ليه؟؟!!

[Pharmcist_girl]

السلام عليكم ورحمة الله وبركاته
-----------------------------------

هدخل فى الموضوع علطول واحب اشوف فعلا مشاركاتكم و أرائكم ...


ليه يا جماعة بقى الحوار بين البنات و الاولاد بلا حدود وبلا داع ؟!

ليه معدش فيه حياء ؟

ولا خدود بتحمر ولا النظرفى الارض من الخجل ؟!

ليه معدش فيه احترام فى التعامل ؟؟

وياترى السبب من البنت ولا الولد ؟

[yojeena]

فكرتيني بموضوع كنت عملته من فتره

و الحمد لله كان في تفاعل من الاعضاء و اعتقد ان في ناس كتير منهم الوقتي بقت الامور اكثر وضوحا بالنسبالهم عن وقتها

http://www.pharma-board.com/board/showthread.php?t=9743

ربنا يوفقك و رسالتك تلقي اذان صاغيه

[Al-Shaimaa]

ليه يا جماعة بقى الحوار بين البنات و الاولاد بلا حدود وبلا داع ؟!

نقدر نقول تساهل من البنت في البداية

ان تسمح لاي حد يكلمها في اي حاجة

مش عملت حدود لنفسها تجبر اللي قدامها على الالتزام بيها

ليه معدش فيه حياء ؟

هو انعدام الحياء ظاهر في كده بس؟؟؟؟؟؟؟!!!!!!!!!!

ده انا والله ببقا مكسوفة وانا ماشية في الجامعة او الكلية وبشوف مناظر بتكسف من اني شوفتها

مش عارفة والله ازاي بيقبلوا على نفسهم كده

ولا خدود بتحمر ولا النظرفى الارض من الخجل ؟!

ليه معدش فيه احترام فى التعامل ؟؟

عشان ما بقاش فيه حدود

ضاعت المعاني والمفاهيم في ظل مواكبة زائفة لظروف مصتنعة

وياترى السبب من البنت ولا الولد ؟

السبب الرئيسي من وجهة نظر البنت

هي لو ردت على اللي قدامها في نطاق السؤال والاجابة تكون كلمة ونص - مع عدم الخضوع في القول طبعآ -

والاحتفاظ بالالقاب وعدم التساهل فيها وتعرف تحدد معنى كل علاقة اجتماعية وحدودها ايه مش هيكون فيه المناظر اللي بنتأذى منها دي

ومش هعفي الولد من المسئولية افرض ان اختك في الله غلطت او تساهلت او نقول - تجاوزآ - مش عاوزة تحرجك في الكلام

تقبل انت ان اختك يبقا حد بيكلمها بالطريقة دي؟

او ان زوجتك اللي في علم الغيب تكون بتتعامل مع الناس بطريقتك؟

لازم نتذكر انه كما تدين تدان

[موظفه طموحه]

السلام عليكم
اولا اشكرك جدا على الموضوع الجميل ده
من وجهة نظرى ان المسؤل الرئيسى
فيما يحدث هو البيت والاسرة والتربية .
المفروض ان البيت دايما فى نصايح مع البنت والولد
وخصوصا مع بداية المرحلة الجامعيه
طبيعى ان يكون فيه تعامل لانها جامعه تجمع الجنسين
بس يكون فى الحدود وبصراحة يجماعة احنا عندنا
فى كلية الصيدلة بحس بالتزام بين الطلبة فى التعامل
على عكس الكليات الاخرى
بس انا برده بقول لكل بنت انتى المسؤلة
عن طريقة تعامل اى شخص لكى
بس ما انكرش برده ان فيه طلبه ..... بيحبو يستظرفو
او مثلا واخدها تهريج .... هههه طبعا ده بيبان
والبنت هنا ملهاش ذنب .
ربنا يهدينا جميعا لما فيه الخير

[أمــ هـنـد ــة الله]

طبعـا الغلـط على البنت فى المقـام الاول

احيـانا الاسـرة بتعلـم وبتـربى بس البنت بتخرج لجو الجـامعة شـايفه الاختلاط بتتعرف على بنات قدرا ممكن يكونو مش كويسين

مع انها فى البداية كانت كويسة ودا شفته بعينى تغيير 360 درجة اول ما دخلو الجامعـة

ثـانيـا الولد بقـى مفروض يسأل نفسه السؤال المشهور اللى دايما يعمل عكسه

الا وهو ترضى لاختك تقف مع واحد وتهزر ويبقو اصحاب او حتى بينهم علاقة مش معروف مصيرها ايه

وطبعـا بيكون الرد الشهير اصلى واثق من نفسى بس مش هبقى واثق فى اى حد تانى

وطبعـا دا غلط لان المبـدأ نفسه مرفوووض

بس فى النهـاية البنت اللى بتدفع كل دا ازااى ؟؟

اولا لو حد شافهاا واقفه هيزيد الكلام ويتنقل ويطلع عليها انها مش مؤدبة

ثانيا فرضا الولد اتسلى بيها وسابها هتتعب نفسيا

ثالثا لو ارتبط بيها رسمى هيفضل حاطط ف دماغه انها عرفته من ورا اهلها وخانتهم يعنى هيفقد الثقة فيها

ودى حاجات بسمع عنها كتير

يبقـى ليه يحصـل كل داا لمـا ممكن ان كل بنت تحافظ على نفسهـا وعلى قلبهـا

ليه تدخل حد من الشباك لما ممكن يدخل من الباب

-----

اخيرا ليه انا برغى كتير فى الكلام لما ممكن اقول سلام ^^

تسلمى على الموضوع اللى بجد ممكن يغير فكر اى بنت وتلتزم بالصح ان شاء الله

جزاكم الله خيرا

[A.Denewar]

من وجهة نظرى ان المسؤل الرئيسى
فيما يحدث هو البيت والاسرة والتربية .

ايوة طبعا البيت له دور كبير جدا زي ما حضرتك بتقولي
وكمان البنت لها دور وهي وقفتها مع نفسها وثقتها بنفسها
البيت مش هيقعد يقول للبنت لو حصل كذا .....اعملي كذا
انا اعتقد ان البيت بيكون شخصية البنت وبعد سن 14 سنة البيت مش بيكون قادر انه يغير حاجة من شخصية البنت
البنت هي اللي لازم تغير نفسها بنفسها
كل انسان فيه حاجات غلط لكن المفروض يتغلب عليها
انا عن نفسي كانت فيه حاجات مضيقاني في نفسي وعايزة اغيرها ومكنشي البيت لو قعد سنة هيقدر يغيرها
لكن صممت انها تتغير ومش اتحققت الا لما اخدت الموضوع بجد ودعيت ربنا بصدق _لازم الدعاء .........اسأل مجرب _
وفعلا الحمد لله كل انسان يقدر يغير حياته تماما حتي لو كانت البيئة اللي عاش فيها مليئة بالسلبيات لكن
اهم حاجة......... اللجوء لله والثقة الشديدة جدا بالنفس والصحبة اللي تعين الواحد علي الخير

طبعـا الغلـط على البنت فى المقـام الاول

طبعا الغلطان هي البنت والولد
ربنا هو اللي بيحاسب ...........وهو هيحاسب الاتنين مش هيحاسب البنت بس

اولا لو حد شافهاا واقفه هيزيد الكلام ويتنقل ويطلع عليها انها مش مؤدبة

لو الواحد اخد في اعتباره كلام الناس ورضاهم مش هيخلص
يا ما الناس اتهمت الشرفاء ..........ورحمت المجرمين
واخيرا
جزاكم الله خيرا علي الموضوع الرائع
لكن انا شايفة المسئول هنا هو التربية عند الصغر _زي ما أ/موظفة طموحة قالت_ وتكوين شخصية للطفل واحترامها في نفس الوقت من قبل الابوين مش تجاهلها
وبذلك تنشأ ثقة الفرد بنفسه ويكبر علي هذه الشخصية
وساعتها يبقي هو المسئول الاول والاخير عن افعاله مش يلوم البيت او الزمن
اسفة جدا علي الاطالة
وتقبلوا مروري

[le pharmacien]

طيب كويس انى مش انا بس اللى واخد بالى خصوصا الفتره بتاع الاتحاد الاخيره دى
الموضوع كان مستفز كنت بدات اكره الكليه بس لسه فى ناس محترمه
ربنا يهدينا جميعا يااااااااااااااااااااااارب

[Dr/HULK]

[QUOTE]

ليه يا جماعة بقى الحوار بين البنات و الاولاد بلا حدود وبلا داع ؟!

ليه معدش فيه حياء ؟

ولا خدود بتحمر ولا النظرفى الارض من الخجل ؟!

ليه معدش فيه احترام فى التعامل ؟؟

وياترى السبب من البنت ولا الولد ؟

اكيد السبب هو البجاحة من الطرفين

-----

وخصوصا مع بداية المرحلة الجامعيه

المفروض فعلا البيت يكون ليه دور اكبر من كده

مينفعش ابدا المناظر اللى بقت فى الشوارع

والانهيار اللى بقى موجود من طلبة لسه فى المرحلة الاعدادية

[أمــ هـنـد ــة الله]

كل انسان فيه حاجات غلط لكن المفروض يتغلب عليها
انا عن نفسي كانت فيه حاجات مضيقاني في نفسي وعايزة اغيرها ومكنشي البيت لو قعد سنة هيقدر يغيرها
لكن صممت انها تتغير ومش اتحققت الا لما اخدت الموضوع بجد ودعيت ربنا بصدق _لازم الدعاء .........اسأل مجرب _

ودااا اللى انا اقصده ممكن البيت يعمل اللى يقدر عليه ويربى صح وكل حاجة بس البنت ممكن متكونشى مقتنعة او بتسمع ومش بتنفذ ودا مش فى كل الحالات

تيجى البنت لما تخرج لحياة الجامعة مفروض تطبق اللى اتعلمته مايحصلش

لكن دا مايلغيش برده دور البيت اللى لازم يتابع البنت ويتابع سلوكهاا ويشوف اصحابها ودور الام انها تتكلم مع بنتها بصدر رحب مش تخويف وعقاب بالذات فى مرحلة الجامعة

طبعا الغلطان هي البنت والولد
ربنا هو اللي بيحاسب ...........وهو هيحاسب الاتنين مش هيحاسب البنت بس

اكيـد طبعـا ربنـا هيحاسب الاتنين نفـس الحساب
لكن احنا بنقول مين ابتدى بالغلط ,الولد لو فرضا هوا اللى راح وكلمها
طيب مين سمح للغلط انه يحصل ويتفتح له سكة هى البنت يعنى كان بإيدها تمنعه لكن دا ماحصلش
يبقى هى اللى فى ايدها كل حاجة لانه مش هيجبرهاااا تكلمه يبقى إذن هى اللى عليها الغلط فى الاساس ... وصلت ؟؟

لو الواحد اخد في اعتباره كلام الناس ورضاهم مش هيخلص
يا ما الناس اتهمت الشرفاء ..........ورحمت المجرمين

يـادكتور فى حـاجة اسمهـا سمعـة البنت

لمـا واحـد يعوز يخطب بنت مش بيروح يسأل عنهـا النـاس وبياخد كلام الناس وحكمهم عليهـا فى عين الاعتبـار

ومعروف البنت لو حد شافهـا مع واحد تبقى اجرمـت لكن الولد عااااادى يعمل اللى هو عايزه

ودا غلط لان كده فيه تشجيع للولـد

[juman]

بصراحه معنديش الرد على اسئلتك بس محبتش اخرج بدون تعليق
انا كل علاقتى بالكليه ان احضر السكاشن وبعض المحاضرات (ده يعنى لو حضرت )
كل اصحابي فى الكليه بنات... اصل الولاد فى دفعتنا انقرضت