاجات السلبية دى اللى أثرت عليه أو على حد تانى يعرفه بشكل سلبى
يكون كويس انو يلفت نظرنا لعدم تكرارها ..

و ان شاء الله أتكلم تانى