مسلسل رمضان ( مجنون سارة ) .. تم التحديث : 03 - 08 - 2012

[Mouri Ran]

الجمل والتشبيهات الى فى الحلقة الخامسة جميلة جدا جدا جداا

متابعة ..

فعلا حلقة جميلة أوي

[rose smile]

لاء متخليكشى بارد
البنت هتزهق كده

[E.Raafat]

الحلقة السابعة ( خليك كول )

كنت أسير متخلفا عنهم ببضع خطوات حتى أمنحهم الفرصة للحديث أكثر فهذا سيساعد كثيرا في تنمية معرفة كل منهما بالآخر ,,, وصلنا للميكروباص حيث صعدا أولا وجلسا جنبا إلى جنب ثم صعدت وجلست في آخر كرسي بعيدا بما يكفي كي لا أسمع أحاديثهم المستمرة منذ ساعات بلا توقف....

لم أدري أين يريدا أن يذهبا بالتحديد فقط كنت أتبع آثار الأقدام ,, فجأة أجدني داخل إحدى المتاجر ,,, مرة أخرى أجد يدا تمتد إلي بكوب من العصير ,, ظللنا على هذا الحال قرابة الساعتين ,, ننقب في أرجاء المدينة عن فستان يناسب العروس ويبدو أن العروسين لن يتفقا بسهولة ,, كما بدا واضحا وجود فجوة في طريقة التفكير ,, فكل طرف لا يعرف الأشياء التي يحبها الطرف الآخر ..

يبدو أنهما نسيا بالفعل أنني أرافقهما ,, هل كان يجب أن يسألاني عن رأيي ربما قدمت نصيحة أنهت حالة الشتات تلك ,,, لقد سئمت من الصمت لذا سأتدخل الآن ,, و إليكم ما حدث تقريبا :-

( أنا ) _____ بعد إذنكم طبعا ممكن تتفقوا و تخلصونا ,, دا فستان مش هيتلبس أكتر من ساعتين هنفضل نلف عليه يوم كامل !!

( هو ) ____ آسفين يا دكتور إن كنا ضيعنا وقت حضرتك الثمين ..

( سارة) ____ كويس ان انت افتكرت إنك بتعرف تتكلم ,,, حمد لله ع السلامه يا دكتور ..

( أنا ) ___ الموضوع بسيط و المفروض كنتم تتفقوا ع الخطوط العريضة قبل ما تيجوا هنا ...

( هو ) ____ دا مش وقت لوم ولا عتاب ,, عندك حل ؟؟

( أنا ) __ الحل بسيط ,, ممكن دقيقة بس أنا و انت لوحدنا " ابتعدنا قليلا عن سارة ودار هذا الحديث "

( هو ) ___ خير ,, عاوز تقول أيه ؟؟

( أنا ) ___ مشكلتك إنك مش عارف سارة بتحب تلبس أيه ,, سارة بتحب اللون البنك وعشان دا فستان خطوبة هيه بتدور على فستان بنك يكون مش عارف بيسموه أيه بس اللي هوه ربع كوم دا ,, و كمان هيه مبتحبش الفستان المنفوش زيادة عن اللزوم ..

( هو ) ___ و انت بقى عرفت دا إزاي ؟؟؟

( أنا ) ___ بالله عليك دا وقته ؟؟؟ خلينا في اللي احنا فيه ..

( هو ) ___ طب و دا هنلاقيه فين ؟؟

( أنا ) ___ أنا شفته في المحل اللي ع الناصية ..

( سارة ) __ " بعدما قاطعت حديثنا " أعتقد المفروض ننجز ..

( هو ) ___ خلاص يا حياتي دقيقة و يكون الفستان قدامك ..

سرنا عائدين حيث كنت أنا من يحدد الطريق هذه المرة ,, دخلنا المحل و وجدت سارة ما كانت تبحث عنه ,, وهكذا انتهى نصف المهمة بنجاح ...

النصف الثاني يتلخص في بدلة للعريس و بدلة لابن خالة العريس اللي هوه أنا ,, دخلنا إحدى المحلات ,, أخذت ثلاثة تصميمات مختلفة من البدل و دخلت البروفة و بالمقابل فعل صاحبي نفس الشيء تقريبا ,, أثناء و جودي داخل البروفة علمت بما دار بين العروسين بالخارج و هو الآتي :-

( سارة ) ___ أيه البدلة البلدي اللي انت اخترتها دي ,, دي ممكن تكون موديل سنة سبعين ..

( هو ) ___ بصي دي اللي عجبتني ,, هوه انت اللي هتلبسيها ولا أنا ؟؟

( سارة ) ____ و أيه الفرق بيني وبينك ؟؟ المفروض ان احنا بقينا واحد وكل طرف مننا لازم يهتم بمظهر الطرف التاني ..

( هو ) ___ طب على فكرة أنا مش حابب الفستان بتاعك و لولا ابن عمتك ألح عليا عشان أوافق مكنتش أشتريته ,, دا حتى لونه مش كويس ..

( سارة ) ___ انت عارف أحسن حاجة نعملها أيه ؟؟؟ زي ما انت قلت كل واحد حر ..

( محمد ) ___ يا حبيبتي أنا مش عاوزك تزعلي مني إحنا لسه متعرفناش كويس على بعض ,, صديقيني مع الوقت هنعرف كل حاجة عن بعض ,, دا بيحب أيه و بيكره أيه ,و ساعتها الحياة هتبقى سهلة ..

( سارة ) ____ ياريت نلحق نوصل للمرحلة دي قبل الجواز ,و وإلا الحياة هتكون انتهت ..

بعدما استمعت لهذا الحديث راجعت نفسي ,, هل لابد أن أشتري هذه البدلة بالتحديد ؟؟ أنا أعرف جيدا اللون والاستايل الذي تحبه ساره وهو بالفعل ما أفضله أنا أيضا وهو بالفعل ما ألبسه الآن ,, وهنا السؤال هل أخرج عليهم مرتديا البدلة التي كانت تتمنى أن يختارها خطيبها أم يجب أن أستبدلها بأخرى ؟؟؟ ,, قبل أن أجيب على نفسي ,, وجدت أحد الزبائن الراغبين في تجربة بدلتهم يستعجلني بالخروج ,, فخرجت ..

( سارة ) ____ الله ,,, اختيارك ممتاز يا دكتور ..

( أنا ) ___ شكرا ,, أيه رأيك يا محمد ؟؟

( مجمد ) ___ كويسة مش وحشة ,, وبعدين هيه مش عجباك خلاص أيه فايدة رأينا ؟؟

( أنا ) ____ آه مظبوط ,, عندك حق ..

بعدها عرض العريس علينا اصطابنا إلى العشاء ( اللي هوه السحور ) :-

( هو ) ___ تحبوا تتعشوا أيه ؟؟ أنا راجل ديمقراطي ,, أيه رأيكم نتعشى كباب ؟؟

( أنا ) ____ " طبعا سمعت كلمة كباب من هنا و مت من الضحك أصل سارة متكرهش في حياتها أد الكباب والمنبار "

( محمد )____ مالك بتضحك على أيه ؟؟

( انا ) ___ لا مفيش دا انا افتكرت موقف معين ..

( سارة ) ____ أنا مبحبش الكباب ,, ممكن نتعشى أي حاجة تانية غيره ؟؟

( هو ) ___ حد في الدنيا مبيحبش الكباب!! ع العموم شوفي انت بتحبي أيه و أنا موافق عليه ..

عدنا ثانية للوضع الأول ,, يسيران معا في المقدمة و أنا أتخلف عنهما ببضع خطوات ,,, صدق اللي قال " العروسة للعريس و الجري للمناحيس "

إبراهيم رأفت

الحلقة القادمة ( أعمل أيه )

[dr corundom]

يا عينى عليه

[DR.BIBO]

تحفه المسلسل ده
يخليك تتشد للحلقة من اول حرف لاخر حرف
بس مش قادرة اقتنع ان فى حد ممكن يضحى بحبه مهما كانت الظروف
فى انتظار باقى الحلقات

[Mouri Ran]

ذكية يا سارة ولو انه ذكاء بتهور

[E.Raafat]

الحلقة الثامنة ( أعمل أيه )

استقظت صباح اليوم على تليفون من العريس :-

( محمد) ___ صباح الخير يا دكتور ..

( أنا ) ____ صباح الخير ..

( هو ) ___ أنا كنت عاوز أعرض عليك موضوع كده بس بصراحة محرج ..

( أنا ) ____ محرج !! أيه يا عم دا انت زي أخويا الكبير ,, قول متنحرجش ..

( هو ) ___ ممكن تبدل معايا ,, تاخد بدلتي و أنا آخد بدلتك ؟؟

( أنا ) ___ أنا معنديش مانع هيه المشكلة دلوقت إن أنا مش هعرف ألبس بدلتك ,, بس و لا يهمك أنا هتصرف ..

( هو ) ____ مش عارف أقول لك أيه ؟؟ ممكن بس تجبها و تيجي عشان أنا ورايا ألف حاجة بعملها فمش هقدر أجيلك ؟؟

( أنا ) ___ بس كده !! هجبهالك حالا و اهوه بالمرة أشوف خالتي ..

لم أعد أعرف إلى متى سيكون علي التظاهر بالبراءة الفريدة ؟؟ إلى متى يجب أن أصمت و أنظر إلى رجل يأتي و ينتزع مني محبوبتي ,, بل إلى متى سيحتم علي القدر مساعدة رجل يسحق أحلامي ؟؟؟؟

جلست أراجع جميع المواقف التي جمعتني بها ,, حاولت أن أكون عادلا مع نفسي وأنا أسألها ,, هل أستطيع تفسير اهتمامها بي على أنه حب ؟؟ لما دائما تأتي تسألني رأيي ؟؟ و دائما ما تحدثني عن نفسها ,, ما تحبه و ما تكرهه ,, آه من تلك الحالة التي أحياها , لكن هناك سؤال تبادر إلى تفكيري هل هي تجلس الآن مثلي تراجع هي الأخرى التفاصيل الدقيقة لمسيرتنا معا ؟؟؟

توجهت لمنزل خالتي حاملا البدلة ,, طرقت الباب و إليكم ما حدث :-

( أنا ) ____ السلام عليكم ..

( خالتي ) ____ و عليكم السلام ,, اتفضل يا حبيبي ,, على فكرة أنا زعلانه منك ..

( أنا ) ___ زعلانه مني أنا !! طب ليه كده بس ؟؟

( خالتي ) ____ يعني متجيش تشوف خالتك غير لما يكون فيه مصلحة ؟؟

( أنا ) ___ فعلا و الله ,, أنا آسف يا خالة ,, بس الامتحانات كانت شغلانا شويه ,, فين محمد ؟؟

( خالتي ) ___ راح يتأكد حجز الدي جي ,,, ادخل بس اقعد في الصالون و أنا هجيب الشاي وهحصلك ...

( أنا ) ___ بس بسرعة يا خالة ,, عاوز ألحق صلاة التراويح ..

( خالتي )____ " بعدما جلست جواري " أنا عاوزه أكلمك في حاجة كده ,, بس الكلام دا ميطلعش لحد ..

( أنا ) ____ قولي يا خالة سرك في بير ..

( خالتي ) ___ انت عارف إني بحب سارة و بتمنى الجوازة دي تتم ,, بس مش عارفه ليه حاسه إن الجوازة دي مش هتم ,, سواء محمد أو سارة تحس كده إنهم مش مبسوطين ,, مبيتكلوش كتير مع بعض حتى لما نسيبهم مع بعض بيقعدوا ساكتين ..

( أنا ) ___ بس دا طبيعي لإن محمد كان طول عمره بعيد عننا ليه حياته و صحابه وعايش في عالم تاني غير عالمنا ,, على عكس باقي العيلة كلهم مع بعض وبينهم علاقات قوية ,,, همه شويه شويه هيقربوا لبعض و هيثقوا في بعض و ساعتها كل واحد هيقول للتاني كل اللي بيحسه بصراحة...

( خالتي ) ____ أنا عارفه إن محمد كان بيحب واحدة تانية قبل ما يتقدم ل سارة بس تقريبا زعلوا مع بعض وافترقوا ,, ممكن يكون لسه بيفكر فيها ؟؟

( أنا) ___ لأ يا خالة كده الموضوع كبر ,, إوعوا تكونوا ضغطم عليه ؟؟

( خالتي ) ___ نضغط عليه !! هوه بنت عشان نضغط عليه يا ابراهيم ,, وبعدين انت عارف محمد طول عمره رأيه من دماغه ,, هوه اللي قال لنا أنا عاوز أخطب سارة ..

( أنا ) ____ طب و بالنسبة ل سارة أيه مشكلتها ؟؟

( خالتي ) ___ أنا لما سألتها هيه مرتاحه ولا لأ قالت إنها مش عارفه ,,قالت إن محمد لا بيهزر معاها و لا بيسألها هيه بتحب أيه ومبتحبش أيه ,, و كمان لما كنا بناخد رأي سارة في الخطوبة كانت بتسكت وتدخل غرفتها وتقفل الباب ..

( أنا ) ___ انت بتقول لي الكلام دا ليه ؟؟

( خالتي ) ____ عشان انت اقرب واحد لها ,, و هيه على طول بتحكيلك كل حاجة ..

( أنا ) ____ مين اللي قال كده ,,, سارة مبتحيش ليا أي حاجة ..

( خالتي ) _____ طب أنا عاوزاك تسألها بينك و بينها إن كانت مرتاحة و عاوزة تكمل ولا لأ ,, أنا بحب سارة أكتر من محمد وسعادتها تهمني أكتر من محمد ...

( أنا ) ____ دا الخطوبة بكره أسألها امتى ؟؟

( خالتي ) _____ اتصرف ,, إمال أنا بحكي لك ليه ..

( أنا ) ____ هحاول ,, وربنا يستر ..

انصرفت كي أدرك لو ركعتين من صلاة التراويح ,, دعوت الله أ، يهديني السبيل .....

إبراهيم رأفت

الحلقة القادمة ( الخطوبة ,,, سقوط الأقنعة )

[مهداه]

حلو اوى المسلسل ده
بحب انا النوعيات دى
هى واقعيه؟؟
صح؟؟

[Dr_Cinderellaaaaa]

متابعة ..
الحلقات روعة يا دكتور ابراهيم ..
أسلوب حضرتك مشوق وممتع ..

[Dr.Sanureta.S]

هو ما ينفعش كله ورا بعضه ^_^