الحقيقه الموضوع ده انا فكرت فيه كتير اوى .. وكلنا عانينا منه تقريبا ..

بس بما انى فى الفرقه التانيه .. هخصص كلامى عنها شويه ..

احنا فى فرقتنا - الفرقه التانيه - فرقه غريبه شويه .. فرقه فيها ما يقرب من 12 طالب وطالبه آبائهم وأمهاتهم دكاتره فى الكليه .. ده طبعا غير الأقارب اللى من قريب واللى من بعيد ..

بسبب الموضوع ده اتحرمنا من دكاتره كتير .. دكتور حسن عيسى ودكتوره فاطمه النبويه .. ودكتور اسامه بشير .. ودكتور أحمد زغلول .. وغيرهم ..

بس مش دى المشكله .. لان الكليه ما شاء الله عامره بالاساتذه الافاضل ..

امال ايه المشكله .. المشكله اللى بجد هى ان دكتور يخش ويشرح جزء فى الماده .. ويكون له ابن او بنت او حتى قريب فى الدفعه .. فمش هو اللى يحط الامتحان ودكتور تانى هو اللى يحط الامتحان ..

وتبدا بقى الاقاويل تنتشر .. طيب هيعرف اللى اتشرح منين .. طيب هيجيب من امتحانات السنه اللى فاتت .. بس اللى اتشرح السنه اللى فاتت مش هو اللى اتشرح السنه دى ..
طيب هياخد تبييض محاضرات .. طيب مين اللى هيديهوله ؟؟ طيب ايه اللى ضمنا انه مظبوط ؟؟

وعلى اى حال من الاحوال .. لما بيتحط الامتحان .. بنلاقي حاجات كتير مش مظبوطه ..

ممكن العناوين الرئيسيه والاسئله المهمه اللى الدكتور - اللى شرح - ركز عليها .. متجيش .. وتلاقي الدكتور جاب سؤال اه هو فى المنهج بس ممكن يكون مجمع من كذا حته .. وسؤال ممكن متفهمش هو عاوز الاجابه عليه ازاى بالظبط ..

وده اللى حصل عندنا فى الصيدلانيات بالظبط ..
دكتوره ثناء دخلت شرحت جزء كامل بـ 30 درجه .. وفى الاخر دكتور تانى هو اللى حط الامتحان .. سواء كان دكتور جلال او دكتور حسن الصباغ مش هتفرق .. بس طبعا كلنا اتفاجئنا بسؤال effect of surfactant on drug activity .. يعني كلنا كنا مركزين على طرق قياس surface tension والاجهزه والرسومات .. وتقسيمة الـ HLB وغيره وغيره .. وطبعا السؤال اللى جه عليه 7 درجات كامله .. ومعتقدش ان فيه حد جاوب عليه اجابه كامله الا قليل ..

ممكن كمان يبقى توزيع الدرجات مختلف .. وده اللى حصل فى الميكرو .. دكتوره رشا دخلت شرحت جزء .. والمفروض زى ما اتقال كان عليه 10 درجات .. وماجاش عليه غير سؤال واحد بدرجتين تقريبا ..

ممكن اه ييجي فى نفس الاجزاء اللى اتشرحت .. بس ييجى بالفاظ مختلفه .. يعني مثلا carry = load مثلا يعني .. فبدل ما نقعد نفكر فى السؤال واجابته نفكر فى ترجمه للكلام اللى مكتوب في السؤال .. وده برضه اللى حصل فى الميكرو ..



وعشان الكلام ميبقاش يخص دفعة تانيه بس .. لا فى مادة البيو فى سنه تالته .. برضه دكتور ممدوح الششتاوى .. دخل شرح جزء .. واللى حط اسئلته دكتور تاني .. وحصل لخبطه برضه .. انا بقول الموضوع بصفه عامه .. لكن أرجو من اى زميل فى الفرقه التالته يخش يقول الموضوع بالتفصيل ..



انا عارف انه قانونا ممنوع .. طب ايه الحل ..

والله من وجهة نظري انا شايف .. ان ليه طالما الدكتور كده كده مش هيحط الامتحان .. خلاص بلاش هو يدي الفرقة من اصله ..
يعني مثلا فى الصيدلانيات .. بدل ما كانت دكتوره ثناء هى الى تشرح الجزء .. كان ممكن دكتور جلال او دكتور حسن ..
وفى الميكرو .. كان ممكن دكتور رمضان يشرح الكورس كامل .. ودكتوره رشا ودكتور وائل .. يمسكوا هما الفرقه الرابعه .. انا عارف انه هيبقى كتير على دكتور رمضان .. بس هى الظروف اللى بتجبر على كده خاصة مع قلة عدد الدكاتره فى قسم الميكرو بصورة ملحوظه .. خصوصا بعد سفر دكتور خالد حسن .. وتوفى الدكتور سامى الله يرحمه ..

لكن بجد ان دكتور يشرح جزء .. ودكتور تانى يحط الامتحان .. بتعمل مشاكل كتير جدا جدا .. للطلبه .. وبتضيع مذاكرتهم ..
واظن ده وضح اوى فى امتحان الميكرو .. واللى بيحضروا محاضرات على فكره هما اول ناس اشتكوا من الامتحان ..



اتمنى من الدكتور محمود بكره والدكتور حسن الكاشف .. ان يضعوا هذا الموضوع فى اهتمامهم .. يعلمى الكامل بحرصهم على مصلحة ابنائهم الطلاب ..


ولكم جزيل الشكر ..