ازيك ياشيكولاتايه كل سنه وانتي طيبه

اولا توبيك فكرته حلوه وجميله اما عن المشكله فبصي كتير قوي بتعدي على الانسان لحظات بيبقى مسيطر عليه افكار سلبيه وبيجيله احباط وتلاقي الدنيا فقدت بهجتها ومفيش حاجه تسعده ولايبقى ليها مذاق وفي الغالب البنات بيعانوا من الحكايه دي اكتر من الاولاد تلاقينا بنعاني من تقلبات حاده في المود تلاقيكي مقضيه اليوم عادي جدا وبتضحكي وبتتكلمي وفجاه كدا تلاقيكي متضايقه وبتعيطي من غير سبب
دي حاجات بتحصل عادي متقلقيش بس المهم ان الواحد ميستسلمش للحاله دي يحاول يخرج منها ويبقى عارف ان دي كدا سحابه وهتعدي انما ميعشي بقى في الحاله ويقضيها اكتئاب

تاني حاجه بقى للوضع اللي انتي وصفتيه دا لازم توجدي لنفسك دور اتعهدي كدا انك تعملي اي حاجه بس تخلصي بجد وتعمليها يعني احنا دلوقتي في رمضان ممكن تعاهدي نفسك انك تعلمي اخوكي او اختك حاجه جديده تقربهم لربنا ولو حتى تفتحي المصحف وتقريلهم قل هو الله احد تخلي يوم تعملي فيه طبخه وتبعتيها مائده من موائد الرحمن تنزلي الصيدليه وتعاهدي نفسك ان مفيش مريض يدخل عندك الا وتقابليه بوجه بشوش وتدعيله بالشفاء
تروحي اي جمعيه خيريه زي رساله مثلا وتشتغلي معاهم يوم في تحضير شنطه رمضان وغييييييييييرها حاجات كتير
شوفي الحاجات دي بالرغم من انها تبان صغيره بس والله تاثيرها جبار عليكي كفايه بس لو اخوكي او اختك جه حضنك بعد متشرحيله حاجه صغيره ويقلك انا بحبك قوي ياشيكو او لما العيان يدخلك قلقان ومهموم ويخرج مرتاح ومطمئن او لما تحسي انك وهبتي شويه من وقتك علشان تجهزي وجبه لصائم من فقراء المسلمين ياااااااه جربي كدا وباذن الله الشعور دا يختفي تماما