السلام عليكم ورحمة الله وبركاته

المنتدى واحشنى جدا رغم انى تقريبا بدخله كل يوم بس يمكن عشان بقاله فترة مافيش مشاركات زى الاول حاسة انه واحشنى .....من غير مقدمات بقى ندخل ع القصيدة


....
....
....



أنا الساكن فى أرض الله
وملامحى جاية من طينى
وبتقابل مع الايام
فى قدر مكتوب على جبينى
أنا العايش فى دنيا الزيف
تلهينى وتغرينى وتظهرلى بألوان طيف

أنا حدوتة متعادة
كما الرملاية فى الصحرا
فى زيى كتير
لكن تفاصيلى تشبهنى
وحياتى جملة مكتوبة مابين قوسين
أنا دمعة و ساكنة العين
وضحكة مرسومة على خدين
ومركب بالأمل ساير مابين شطين

أنا الحاير فى أمر زمانى وفى أمرى
مابين بكرة اللى بستناه
وبين ماضى عايزنى أنساه
لكنى ليّا فيه ذكرى
حنينى ليها بيوجعنى
واتمنى الزمن ليها يرجّعنى
لكنه ماشى بلا استئذان
أنا الثاير على الأحزان
وف أحلامى أنا عشمان
أنا البائس وانا والفرحان وانا الراسى وانا الحيران وانا الحالم وانا المهموم وانا العاقل وانا المجنون ....
خلاصة القول أنا انســــــــــــــان
....
...