دا شعر جديد و لسه مأخدتش رأى حد و بجد محتاجه نقد كويس و سريع عشان لو فيه حاجة تتظبط


........

سفينة نـــــــــــوح

....

أنا لسه ببان بهتان
بشوف الصورة مبتضحكش

و لما غابت الألوان
و شافها قلبي خاف مفرحش

أنا اللى غلطت فى العنوان
بخبط و الزمن مفتحش

أنا اللى ناديت فى عز طوفان
و كله ع الجبل مسمعش

و قاله أصله كان مجنون
و كان حالف يهد الكون
نادينا كتير و دا مرجعش

..

ف قلب سفينة التحرير
زوجين من كل شئ عندى

و أنا مملكش غير نفسى
و لجل الحق كان عِــندى

و يوم ما بَـدَأْتْ فى الرحلة
لقيت شعبك هنا جمبى

و دين لله .. وطن واحد
بننده .. قومى يا بلدى

..

رفعنا شراع بلون علمك
و نسر الحق حارسنا

و ليل الظلم مش باقى
و لينا نهار يونسنا

أنا و نيلك و طيبتك و يَّــــا صوت قلبك
و حبك هو خامسنا

على لحن الخلود نسهر
يدوب فى العشق إحساسنا

أنا حلمى أشوف لمعة ف عيون شمسك
و بسمة قلبك الصافى ترجع حلم ناقصنا

..

زمــــان ...
زمان شباكى كان مقفول
و أخاف أفتح يفكرنى بحقى إنى اشوف النور

زمــــان ...
زمان قلبى يخاف يفرح
فتتسرسب كدا ضحكة لوجدانى ..
تكون ممنوعة فى الدستور

زمــــــــان ...
زمان عايش هنا ميت
و اكسير الحياة .. ثورة ..
بتحيى قلبنا المكسور

...

رصاص الغدر أنا هآخده كدا عنك
و طولت العمر دى ليكى
خلاص زمن السكوت منفعش

أنا طالب رضا قلبك
و أبيع عمرى عشان خاطرك
و تدينى بدالة نعش

و قبل النوم ..
أنا حكيتلك على قصة
بطلها كان كدا شبهك
و قلت لقلبى ميدمعش

أنا سايبك و مش سايبك
و روحى ساكنة فى الحواديت
و بدعى حلمنا ميضعش

...........
Aya khedr
.........

Hope U LiKE iT ^_^