ما رأيكم في صرف دواء بديل؟

[pharmacistina]

بحترم آراءكم جدااا ..

لكن بستغرب من حاجة , المفروض أنا كصيدلي أختار الأدوية أصلا بناء على تشخيص الطبيب للمرض ( دة في الدول المتقدمة يعني ) ..


يعني أنا أصلا أختار الداء ..

ازاي آجي أخاف اني أبدل منتج شركة .. و هو نفس الـ Active ingredient ..

لا و ساعات بقى الصيدلي يتصل ياخد الاذن من الطبيب , لو الطبيب وافق اننا ندي للمريض Betamethasone من شركة ابيكو بدل من Betamethasone من شركة آمون .. يبقى خلاص اصرف يا صيدلي ..

لو الطبيب المعالج رفض .. يبقى خلاص ..

يعني هو Betamethasone آمون وحش مثلا ؟؟


ولا لأن مندوب شركة ابيكو راح للطبيب اداله عينات مجانية و جددله أثاث العيادة ؟؟

معظم الأطباء لما بيكتب منتج شركة بيبقى قابض الثمن من الشركة .. و احنا علينا السمع و الطاعة ..


أنا الصيدلي اللي المفروض أصلا أختار الدواء أصبح ماليش حق أغير الشركة ..


و بعدين أنا ربنا رقيب عليا .. أنا مبعملش حاجة حرام ولا بعمل حاجة غلط .. نفس المادة يا جماعة و نفس التركيز ..


و ليكن الطبيب واخد فلوس من شركة المنتج بتاعها غالي كتير عشان يكتب المنتج دة في روشتاته , و المنتج دة له بديل سعره معقول .. هل أساعد الطبيب في مشروعه ؟؟ ولا أراعي المريض لو لقيته على قد حاله أجيبله بديل أرخص في السعر ؟؟


و عمر الدواء ما يخرج من المصنع تركيزه غلط لأن في رقابة ع الأدوية ..

عموما الناس تشتم أو غيره , هما مش فاهمين ان دة نفس الدواء .. لكن احنا فاهمين ..

و بعدين انت كصيدلي المفروض تراعي زميلك قدر الامكان و متصغروش قدام العيان و تقوله صيدلية فلان كانوا مديينك بديل عشان يروح يتخانق معاهم .. ( دة موقف حصل و سمعت عنه )

لا ... في بين الصيادلة زمالة المفروض نراعيها .. دي نقطة تانية ..


و برده بقول اختلاف الآراء لا يفسد للود قضية ..




عندي سؤال مستعجل جداااا ..


Lugol,s solution

مر علينا في عملي الـ medicinal

بيستخدم لعلاج الـ Hyperthyrodism ولا الـ Hypothyrodism ؟؟؟



كتاب العملي بيقول لعلاج الـ Hypothyrodism , و ع النت بعض المصادر بتقول كدة و بعضها بيقول كدة ..

و اللي مضايقني و مش مخليني مستوعبة هو ان احنا دارسين كويس في الفارما ان الـ Potassium iodide و التركيزات العالية من الـ iodine بتقلل الـ vascularity بتاع الغدة الدرقية و تقلل نشاطها يعني بتعالج الـ Hyperthyrodism !!!!


و ساعتها قعدنا نحكي و نتناقش هنا ع المنتدى و قلنا ازاي الـ iodide و الـ iodine يستخدم لعلاج الـ Hyperthyrodism لو فاكرين ..


حد عنده الخبر اليقين بخصوص المعلومة دي ؟؟

اللي يعرف يجاوبني و جزاه الله كل خير ..

[احمد شبند]

بالنسبة للتسائل الاخير

انا مليش فى المذاكرة قوى بس هقول الى اتعلمتة برة الكلية

هو لا بيعالج ده ولا بيعالج ده!!! .........امال بنعمل بيه ايه ؟؟


دوت فى حالات الهيبر ثايروديزم بديه قبل العملية باسبوعين (مش اكتر ) لانه زى ما الدكتورة قالت بيقلل الفسكولارتى ويقل الافراز وبالتالى يسهل عملية الفصل ؟؟؟


معلومة مهمة : هو لو استخد اكتر من اسبوعين بيعمل توليرانس ومعدش يبقى ليه لازمة ولو زاد اكتر بيعمل توكسيستى وممكن يؤدى الى الوفاة ........


دا كل الى انا اعرفى عن الليجل سوليوشن

[..::ciZar_Resala::..]

لسة بتتكلموا ف حتة بديل برده ..

أمانة المهنة تقتضى إنى لما أخرج حاجة للمريض أقوله أنا عاطيله إيه .. و مضحكش عليه ..

مش هو يدخل يقولى مش عاوز بديل .. بسبب العملة التى اتعملت فيه قبل كده من صيدلى تانى ..

الحكاية اللى بتحكى عنها دى .. لو كان الصيدلى فهم المريض و اتصل بالدكتور يستأذنه .. مكنش المريض راح يتخانق معاه ..

لآن المريض اعتبرها إن الدكتور بيستغفله !! و ده فعلاً اللى حصل .. لأنى كده اتبعت أسلوب بتوع الدبلومات لما مش فهمت المريض أنا عاطيله إيه ..

و الله أهم من العلاج الكلام يا جماعة .. و الله الكلام أهم ..

و عشان أوضح حتة الدبلومات دى ..

جالنا روشتة ب 120 جنيه و الحمد لله صرفناها كاملة ..

صاحبتها كانت عاوزة حفاضات بيبى فاين .. و دى كانت لسة خلصانة اليوم اللى قبله و الطلبية لسة موصلتش .. قلنالها الموجود بامبرز و شافتها و فهمناها .. قالت لآ أنا عاوزة التانية .. " على فكرة لا بتعرف تقرأ و لا تكتب " .. قالت هروح أجيبها من صيدلية تانية و أجيلكوا ..

راحت الصيدلية التانية .. الكبيرة .. اللى ف وسط البلد .. و مفيش فيها دكتور يواحد ربنا .. راح لاففلها البامبرز ف ورق جرنال .. و حطه ف كيس .. و دفعها الفلوس .. و قالها بيبى فاين !!!!!!!

لما جت أنا صممت إنى أشوف إيه اللى ف الكيس ..

و لما فتحته و قلتلها إن ده هو اللى أنا ورتهلها .. تخيلوا شكل وشها كان عامل إزاى .. أنا كنت حاسس إنها هتروح تقتله ..

و أهى دى حاجة بسيطة .. مش دوا ..

قمة الاستهتار و الاستخفاف بطلبات العميل !!

و الله اللى يوقف ف صيدليته حد غير كلية صيدلة .. يبقى ميستحقش يكون انسان أصلاً ..

الصيدلى الصح .. يفهم المريض قبل ما يديله أى حاجة .. حتى قبل ما يقوله العلاج بكام .. إلا إذا المريض طلب تتمين الروشتة ..

[pharmacistina]

أمانة المهنة تقتضى إنى لما أخرج حاجة للمريض أقوله أنا عاطيله إيه .. و مضحكش عليه ..

طبعا يكون أحسن لو قلتله ( أنا جبتلك نفس الدواء بس شركة تانية ) ..

بس حضرتك عارف الناس خصوصا عندنا بسيطة أوي مش هتفهم قصدنا أو مش هتحاول تفهمه لأنه حاسس انه داخل يدفع فلوس و عايز بقى اللي في الروشتة بالحرف الواحد و الا يبقى احنا بنستغله ..


مع التحفظ على كلمة ( مضحكش عليه ) .. لأن أنا لو أعطيته نفس العقار من انتاج شركة تانية مبقاش ضحكت عليه ولا ضريته ..

مش هو يدخل يقولى مش عاوز بديل .. بسبب العملة التى اتعملت فيه قبل كده من صيدلى تانى ..

هو السبب ان المريض يدخل يقول ( مش عايز بديل ) مش عملة عملها فيه صيدلي , لكن السبب ان الطبيب بيكون قايل للمريض ( متخليش الصيدلي يديلك البديل ) .. دة طبعا عشانه متفق مع شركة ابيكو مثلا انه يمشيلهم الدواء بتاعهم قصاد المكيف الجديد اللي في العيادة ..


من هنا كان ينبغي عدم اعطاء البديل حفاظا على مشاريع الأطباء الاستثمارية ..

مجرد رأي ..

بس فعلا .. اللي بيعطي نفس الدواء بيحصل على ثقة العميل دة بدون شك .. خصوصا لما يكون العميل رجل بسيط لا يعرف معنى كلمة بديل ..

على فكرة الناس المتعلمة بتوافق بالبديل على طول , لأنهم فاهمين انه نفس الدواء ...
و بعض الناس العامية الدكتور قال لواحدة ( هو نفسه بس اللبس بتاعها مختلف ) قالتله ( لو كدة ماشي )

[..::ciZar_Resala::..]

كده دخلنا ف موضوع تانى ..

حكاية الفلوس اللى بتتدفع و الاتفاقات دى مش ف بلدنا .. و مظنش إن شركة أدوية ترشى دكتور ف بلدنا أصلاً .. و ممرش عليا ..

لكن مر عليا اتفاقات بين صيدلى و دكتور جنبه .. و بسبب الحكاية دى واحد من زباينا اتخانق مع الدكتور و مع الممرضة اللى عنده عشان نزلت صرفتله الدوا قبل ما يمشى م العيادة م الصيدلية اللى هو متفق معاها و ليه نسبة ف مبيعاته ..

و المريض خد الروشتة و رماله الدوا .. و جه صرفها من عندنا .. و حلف بالله ما عاد رايح للــ " تاجر " ده تانى ..

====

يا منى .. المريض مدخلش جواكى و عرف نيتك ..

أول ما تطلعيله حاجة تانية و تديهاله من غير ما يعرف و يكتشف ده من مكان تانى يبقى علطول ف نظره " المكان الفلانى ده بيستغفلنى و بيضحك عليا " .. مش هيقول لآه .. ده غرضها مصلحتى ..

طبيعى لآ .. لآنه كده اتأكد إنك طالما مخرجتيش اللى ف الروشتة يبقى مش عندك .. و طالما مقلتيلوش يبقى بتتاجرى !!

الصح: الدوا كله موجود يا فندم لكن الحقن/الاقراص/الشراب/أياً كان .. ده مش موجود .. و فى عندى نفس الدوا بس شركة تانية .. لو حضرتك عاوزه أجيبهولك ..

فى حالتين ف الرد.. الحالة الأولى ..

المريض: طب هو ده زيه .. يعنى مش غلط ؟؟

الطبيب: لا يا فندم .. بقول لحضرتك هو نفسه بس شركة تانية ..

المريض: طيب مش مشكلة أو/ طب ممكن تسألى الدكتور أو/ طب أستأذنك ف الروشتة أسأل الدكتور أو/ لا معلش مش عاوز بديل ..

فى آخر رد .. فى حالتين ..

اللى واقف ف الصيدلية طبيب: تحت أمرك يا فندم .. اتفضل الروشتة .. " مصرفلوش حاجة منها " ..

اللى واقف ف الصيدلية تاجر: هيصرفله الباقى .. و يروح ناقله اللى مش موجود ف حتة ورقة قاطعها من كراسة .. و يدهاله .. و يقوله هاتها من صيدلية تانية ..

اللى واقف تاجر بس عنده شوية أخلاق: هينقل الدوا اللى ناقص .. و يبعت حد يجيبهوله من صيدلية تانية و يقول للمريض .. اتفضل استريح على ما ييجى ..

الحالة التانية من رد المريض ...

المريض: لا لو سمحت مش عاوز أى بديل ..

الصيدلى: طب إيه فكرة حضرتك عن البديل يا فندم .. ..

و يبدأ يشرحله يعنى إيه .. و يفهمه اللى بيحصل .. و للأسف محدش بيكون فاضى إنه يتكلم مع مريض و يفهمه و لو دقيقة !!

تمام كده ؟؟

===========

أتمنى .. من بوسى أو أميرة .. نسخ المشاركات و كل التعليقات عليها لموضوع جديد ف قسم المناقشات .. لعل يكون حد ليه رأى تانى كمان .. و نستفيد منه ..

[pharmacistina]

قد يكون عندك حق في اننا الأفضل نقول للمريض ,, لكن المريض حاسس انه داخل محل تجاري فـ 90% من الحالات هيقول الكلمة الشهيرة اللي تدل على المستوى التعليمي المحدود ( مش عايز البديل )

تعرف حضرتك ان صرف البدائل هو الحاجة الوحيدة اللي بحس بيها ان الصيدلي له حق في التصرف في الروشتة ..


فحتى دي لا أملك اني أعملها !!!



و أنا و الله العظيم الروشتة كمكسب عندي ولا في بالي , لكن احنا بنتكلم في مبدأ ..


كأني المفروض أجيب جميع المنتجات اللي في الماستر في الصيدلية عشان كل طبيب ينقي الشركة اللي على مزاجه ..

دة أنا كنت ناوية لما يبقى ليا شغلي الخاص أجيب كل عقار من شركة واحدة بس .. و عادي أعرف الناس الموضوع دة .. مهو أنا أجيب أحسن منتج ..


دي نقطة ..

أمال لو حذفتله دواء من الروشتة عشان هيسببله مشكلة !!! طبعا دة لما أستأذن من الطبيب

الله يرحم أيام ما كان الصيدلي بيعمل الدواء .. ماكانش المريض ولا الطبيب ولا حد بيفتح بقه بكلمة ..


عموما أنا معنديش الصبر اني أشرح لكل مريض مفهوم كلمة بديل و خصوصا لما يكون المريض لا يجيد القراءة و الكتابة و أجي أقوله كدة يفتكرنا عايزين نبيع رغم اننا الحمد لله مش محتاجين روشتته ..

[..::ciZar_Resala::..]

عموما أنا معنديش الصبر اني أشرح لكل مريض مفهوم كلمة بديل و خصوصا لما يكون المريض لا يجيد القراءة و الكتابة و أجي أقوله كدة يفتكرنا عايزين نبيع رغم اننا الحمد لله مش محتاجين روشتته ..

هى دى نقطة الفصل ف الموضوع ..

إن الناس المتعلمة فاهمة ..

و الناس اللى مش متعلمة بتسمع من حد تانى مش متعلم .. و اللى سمع من حد تالت برده مش متعلم .. و اللى برده سمع من حد رابع ممكن يكون حصلتله مشكلة مع أى حاجة ف الدوا .. أو سمع من حد خامس برده ..

و المتعلم الفاهم .. معندوش وقت إنه ينزل لمستوى الغير متعلم و يفهمه .. و يرقى بيه ..

و صدقينى مش هياخد من وقتك 5 دقايق ..

العلم أمانة .. و أمانتنا إن إحنا ننقله ..

[pharmacistina]

و المتعلم الفاهم .. معندوش وقت إنه ينزل لمستوى الغير متعلم و يفهمه .. و يرقى بيه ..

و صدقينى مش هياخد من وقتك 5 دقايق ..

العلم أمانة .. و أمانتنا إن إحنا ننقله

مش كدة بالضبط و الله ..


لكن الفكرة اني ببقى عارفة و متأكدة انه مش هيقتنع لو عملت ايه ..
أصلي جربت أقنع المريض قبل كدة .. مفيش ..

فحضرتك كصيدلي هتقعد تشرح و تقول و تعيد و تزيد انها نفس المادة و في الآخر هيقول ( برده يا أبلة مش عايز بديل )

و الأكتر انه جواه احساس اني كصيدلي بقنعه بالدواء عشان مصلحتي و عشان أبيع ..

يعني بشرح لواحد مش هيفهمني , و لو فهمني و صدقني هيظن فيا ظن غلط ..


على ايه ..

أنا يوم لما أديله بديل صحيح فيه نفس المادة مش بضره ولا بأذيه .. لسة هقعد أبررله .. دة الواحد يمشي المريض أحسن و يريح دماغه ..

بعترف اني مش ناجحة في الصيدلة الأهلية .. اذا كانت دي قوانين الصيدلة الأهلية ..

بالتوفيق لك يا دكتور ..

[..::ciZar_Resala::..]

مش كدة بالضبط و الله ..
لكن الفكرة اني ببقى عارفة و متأكدة انه مش هيقتنع لو عملت ايه ..
أصلي جربت أقنع المريض قبل كدة .. مفيش ..
فحضرتك كصيدلي هتقعد تشرح و تقول و تعيد و تزيد انها نفس المادة و في الآخر هيقول ( برده يا أبلة مش عايز بديل )
و الأكتر انه جواه احساس اني كصيدلي بقنعه بالدواء عشان مصلحتي و عشان أبيع ..
يعني بشرح لواحد مش هيفهمني , و لو فهمني و صدقني هيظن فيا ظن غلط ..
على ايه ..
أنا يوم لما أديله بديل صحيح فيه نفس المادة مش بضره ولا بأذيه .. لسة هقعد أبررله .. دة الواحد يمشي المريض أحسن و يريح دماغه ..
بعترف اني مش ناجحة في الصيدلة الأهلية .. اذا كانت دي قوانين الصيدلة الأهلية ..
التوفيق لك يا دكتور ..

الناس أنواع .. و مش كل اللى هيدخلك مش هيقتنع .. و أكيد فى ناس هتحب الكلام .. خصوصاً لو اتشرح بطريقة بسيطة ..

مثلاً: جالى امبارح واحد عاوز قرصين مضاد حيوى أموكسيل .. و لما اتكلمت معاه اقتنع .. و بدل ما كان هياخد قرصين .. قالى هات 4 .. و رجع قالى بص هات 8 أحسن عشان يبقى نكمل كورس العلاج ..

أنا بصراحة اتبسطت .. حتى لو كان مش لقتنع .. فأنا يكفينى ما عند الله ،،

=======

لما بعد الشرح ده و يقولك يا أبلة .. قوليله بكل هدوء .. و بابتسامة الصيدلى اللى المفروض متفارقوش .. " لو سمحت دكتورة .. لو كنت غير كده .. كنت هعرف أشرح لحضرتك الكلام ده ??.. و لا إنت إيه رأى حضرتك ؟؟ " ..

=======

اشرحى .. و تمنى الثواب .. و متقوليش أريح دماغى ..

تمنى الثواب .. و بغض النظر عن اقتناع المريض أو لأ .. فده شىء يرجعله ..

[pharmacistina]

اشرحى .. و تمنى الثواب .. و متقوليش أريح دماغى ..


تمنى الثواب .. و بغض النظر عن اقتناع المريض أو لأ .. فده شىء يرجعله ..

حضرتك عندك حق ..

ربنا يعلم اللي في نية الواحد انه يشرحلهم .. مهو مش بقية شريط المضاد الحيوي اللي هتفرق مع الصيدلي ..


و دكتور عطا الله قالنا قبل كدة نديله بقية كورس المضاد الحيوي و ندفعله من جيبنا عشان يعرف ان الحكاية مش مادية ..


بالنسبة للبدايل بقى .. أنا كنت بقول الصمت أبلغ من الكلام الغير مفيد .. و يكفي ان ربنا عالم اني مش بخدع حد ..
طبعا لو فهمته هيكون أحسن .. بس ربنا يقدر الصيدلي و يصبره كدة و لازم نشيل المرارة بعد التخرج مباشرة ..