من البيت للجامعه ومن الجامعه للبييت صح ولا غلط ؟

[جمال الشافعي]

السلام عليكم
قعدت مع نفسى لحظات وفكرت لو رجع بيا الزمن لسنة اولى كنت هبقى انا ولا كنت هتغير..وكانت الاجابة....
طبعا كنت هتغير..انا كنت فاكر انه الصح انه الطالب يبقى هدفه الوحيد اثناء الجامعة هو المذاكرة والنجاح بتقدير كويس عشان كدة لازم يروح كليته يحضر محاضراته وسكاشنه ويروح على طول عشان ميضيعش وقت
يعنى...من البيت للكلية ومن الكلية للبيت
اللى عايزاقوله ليكم انه العبارة دى غلط جدا..فترة الكلية دى مهمة جدا فى بناء شخصية الانسان لانك بعد ما تخلص هتلاقى الدنيا غصب عنك بتعاملك كرجل او امرأة مسئولين وكبار و....دكاترة
طيب قولتولى بقى....ازاى كنت هتتغير

اعتقد كدة انى كنت هبقى اكثر نشاطا فى كليتى اشترك مثلا فى اسرة او حتى افكر اعمل اسرة واجمع ناس ونكون اسرة مفيدة...كنت هفكر أبنى علاقات جيدة مع الدكاترة اللى بنحبهم و بيأثروا فينا اكيد كنت هستفيد منهم كتير اوى ...كنت هفكر ازور اماكن كتير متعلقة بالصيدلة وبغيرها...كنت اكيد هشترك فى المسابقات اللى ينفع اشارك فيها...كنت هنظم رحلات...كنت هاخد كورسات....كنت هعمل حاجات كتيرة اوى
الحاجات دى يا جماعة بتفرق فى شخصية الانسان اوى وبتخليه فاهم الدنيا حواليه ماشية ازاى وأقدر بكتير على ايجاد فرص عمل افضل يمكن من اللى قعد الخمس سنين ولا اكتر من البيت للكلية ومن الكلية للبيت وجايب تقدير حتى
كلامى مش معناه انه نسيب محاضراتنا ونتهاون فى مذاكرتنا ..اطلاقا لكن بجد زى ما المحاضرات والمذاكرة مهمين ...تنمية الشخصية والتعرف على العالم بردو مهم جدا فى الفترة دى واللى هيسيبها من غير ما يستفيد منها يبقى خسر كتير
كان فى مرة دكتور فى الموارد البشرية HR بيقولنا انه لما بييجى يشوف سى فى بتاع حد(صيدلى على فكرة) متقدم لوظيفة بيهمه اوى انه يبص على ال Activities وقالنا:واحد كاتبلى انه كان عضو فى كذا وكذا وانه قام بتنظيم كذا وكذا وقاد فريق لكذا وكذا هعرف انه هيفيدنى هيكون دماغه صاحية فى الشغل هيعرف يشتغل فى فريق....كل دة بغض النظر عن التقدير...(دة كلامه) تخيلوا...على فكرة انا مكنتش اعرف الكلام دة غير من وقت قليل وبجد كنت فاكر انه التقدير هو كل حاجة ,وانه لما الواحد يخلص ويروح دة نوع من انواع الالتزام وصحابى كمان كانوا بيعتقدوا كدة (كانوا لازم يروحوا بعد يومهم الدراسى على طول زى المدرسة بالظبط يعنى)
عشان كدة اتمنى انه كل طالب وخصوصا اللى لسة فى بداية الحياة الجامعية يستفيد من الموضوع دة وبشكل صحيح.. وكمان يحاول يصاحب الصحبة اللى تساعده على كدة ..دعوتى انه الطالب يحاول يخلى فى حياته الجامعية اكتر من جانب وليس فقط المذاكرة او الارتباط...عذرا للاطالة

[wh_kaboo]

طبعا الحياة الجامعية مهمة جدا وهيا اللى بتكون شخصية الفرد
ولازم الواحد يستفاد منها على قدر المستطاع

[dr/dina]

عندك حق فعلا يا د/جمال....
انا برده السنه اللى قضيتها ف الكليه مكنش ليا اى نشاطات و لا فكرت ف كده و لا اصحابى لاننا معتقدين انها مضيعه للوقت.........
لكن انشاء الله نحاول...........

[Lost * Dreams]

موضوع اكتر من رائع ياجمال

بس للاسف انا من النوع اللى من البيت للكليه ومن الكليه للبيت

وحتى مش بحضر محاضرات سكاشن بس

بس كلامك خوفنى جدا رغم انى استفدت منه كتير

[جمال الشافعي]

شكرا علي مروركم جميعا و ربنا يوفقنا جميعا السنه دي

[Amira]

عندك حق يادكتور جمال انا كمان غالبا ببقى من البيت للكليه ومش مشتركه فى اى نشاط بس اكيد كده مش صح وللاسف اصحابى كلهم مش فى دماغهم حكايه النشاطات دى يعنى المحاضرات والسكاشن وعلى البيت على طول مع ان انا من السنه اللى فاتت وانا لازم يبقى عندى فاصل بين المحاضرات والسكاشن مش اقل من ساعه كان ممكن استفيد من الوقت ده
شكرا على النصيحه د.جمال

[آيه محمد]

شكرا يا دكتور علي الموضوع
انا حياتي في الجامعه كلها شغل مفتكرش اني بحضر محاضرات كتير
او حتي بذاكر
بس لما المسؤليات بتزيد عن حدها بيجيلي اكتئاب وبحس اني عايزه راحه
في الوقت اللي كل واحد عايز حاجته تخلص ومش بيكون حاسس بيك

تحياتي

[maryam]

thanks dr:gamal
انا كمان مش مشتركة في أي حاجة غالبا من البيت للكلية
وصحابي كمان

[lost*soul]

موافقه معاك جمال ف الراى

مرسى ع التوبيك تسلم الايادى

[dr_chamommile]

معاك حق دكتر جمال لازم فعلا نتحرك عن كده