حضرتك أنا بتقبل آراء الآخرين وبحب أسمع عن الموضوع من أكثر من جانب
بالنسبة لأحداث أوروبا فأنا فعلا متبعتهاش كويس لإنّي عارف طبيعة الشعوب هناك وطبيعة الحكومات وواثق إنّهم هيحلوا مشاكلهم بسرعة وبفاعلية بس أكيد متظاهري أوروبا ما أحرقوش مباني مهمة في دولتهم ولا استخدموا قنابل مولوتوف ورموها على الشرطة وإلاّ كانت الشرطة بتاعتهم هتبادلهم بأسلوب يتناسب مع التصرفات دي( ولو كانوا أحرقوا أو كسروا حاجة فهم يعرفون كيف يميزوا بين الملكيات الخاصة والعامة ولا يمكن أن يعتدوا على مكان عام يملكه كل الشعب ) ,, والشرطة هناك بتفرق المتظاهرين زي هنا بالظبط وأنا شوفت مشاهد ف التليفزيون للشرطة بتجري ورا المتظاهرين يعني فيه كر وفر واشتباكات يعني فيه ضرب مش رش بمياه بس ,,, أمّا مجمع البحث العلمي فأنا شوفت الفيديو اللي واضح فيه جدا إن اللي بيحرقوه لابسين هدوم ملكي ( مدنيين ) ماسكين فنابل المولوتوف وبيرموها على المبني ,, يبقى الجيش اللي حرقه !!!
ثانيا قبل أحداث محمد محمود وكل الحاجات دي الناس المعتصمين دول كانوا معتصمين ليه ؟؟؟ هوه عشان أنا فيه تصور شايفه صح وهينفع البلد أكتر (من وجهة نظري) أبدأ أفرضه على الناس ,, أنا كمواطن مصري برفض إن اتنين أو تلاته مليون يجتمعوا في التحرير ويمنحوا حقهم سلطة إدارة البلد وعزل المجلس العسكري ( اللي هوه العمق الوحيد اللي بيثبّت جذور أي دولة في العالم وبيحمي شرعيتها الدستورية ) ويرفض رئيس وزراء ويعين آخر ,, مين أعطاهم السلطة ,,, وبعدين اختاروا أشخاص لقيادة البلد الأشخاص دول لا يمتلكون القبول لدى أقوى تيارين سياسين في مصر ( الإخوان والسلفين ) وأظن الإنتخابات أظهرت حجمهم الحقيقي وأظهرت حجم مؤيديهم ,, وكمان الكتلة الصامته ( حزب الكنبه ) بتؤيد الجنزوري ,,, وكمان حركة ستة إبريل دي حركة خلقت لتعترض وبتمنح نفسها مساحة أكبر من حجمها ,,إحنا لو بنحب مصر بجد هنسكت خالص وكل واحد مننا يموّت نفسه في الشغل عشان ننقذ البلد ( حضرتك ممكن ترجعي لتاريخ روسيا واعتقد في بداية عصر لينن الراجل كان بيخليهم يشتغلوا ليل ونهار كإنهم في سخرة ومفيش حد يتكلّم ولا يعترض ,, كان بيخلّيهم يراقبوا بعض وكان بيعتقل أي حد يعمل مظاهرة رغم إن هوه ذات نفسه قبل ما يمسك الحكم كان ثورجي ومبيفوتش مظاهرة بس لمّا مسك الحكم كان عارف إن العمل والتضحية والإخلاص لبلده وتحقيق مجد لنفسه ولبلده حاجات محتاجه عمل مش كلام ومظاهرات ) ,,
بلاش نلتف حول الديقراطيه ونستخدمها ف صورة صنم عجوة ,, الأغلبية كانت مع ثورة يناير وكان فيه ناس عاوزين مبارك يكمّل بس دول أقلية عشان كده الثورة نجحت ( الثورة كانت هديه من ربنا للشعب وربنا هيختار لمصر المصير الأفضل للإسلام وللعرب ) ,, بس الأحداث اللي بتحصل دلوقت أحداث مفتعلة بتخدم مصالح ناس بعينها ( لو كانوا بيحبوا البلد مكنوش وضعوا أنصارهم في كمين للجيش ,, فمكنتش وقعت الأحداث المؤسفة دي ,, )
الكلام دا وجهة نظري المتواضعة ربما أكون مخطئ لكن أنا بثق جدا في بصيرتي ( قريبا ستنحصر الزوبعة في الفنجان وتصبح مصلحة مصر مقدّمة على كافة مصالحنا الشخصية )
آسف للإطالة ................. حفظ الله الوطن ( الكبير )
رد مع اقتباس
المشاركة الأصلية كتبت بواسطة E.Raafat
.gif "Fop (29)")
