من عناء تانية للعناء الأكبر في تالتة(مقتبس من موضوع سنة تالتة)
الموضوع ده مقتبس من موضوع (من عناء تالتة لملل رابعة)
حسيت ان احنا المفروض بقى نقول كده:
من عناء تانية للعناء الأكبر في تالتة
هل سنة تالتة فعلا بالصورة اللي احتا سمعنا عنها؟
بقالنا سنة عمالين نسمع عن الرعب والتعقيد في سنة تالتة
أفيدونا يا طلبة تالتة
هل الموضوع فعلا معقد للدرجة دي؟
هل تالتة هي فعلا عنق الزجاجة؟
وهل تستاهل كل الرعب والخوف ده؟
الوضع ده بيفكرني ايام ما كنا لسه هندخل الثانوية العامة
الخوف والترهيب والتعقيد
في انتظار نصائحكم وردودكم
وربنا يستر في النتيجة
حل مشكله تالته
ثالثه مش صعبه بس عايز تنظيم وقت من أول الدراسه وأهتمام بالترم الأول علشان مشكله تالته إن التعويض فيها الترم التانى صعب ونصحتى
ذاكرى الفايتو من أول يوم من الدراسة ولو صفحتين بس فى اليوم بس كويس ...أنا لى واحد صاحبى ماكنش بيذاكر من أول السنه إلا فايتو بس فجاب فى الفايتو 110 وجاب فى الفارما 25 والطبيه 36
ذاكر الفايتو من أول يوم وركز على العملى لو عايز تجيب فوق 100
بالنسبه للفارما و المعايرات ركزى على شيت العملى علشان عليه 30 درجه كامله وبعض الأحيان بيجى من النظرى لو ضبطيه ودخلت لدكتور كويس فى الشفوى هتنجحى فى الأتنين إن شاء الله أهم حاجه فى الأتنين دول العملى
بالنسبه للطبيه ركزى على العملى علشان هو رخم جامد وبينقص موووت والنظرى مش هقولك خشى بكله علشان غالبا مافيش وقت ولوحبيتى تخشى بأسهل واكتر درجات خشى بجزى الدكتوره ماجده وداليا
بالنسبه الصيدلانيات العملى عايز هدوء مش أكتر علشان وقته قليل وهو بيطلب تحضرتين والنظرى ركزى على جزء الدكتور خيرى مثلا وأفهمى جزء الدكتوره محاسن علشان الجزء ده عايز فهم مش حفظ ولو حفظتى مش هتحلى بس أساسك جزء الدكتور خيرى أفقليه كويس وبعد كده جمعى قوانين د محاسن ولوفيه وقت أقرا جزء الدكتوره محاسن
البايو طويلة بس ظريفه لو أنتى جمعتيها فى ملخصات هتريحك أخر السنه والعملى بتاعها زى العضويه والشفوى أدخلى للدكتوره أمال أو محمد الجيار درجاتهم ممتازه
من الأخر مشكله تالته صعوبه التعويض الترم التانى فأتعبى الترم الأول وهترتاحى خالص الترم التانى ده كل الترم الأول شهرين مش جايبين هم أنك تزعلى أنك ماتتفسحيش أو تعيشى حياتك فيها الترم التانى
عيشوا حياتكم الشهرين دول علشان تبقوا جاهزين للحرب
هههههههه والله ما فى فايده
عليكم بالصلاه وكثرة الدعاء لأن كثرة الدعاء تغير القدر (س.ص حيث شبه سنه 3 بالقدر )
ربنا يكرمك و جزاك الله خيرااا
شكرا يا جماعة على ردودكم ربنا يكرمكم كلكم
بس عايزة شوية تفاؤل يا جماعة
انا عاملة الموضوع ده علشان الاشاعات اللي على طول بنسمعها عن سنة تالتة
وبعد النتيجة الحمد لله عايزين نحس بشوية تفاؤل وحنا داخلين السنة الجديدة
مفيش حد ممكن يقول حاجة كويسة عن سنة تالتة؟؟؟
بصى يادكتوره
ثالته تقيله شويه
بس مش صعبه
مفيش حاجه اسمها صعبه
وحطى فى دماغك ان فيه الاف من الناس عدوا على سنه تالته وعدوا منها
وانتى ممكن تكونى اذكى منهم
فحاولى تنظمى وقتك
وتحافظى على علاقتك بربنا
واهتمى بالشيتات
والشفوى بتاع المعامل
هيلم ليكى درجات كتير
وربنا يوفقك
أنا مش معاك يا د/ your_mother74 التعويض سهل فى أى سنة و أنا جربت بس للأسف أكبر مشكلة أنا حسيتها السنة دة بالنسبة لى فى الدرجات أنى مجبتش الدرجات اللى كنت متخيلاها فى الفارما و الفايتو.
لكن الحمد لله ربنا كريم مادام هتعملوا اللى عليكوا و تدعوا ربنا ؛ ربنا هيحقق ليكم اللى انتوا عايزينوه ان شاء الله على الأقل النجاح و أنا أعرف ناس كنت خايفة ما يعدوش و الحمد لله عدوا من غير مواد و دة معناه أن التعويض مش صعب للدرجة دى و كمان ربنا كريم إلى أبعد حد ........ متقلقوش
مرة قابلت بنت يوم نتيجتنا فى سنة تانية و كانت هى فى ثالثة كان فى الترم الأول و سألتها على نتيجتها قالتلى: جبت جيد جدا و سألتها: كانت جايبة ايه فى تانية قالتلى : مقبول ( يعنى فيه امل كبير ) قلتلها : عملتى ايه علشان تجيبى جيد جدا ؟ قالتلى : أهم حاجة ذاكرى من أول يوم .
و على الرغم من كدة أنا أعرف ناس بيذاكروا الأسبوع اللى قبل كل مادة و بيجيبوا جيد جدا و امتياز ( قدرات يا جماعة) .
و من الأراء اللى سمعتها ان ثالثة سنة التقديرات ..... و دة فعلا حصل مع بعض الناس أن تقديرهم زاد فى ثالثة .
ربنا بيدبرها ............ فلا داعى للقلق
مبرووووووووووووووكووووووووك ياجماعة وعقبال الشهادة الكبيرة
انا أسف فعلا يا جماعه تانيه لو خوفتكم بس مش قاصدى فعلا
أنا بوجه دائما نصائحى للناس اللى ممكن تدبلر او تشيل مواد علشان معظم اللى بيشيلوا المواد سببه الأستهتار الشديد بالترم الأول وخاصه السنه ديه اللى كان بيستهتر بماده كان بينزل الأرض بيها
أما الناس اللى بيجيبوا مقبول الترم الاول فدول ناس صدقينى اكيد كانوا جايبين جيد فى تانيه علشان فعلا السنه ديه كانت رخمه واسؤا ما فيها العملى علشان كده نصحت بالتركيز عليه
وعلى فكره اللى جاب تقدير فى الترم التانى وكان جايب مقبول الترم الأول فأكيد كان داخل أعصابه مستريحه فقدر يدخل من غير اى ضغوط وعلشان كده ابدع فىالامتحانات اما الناس اللى بتشيل مواد أو معاها مواد من السنه اللى فاتت فصدقينى هيتعبوا مووووووووت
بس سعتها زى ماحضرتك قولتى لازم يذاكروا من اول يوم فى الترم التانى وصدقينى اللى بيذاكر من اول يوم من الترم التانى اكيد كان بيذاكر من اول يوم فى الترم الأول
بس عموما تالته اللى يركز فيها خاصه الترم الأول هيستمتع بيها علشان العملى بتاعها جامد وهيحسسكم انكم طلبه صيادله بعكس السنين اللى فاتت
هتمسكوا فئران وهتشرحوا ضفادع وهتحضروا كريمات شعر وحلاقه ( اللى كان نفسه يبقى حلاق هيكتشف نفسه فى سكشن الصيدلانيات ) ولبوسات وهتكشفوا فى عينات bile( هموا كان بيقول Bile بس طلعت فى الأخر ميه من الحوض محطوط عليها نكهه امونيا يعنى ماتخافوش تحللولها )
يعنى من الاخر have fun هتعيشوا حياتكم بس خلوا معظم وقتكم للكليه والمذاكره وركزوا على الترم الاول علشان تستمعتوا بيها من غير ضغط
ضوابط المشاركة
