امسح دموعك يا عُــمـر
زمنــك عظيم يا فاروق

ترعى البشر و الطير
و لكل نفس حقوق

خمسين ملاك إتدبـــح
كان مين هنا محقوق

و الحلم ساب الشجــر
قلب الأمل مخنوق

مين اللى قال الورق
يدبل فى وسط ربيع
مين اللى باح .. دمــــه

ملعون يا بحــر البقر
من تانى جاى تنتشــل
الطفــل من .. أمــه

كان نفسى أكون ويـَّــاه
قبل الفراق ألمحــه
و أنده على إسمــه

و أســأل على الواجـب
بالصدفة أشوف رسمــه

أضحك و أقول فنان ..
حلوة قوى الألوان
فيبصـلى و يســأل

إمتــه بقى نـــوصــل

و القطر بيقرَّب ..
يبعــد كدا بينــا

فأضمــه أنا جــداً ..
و أهمســله " عالجنــة "

و أشوف جمال ضحكته
فيبوسنى و يغمض ..
عامل كــدا مكسوف

فأقولــه خليك كدا ..
و بلاش للحظــة تشوف

دمك بيدفع تمن ..
إهمال و قطر و خوف

و أمــا تفتَّــح بقى
هتشوف مكان أجمل
يسبق كدا الحواديت

و أنا من هنا حسيت

بالموت و من قبلك

شايفة كمان أهلك

حاضنين كدا الكراريس
على خط قطر الموت

دمعــة ورا دمعة
نازلة كدا بتفوت
لعنــة على دا الحال

فات الطابور يبكــى
يحيكيكوا فى الموال

مشتاق لصوت ضحككوا
مشتاق للعب عيال
..........

.. وداعــاً أيها الحلم الصغير ..
((بقلبــى : آيــة خضــر))
17/11/2012

..........
كثر موتانا و لا ندرى أنحزن لرحيلِهم أم نحزن لبقائِنا فى زمن الزيف هذا
اللهم احينا مادامت الحياه خيرا لنا وامتنا اذا كان الموت خير لنا
اللهم إرحمنا و إرحم كل موتى المسلمين يارب