حدوتة مصرية _عامية _ (بقلمى)

[eeeman]

السلام عليكم ورحمة الله وبركاته

انا عارفة ان القصيدة دى متاخرة حبتين بس انا كنت كتبت فيها شوية ايام الثورة وبعد كدة سبتها ونسيتها ومكملتهاش الا امبارح يـــــــــــــــــارب تعجبكم واعرف رايكم بصراحة

سلام على ولاد شربوا مع مية النيل
أصــــالة وطيبة وعنــــــــــــــــــــــاد
وبشهادة أحمد الأميــــــــــــــــــــن
هم خير أجناد البـــــــــــــــــــــــــلاد

قدروا يضيفوا تاريخ فوق التاريخ
تاريخ اول كلمة فى اول سطر فيه حرية
وبين السطور حكاية جيل عرف المسؤلية
عرف يقول للظلم لا
وعلى اكتافه شال القضية
وبصوته زال غمامة حجبت عنا النور سنين

سنين الحق فيها بات سجين
والعدل فيها ان الوزير يمص دم الشقيانين
يبنى ويعلى فى عمارات
وبنوك تتعبى بالملايين
ولو يوم البيه الوزير اشتكى وقال اه يا بطنى
العلاج على نفقة الدولة يكون
وكل حاجة فى سبيل راحة الباشا تهون
اما الفقير فى اليوم يموت الف مرة
مش لاقى حق الدوا والعيشة مرة
واهو راضى بقليله وصابر ع المضرة
واستغنى عن الدوا الفلانى والعملية اللى برة
واتاريه رضى بالهم والهم مش راضى بيه
والدوا اللى ببلاش بقى يدفع فلوس عليه
طب يعمل ايه اللى مش لاقى لقمة تشبعه ولا هدمة تدفيه
ولا حتى نايم تحت سقف بيت يتاويه
واخرتها ايه هتوصلونا لفين
الشعر شاب والهم مالى العين
والدمعة مبتنشفش وشقت الخدين
بس لينا رب كريم بحالنا سامع وعالم
قادر ع الظلم ينصرنا وليك يوم يا ظالم

واخيرا جه اليوم وخرجت الملايين
تصرخ باعلى صوت يفوق النايمين
ما خلاص قتلنا الشيطان الاخرس
وهزمنا شبح الخوف
ومن النهاردة يا بلد بالظلم مش راضيين
وحقوقنا هناخدها ولو تمنها الموت
هيكون مكاننا فوق فى جنة الخالدين

وفى يوم الجمعة عيد المسلمين
وكان موافق حداشر اتنين
راس الفساد اتخلــــــــــع
والامل فى قلوبنا اتزرع
والفجر الجديد طلــــــــــع
وقالتها مصر لكل واحد على ارضها
قوم يا مصرى افرح وغنى
كبر وهلل شيل التراب عنى
رد عليها ابنها وقال خلاص يا غالية
محدش هيقدر ياخدك فى يوم منى
بحق ليالى نمتها ع الارض
السما فيها كانت غطايا فى عز البرد
وبحق اخويا اللى مات قدامى وشاف فى عينى الوعد
بانى اصونك بعده واحميكى
من جموع العدا وبدمى افديكى
ودى نهاية الحدوتة وبداية المشوار
مشوار تحقيق الحلم والاعمار
عمار يا مصر ودايما عمار

[الواثقة بالله]

جميله جدا
تسلم ايدك يادكتورة
عجبتنى جدا كلمات حضرتك رائعه واسلوبك جميل جدا
ربنا يكرمك ويوفقك الى مايحبه ويرضاه

[* lovely heart *]

ايه الجمال دة

الله اكبر فوق كيد المعتدى

كنتوا فين يا شعب مصر من زمان

جميل اوى يا دكتورة

عقبال ما نحقق كل اللى نتمناه ونشوف بلدنا احلى بلد فى الدنيا دى

احيكى تقبلى مرورى

[M.Hegazy]

فعلا حدوتة مصرية .. أسلوب غاية في الروعة و البساطة الممتعة .. قوية جدا القصيدة دي .. أحسنت فيها كل شيء ..

كلام مظبوط و واقع و حدوتة فعلا عشناها و حضرتك كأننا بنشوف الفيلم من البداية .. ممتعة جدا جدا ..

أبدعت فأمتعت .. سلمت يمينك ..

و طبعا خمس نجوم

[eeeman]

جميله جدا
تسلم ايدك يادكتورة
عجبتنى جدا كلمات حضرتك رائعه واسلوبك جميل جدا
ربنا يكرمك ويوفقك الى مايحبه ويرضاه

الله يخليكى يا حبيبتى سلمكى الله وجزاكى الله كل خير ع الرد والدعوة الجميلة دى والحمد لله انها عجبتك

ايه الجمال دة
انتى الاجمل يا حبيبتى

الله اكبر فوق كيد المعتدى



كنتوا فين يا شعب مصر من زمان
موجود بس مبيبانش اوى الا فى وقت الازمات

جميل اوى يا دكتورة
شكرا جزيلا

عقبال ما نحقق كل اللى نتمناه ونشوف بلدنا احلى بلد فى الدنيا دى
يااااااااااارب
احيكى تقبلى مرورى

مرورك مقبول جدا بل زادنى شرفا

فعلا حدوتة مصرية .. أسلوب غاية في الروعة و البساطة الممتعة .. قوية جدا القصيدة دي .. أحسنت فيها كل شيء ..

كلام مظبوط و واقع و حدوتة فعلا عشناها و حضرتك كأننا بنشوف الفيلم من البداية .. ممتعة جدا جدا ..

أبدعت فأمتعت .. سلمت يمينك ..

و طبعا خمس نجوم

اسعدنى جدا رد حضرتك وزود ثقتى ان القصيدة عجبتك طبعا لان حضرتك ناقد مميز ومحلل رائع وبستمتع بتحليلك لاى قصيدة واقسملك انى مرة قريت قصيدة هنا ع المنتدى ومعجبتنيش اوى بس لما قريت تحليل حضرتك ليها فهمتها اكتر وعجبتنى ورديت عليها كمان وكتير عليا الجملة دى _احسنت فيها كل شىء_
وشكرا جزيلا ع الخمس نجوم