هو ليه مش بنذاكر............

[Dr/HULK]

بسم الله الرحمن الرحيم

ازيكوا ياعضاء المنتدى وانا معاكم ويارب نكون كويسين

دى اهم حاجة المهم الصحة الباقى عبارة عن شكليات

لازم برده نهتم بيها

طبعا ومن الشكليات دى حاجة منكدة علينا كل يوم

تقريبا كل يوم لازم ننطرق ليها طبعا انتو عرفتوها من العنوان

ايوه هى دى بالظبط انا سمعت اللى قالها

المذاكرة

ايوه ياعم ليك حق تضايق وتولع كمان دا عن نفسى هربان منها

وقاعد اكتب فى الموضوع

هو مين فينا اساسا بيطيق حاجة اسمها كتاب

بس معلش ياريت نكمل فى الموضوع ونستحمل شوية الكلمة التقيلة دى

دلوقتى السؤال اللى مضايق ناس كتير وانا كمان نفسى الاقيله حل

هو احنا ليه مش بنذاكر؟؟؟؟؟؟؟؟؟؟؟؟؟

او بالاخص ليه بيجيلنا شعور بالضيق واحنا بنذاكر

على فكرة دا موضوع للمناقشة لان انا معنديش حلول

يعنى مثلا احد الحاجت اللى بتخلينى مش عاوز اذاكر انى بأجل كل مذاكرة الاسبوع لايام الريست

ولما ييجى الريست اجيب كل المواد واقعد اجمع فى ورقها ومذكراتها

واظبط نفسى انى هذاكر الاول فارما بعدين ميديسنال بعد كده فايتو......الخ

فلاقى نفسى تعبت من اول صفحة فى الجرنان (اصلى بقرأ جرايد)

فأقوم من على الكتب او الترابيزة حسب ماانا قاعد وافتح الكمبيوتر

ودى برده احد المشاكل اللى انا شايفها بتعيقنى عن المذاكرة

وهى انى ببقى عاوز اعمل كل حاجة فى نفس الوقت

ولأن ده عمره ماهيحصل فبيئس واقوم اعمل اى حاجة تانية

ياريت نتناقش فى الحكاية دى عشان وكل واحد يقول رأيه عشان ممكن حاجات توضح منكنش واخدين بالنا منها

اه حاجة مهمة ياريت بقى نسيبنا من اخبار الكلية اللى تجيب اكتئاب ونفكر فى نفسنا شوية

يعنى انا هبطل اتدخل فى اى حاجة تخص الكلية(على الاقل اليومين دول لحد الامتحانات)

عشان اعرف اركز شوية واخرج من حالة الاحباط اللى بنشوفها كل يوم دى وبتخلى الواحد ملوش نفس لأى حاجة

سلام بقى اقوم اذاكر عشان شيت الفايتو والميديسنال

هذاكرهم مع بعض (طول عمر ريمة ماسكة فى عادتها القديمة)

خلاص بأذن الله هذاكر فايتو الاول ولما اخلصه ابقى اشوف حكاية شيت المديسنال دى ايه

[إيمان حمدي]

كويس اني هكون اول حد يرد على الموضوع دا
بس مش عارفة هقول ايه انا وصاحبتي نفسنا نذاكر من زمان
ومش عارفين نبدأ مفيش نفس لحاجة
دا المفروض آخر ترم لينا في الكلية لازم نستنزف كل طاقتنا ( لو لسه فينا حيل يعني)
بس مش عارفين الشهر اللي بيقولوا عليه دا مش هيكفي الواحد يخلص فرع من مادة
بس احنا مش لازم نيأس أبدا
لازم نستعين بالله.... ونتوكل عليه سبحانه هو الأعلم بأحوالنا

[N00R EL _SHAMS]

والله موضوع جامد ...........
بس هو ايه الى هيفتح نفسنا على المذاكره يعنى ؟؟
ماشاء الله اى حاجه بتحلها فى ورقة الامتحان بتاخد عليها درجات وتلاقى تقديرك علا فجاه
وماشاء الله الدكاتره مش نسينا خالص وبيقولوا لينا هنجحكم مش هتقعدوا معانا للسنه الجايه خالص
وماشاء الله الجدول جميل جدا وهنبقى نذاكر فى الايام الكتير الى قبل كل ماده
وماشاء الله كل الناس الى اتخرجت مش عارفه تعمل ايه من كتر الشغل والعروض الرائعه(على فكره دى اكتر حاجه بتسد نفسى عن المذاكره ...ان مفيش امل )



انسواكل الكلام الى انا قلته ده ........لكن المفروض بجد اننا نشجع بعض على المذاكره لان خلاص ازف الوقت .....
ياريت حد كده من الناس الى اكبر مننا ولا الى اصغر مننا يعطينا شوية نصايح لفتح الشهيه على المذاكره .....ونعتبرهادوا مر بس لازم ناخده .....
بالتوفيق للجميع باذن الله .............

[Hope1]

هو احنا ليه مش بنذاكر؟؟؟؟؟؟؟؟

ده سؤال منطقي وجيه ينطوي علي وجهة نظر فلسفية متعمقة

احنا و الله معذورين عندنا حاجات تانية كتييييييييير ليها اولوية عندنا قبل المذاكرة زي لعبة الحياة و عيش ايامك و الاتجاه المعاكس و الشيخ سيد حمدي ده غير النت و الكتب اللي تحت المخدة
انا الحمد لله قررت امبارح مش هتفرج علي لعبة الحياة و ممتش و لا حاجة و ان شاء الله هكمل المسيرة
المشكلة كمان انا معندناش هدف (يعني بجد و الله لو الواحد مات دلوقتي مش عارف هيقابل ربنا يقوله ايه)
احنا كلنا اتصدمنا بوفاة الدكتورة صاحبتنا الي في سنة رابعة ربنا يرحمها يا رب مع ان كلنا معرضين يحصلنا كده و اه بقي لو ادام التلفزيون و بنشوف حاجة هايفة ............
قصدي اقول الي هيخلينا نذاكر ان شاء الله و انا معاكم لو حطينا كلنا في دماغنا انا هنتسأل عن عمرنا فيما افنيناه و شبابنا فيما ابليناه
اللهم ثبتنا عند السؤال يارب
كمان الحمد لله في حاجات ماللي بناخدها في الكلية علم ينتفع به (هدف تاني بردو)
و كمان رغم ازمة البطالة مازال الصيادلة اكتر ناس بيشتغلوا و اكتر ناس ليهم عقود بره
معلشي طولت عليكم انا اسفة
يلا دلوقتي مع السلامة عشان راحة الكلية ادعولي الحق المحاضرة

[Messi]

احنا مش بنحب نذاكر عشان احنا مش عارفين احنا بنذاكر ليه.......

طبعا المشكله اننا بنقول ......(انا عايز اذاكر عشان انجح) ........وده غلط...

لكن لو الواحد حط امامه اهداف اخري اسمي ........ هتخليه يحب المذاكره

وانا في اعدادي كنت من ال3 الاوائل علي مدرستنا
وبجد كنت بحس ان المذاكره جميله ومش بزهق منها خالص.....
لاني كنت حاطط هدف امامي وهوه اني اكون احسن واحد في المدرسه......

حتي في ثانوي ........كنت بلاقي للمذاكره طعم
لاني كنت حاطط هدف ليا اني ادخل طب .....
وانا ربنا لم يوفقني في 3 درجات.......
لكن فعلا كنت بحب المذاكره في ثانوي....

اما الجامعه.............
فالاسف .....انا وجدت نفسي في عالم منعزل عن الاخرين
ولا عارف اذاكر ازاي؟؟؟؟؟
ولا عارف احضر محاضرات ولا لأ؟؟؟؟
ولا عارف اخد كورسات ولا لأ؟؟؟؟؟؟؟
ولما اجيب ورق اجيب لمين؟؟؟؟

برجع من الكليه مرهق جدا و مش قادر.........فبدخل انام ......واصحي بليل ...فاليوم بالتالي بيضيع مني..
مش عارف احط هدف لنفسي معين
و مضحكش علي نفسي و اقول اني ممكن اتعين معيد.......
ولو اتعينت ......مش هكون اول ولا اخر واحد يتعين معيد...وان كنت ارجح السفر الي الخارج افضل من التعيين بالجامعه....

حتي الان وانا ابحث عن هدف سامي و مش لاقي....
واصحابي زيي زيهم .....
ودي المشكله....

[muna7assan]

انا عن نفسى متعوده على كده

التيرم الاول بأبقى نشيطه جدا وبأذاكر جدا

التيرم التانى مش بأفتح كتاب .... يعنى العكس تماما

كل الناس من اول ما بدأنا مسيره التعليم يقولوا انهم زادوا كتير فى التيرم التانى

انا بقى لأ... بأضيع اللى عملته فى التيرم الاول باللى بأعمله فى التيرم التانى

فمش مستغربه قوى يعنى حالتى دى.,

[white light]

سؤال مهم يطرح نفسه

وكل الطلاب بتقول نفس الكلام ده هو الواحد مش بيزاكر لاسباب

اننا فى كليه عمليه وبنقضى معظم وقتنا فى الكليه فى المحاضرات ونرجع البيت همدانين من شايفين ادامنا فطبعا مفيش وقت للذاكره

نجى بقا ليوم الريست كل مره اعد ابص للمواد والورق الكتير اللى اشتراتيه واللى لسه ابيض يا ورد اصلى

انا اجدع واحده اشترى ورق ومفتحوش يجلى اكتئاب لو معدتش على بابير

وطبعا افضل اظبط فى الورق واحتار اذاكر بايه الاول وفى الاخر الاقى اليوم عدى ومحصلتش حاجه

ده غير الشيطان اللى يعقد يوسوس انتى هتذاكرى واخواتك بره بيتفرجوا على التليفزيزن لا بلا ماكره بلا نيله

الواحد اصلا مش بيذاكر الا لما يتزنق فى الامتحانات ذى كده ان شاء الله الاسبوع الجاى عندى 3 امتحانات

عملى ورا بعض سبت واتنين وثلاثاء حاجه جميله خالص ده غير الميكرو يوم الخميس ربنا يستر

وادعولى يا جماعه الحق اخلص حاجه فى الليله دى

[اميرة الاحلام]

السلام عليكم

اذيكو يا دكاترة
بصراحة انا بقى عارفانى لما باجى اذاكر وده طبع من وانا صوغيرة .......افضل ادلع ...
..لحد قبل الامتحان واجى بقى وقت الامتحان ابدا ازاكر واظبط وببقى فاهمة كويس وعارفة كل حاجة بس هو ده طبع ووالله كنت ناوية اغيره ف الكلية بس نووووووو وااااااااااى مفيش فايدة والحمد لله بحاول افتح من وقت للتانى
والحمد لله ربنا بيبقى ميسرلى امورى وبيبقى الموضوع سهل نوعا ما رغم ان امى وبابايا اصلا بيتغربو وبيقولو ......البت دى اصلا جابت مجموع ازاى .........وبتذاكر امتى
وكمان ده جايز لان انا activeجدا ومش بقعد هادية خالص ف البيت ولا بره وببقى علطوووول مركزة ف حاجات تانية غير المذاكرة

وربنا يعدلها لنا ونطيق الكتب شوية

[Jailan]

و ذلك لان الممنوع مرغوب و المرغوب ممنوع

[Retag]

والله كل ما انوى اذاكر زى الناس الشيطان يضحك عليا ويقولى لسه بدرى واجل الى كنت هذاكره وهكذا تتراكم عليا المذاكره . ........
وثانيا الكسل انا كسوله اوى( من الاخرراحتى فى المقام الاول ثم المذاكره )
يلا ربنا يهدينا ونذاكر
شكرا لطرح الموضوع