كن حقيرا .. من فضلك ...

[AMERAL]

كن حقير .. قليل أدب .. وإحذر أن تكون ذا خلق ..!!
!!!!!!!!!!!!!!!!!!!!


هكذا هم الناس دوماً .. يفسروا طيبتك وتعاملك برفق معهم على أنه ضعف ..

هكذا يظن الكثير ... وعلى هذا المقياس يعاملك الناس .....!!

عندما تتنازل عن حق لك ... فقط لكي لاتؤذي مشاعر الشخص الآخر ... أطلقوا عليك لقب الضعيف ....

وصرخوا في وجهك ..ألا تستطيع أخذ حقك منه ...؟ ... كم أنت جبان ...

لم هذه النظرة ؟

عندما تعطي شيئاً مما تملك لأحد ما ... ليس لشئ بل رغبة في عدم إحراجه ... فسر ماعملت بأنه ضعف ..

عندما تصفح عن من أخطأ عليك ... فقط لكيلا تدب الكراهية بينكما ... قيل عنك الجبان ....!!

عندما يكشر البعض عن أنيابه باتجاهك ... وتقابلهم بالإبتسامة ... قيل عنك لايملك سواها ...!!

عندما تتلطف ،، فـ بالأسلوب تستخدم العبارات الرقيقة تجاه الآخرين ....... قيل عنك مراوغ ..!!

إذاً .. فإليك بالحل الوافي .. والدواء الشافي ..والجواب الكافي ..وإنتظر النتائج ...





فلتقل أدبك ... وتتهمج في أسلوبك ... وتسلب الآخرين حقوقهم إضافة إلى حقك ...

وتكشر عن انيابك في ظل الآخرين متبسمين ... ولاتعطي بل تمنع ... ولاتتهاون بل تصرخ ...

ولاتغفر الأخطاء بل أنعت منفعلها وعليك بالزجر فإنه له وجاء ... !!

وإستخدم أقبح العبارات في النقاشات .. وتلفظ بأوقح الألفاظ في الحوارات ...!!

عندئذ ... سيعمل الآخرين لك ألف حساب ... سيخافوا منك ... سينتظروا ردة فعلك ...

لن يحاولوا إيذائك ولو بكلمة ... يترقبون ماتريد .. ينفذون دون طلب ...






هكذا هو مجتمعنا ... يأبى بأن نكون ذا أدب وإحترام ... !!

ويحرضنا على أن نكون من ذوي الكره والإنــتــقام ...!!





موضوع استفزني جدا حبيت نتناقش فيه وسؤالي


لماذا انقلبت موازين الحياه هكذا ؟؟؟


سبحان الله له في خلقه شئون


عارفين الصح بس الغلط هوه اللي ماشي وبقى طبيعة الكون

[Joker]

عارفين الصح بس الغلط هوه اللي ماشي وبقى طبيعة الكون

وفيه ناس مش عارفة الصح او فاكرة ان الغلط اللي بتعمله هو الصح وان الدنيا مش هتمشي غير كده
او واخدينها فهلوة وحداقة واللي يعمل كده هو الحدق واللي ميعرفش يبقي مقفل و " خام "
ثقافة المجتمع لازم تتغير
هي فعلا بدأت تتغير بدليل اننا بنتكلم في الموضوع ده
عموما يا دكتور موضوعك مهم جدا ولازم الناس اللي تدخله تشارك في النقاش ده

[Lost * Dreams]

موضوع جميل
وصح جدا جدا
وعن تجربه شخصيه
دايما يقولولى ان طيبتى ضعف منى
بس طبعى ومش عارفه اغيره

[lost*soul]

لماذا انقلبت موازين الحياه هكذا ؟؟؟

لان نظرة الناس للطباع والاخلاق اختلفت

زى مازكرت الطيب الناس تتمادى ف الغلط معاه

وقليل الزوق الناس تتجنب الكلام معاه لانه قليل الادب يعنى منبوذ

بقى الاحلى اننا طيببن بس مش هنسكت عن الحق ونكون شياطين اخرس

ف صنف بقى تالت عرفته قريبا عشان تكسب الكل الضحك عليه ودموع التماسيح اقصر طريق زائف للموده

بس الاحلى اننا نجمع معظم لغات الحوار ونعرف امتى نتكلم وامتى مانردش ومع مين يعنى لو واحد مهذب

شور هتستحى تعامله غير بادب والعكس

يعنى الحل النهائى المعامله بالمثل مع اعتبار ان ف حجات يكفى الرد عليها بالسكوت الى ممكن يموت قهر

[dr.sasso]

موضوع رائع والنقاش فيه طويل جدا لأنه للأسف حقيقي
بس إرضاء الناس غايه مستحيل الوصول إليها فلازم الأساس اللي نتعامل بيه هو إرضاء الله سبحانه وتعالى وإرضاء نفسك ثانيا أنك لما تيجي تحاسب نفسك في نهايه اليوم تحس بالرضا عن كل تصرف عملته وعن كل كلمه طيبه قلتها لحد وعن كل عطاء إديته بنيه صافيه أيا كان رأي اللي حواليك فيك إيه
عمر ما كانت الطيبه ـ مع اللي يستحقها ـ ضعف
عمر ما كانت الكلمه الطيبه مراوغه عمر ما كان العفو جبن بل هو قمه الشجاعه
بس فيه نقطه لازم نتعامل مع كل شخص ومع كل موقف حسب طبيعته فيه إنسان لو حس منك بالطيبه بيبتدي يستغلك فيه موقف لازم توضح فيه الصوره قبل ما تنسحب من النقاش فيه إنسان لو إديته بيبقى ناكر للجميل
بس الأساس أنك تعامل ربنا في كل حاجه وفي كل موقف
وربنا يهدينا جميعا
شكرا ليك على الموضوع

[lost*soul]

dr_sasso

كلامك لفت نظرى لنقطه مهمه اوى اننا نتعامل ارضاء لربنا

وافتكرت كمان ان المؤمن القوى خير من المؤمن الضعيف

بس فيه نقطه لازم نتعامل مع كل شخص ومع كل موقف حسب طبيعته

تمام كده لو وحسيت مع واحد انه بدا يستغلنى ويتمادى ف الخطا فحقى يبقى لازمله وقتها وقفه

[Alaa_Resala]

الموضوع رائع جدا

بس ده أكيد عيب مجتمعي

وفي النهاية لا يصح إلا الصحيح حتى لو الناس فاكراه ضعف منك

عامل الناس كما تحب ان تعامل

[Dr nour]

والله فعلا موضوع مهم وحقيقى بنعاصره وبنشوفه باستمرار
الناس تفتكر ان الطيبه ضعف وانها شئ مينفعش نتعامل به فى هذا الزمان وبيكون طيب القلب فى هذا الزمان قد أخطأ خطأ فادح لا يغتفر وكأننا أصبحنا فى غابه لازم نكشر عن انيابنا حتى نستطيع ان نعيش بسلام فى هذا الزمان

كن حقيرا .. من فضلك ...</STRONG>

والله العنوان معبر تماما عما يريده الناس ...............ياااااااه كم خلقنا ابرياء أنقياء .................وكم ضاعت البراءه مننا ............أصبحنا نعيش وكاننا فى سباق لابد أن نتخلص من الأضعف ونفرض سيطرتنا على الآخر
______________________
بس مهما كان الوضع الحالى ومهما كانت نظره الناس فى مثل هذه الأمور فهى نظره خاطئه
كن طيب القلب ...................تكسب نفسك
كن طيب القلب...................تنال احترام نفسك لنفسك
ولا تنظر لما يحدث حولك ولا تنظر لما يردده الآخرين ..................فسر فى طريقك .............تنال السلام
_______________
وشكرا يادكتور على الموضوع الجميل ده

[Bright_Eyes]

فى البدايه شكرا على مناقشة هذا الموضوع الهام ,مش هتكلم كتير بس هقول ان البشر اتغيروا والزمان والظروف كمان اتغيروا بس فى النهايه احنا اللى نقدر نوصل فكره كويسه للناس عننا وعن شخصيتنا واللى ما يعرفهاش غيرنا بس بالادب والاخلاق مش بالحقاره اى انسان حقير عازك تبقى زيه بس الرد الوحيد للموضوهع ده هو الاتى
المسلم من سلم المسلمون من لسانه ويده ,مش معنى كده انى افرط فى حقى الطيبه مطلوبه بس مش لدرجة السذاجه واسأل انسان مظلوم او مجروح يقولك ان الدنيا علمته انه ما يسمحش لاى حد يجرحه تانى ويعيشه فى الالم تانى من جديد وفى نفس الوقت مايسمحش لنفسه انه يجرحاويظلم اى حد عشان ما يحسسوش بالاحساس الاليم ده "الظللم ظلمات يوم القيامه "كل واحد فينا لازم يحاسب نفسه قبل ما ربنا يحاسبه اما الناس فمستحيل ترضيهم ولما حد يسىء ليك افتكر دايما انك لو رديت عليه تبقى تدنيت لمستوى تفكيره واسلوبه وافتكر دايما قول الشاعر
اذا كنت عن الصمت عاجز فأنت عن الايجاز فى القول اعجز
يخوض اناس فى المقال ليوجزوا وفى الصمت عن بعض المقالات اوجز
كمان افتكر قول حكيم "اصمت اذا ابتغيت الكلام وتكلم اذا ابتغيت الصمت"
***************تحياتى ******************

[khokha]

لماذا انقلبت موازين الحياه هكذا ؟؟؟


سبحان الله له في خلقه شئون


عارفين الصح بس الغلط هوه اللي ماشي وبقى طبيعة الكون
والله الدنيا دي يقت ماشيه غلط في غلط
كله يغلط في كله ومفيش احترام ومفيش زوق للاسف مجتمعنا بقي صعب قوي وانا مبقتش طايقه الدنيا دي بسبب الناس
بيحصلي مواقف غريبه جدا بقول فين ايام الرسول صلي الله عليه وسلم .. كله نسي القدوه الصالحه !!
فين التحلي بأخلاقه !!!
والله اللي احنا فيه ده عشان الناس بعيده عن ربنا ومقصره في حق ربنا وربنا يهدي الناس جميعاا اللهم امين
وشكرا علي طرح الموضوع الرائع