جيتــلى متــأخر

[Aya Farouk]

جيتلى متأخر
طالب يكونلك
جوا قلبى مكان
قلبى مش ملكك
ولا مملوك لأي كان
يعز عليا أشوف فى عنيك
نظرة "انا مِن كان"
فى وقت شدِتِك شايلِك
وأنا صاينِك
ومهما تقولى مش عيزاك
هكون جمبِك
أنا شتّان
..
يعز عليا أشوف فى عنيك
كلام يوجع
أخاف أحِسَك فى يوم مجروح
وبتّدور يامن يسمع
وأكون أنا الجانية عليك
وأخاف أكون حكمت عليك
لو ان فى حُكمى مش هرجع
..
قدَرَك كدا
جيت لواحدة مُستَهلَكَة
لا عاد يأثر فيها حُب
ولا حته حبة سَهوكَة
ستاير قلبى القديمة
دابت ولسه متعلَقة
رافض يقبل يوم بديل
وجدرانه لسه مترّبة
أصل قبلك حَب واحد
ومحبش بعده تانى
كل حته فى قلبى بعده
عايشة على ذكرى وأغانى
وبرغم عدى كتيرعلينا
لساها صورتة متزوقة
..
مقدرش أكدب عليك
وأقول أنا هبقى ليك
وأنا كل حتة فيا مِلكُه
وضع ايـــد
..
يعنى قُصر الحكاية
أنا وأنت ضحايا
لا حُبك ليا راح يشفع
وياريت حُبى ليك ينفع
أنا وأنت مننفعش نكون أحباب
ولا يصحِش دلوقتى
نكون أصحاب
وعشان منطقى جداً
مكنش فى يوم
مكان موجود
ما بين الجنة وبين النار
ولو فضلنا محلَك سر
فادا استعباط واسمه هزار
فعشان أكون معاك واضحة
وصدقنى منيش قاصدة
أكون جارحة
لكن أحسنلك
تكون عارف
ولا سيبشِ روحك سارحة
أنا آسفة !
ملكش يا غالى فى قلبى مكان
ولا روحى مستنية
ولابسة التاج والطرحة
لكنُ ببساطة
العيب مش فيك
أنا اللى بس أنسانة
متعرفشِ يعنى ايه
فرحة

...




آيــه فــاروق

[M.Hegazy]

مفهمتش حاجة ..

بس الكلام مجملا و تفصيلا جميل جدا .. و مبدعة كعادة حضرتك يا دوك ..

بالتوفيق و للأمام دائما ..

[Dr_Cinderellaaaaa]

مفهمتش حاجة ..

أنا فهمت كل حاجة

ما شاء الله بجد تحفة يا يويو
روعة .. روعة .. روعة
و مشاعرك وصلت جداااااااااااااااااااا
سؤال الحلقة ؛؛
القصيدة عن تجربة شخصية ؟؟
وموجهة لشخص معين ؟؟
ولا ده مجرد شعر ليس له صلة بالواقع ؟؟
اعترفى .. بقولك اعترفى

دمتِ فى تألق وتميز وابداع يا آية

[E.Raafat]

مشمعنا أنا طب أنا كمان فهمت
هوه الكلام جميل ,,,,, وزي كل مرة حضرتك أسلوبك سهل وممتنع وتحسي كده في الكلام نبرة حكمة وبصراحة المنتدى بتاعنا محتاج قوي للون الحكمة دا
دمت متألقة مبدعة في سماء منتدانا الذي يشرف في إحتواء موهبة جميلة واعدة كتلك

[محمد فهمي]

ضحكت قليلاً...وسرحت قليلاً...واستمتعت كثيراً...وننتظر تواجدك معنا أكثر وأكثر حتي نستمتع أكثر...
جميلة.....تسلم ايدك..

[Aya Farouk]

مفهمتش حاجة ..

بس الكلام مجملا و تفصيلا جميل جدا .. و مبدعة كعادة حضرتك يا دوك ..

بالتوفيق و للأمام دائما ..

ليه كدا بس حاول تقرأ تانى وانت تفهم
وميرسى عالتعليق أوى .. نورتنى

أنا فهمت كل حاجة

ما شاء الله بجد تحفة يا يويو
روعة .. روعة .. روعة
و مشاعرك وصلت جداااااااااااااااااااا
سؤال الحلقة ؛؛
القصيدة عن تجربة شخصية ؟؟
وموجهة لشخص معين ؟؟
ولا ده مجرد شعر ليس له صلة بالواقع ؟؟
اعترفى .. بقولك اعترفى

دمتِ فى تألق وتميز وابداع يا آية

الحمد لله يا سندريليتى
وعشان انتى حبيبتى هقولك أيوه القصيدة اكتبت عن واقع الى حد ما موش خيال كامل
بس مش موجهه لحد معين
اعترفت اهوه من غير زعيق منورنى يا جميله

مشمعنا أنا طب أنا كمان فهمت
هوه الكلام جميل ,,,,, وزي كل مرة حضرتك أسلوبك سهل وممتنع وتحسي كده في الكلام نبرة حكمة وبصراحة المنتدى بتاعنا محتاج قوي للون الحكمة دا
دمت متألقة مبدعة في سماء منتدانا الذي يشرف في إحتواء موهبة جميلة واعدة كتلك

والله يا دوكتر دايما وجودك فى مواضيعى شىء بيبسطنى
وشكراً على رأيك انا بحب الأسلوب يبقى واصل بس مش ركيك والحمد لله انه عجبك
ميرسى ليك

ضحكت قليلاً...وسرحت قليلاً...واستمتعت كثيراً...وننتظر تواجدك معنا أكثر وأكثر حتي نستمتع أكثر...
جميلة.....تسلم ايدك..

دايما حتى فى تعليقاتك يا دوكتر محمد ليك طابع معين جميل كدا
ميرسى ليك جداً عالمرور والتعليق

[amira89]

جميلة جداجداجدا يا ايه
تسلم ايدك والله عليها
كلامك بيوصل الاحساس بسهولة جدا ودا بيدل على مهارتك وشطارتك وان كلامك قريب مننا لانه نابع من احسا صادق
تسلمى يا جميلة




معلش طولت عليكى

[**mahasen mohamed fouad**]

بجد فوق الروعه كلماتك واحساسك اكتر من رائع .........دمتى دوما مبدعه يا جميل وسلمت يداكى

[a.m.f.n]

ماشاء الله يا آية روعة جدا يا حبيبتى وواصلة اوى اوى
ومحسوسة جدا ربنا يبارك فيكى يا جميل

بالتوفيق الدايم يا آية

[DR.BIBO]

جميل يا ايه واحساسك واصل بس انا عندى وجهة نظر ان مش معنى ان الانسان حب مرة ومحصلش نصيب يبقى مستهلك وميقدرش يحب تانى لانه لو لقى اللى يعوضه ويداوى الجرح ده ايه المانع انه يحب تانى ولا انتى ايه رايك