أنا أحب أوضح اني هتكلم عن السفر خارج مصر لبلد عربي خليجي لأن دة اللي أنا عشته .. لكن في ناس مثلا بتسافر ليبيا أو الأردن أو لبنان .. ناس تانية بتسافر بلاد غربية ..
طبعا عمر اللي سافر ليبيا ما هيكون زي اللي سافر أمريكا سوا من الناحية المادية أو التربوية و الأخلاقية بالنسبة للأبناء .. دة شيء واضح جدااا لينا كلنا
سلبياتها وايجابيتها!!
الايجابيات تتمثل في : 1 ارتفاع مستوى -دخل الأسرة أكتر بكتيـــــــــــــر من مصر .. و دة جانب ايجابي أنا أعتقده كبير .جدااا لا يستهان أبدا به و لكن هو مش كل حاجة , مش مادية مني لكن الأب بيسافر عشان ينفق على أولاده .. مهم جدااا أن تلبى احتياجات الأطفال - اللي عمر مرتبات مصر ما تسمح بتلبية ربعها حتى - و دة عشان يطلعوا شباب عندهم قناعة و احساس بالشبع من الدنيا .. في حين اذا لم تلب احتياجاتهم هيطلعوا .......
و 2- تعليم على مستوى أنا أعتقده أفضل - و ليس أقوى - خصوصا في مرحلة الطفولة ابتدائي و المرحلة الاعدادية .. نتيجة الاهتمام المناهج الدراسية باشباع العاطفة و العقل و الهوايات عند الطفل .. دة كلام مش مبالغ فيه .. أنا جربت بنفسي عشت المرحلة الابتدائية كلها حارج مصر .. مثلا كانت مادة الاقتصاد المنزلي تضاف للمجموع - في مدارس البنات طبعا و ليها أكيد مادة مقابلة للولاد .. كنا بنتعلم - و احنا في ابتدائي - أنواع غرز الخياطة و أنواع الأقمشة , كنا بنتعلم ازاي حفظ الأطعمة , و الطبخ طبعا كانت المعلمة بتطبخلنا أكلة كل فترة حسب توزيع المنهج .. كانت معلمة الاقتصاد المنزلي بتكلمنا كأنها أم عن الاهتمام بالشكل و النظافة الشخصية و ازاي تبقى البنوتة حلوة و مؤدبة .. بتحط أساس في البنات عشان لما يكبروا يبقوا زوجات ناجحات و أمهات رائعات ..
مادة الرسم و الفنون كانت تضاف للمجموع .. كنا بنعمل بايدينا دباديب و عرايس .. و لوحات فنية .. و كان في آخر الترم بيتعمل معارض خيرية للكلام دة في حفلة تكريم الأوائل و اللي كنت فيها أنا الأولى دايما .. لأني مصرية ..
مادة التربية الرياضية كانت تضاف للمجموع امتحانها عملي فقط .. كانت عقدتي لأني كنت بخاف من التمرينات اللي بتتطلب قفز عالي و حاجات من دي ..
اللغة الانجليزية كانت تنطق كما يجب أن تنطق ,, كانت المعلمة ممتازة بصراحة .. مهم عندها نعرف نتكلم انجلش و ننطق صح .. لكن هنا في مناهجنا المصرية المهم اننا نحفظ الكلمات و نذاكر القواعد و ندخل نجيب الفول مارك و طبعا النطق بطيــــــــــــــــخ ..
مادة العلوم سهلة و بسيطة .. تخلي الطفل يفكر و يتخيل ..
الحصص الفاضية نروح المكتبة نقرأ .. أو أمينة المكتبة تشغل لنا شريط فيديو علمي عن الفضاء و الكواكب .. أو عن الحيوانات و الحاجات دي ..
طبعا فصول مكيفة و نظيفة , مكناش بندفع ولا مليم في التعليم .. الكتب مجانية ..
3- أهم ايجابية هي منع الاختلاط تماما من المرحلة الابتدائية حتى الجامعية .. و دة سبب من أسباب تربية أجيال محترمة .. لأن طبعا أنا مؤمنة بان لابد من فصل الولاد و البنات لحد لما ياخدوا قسط من التعليم و التربية يخليهم يعرفوا الصح من الغلط .. هنا في بلدنا الولد في ابتدائي بقى بيحب, و البنت معاها مراية
في المدرسة و حاجة ايه !! ههههه .. و طبعا دة بفضل الاعلام الغير محترم مع الاختلاط و التقليد .. الحكاية كملت ..
ايه معنى بيت بدخل اكبر بدون اب؟
ولا حاجة .. لأن الفلوس الزيادة مش هتعوض أبدا وجود رب الأسرة بينهم ..
ولأن في حالة غياب الأب بيحصل واحد من احتمالين : 1- ان الأم تفشل في القيام بمهام الأم و الأب ومحدش يقدر يلوم عليها - لا تكلف نفس الا وسعها - , و بالتالي يحصل خلل في تربية الأبناء يكون نتيجته طيش و صياعة من الشباب مثلا و بنات ماشية على مزاجها لأن مفيش في البيت رااااااااجل يخافوا منه و يعملوا له اعتبار ..
2- و دة اللي الأم المصرية المكافحة غالبا بيحصل معاها .. ان الأم بتنجح في انها تكون أب و أم و بتربي ناس محترمة و ناجحين في شغلهم و طبعا دة بيكون على حساب صحة و أعصاب الأم دي - و دة ظلم لأن ربنا قسم المسئولية بين الزوج و الزوجة .. لكن لما يعود الأب بعد لما الأبناء يكبروا صعب جداا و يمكن مستحيل بسهولة يرجع ياخد دوره كأب .. واحد عاش بعيد عنهم سنيــــــــن لحد ما كبروا و بعدين جاي عايز بسهولة يبقى أب .. الأبناء غالبا مش بيقدروا يحبوه و يحترموه زي ما لو كان معاهم .. و معذورين
ايه مدى تاثير الظاهرة عليك وع اسرتك سوا سافرت مع بابا او سافر لوحده؟
كان تأثير كبير عليا أنا و كل اخواتي بشكل خاص .. زي ما شرحت فوق من الناحية التعليمية و التربوية الحمد لله , و من الناحية المادية مش هنكر انها فرقت كتير معانا , لأن أسرة بابا ( أهلي ) و دة يشرفني كانوا فلاحين مستواهم المادي قليل .. بابا سافر عشانهم و عشاننا ..
لما رجعت مصر حسيت بالغربه وفارق المعيشه والناس ولا بسهوله تاقلمت؟
حسيت بكل الغربة و كل الوحدة برا البيت حتى اني كنت بكره المدرسة .. حتى لهجة الكلام و التفاهم بيني و بين البنات كانت مختلفة .. فضلت سنين كتير مش متأقلمة .. كانوا بيتريقوا عليا في الفصل على نطق الانجلش بتاعي خلوني أعيط في مرة ..
عايزة يا زوزو تعرفي قد ايه أنا حسيت بالغربة ؟؟؟ قارني بين الكلام اللي فوق ووضع التعليم عندنا في مصر ..
جوا البيت عادي .. لأن بابا كان محافظ دايما انه يلبي كل احتياجاتنا سواء هنا أو هناك ..
حاجة أخيرة عايزة أوضحها .. أنا و أسرتي جينا من السفر من حوالي 9 سنين .. كنت مرة بتكلم مع خالتي و هي بتسافر حايا كتير و قلتلها نفسي أرجع تاني .. قالتلي ان الوضع اتغير .. لكن على أي حال هيكون أحسن ألف مرة من اللي احنا فيه هنا ..
أنا بحب مصر أوي وربنا يعلم .. لكن برده عايزة أرتاح و لو ربنا أراد ان شاء الله أربي أبناء متأسسين صح يقدروا ينفعوا مصر و ينهضوا بيها .. لكن لو فضلت هنا داخل أرض الوطن مش هعمل أي حاجة لنفسي و لا لبلدي ..
آسفة ع الاطالة .. الدكتور جوهري قال ان منتدى المناقشة لازم نناقش فيه مش نمر و نشكر و بس .. أنا ناقشت لكن واضح اني ناقشت زيادة عن اللزوم ..
أشكرك ع الموضوع الرائع جدااا ..
رد مع اقتباس