.. الزمه الماليه ..

[same7]

من وسط الافكار اللى بتيجى ف بالى فكره معرفتش احدد او اوصل فيها لحل
حبيت اعرضها واسمع واشوف ارائكم والمناقشه توصلنا لحل

جه ف بالى ف مره موضوع الزمه الماليه

خصوصا
الزمه الماليه للزوج والزوجه

يا ترى تبقى

زمه ماليه واحده ؟

ولا

كل زوج ليه زمه ماليه منفصله عن الاخر؟


يا ترى ايه الافضل ؟

و
انت تفضل ايه ؟

و
ليه ؟

و
ايه تأثيرها ع علاقه الزوجين ؟



مستنى اسمع الاراء

[muna7assan]

ممم ., موضوع مهم على فكرة ساعات بيسبب مشاكل كتير

أنا عن نفسى عمرى ما سمعت ماما وبابا بيتكلموا فى فلوس , بس شفت نماذج دايما بينهم خلاف بسبب الموضوع دا

انت تفضل ايه ؟

هوا ذوقيا واللى لازم الزوج يعمله انه يقول لزوجته ان دى فلوسها وهيا حره فيها سواء دخلها الشهرى أو فلوسها من باباها اللى ليها قبل الزواج او حتى لا قدر فى حاله اى ميراث ...

وقتها الزوجه ذوقيا تساعد زوجها من غير ما تحرجه او تحسسه بعجز ..

ايه تأثيرها ع علاقه الزوجين ؟

الكلام فى الماديات دا مش بأحبه خالص وأكيد بيسبب مشاكل لحساسيته ..

ممكن يعمل مشاكل وتوتر فى العلاقه بين الطرفين .,

عاما أيا كان القرار اللى هيتخذه الاتنين لازم جدا أهلهم ما يعرفوش حاجه عنه ولا يتدخلوا فيه,

وكل واحد يخلى باله من الكلام فى النقطه دى علشان مايحرجش الطرف التانى .,

السببين دول ممكن يكونوا اكتر حاجه تسبب مشاكل فى موضوع زى دا

[asfourelgana]

اولا اشكرك على الموضوع فكرته بجد جميله

ثانيا بالنسبه لرأيي

اعتقد ان الاسلام جعل للمرأة ذمه ماليه خاصه

لأن موضوع الماديات ده حساس شوية وممكن يعمل مشاكل كتير

[DR DOOLA]

طول ما الزوج قادر و مش محتاج راتب زوجته فى حاجه يبقى يسيبه ليها تجيب دهب تجيب لبس تحطهم فى بنك اللى هى عاوزاه

انما اكيد فى عز الغلاء الفاحش اللى احنا فيه ده ... الزوج و الزوجه الاتنين بيموتو نفسهم عشان يعيشو نفسهم و يعيشو ولادهم حياه افضل


بالنسبه ليا انا افضل اننا يبقى هدفنا واحد قبل زمتنا الماليه الواحده و يبقى تامين مستقبل اولادنا و برضه نعيش كويس
-----
و الموضوع حلو يا سامح تسلم

[SmSm]

يا ترى تبقى

زمه ماليه واحده ؟

ولا

كل زوج ليه زمه ماليه منفصله عن الاخر؟


يا ترى ايه الافضل ؟

و
انت تفضل ايه ؟

و
ليه ؟

و
ايه تأثيرها ع علاقه الزوجين ؟

أنا شوفت ناس بتخليها منفصلة وشوفت ناس بتخليها واحده ودي اللي ممكن بتعمل مشكله سواء بطلب من الزوج أو بقرار من الزوجه .. في ناس بيطلبو كده من الاول وفي الحاله دي الجواز متمش اصلا :d
وفي ناس يجي الزوج يقولها دي فلوسك انا مليش دعوه بيها و لما هي تصر انها تتحط ف البيت والسنين تمر على كده وتيجي هي تلاقي نفسها محتاجه منها تبقه محرجه تطلب أو محرجه تقوله انا هاخد مرتبي المره دي محتاجاه ..وساعات الزوج بيكون خلاص اتعود ومعدش مقدر تعبها .. وده بيسبب للزوجه احساس لأن أصعب حاجه عليها انها تلاقي نفسها بتتعب بدون تقدير للتعب ده ومتقدرش تقول خلاص انا مش هشتغل أو هاخد فلوسي
اعتقد المفروض انها في وسط الظروف دي دلوقتي تخليها واحده والزوج يقدرها في كده ولما يقدر يستغنى عن فلوسها يفصلها ..
ولو هو كان مصر انها متبقاش واحده من الاول المفروض الزوجه تعمل حاجه عادله زي مثلا يبقه نص مرتبها ليها و نص للبيت وطبعا في وقت الشدائد ملهمش غير بعض..

[Al-Shaimaa]

اولاً موضوع رائع يا دكتور

ثانيا انا فكرت في الموضوع ده كتير قبل كده

وثبت رأيي مؤخراً على الآتي

ديننا الحنيف لم يلزم المرأة بالانفاق على نفسها في اي مراحل حياتها
فهي دائما تكون نفقاتها ملزمة من رجل
فبالنسبة للزوجة زوجها ملزم بالكامل على نفقاتها
وكذلك الزم المراة بالاهتمام بشؤن زوجها وبيتها وابناءها
فاذا كانت المرأه ستأخذ من وقت رعاية الزوج والبيت لجني المال
فمن الافضل ان تعوض ذلك بقدر مما تربحه وتضعه في نفقات البيت
لكن اذا كان البيت لا يحتاج لما تربحه المرأه ومستوى المعيشة لا ئق
فلا بأس من وجهة نظري انها تحتفظ به كله

لكن لا يصح لمرأه تملك المال وترى زوجها يعيش في مستوى مادي منخفض او يمر بضائقة مالية
ولا تمد له يدها بكل ما يحتاج

ومتابعة ان شاء الله الموضوع ولأراء باقي الداكترة

[same7]

عاما أيا كان القرار اللى هيتخذه الاتنين لازم جدا أهلهم ما يعرفوش حاجه عنه ولا يتدخلوا فيه,
وكل واحد يخلى باله من الكلام فى النقطه دى علشان مايحرجش الطرف التانى .,

اعتقد ده المفروض يكون موجود مش ف الماديات بس
لكن دى حياتكوا تخططولها براحتكوا
اكيد لازم تسمعوا اراء الاخرين لكن ف الاخر بتنفذوا اللى تقرروه انتوا

بالنسبه ليا انا افضل اننا يبقى هدفنا واحد قبل زمتنا الماليه الواحده و يبقى تامين مستقبل اولادنا و برضه نعيش كويس

اعتقد لو النقطه دى مش موجوده
انا عن نفسى مسميهوش جواز
اى مسمى تانى بقى
لكن جواز لا

وفي ناس يجي الزوج يقولها دي فلوسك انا مليش دعوه بيها و لما هي تصر انها تتحط ف البيت والسنين تمر على كده وتيجي هي تلاقي نفسها محتاجه منها تبقه محرجه تطلب أو محرجه تقوله انا هاخد مرتبي المره دي محتاجاه ..وساعات الزوج بيكون خلاص اتعود ومعدش مقدر تعبها .. وده بيسبب للزوجه احساس لأن أصعب حاجه عليها انها تلاقي نفسها بتتعب بدون تقدير للتعب ده ومتقدرش تقول خلاص انا مش هشتغل أو هاخد فلوسي

يبقى مش جواز
لان انا لازم احس واشوف واحاول ألبى رغباتها
مش ألبى لا احاول لان ساعات بيكون طلب مش ف وقته ساعتها لو معرفتش اتناقش معاها هتحايل عليها وأأجله او الغيه على حسب

اعتقد المفروض انها في وسط الظروف دي دلوقتي تخليها واحده والزوج يقدرها في كده ولما يقدر يستغنى عن فلوسها يفصلها ..

انا توصلت عن نفسى لما اتجوز
نخلى زمتنا الماليه واحده
واعملها توكيل عام
او العكس هيه تعملى مش فارقه
لاننا ف الوقت ده هنبقى روح واحده
لانى مش هتجوز غير اللى احس معاها كده وبس

ممكن ناس تعترض ع فكره التوكيل العام دى
وتقول ف اى وقت محدش يضمن وحكاوى القهاوى تحصلك والتوكيل العام بلاش وكلام م ده


اعتقد ساعتها ده لو حصل
يبقى انا الكسبان لانى عرفتها ع حقيقتها
وكده كده انا كنت بعمل الفلوس دى عشانها


وبعدين ده انا اختارتها ام ولادى ومأمنها على نفسى
يبقى مش هأمنها ع فلوسنا


اعتقد ده معناه ان ف حاجه غلط
لان مينفعش اشك ف مراتى حبيبتى


و اعتقد المفروض م ساعه ما فكرنا ف بعض اعتقد ساعتها بقى التفكير احنا مش انا او هيه


يمكن ناس تبوص للفكر ده انه صعب او مش حلو

بس اتمنى احقق ده

ولو هو كان مصر انها متبقاش واحده من الاول المفروض الزوجه تعمل حاجه عادله زي مثلا يبقه نص مرتبها ليها و نص للبيت وطبعا في وقت الشدائد ملهمش غير بعض..

اكيد انهم ملهومش غير بعض
.........................

معنى جواز ( من وجهه نظرى ) اللى عمال اكتبها فوق دى

1- مشاركه
2- روح واحده
3- غرام
4- وفاء
5- تضحيه


مش موافق ع حته ليها وليه
مفيش حاجه اسمها واحد لواحده
ف حاجه اسمها احنا
مش هاخد نصه ليا


وكمان المفروض انها ف عدم وجودى تقدر تدير كل حاجه
وتمشى كل حاجه زى ما انا موجود
وبالتالى لازم يكون معاها أليه تساعدها ف تسيير الامور مهما كانت
وفكره التوكيل دى هتحللها اى حاجه

اه فكره انها تبقى ليها زمه منفصله هتساعدها وتعتبر أليه حلوه

لكن انا شايف ان ده فصل بينى وبينها لان كده كده مفيش حاجه هتحصل غير بموافتنا احنا الاتنين
ومش حابب يكون فصل بينا ف اى حاجه

فاذا كانت المرأه ستأخذ من وقت رعاية الزوج والبيت لجني المال

اعتقد المفروض ان ليها حقوق وانا لازم وضرورى احققهالها
مفيش حاجه اسمها شغل وكلام م ده
ليها حقوق لازم منها اكيد

لكن اذا كان البيت لا يحتاج لما تربحه المرأه ومستوى المعيشة لا ئق
فلا بأس من وجهة نظري انها تحتفظ به كله

لا اعتقد

لكن لا يصح لمرأه تملك المال وترى زوجها يعيش في مستوى مادي منخفض او يمر بضائقة مالية
ولا تمد له يدها بكل ما يحتاج

ده اكيد
ده الواحد سمع عن حكاوى فوله بخصوص النقطه دى


اسعدنى مروركم ومستنى باقى اضافاتكم

[تابعة محمد]

اولاً موضوع رائع يا دكتور

ثانيا انا فكرت في الموضوع ده كتير قبل كده

وثبت رأيي مؤخراً على الآتي

ديننا الحنيف لم يلزم المرأة بالانفاق على نفسها في اي مراحل حياتها
فهي دائما تكون نفقاتها ملزمة من رجل
فبالنسبة للزوجة زوجها ملزم بالكامل على نفقاتها
وكذلك الزم المراة بالاهتمام بشؤن زوجها وبيتها وابناءها
فاذا كانت المرأه ستأخذ من وقت رعاية الزوج والبيت لجني المال
فمن الافضل ان تعوض ذلك بقدر مما تربحه وتضعه في نفقات البيت
لكن اذا كان البيت لا يحتاج لما تربحه المرأه ومستوى المعيشة لا ئق
فلا بأس من وجهة نظري انها تحتفظ به كله

لكن لا يصح لمرأه تملك المال وترى زوجها يعيش في مستوى مادي منخفض او يمر بضائقة مالية
ولا تمد له يدها بكل ما يحتاج

ومتابعة ان شاء الله الموضوع ولأراء باقي الداكترة

انا متفقة مع هذا الراى تماما ، لكن احب اضيف سواء المراة كانت عاملة او لأ ، فالراجل عليه ان يكفى احتياجات المنزل .
بمعنى تانى مينفعش راجل يبقى عارف ان مراته بتاخد مرتب معين ، فيقوم يعطيها مثلا 500 جنيه و يقولها مشى البيت بالفلوس ديه مع انه بيقبض اكتر من كده بكتير ، فطبعا 500 مش هيعملوا حاجة فغصب عنها تبدا تطلع فلوسها و تحطها فى البيت . و الموضوع يبان انه مطلبش منها المرتب .
المشكلة ان الزوجة دايما قلبها طيب و بتخاف على والدها اوى و متحبش تحرمهم من حاجة ، و الازواج بيستغلوا النقطة ديه كويس جدا .
بس احقاقا للحق فى رجالة بتدى لزوجتها مصروف شهرى بعيد عن مصروف البيت و لو حتى مديونين للناس زوجها ميحرمهاش من المصروف او حتى يطلب منها فلوس .
و شكرا على الموضوع الجميل .

[DR DOOLA]

فى زوجات تانيه مش بتشتغل خالص يا جماعه و مع ذلك بتتطلب طلبات تعجيزيه من الزوج و بتحمله فوق طاقته

رأيكو فيهم ايه ؟

[SmSm]

يبقى مش جواز
لان انا لازم احس واشوف واحاول ألبى رغباتها
مش ألبى لا احاول لان ساعات بيكون طلب مش ف وقته ساعتها لو معرفتش اتناقش معاها هتحايل عليها وأأجله او الغيه على حسب

كلامي معتمد على واقع بشوفه قدامي مش افتراض
وشفت ان لما تبقه الذمة الماليه منفصله بيبقى مفيش مشاكل خالص

انا توصلت عن نفسى لما اتجوز
نخلى زمتنا الماليه واحده
واعملها توكيل عام
او العكس هيه تعملى مش فارقه
لاننا ف الوقت ده هنبقى روح واحده
لانى مش هتجوز غير اللى احس معاها كده وبس

حل كويس
بس مشوفتهوش قبل كده خالص يمكن لأن مش أي حد يقدر ينفذه
بالنسبه لحضرتك حطيت أساس للجواز و انكو لازم تبقو روح واحده لكن في ناس و ده معظمهم بيبقو عادي والحل ده اكيد مش هيناسبهم
وفي ناس العشرة بدل ماتقربهم بتبعدهم عن بعض .. ده غير ان الاهل مش هيوافقو وهيقولو ان محدش ضامن حد ..
يعني لازم اللي ينفذه يبقه واصل فعلا للمرحله اللي حضرتك اتكلمت عنها