هام جدا قبل امتحانات النظرى

[ameer]

ممكن سؤال موبايل مقفول محطوط فى الشنطه او الجيب هى زيها بالظبط فى ايد المراقب مش فارق كتير وبكده دخلت بيها مكان الامتحان والقرار بيمنع الدخول بيه اللجنه من اساسه و ليه نحمل ناس تانيه مسئوليه موبايلات ووجع دماغ ولى كل واحد يكتب تعهد على نفسه ان الموبايل لو اتسرق عوضه على الله ولى اييييييييه هيحصل وجع دماغ كتير وكمان لو واحد غش بالموبايل سؤال مش هيغش التانى يعنى فى وسائل اقوى بكتييييير من كده وكمان المراقبين مش هيرضوا يتحمله مسئوليه حاجه زى ديه فالحل الوحيد انه يتساب فى البيت وكله يطلع على السنتر تليفون صغير يريح الاهل وانتهى الموضوع انا مع الاقتراح ده بس مش عارفه هاعرف اطبقه ولى لا الواحد مش عارف يجرب مذاكرة يومين ولى يجرب ينزل من بيته من غير موبايل مش عارفه السنه ديه غرييييييييييييييييييبه كده ليه؟؟؟؟؟؟؟؟؟؟؟؟؟

-----
سبقتينى يا استاذه منى بان فعلا مينفعش ان احنا نحمل المراقب مسئوليه زى ديه واقتراح حضرتك برضه مناسب بس برضه ممكن يحصل سرقه ووجع دماغ فبلاش منه احسن فالحل الوضع يبقى كما هو عليه فى السنين الماضيه يا اما كل واحد يريح نفسه ويسيب الموبايل فى البيت والسنتر موجود للى عاوز يتصل يعنى ده ابس الحلول

المشكلة مش بس اننا نطمن اهلنا المشكلة ان في ناس بتسافر مدة طويلة وخصوصا بنات فمجرد تاخير 5 دقايق هيعمل حالة طوارئ عند الاهل فلو الموبايل موجود مكالمة صغيرة يطمنوا لو مش موجود يبقي ربنا يصبرهم علي ما ابنهم او بنتهم توصل بالسلامة

[Mohamed Al Gohary]

المفروض اصلا انه ممنوع الدخول بالشنط الى لجان الامتحان والسنه اللى فاتت اول يوم كانوا متسابين بره اللجان فالدكتور محمود أمر ان الشنط تخش جوه مع التنبيه على عدم اصطحابها بعد ذلك ..

موضوع شئون الطلاب مش عارف هل ممكن يطبق ولا لأ ..

فمجرد تاخير 5 دقايق هيعمل حالة طوارئ عند الاهل

ماهم هيبقوا عارفين ان الموبايل مش معاها .. وكمان ماهو وارد ان الموبايل يفصل شحن فى اوقات كتير .. اعتقد ان اى حد يكلم اهله ويطمنهم مش حاجه صعبه ومستحيله يعني ..
السنتر في سنترال ..
انا شايف بصراحه انى دى حجه مش قويه للاعتراض على القرار ..

[ameer]

ماهم هيبقوا عارفين ان الموبايل مش معاها .. وكمان ماهو وارد ان الموبايل يفصل شحن فى اوقات كتير .. اعتقد ان اى حد يكلم اهله ويطمنهم مش حاجه صعبه ومستحيله يعني ..
السنتر في سنترال ..
انا شايف بصراحه انى دى حجه مش قويه للاعتراض على القرار ..

انا قصدي في المواصلات حصل تاخير لاي سبب من الاسباب مش هيحصل قلق عند الاهل وخصوصا لو ابنهم اوبنتهم كلمهم من السنترال وقالهم انة خلص الشفوي وجاي في الطريق

[marooo]

المشكلة مش بس اننا نطمن اهلنا المشكلة ان في ناس بتسافر مدة طويلة وخصوصا بنات فمجرد تاخير 5 دقايق هيعمل حالة طوارئ عند الاهل فلو الموبايل موجود مكالمة صغيرة يطمنوا لو مش موجود يبقي ربنا يصبرهم علي ما ابنهم او بنتهم توصل بالسلامة

كلامك صح يا دكتور امير بس هى مالهاش حل غير كده لان مش من حقنا نحمل ناس تانيه مسئوليه حاجاتنا وكمان لو اى اب او ام عرف ان ابنه او بنته لو دخل بالموبايل لجنه الامتحان ويتعمله محضر غش كلهم هيولعوا فى الموبايلات وده حصل معايا ماما قالتلى ما تسيبيه احسن من محضر غش مع ان نا مش معاهم بس ما باليد حيله

[مهداه]

شوف يا دكتر انا مش معترضه على القرار
بس انا ليه مخدش الموبايل معايا واحطه ف الشنطه وهو مقفول طبعا
والشنطه تكون جمبى ذى السنه اللى فاتت
دا بالنسبه للبنات
اما الولاد بقى يدورولهم على كيس بلاستيك يحطوا فيه موبايلاتهم
لا بجد حكايه اسيبه ف البيت دى حاسه انها متدرستش كويس
ممكن يجيبوا حتى كرسى زياده ويحطوه ف اول اللجنه ادام كل الناس ويكون عليه كل الموبيلات

[موظفه طموحه]

يجماعه واضح ان فيه ناس بتمر على اخر مشاركه ارجو الرجوع الى صفحه 10 وقرااة اقتراحى
وشكرا لكم

[Anameshana]

السلام عليكم ...
انا بشجع وبنادى وبطالب بفكرة امتحانات الاوبن بوك اكزااااااااااااامس ...
واهو كدا نقدر نخلى الحبايب مTم ن ين ...

واهو يبقى فى الدراسة اوبن بوك على صيغة اوبن ماستر بعدها بعد الدراسة طبعا

اعدو بالعافية ... :-*



وسلام الله عليكم ورحمته وبرككاته

[The Princess]

على فكرة الواحد مش محتاج ياخد الموبايل علشان الاهل و بس لان لو على كده مكالمة من السنتر بتحل الموضوع لكن الواحد ميقدرش يقعد بره البيت من 8 لحد 5 من غير موبايل ساعات بنقعد ندور على بعض و نتصل بناس و اللى بينسا حاجه فى البيت يتصل يبعتوها له بسرعه مع حد و اللى بيستعجل زمايله لو لاقى حد اتاخر و دى بتحصل كتير جدا ان ناس تروح عليها نومة و زمايلها تتصل تصحيها و اللى بتتصل ب باباها بعد ما تخلص يجي ياخدها و نروح مشاوير و نتفق مع زمايلنا انهم اول ما دكتور الشفوى يوصل يتصلوا مية حاجه و حاجه الموبايل احنا اتعودنا عليه و بقى مهم يعنى فكرة انه يتساب فى البيت مستحيلة مش علشان هتحرم منه فى وقت مش هحتاج له فيه اتحرم منه فى وقت الحاجه كمان و الله احنا يوم التوكسو سيبنا الموبايلات فى الدولاب و كنا 3 رحت انا و واحدة اخدنا الموبايلات كلها و وقفنا نستى التالته و الله العظيم حسينا باللشل لان هى موبايلها معانا و ندور ندور عليها و نسال زمايلنا و دوخه و باباها يتصل عليها قلقان علشان هى بتسافر و اختها تتصل بيناعلى موبايلاتنا احنا هنرد نقول ايه مش لاقينها ؟؟؟؟؟؟؟؟؟؟؟ فضلنا مستنين لحد ما جت يعنى اللى مستسهل التطبيق للقرار ساعة التنفيذ هيلاقيه بقى صعب و مرهق و يكره الواحد فى التعليم كله
ثم ان التقنيات الحديثة اللى بيتكلم عنها دكتور عطاالله انا اولا مفهمتش منها حاجه ثانيا كام واحد هيقدجر يعمل ده و يستفيد منه فعلا ثالثا انا شايفه ان يذاكر اسهله بمراحل احنا مش طلاب فى جامعة كامبريدج و لا احنا عملاء فى السي اي ايه علشان مستوى تفكيرنا يوصل للمرحلة دى
شكرا

[Scofield]

سؤال لدكتور جوهرى

لو انت ليك اخت وقبل ما تركب الميكروباص كلمتك من سنترال جنب الموقف وقالت انا جايه اهو نص ساعه او ساعه او اكتر حسب الطريق

وفى نص الطريق الميكروباص عطل او حصل لاقدر الله شئ من كويس

وانت طبعا مستنى وصولها بمده الطريق وحصل ان تصليح الميكروباص او انهاء الموقف الى حصل حوالى ساعه

انت بقا هتعمل ايه فى الساعه التاخير دى هيكون شعورك ايه او قلقك عامل ازاى

ارجو مراعاه مشاعر اسر الطلاب وقلقهم على ابناءهم

ونفكر ازاى الموبيل يكون فى مكان امن وقت اللجنه فقط

[pharmacistina]

يا جماعة بتهيألي الحكاية برده أبسط من كدة ..

سبحان الله علينا !!! يعني الناس زمان قبل اختراع الموبايلات ماكانتش بتروح الامتحان ؟؟؟!!!

يعني أهالينا مثلا كانوا بيروحوا الامتحانات بالموبايلات ؟؟

ليه نعطي الموبايلات للمراقب و نحمله مسئولية ,

عشان بدل الغش يحصل سرقة !!

مهو كدة الواحد يخرج م الامتحان بدري عشان ينقي له موبايل جديد كدة , متقولوليش رقم و كلام من دة لأن دي حاجات عايزة تنظيم ووقت جامد قبل الامتحان و برده ممكن يحصل خطأ و تبادل للموبايلات بين الطلبة و نرجع نشتكي و نقول ( عايزين موبايلاتنا اللي ضاعت )


و لو أعطينا الموبايلات للشئون برده نفس الحكاية , الموضوع عايز تنظيم و شغلانة و الخطأ وااارد ..

أنا واحدة بسافر مسافة ساعة و نص , مكالمة دقيقة من أي سنترال ان شاء الله و خلاص الموضوع انتهى ..


أصلا احنا داخلين على الامتحانات و الموضوع دة مش مستاهل نتكلم فيه كتير ..

سيبوا الموبايلات في البيت يا جماعة و طمنوا الأهل من السنترالات .. مش مشكلة

ولا نسيب الموبايلات عند المراقبين ولا عند الشئون ..

الناس زمان كانت بتروح الامتحان و بتسافر و بتخرج برا مصر بدون موبايلات و بدون نت , و كانوا عايشين زي الفل ..


بالتوفيق للجميع