ممكن أعرف أنت بتذاكر إزاى؟

[Mohamed Al Gohary]

انا بذاكر بطريقة المراجعه .. وبسال نفسي واجاوب ..
دى اكتر حاجه بتثبت الكلام فى دماغى ..

[Amira Said]

في مواد بتحتاج طريقة خاصة في مذاكرتها، مثلا المسائل لازم نحلها مش نقرأ الحل، الرسومات لازم نرسمها،، ال structures لازم نعرف الفرق بينها و نربط بين كل واحد و اسمه و خواصه
فبقترح كل واحد يقول الأسلوب الأمثل من وجهة نظره في مذاكرة كل مادة عندنا
بالنسبة لي، الكيمياء الطبية لازم ألخص كل باب في ورقة، فيها الحاجات المهمة، لو في structures شبه بعضها و بينهم اختلافات بسيطة برسم الأساسي و احط الاختلافات بألوان مختلفة،، و غالبا بزود كل شوية على الورقة دي و بذاكر منها في الآخر
و طبعا لو محلتش امتحانات يبقى مش هحل حاجة في الامتحان،، فبحاول احل على الاقل امتحانين من امتحانات السنين اللي فاتت، و أضعف الايمان أقرأ الحلول

الصناعية، اصحابي الاكبر مني قالولي اجمع الاجهزة و احفظ رسمها كويس و هلاقي النظري سهل بعد كده

الصيدلانيات و العقاقير و التوكسو و البارا و الباثولوجي، مواد فيها كلام كتير فبقرأ كويس و اكتب الحاجة اللي عاوزة احفظها، و مهم بالنسبة لي اعرف نظام الامتحان في كل مادة علشان بتفرق في طريقة المذاكرة

[pharmacistina]

بالنسبة ليا ..

الترم عندي بقضيه قراءة فقط Read only

و بذاكر بحفظ ( علشان الامتحان ) في الآخر ..

أحلى معلومة و أكتر معلومة تثبت هي المعلومة اللي أبقى قارياها بمزاج ..

يعني بدون ضغوط .. قراءة جرايد للموضوع ككل ..

أشيل من دماغي فكرة اني بذاكر و أقرأ كدة و أنا الحمد لله بحب القراءة فدة شيء حلو عندي ..

في الأول مش بيكون في نية للحفظ أو المذاكرة كمذاكرة .. و الحمد لله في الآخر بتتكون فكرة حلوة عند الواحد تشجعه انه يذاكر عشان الامتحان ( مهو في خلفية .. يعني مفيش غربة بين الواحد و المعلومة )

و بعدين احنا ناس هنتخرج يعني لازم ناخد ع القراءة في حد ذاتها ,

لأن المذاكرة هييجي يوم و تنتهي بانتهاء ضغوط امتحانات الكلية , لكن القراءة المفروض تستمر مع الواحد طول حياته , و أنا لو قرات كتاب فهمت منه 60 % و طبقتهم في حياتي يبقى حلو أوي ..

شكرا لطرح الموضوع ..

[احمد شبند]

انا بذاكر بطريقة الربط والتلخيص

اولا

الربط

يعنى بربط اى معلومة جديدة بمعلومة قديمة هى ثابتة اصلا عندى

مثال

حرب اكتوبر كانت سنة 1973

(محدش بينسى التريخ ده طبعا )

قابلنى مثلا رقم فى المنهج 73 يبقى خلاص خلصت

مثال اخر

عرفت ان الاسيتايل كولين بيشتغل على M3

وعرفت هو المفروض تاثيره العام على الجسم كذا وعرفت هو موجود فين

وبالتالى مش محتاج احفظ ايه هى الفارماكلوجيكال اكشن او اليوزيس

والطريقة دى بتخلينى داخل الامتحان بدون اى ضغط اكنى داخل العب شوية وطالع الحمد لله


ثانيا

التلخيص

الحمد لله ربنا رزقنى الموهبة دى وانى ابقى اقدر الخص المعلومات فى مساحات صغيرة جدا جدا جدا

يعنى مثلا فى الفارما السنة الى فاتت لخصت منهج الاوتونومك كله فى عريزة واحدة فقط

وامتحان الاساى السنة الى فاتت لخصت تجارب العملى بنظرى العملى بتاعها بجزء النظرى المرتبط بيها علشان الشيت وكدا فى ورقة


وطبعا حبيبتى العقاقير

اقسم بالله كنت بكون داخل منهج العقاقير بتلت ورقات فقط وزمايلى يعرفوا عنى كدا كويس


شوف بقى سعتك لو انت قدامك اسبوع وبتذاكر فيه تلت ورقات بس

حاجة زى الفل الحمد لله

وبفضل الله مكنش بيكون سؤال واحد خارج الورق الى انا كاتبه

[manoo]

شوف ياسيدى من خبير فى المذاكرة اولا اقراء الموضوع كله بصفة عامة
ثم بعد ماعرفت الفكرة العامة للموضوع ابداء ذاكر الموضوع بفهم وتعمق ثم بعد كده تعيد على المعلومة اللى فهمتها ودعمها بالحفظ مرة او مرتين بعد كده ذاكر اللى بعده ولما تخلصه راجع على الاتنين وهكذا ثم بعد نهاية الموضوع اوعى تنسى تراجع على الموضوع كله...............
وادعيلى فى ساعة اجابة..............
د-عبدالرحمن

[سندريلا]

دكتور أحمد شبند ياريت حضرتك تبقى تنزل نسخةمن ورق التلخيص ده ولو يوم الامتحان بالليل
ويكون لك خالص تحياتنا ودعواتنا

[احمد شبند]

دكتور أحمد شبند ياريت حضرتك تبقى تنزل نسخةمن ورق التلخيص ده ولو يوم الامتحان بالليل
ويكون لك خالص تحياتنا ودعواتنا

والله الورق ده للاسف الشديد بيكون كله شفرات انا بس الى بكون فاهمها


ووالله الناس بتقولى كدا من زمان بس فعلا محدش بيفهم منه غيرى ولو عوزين ابقى اوريكم حجات من السنين(عينات يعنى ) الى فاتت ماشى



بس بجد محدش هيفهم منها حاجة

[NonY]

اه اه
عايزين نشوف

[SadSnow]

تقصد المذاكره دلوقتي ولا ايام زمان
ايام ماكان الواحد ده دماغه فاضي ابيض ولا شايل هم حاجه ولا متضايق ولا تعبان ولا مخنوق ولا الحاجات دي خالص كانت المعلومه تدخل وما تخرجش ولا حتي بعد الامتحانات ما تخلص والله
اما الان مع تقلبات الحياه بقي الواحد في دماغه الف حاجه بيفكر وحاسس انه شايل هم كل حاجه ليه بقي مش عارفه ؟؟؟؟
بس طقوس المذاكرهبالنسبه ليا صعبه اوي
اولا .. اقرا بصوت مش بعيد يصحي الجيران
ثانيا.. قلم جاف احمر خطه حلو وورق ابيض ساده مش داشت
ثالثا.. جو هادي ولطيف كده من غير صوت حواليا خالص
رابعا.. حد يكون قريب مني بيذاكر مش جنبي قوي يعني عشان اصلا مفيش حد بيطيق يقعد معايا وانا بذاكر
خامسا.. وده الاهم نظرا للطقوس الي انا باعملها مش باعرف اذاكر خالص والله
............مشكله صح تفتكروا اعمل ايه؟؟؟؟

[dr/lolla]

انا بقى ليا اسلوب غريب شوية فى المذاكرة . مذاكرتى بالتكرار يعنى ايام الامتحانات مثلا
اقراجزء الاول منغير حفظ مجرد تصفح وبعدين اسيبة وانقل على جزء تانى من المادة بردة تصفح
وبعدين ارجع تانى للجزء الاول واقراة مرة تانية بس بتركيز شوية واذا كان فية معادلات او استركشرات باكتبها مرة و اتنين وعشرة وهكذا لغاية ما احس ان كل اجزاء المادة بقت مألوفة بالنسبالى