جوابات فى بوسطة القلوب

[Aya Farouk]

كونى ليا ضلة تايهه
فى الصحارى المشمسات
وفى غيابى اقرأيلى
السبعة المنجيات
واما أسألك جايه امته ؟
اكدبى
وقوليلى هانت من سكات
معرفش مين فينا اللى سافر !
وانتى سايبة حاجة منك
فى كل حتة ومش لاقينى
والفراغ اللى محاوطنى والبرود
اللى هاوينى
شرطةمايلة فى الرسايل بعد اسمك
بتغاوينى
وألقى نفسى برسمك يلى صورتك
ساكنة عينى

****
كونلى ضى يملا كونى
بالدعاوى فى الغياب
كونلى كلمة صبر نورها
يمحى عجزى بروح شباب
كونلى أملى فى التواجد
جوا عصر المعجزات
خدلى أنفاسى بكلامك
جوا شِعرك وفى مَلامك
يلى روحى بتبقى تايهة
يوم ما يتغير سلامك

****
سيبى روحك تبقى تايهه
وسط مشاعرى فى الزحام
ولو لاقيتى مره قلبى
سيبى بوسه بدل السلام
وأحفرى ألف البدايه
مع كل دقة تسمعيها
وارسمى الياء يا حبيبى
وفى ضل هاء اشبُكيها
يلى إسمك ويا رسمك
كل حاجة حلمت بيها

***
زى عادتك بين سطورك
رعشة صحت جسمى كله من النعاس
وبسمه ترسم بين شفايفى
كام مدينة والحياه فيهم أساس
يا حلم ساكن كل حته فى أضلُعى
خلينى أغرق فيك يمكن أتلَقَى
وفى شطوط عينك الاقى موضِعِى
وفى بلادنا راح يكون المُلتقَى
وأرسم طريق واصل مابنا فى غُربتى
يِسرى مسرَى دم جوا الأورده

****
اشتقت ليكى يا حلم تايه
فى الدروب المُبعِدات
يا جامعة بين حِلوك ومرك
اد ما فى ديانات الهند تناقضات
يا فكرة شاردة
فى عقلى واجدة
مليون وجع وتساؤلات
بالله عليكى .. عِيديلى تانى
وقوليلى هانت من سكاااات

آيــه فاروق ♥

[A.Elrayes]

هاااااااااااااااااااااانت يا دكتورة ايه
راااااااااااااااااااااااااااااااااااائعة بجد
بالرغم من اني بزهق من الحاجات الطويله الا اني كملتها للآخر من جمالها

[E.Raafat]

جميلة جدا و صورة محمد منير لوحدها قالت بما فيه الكفاية ,,, دمت مبدعة متألقة في سماء المنتدى و يارب تتواجدي دايما ومتحرمناش من الابداعات الجميلة دي

[امانى*]

رائعه يا دوك آية بجد

[rose smile]

طبعا بعد كل المدح اللى اتمدحتيه فوق ده لازم حد يعكنن عليكى الا تفكرى نفسك موهوبه
عل فكره بقى مش حلوه
هى حلوى اوى
وعلى فكره كمان مش بترن فى ودانى
لكن بتمتعنى جدا
ويلا كفايه كدا

[Aya Farouk]

هاااااااااااااااااااااانت يا دكتورة ايه
راااااااااااااااااااااااااااااااااااائعة بجد
بالرغم من اني بزهق من الحاجات الطويله الا اني كملتها للآخر من جمالها

دا كويس جداً بس دى متعتبرش كبيرة انت مقرأتش قلبى وقلبك والأغانى وحبة ورق بقا
او حدوتة مصرية
بس اشطه .. كويس انها عجبتك انا مبسوطة ^_^

جميلة جدا و صورة محمد منير لوحدها قالت بما فيه الكفاية ,,, دمت مبدعة متألقة في سماء المنتدى و يارب تتواجدي دايما ومتحرمناش من الابداعات الجميلة دي

اه الصورة جت صدفه كدا متشكرة جداً يا دوكتر ابراهيم

رائعه يا دوك آية بجد

ميرسى جداً يا أمانى

طبعا بعد كل المدح اللى اتمدحتيه فوق ده لازم حد يعكنن عليكى الا تفكرى نفسك موهوبه
عل فكره بقى مش حلوه
هى حلوى اوى
وعلى فكره كمان مش بترن فى ودانى
لكن بتمتعنى جدا
ويلا كفايه كدا

أ به ؟ حبيبى يا أموله
تسلميلى يا رخمه يا حبى

[Dr_Cinderellaaaaa]

ايه الجمال ده كله
من يومك وانت كبير والله
عجبتنى أوى يا آية
كلها على بعضها حلوة
تسلم ايديكِ يا جميلة

[M.Hegazy]

من أجمل ما قرأت ..

كلمات ملهاش حل ،، و تعبيرات و تشبيهات مشكلة ..

و الأكبر و الأكتر الإحساس فيها عالي قوي ..

تسلم الأيادي .. و يا ريت تنورينا دايما كده يا دوك بالحاجات الجميلة دي ..

5 نجوم أقل واجب طبعا ..

[Aya Farouk]

ايه الجمال ده كله
من يومك وانت كبير والله
عجبتنى أوى يا آية
كلها على بعضها حلوة
تسلم ايديكِ يا جميلة

حبيبتى يا سرسوره ♥ تسلميلى يارب

من أجمل ما قرأت ..

كلمات ملهاش حل ،، و تعبيرات و تشبيهات مشكلة ..

و الأكبر و الأكتر الإحساس فيها عالي قوي ..

تسلم الأيادي .. و يا ريت تنورينا دايما كده يا دوك بالحاجات الجميلة دي ..

5 نجوم أقل واجب طبعا ..

دا شرف ليا كلام حضرتك دا على فكرة !
وأنت عارف ان مفيش موضوع بيكتمل ليا إلا بتعليقك كدا انا مرتاحة

ميرسى جداً ♥

[same7]

الناس كلها بتشكر وانا هشكر برده

بس عندى تعليق صغير
فى اخر جزئين
الرومانسيه شكلها اتغير
وبقت تقيله مش زى اللى فى الاول
وقلت حبه
ده اللى حسيته
اكدب يعنى
احساسى وانا حر فيه




بس تحفه وجميله جدا يا د. ايه
بالتوفيق دايما